Ang Pagtamod sang Biblia

Ano ang Buot Silingon sang Pagtaya sang Pihak nga Guya?

SA IYA bantog nga Sermon sa Bukid, nagsiling si Jesucristo: “Indi pagbalusi ang malauton; kundi bisan sin-o man ang magtampa sa imo sa tuo nga guya, itaya man ang pihak sa iya.”—Mateo 5:39.

Buot bala niya silingon nga indi na pagpangapinan sang mga Cristiano ang ila kaugalingon? Kon himuan sila sing malain, mapabaya na lang bala ang mga Cristiano kag indi na mangayo sing bulig sa mga awtoridad?

Ano ang Buot Silingon ni Jesus?

Para maintiendihan naton kon ano ang buot silingon ni Jesus, dapat binagbinagon naton ang konteksto sang iya ginsiling kag kon sin-o ang iya ginahambalan. Ginbase ni Jesus ang iya laygay sa kon ano na ang nahibaluan sang iya mga tagpalamati sa Balaan nga Kasulatan. Nagsiling sia: “Nabatian ninyo nga ginsiling, ‘Mata sa mata kag ngipon sa ngipon.’”—Mateo 5:38.

Ang ginpatuhuyan diri ni Jesus mabasa sa Exodo 21:24 kag Levitico 24:20. Talalupangdon nga suno sa Kasuguan sang Dios, ang silot nga “mata sa mata” nga ginsambit sa sini nga mga teksto, ipatuman lang sing nagakaigo pagkatapos nga mapamatbatan sang mga saserdote kag hukom ang isa nga nakasala. Usisaon anay nila ang mga sirkunstansia kon bala ginhungod ini ukon wala.—Deuteronomio 19:15-21.

Pero sang ulihi, ginpatiko sang mga Judiyo ang pagsunod sa sini nga sugo. Ang isa ka komentaryo sa Biblia sang ika-19 nga siglo ni Adam Clarke nagsiling: “Ini nga sugo [mata sa mata, unto sa unto] daw gingamit sang mga Judiyo nga rason para magdumot kag magbalos sa mga nakasala sa ila. Masami nga sobra pa sa ginhimo sa ila ang ila ginabalos.” Pero, wala gid ginatugutan sang Kasulatan ang pagbalos.

Ang gintudlo ni Jesus sa iya Sermon sa Bukid nga ‘itaya ang pihak nga guya’ nagahisanto sa matuod nga kahulugan sang Kasuguan sang Dios sa Israel. Wala ginapahangop ni Jesus nga kon tampaon ang iya mga disipulo sa pihak nga guya, literal nga itaya pa gid nila ang pihak. Halin sang panahon sang Biblia asta subong, ang pagtampa wala ginahimo para halitan ang isa kundi para garitgariton sia nga magbalos.

Gani, ang buot silingon ni Jesus nga kon may nagagaritgarit sa imo nga mag-inaway kamo, halimbawa gintampa ka niya ukon gin-insulto, dapat likawan mo nga magbalos. Kon indi ka magbalos, malikawan ang pagbaslanay.—Roma 12:17.

Ang ginsiling ni Jesus pareho gid sa ginsiling ni Solomon: “Dili ka magsiling, ‘Himoon ko sa iya ang subong sang ginhimo niya sa akon; magabalus ako sa tawo sono sa iya binuhatan.’” (Hulubaton 24:29) Mapakita sang isa ka sumulunod ni Jesus nga ginataya niya ang iya pihak nga guya kon indi niya pagsapakon ang ‘pagpanghangkat’ sang iban sa iya.—Galacia 5:26, Ang Biblia.

Puede Bala Naton Depensahan ang Aton Kaugalingon?

Ang pagtaya sang pihak nga guya wala nagakahulugan nga indi na pagdepensahan sang isa ka Cristiano ang iya kaugalingon. Indi amo sini ang buot silingon ni Jesus, kundi dapat likawan naton nga mairitar kag magbalos. Maalamon nga maglikaw, pero kon biktima kita sang isa ka krimen dapat mangita kita sing paagi para pangapinan ang aton kaugalingon kag mangayo sing bulig sa mga pulis.

Amo sini ang ginhimo sang mga sumulunod ni Jesus sang una. Halimbawa, nangayo si Pablo sing bulig sa mga awtoridad para pangapinan ang iya legal nga kinamatarong sa pagwali nga ginsugo ni Jesus sa iya mga sumulunod. (Mateo 28:19, 20) Sang magwali sia kag ang iya kaupod nga misyonero nga si Silas sa siudad sang Filipos, gin-aresto sila sang awtoridad kag ginpasibangdan nga nagalapas sa kasuguan.

Ginbunal sila kag ginpriso bisan wala pa sila nadala sa korte. Sang nakakita si Pablo sing kahigayunan, gingamit niya ang iya kinamatarong subong isa ka Romano. Sang nahibaluan ini sang mga ara sa awtoridad, hinadlukan sila. Gani ginpangabay nila sanday Pablo kag Silas nga magbiya kag indi na magpagamo. Nagpakita si Pablo sing halimbawa “sa pagpangapin kag sa legal nga pagpamatuod sa maayong balita.”—Binuhatan 16:19-24, 35-40; Filipos 1:7.

Pareho kay Pablo, sulitsulit man nga ginapangapinan sang mga Saksi ni Jehova ang ila kinamatarong sa mga korte para makapadayon sa ila pag-alagad sa Dios. Amo sini ang ila ginahimo bisan sa mga lugar nga may kahilwayan sa pag-alagad. Kon biktima naman sila sing krimen, ginapangapinan sang mga Saksi ni Jehova ang ila legal nga kinamatarong paagi sa pagpasaka sing kaso.

Gani subong mga Cristiano, ginatinguhaan nila nga matigayon ang ila legal nga kinamatarong bisan pa nakahibalo sila nga limitado lang ang mahimo sini. Kaangay ni Jesus ginatugyan na lang nila ang tanan sa Dios kay nagasalig sila nga nahibaluan Niya ang tanan nga nagakatabo. Kag bangod perpekto ang hustisya sang Dios, silutan niya ang mga nakasala. (Mateo 26:51-53; Judas 9) Ginadumdom man sang matuod nga mga Cristiano nga si Jehova ang magatimalos.—Roma 12:17-19.

NAMANGKOT KA BALA?

● Ano ang dapat likawan sang mga Cristiano?—Roma 12:17.

● Wala bala ginatugutan sang Biblia nga magpabulig kita sa mga hukmanan para pangapinan ang aton kinamatarong?—Filipos 1:7.

● Ngaa nagasalig si Jesus sa iya Amay?—Mateo 26:51-53.