Pangitaa ang mga Takus
1. Paano naton mapakita nga ginaapresyar naton ang pribilehiyo nga pagministeryo?
1 Sa tion sang ministeryo ni Jesus gintinguhaan gid niya nga lugpayan ang mga mahagop sang maayong balita. (Isa. 61:1, 2) Subong mga embahador kag kabulig sang mga embahador nga salili kay Cristo, may hamili kita nga pribilehiyo sa pag-ilog sa iya sa aton wala untat kag maid-id nga pagpangita sa mga takus sa aton teritoryo.—Mat. 10:11; 2 Cor. 5:20.
2. Paano ginpakita ni Pablo ang iya pagkamapasibusibuon, kag ano ang resulta sini?
2 Mangin Mapasibusibuon: Kinabatasan na ni apostol Pablo nga magkadto anay sa sinagoga agod bantalaan ang mga Judiyo kag mga proselita. (Binu. 14:1) Sa Filipos, ginpangita nila ni Silas ang mga tawo sa ‘ginhunahuna nila nga mga duog nga palangamuyuan.’ Ginbantalaan nila ang isa ka grupo sang mga babayi, kag ang isa sa ila amo si Lidia, nga nagbaton gilayon sang kamatuoran.—Binu. 16:12-15.
3. Anong iban pa nga kahigayunan sa pag-alagad ang aton mahimo luwas sa pagpamalaybalay sa aton teritoryo?
3 Luwas sa imo pagpamalaybalay, mahimo ka man bala makabantala sa mga terminal, mga parke, mga opisina, madamo sing tawo nga mga kalye, mga tiendahan, kag mga shopping center sa inyo teritoryo? Ayhan mahimo ka makabantala sa mga housing village kag sa guardiado nga mga apartment paagi sa sulat ukon telepono. Paagi sa pag-obserbar kag pagpasibu sa nanuhaytuhay nga kahimtangan sa inyo teritoryo, mangin madamo ka pirme sing “ginahimo sa hilikuton sang Ginuo.”—1 Cor. 15:58.
4. Ano ang mahimo naton kon diutay lang ang teritoryo sang aton kongregasyon?
4 Madamo nga manugbantala ang nakahigayon sa pagpasangkad sang ila ministeryo paagi sa pagsaylo sa iban nga kongregasyon, ayhan sa ila nga lugar ukon sa iban nga pungsod. Ang iban nagtuon sang iban nga lenguahe agod makabantala sa mga tawo nga naghalin sa iban nga pungsod.
5. Paano naton dapat tamdon ang aton tion, kag ano ang aton determinado nga himuon?
5 Dumdumon naton nga ang “uma amo ang kalibutan.” (Mat. 9:37; 13:38) Bangod malapit na lang ang katapusan sining malaut nga kalibutan, kinahanglan naton tanan nga usisaon sing maayo ang aton kahimtangan, ikasarang, kahigayunan, kag mga posibilidad nga mapasangkad ang aton ministeryo. Ginapasalig kita ni Jehova nga kon unahon naton ang intereses sang Ginharian, pakamaayuhon niya ang aton hanuot nga panikasog nga pasangkaron ang aton ministeryo.—Mat. 6:33.