Repaso sa Teokratikong Eskwelahan para sa Ministeryo
Ang masunod nga mga pamangkot binagbinagon sa Teokratikong Eskwelahan Para sa Ministeryo sa semana sugod sa Pebrero 23, 2004. Dumalahan sang manugtatap sang eskwelahan ang 30-minutos nga repaso pasad sa materyal nga gintuptupan sa mga asaynment para sa mga semana sang Enero 5 tubtob Pebrero 23, 2004. [Patalupangod: Kon wala sing mga reperensia pagkatapos sang pamangkot, kinahanglan nga ikaw ang magpanalawsaw agod masapwan mo ang mga sabat.—Tan-awa ang Eskwelahan Para sa Ministeryo, p. 36-7.]
MGA KALIDAD SA PAGHAMBAL
1. Ano ang aton mahimo agod mapat-od nga ang praktikal nga kapuslanan sang materyal nga ginapresentar maathag sa aton mga tagpalamati kag makabenepisyo gid sila sa sini? [be p. 158 par. 2-4] (1) Mapresentar naton ang materyal sa paagi nga nagadalahig sa aton mga tagpalamati sa umpisa pa lang sang pamulongpulong. (2) Ang praktikal nga aplikasyon sang materyal dapat isulusal-ot sa bug-os nga pamulongpulong, indi lamang sa pila ka malip-ot nga mga pinamulong sa aton konklusion. (3) Ang pag-aplikar sang materyal dapat himuon sa paagi nga makapalig-on sa aton mga tagpalamati kag ‘makapukaw sang gugma kag sang maayong mga buhat.’—Heb. 10:24.
2. Ngaa dapat naton pilion sing maayo ang aton mga tinaga? [be p. 160 par. 1 kag ikaduha nga kahon] Ang mga tinaga gamhanan kag sarang makasakit ukon makapalig-on. (Hulu. 12:18, 25) Bangod ang ginapili naton nga mga tinaga sarang makaimpluwensia sa reaksion sang iban sa aton ginasiling, dapat kabalak-an naton ang pagpili sing “kalahamut-an nga mga pulong.”—Manugw. 12:10.
3. Anong sadsaran nga kinahanglanon sa maayo nga paghambal ang ginapadaku sa 1 Corinto 14:9, kag paano naton maaplikar ining prinsipio sa aton pagpanudlo? [be p. 161 par. 1-4] Dapat madali mahangpan sang aton mga tagpalamati ang aton ginahambal. Ang simple kag ginpili sing maayo nga mga tinaga, malip-ot nga mga prase, kag malip-ot nga mga dinalan epektibo gid kag madali mahangpan. Kon nagagamit kita sing mga tinaga nga madali mahangpan, nagapakita kita sing pasunaid sa aton mga tagpalamati kag ginapahapos naton para sa ila nga madumduman ang aton ginasiling.
4. Subong sang makita sa Mateo 5:3-12 kag Marcos 10:17-21, ano ang isa sang talalupangdon nga estilo sang panudlo ni Jesus nga sarang naton mailog? [be p. 162 par. 4] Simple ang panudlo ni Jesus. Sarang naton mailog ang Dakung Manunudlo paagi sa paghambal sing simple. Ang aton pinamulong dapat magpaathag sing ideya, indi magpaburon sa sini. Ang indi paggamit sing madamo katama nga mga tinaga nagapahapos sa iban nga mahangpan kag madumduman ang sibu nga ihibalo.
5. Sa aton ministeryo ukon kon nagakomento sa mga miting sa kongregasyon, ngaa dapat kita mangin interesado sa paggamit sing mga tinaga nga nagapaalinton sang kapagsik, balatyagon, kag kaathag sang pinamulong? (Mat. 23:37, 38) [be p. 163 par. 3–p. 164 par. 1] Ang mga tinaga nga maathag nga nagapaalinton sing mga ideya kag mga impresyon sa hunahuna nagabulig agod mawili ang mga tagpalamati sa aton ginasiling, ginahimo nga buhi ang mga butang sa ila. Ang ginpili sing maayo nga mga tinaga sarang makalab-ot sang mga tagipusuon, makapukaw sing paglaum, makapalig-on sa mga nasubuan, kag makapahulag nga higugmaon ang Manunuga.
ASAYNMENT NUM. 1
6. Ano ang tema sang pamulongpulong, kag paano ang pagdumdom sini mangin epektibo kon nagapili kag nagaorganisar sang materyal para sa isa ka pamulongpulong? [be p. 39 par. 6–p. 40 par. 1] Ang tema sang pamulongpulong indi ang kabilugan nga topiko, kundi sa baylo, amo ang panguna nga ideya ukon espesipiko nga bahin sang topiko nga pagahinun-anunan. Ang pag-analisar sang makahulugan nga mga tinaga sa tema kag ang pagpanalawsaw sa mga publikasyon samtang ginahunahuna ang tema makabulig sa aton nga maorganisar ang materyal samtang ginahunahuna ang aton tulumuron.
7. (a) Ano ang buot silingon nga mangin matinlo sa espirituwal, kag ngaa ang espirituwal nga katinlo makabig nga amo ang labing importante nga katinlo sa tanan? Ang katinlo sa espirituwal nagakahulugan sang paghupot sing matuod nga pagsimba kag pagpabilin nga napain gikan sa butig nga pagsimba, nga wala nagapakigbahin ukon nagasimpon sini sa matuod nga pagsimba. Nadalahig sa paghupot sang espirituwal nga katinlo ang aton paglaum nga kabuhi nga wala sing katapusan. (2 Cor. 6:17; Bug. 18:4) (b) Paano malikawan sang mga Cristiano ang di-matinlo nga moralidad nga kinaandan sa kalibutan karon? [w02 2/1 p. 5-6] Ang pagkadimatinlo sa moral mahimo makita sa ginapili nga kalingawan kag panapton sang isa. Dapat likawan sang mga Cristiano ang kalingawan nga nagapadaku sang mga paggawi nga nagalapas sa mga talaksan sang Biblia sa moral. Dapat man likawan sang mga Cristiano ang pagsuksok sing mga panapton nga nagapahunol sa lawas, kundi sa baylo dapat sila magpanapot sing maugdang.
8. Sa mga prinsipio nga yara sa Biblia, ano ang mga mas mabug-at? [w02 2/15 p. 5 par. 1, 4, 6] Ang yabi nga mga prinsipio sa Kasulatan amo ang may direkta nga kahilabtanan sa aton kaangtanan kay Jehova. Ang isa sang labing importante nga mga kamatuoran sa Biblia amo nga si Jehova ang aton Manunuga, ang Dios nga Labing Gamhanan, ang Labing Mataas. (Sal. 83:18) Dapat sia ang nagapanguna nga impluwensia sa aton kabuhi.—1 Cor. 10:31.
9. Ano ang empatiya, kag paano ginpakita ni Jesus ini nga kinaiya? [w02 4/15 p. 25 par. 4-5] Ang empatiya nagalakip sa pagbatyag naton sang kasakit sang isa ka tawo. Sang gin-ayo ni Jesucristo ang isa ka bungol kag apa nga tawo, ginhimo ini sing pribado, ayhan agod indi sia mahuya ukon makibot. (Mar. 7:32-35) Nabatyagan ang kasakit sang balo nga buot maglubong sang iya bugtong nga anak nga lalaki, gingamit ni Jesus ang iya gahom suno sa kabubut-on sang Dios kag ginbanhaw ang lamharon nga lalaki. (Luc. 7:11-16) Sa karon, subong ang Mataas nga Saserdote, nagasimpatiya si Jesus sa aton mga kaluyahon.—Heb. 4:15.
10. Paano ang Hulubaton 11:11 naaplikar sa mga kongregasyon sang katawhan ni Jehova? [w02 5/15 p. 27 par. 1-3] Ginapakamaayo ni Jehova ang tulad banwa nga mga kongregasyon nga naimpluwensiahan sang espirituwal nga mga tawo kag nagapadungog sa iya. Sa amo, indi kita dapat magpamati sa negatibo kag mapasipalahon nga hambalanon, nga ginatunaan sang pagluya, sa baylo tinguhaan naton nga palig-unon ang paghidait kag huptan ang aton integridad.
SEMANAL NGA PAGBASA SA BIBLIA
11. Ano ang ginarepresentar sang “kahoy sang kabuhi” nga ginsambit sa Genesis 2:9? Ang kahoy nagarepresentar sang garantiya sang Dios nga kabuhi nga wala sing katapusan sa isa nga tugutan sa pagkaon sang bunga sini. Sa amo, pagkatapos nga magpakasala sanday Adan kag Eva, kinahanglan nga palayason sila sa Eden kag indi na pagpasudlon liwat sa hardin.—Gen. 3:22-24. [1, it-2 p. 247 par. 4; w99 4/15 p. 7-8]
12. Ngaa napatay ang asawa ni Lot? (Gen. 19:26) [w90 4/15 p. 18 par. 10] Maathag nga mas mabakod ang iya gugma sa iya puluy-an kag materyal nga mga pagkabutang sa Sodoma sangsa gugma niya sa Dios.—Luc. 17:31, 32.
13. Sa matagnaon nga drama sa Genesis kapitulo 24, sin-o ang ginalaragway (a) ni Abraham, (b) ni Isaac, (c) sang alagad nga lalaki ni Abraham nga si Eliezer, (d) sang napulo ka kamelyo, kag (e) ni Rebeca? (a) Si Abraham nagalaragway kay Jehova; (b) si Isaac nagalaragway sa Kordero sang Dios, si Cristo Jesus; (c) si Eliezer nagalaragway sa balaan nga espiritu; (d) ang napulo ka kamelyo nagalaragway sa kompleto kag himpit nga Pulong sang Dios; kag (e) si Rebeca nagalaragway sa asawa sang Kordero, ang katapo sang nobya nga klase, nga nagadamo sing 144,000. [5, w89 7/1 p. 27-8]
14. Gintalana bala nga daan sang Dios sanday Jacob kag Esau? (Gen. 25:23) Sarang mabasa ni Jehova ang genetiko nga sulundan sang wala pa mabun-ag nga kapid. Mahimo nga ginbinagbinag niya ini sang gintagna niya ang mga kinaiya sang tagsa ka bata nga lalaki nga mapalambo nila sa ulihi. (Sal. 139:16) Apang wala sing patimaan nga ginpat-od na niya ang ila dayon nga palaabuton ukon nga gintalana niya ang tanan nga matabo sa ila kabuhi. [6, rs p. 142 par. 4]
15. Sa anong paagi nga nangin maayo nga halimbawa si Raquel subong isa nga ginpakamaayo ni Jehova bangod nagpanikasog gid? (Gen. 30:1-8) [w02 8/1 p. 29-30] Ginpakabahandi ni Raquel ang iya palanublion. Nahibaluan gid niya ang saad ni Jehova nga pakamaayuhon si Jacob. Ang iya utod nga si Lea, ang una nga asawa ni Jacob, ginpakamaayo paagi sa apat ka anak nga lalaki samtang si Raquel baw-as gihapon. (Gen. 29:31-35) Sa baylo nga magpadaug sa kaluoy sa kaugalingon, padayon sia nga nakiluoy kay Jehova paagi sa pangamuyo kag nagbuhat sing positibo nga tikang nga nahisuno sa kabubut-on sang Dios kag suno sa iya mga pangamuyo.