Mainandamon Ka Bala?
SA PAGTANGDO sang mga hukom sa Israel, gintinguhaan ni Moises nga pangitaon ang “maalam kag mainandamon kag eksperiensiado nga mga lalaki.” (Deuteronomio 1:13) Ang eksperiensia, nga nagaupod sa edad, indi lamang amo ang talaksan. Importante man ang kaalam kag pagkamainandamon.
Ang tawo nga mainandamon nagapakita sing maayo nga paghantop sa paghambal kag sa paggawi. Suno sa Webster’s Ninth New Collegiate Dictionary, ang mainandamon nga tawo “makasarang [man] sa paghipos sing maalamon.” Huo, may “tion sa paghambal,” kag may “tion sa paghipos,” kag nahangpan sang mainandamon nga tawo ang kinatuhayan. (Manugwali 3:7) Sa masami, may maayo nga rason sa paghipos, kay ang Biblia nagasiling: “Sa kabuganaan sang mga pulong wala ginakulangi sing paglapas, apang ang nagapugong sang iya mga bibig nagapanghikot sing mainandamon.”—Hulubaton 10:19.
Ang mga Cristiano nagahalong nga mangin mainandamon sa pagpakig-angot nila sa isa kag isa. Ang isa nga nagahambal sing masunson gid ukon sing mabaskog gid indi pirme ang isa nga labing importante ukon labing kinahanglanon gid. Dumduma, si Moises “gamhanan sa iya mga pulong,” apang wala niya mapangunahan sing epektibo ang pungsod sang Israel tubtob napalambo niya ang pagpailob, pagkamapainubuson, kag pagpugong sa kaugalingon. (Binuhatan 7:22) Busa, yadtong gintugyanan sing awtoridad sa ibabaw sang iban dapat ilabi na nga manikasog nga mangin mapainubuson kag magpakita sing pagkamakatarunganon.—Hulubaton 11:2.
Yadtong gintugyanan ni Jesucristo sang “tanan niya nga pagkabutang” amo ang ginlaragway sang Pulong sang Dios subong “matutom kag mainandamon.” (Mateo 24:45-47) Wala nila matinaastaason nga ginaunahan si Jehova sing makahason; ukon nagapabuyanbuyan sila kon ang panuytoy sang Dios sa isa ka butang maathag. Nahibaluan nila kon san-o ang tion sa paghambal kag kon san-o ang tion sa paghulat sing mahipos para sa dugang nga kaathagan. Mas maayo nga indi lamang ilugon sang tanan nga Cristiano ang ila pagtuo kundi pamatud-an man ang ila kaugalingon nga mainandamon, subong sang ginahimo sang ulipon nga klase.—Hebreo 13:7.