Maggawi Subong mga Maalam
1 Sang gin-agda ni Jesus ang apat ka mangingisda nga mangin mga sumulunod niya, wala na nila ginpaiway ang ila desisyon kundi “sa gilayon . . . nagsonod [sila] sa iya.” (Mat. 4:18-22) Sang nakumbertir kag naulian ang panulok ni Saulo sang Tarso, wala na sia nagpabuyanbuyan pa kundi “sa gilayon ginbantala niya sa mga sinagoga si Jesus.” (Binu. 9:20) Ang tion madasig nga nagalipas; kon maglipas ini, indi na ini mabalik. Amo kon ngaa importante nga ‘maggawi kita subong mga maalam’ kon tuhoy sa paggamit sang aton tion.—Efe. 5:15, 16.
2 Wala Ginapaabot nga Hitabo: Ang aton kahigayunan nga maalagad si Jehova karon nga adlaw mahimo nga wala na buas. (Sant. 4:14) Wala sing makalikaw sa “wala ginapaabot nga hitabo.” (Man. 9:11, NW) Dugang pa, nagatigulang kita tanan, kag ang “malaut nga mga adlaw” nga nadalahig sa pagtigulang kag nagalimite sang aton masarangan sa pag-alagad kay Jehova indi malikawan sa sining sistema sang mga butang. (Man. 12:1) Busa, indi gid maalamon nga magpabuyanbuyan kita sa pagdedikar kay Jehova ukon maghulat sing pinakapaborable nga mga kahimtangan agod pasangkaron ang aton ministeryo tubtob sa aton masarangan. (Luc. 9:59-62) Nakasapo si Abraham sing paghidait kag kalinong sa iya katigulangon, napatay sia nga “tigulang na kag busug sang pagkabuhi” bangod gingamit niya ang iya kabuhi sing maalamon, nga bug-os nga ginhinguyang sa pag-alagad kay Jehova.—Gen. 25:8.
3 Ang Tion Ginpalip-ot: Luyag man naton gamiton ang aton tion sing maalamon bangod “ang tion . . . ginpalip-ot.” (1 Cor. 7:29-31) Sa indi madugay laglagon na ining daan nga sistema sang mga butang. Ang kahigayunan sa pagpakigbahin sa dakung pagpanipon sa tulad-karnero nga mga tawo sa tion sang “pag-ani” sa duta matapos na sa ulihi. (Bug. 14:15) Dapat kita maghalong agod indi matugutan ang mga kabalaka kag mga tublag sa kabuhi nga mag-ubos sang aton tion nga ginahinguyang sa ministeryo. (Luc. 21:34, 35) Daw ano gid kita ka malipayon sa paghinumdom kay nakahibalo kita nga nagpakigbahin kita sing bug-os sa pagpangani!
4 Dapat mangin alisto kita pirme agod indi naton mawasi ang makalilipay nga mga pribilehiyo sa pag-alagad nga mahimo matigayon naton. Busa, mangin determinado gid kita karon nga himuon ang bug-os naton nga masarangan sa pag-alagad kay Jehova samtang may kahigayunan pa kita. (Heb. 3:13) Sa paghimo sini, mapakita naton nga maalam kita, bangod “ang nagahimo sang kabubut-on sang Dios nagapadayon sa gihapon.”—1 Juan 2:17.