Makapalig-on kag Positibo

ANG mensahe nga ginsugo sa aton nga ibantala isa ka maayong balita. Si Jesus nagsiling: “Sa tanan nga kapungsuran ang maayong balita dapat anay ibantala.” (Mar. 13:10) Si Jesus mismo nagpahamtang sing halimbawa paagi sa pagpadaku sa “maayong balita sang ginharian sang Dios.” (Luc. 4:43) Ang ginbantala sang mga apostoles ginlaragway man subong “ang maayong balita sang Dios” kag “ang maayong balita tuhoy kay Cristo.” (1 Tes. 2:2; 2 Cor. 2:12) Ini nga mensahe makapalig-on kag positibo.

Nahisuno sa ginabantala nga “maayong balita nga dayon” sang “anghel nga nagalupad sa tunga sang langit,” ginapalig-on naton ang mga tawo: “Kahadluki ninyo ang Dios kag hatagi sia sing himaya.” (Bug. 14:​6, 7) Ginasugiran naton ang mga tawo bisan diin tuhoy sa matuod nga Dios, ang iya ngalan, ang iya dalayawon nga mga kinaiya, ang iya makatilingala nga mga binuhatan, ang iya mahigugmaon nga katuyuan, ang aton salabton sa iya, kag kon ano ang ginapatuman niya sa aton. Ang maayong balita nagalakip sa katunayan nga laglagon ni Jehova nga Dios ang mga malauton, nga nagapakahuya sa iya kag nagaguba sing kabuhi sang iban nga tawo. Apang wala kita sing kinamatarong nga hukman ang mga indibiduwal nga aton ginabantalaan. Ang aton hanuot nga handum amo nga madamo tubtob posible ang magasabat sing paborable sa mensahe sang Biblia agod mangin matuod gid ini nga maayong balita para sa ila.​—Hulu. 2:20-22; Juan 5:22.

Limitehi ang Negatibo nga mga Topiko. Sa pagkamatuod, may mga negatibo nga mga bahin sang kabuhi. Wala naton ini ginapabulagbulagan. Sa pagsugod sang paghambalanay, mahimo ka magpautwas sing isa ka problema nga ginahunahuna sang mga yara sa inyo teritoryo kag hambalan ini sing malip-ot. Apang diutay lamang ang benepisyo sini kon hambalan ini sing madugay. Pirme makabati ang mga tawo sing makahalanusbo nga mga balita, busa ang paghambal tuhoy sa makapasubo nga mga butang mahimo bangdan nga takpan nila ang ila mga ganhaan ukon ang ila mga palamatin-an. Sa una pa lang nga bahin sang inyo paghambalanay, panikasugi nga ipatuhoy ang atension sa makapaumpaw nga mga kamatuoran sa Pulong sang Dios. (Bug. 22:17) Nian, bisan indi luyag sang tawo nga padayunon ang paghambalanay, may mabilin ka sa iya nga makapalig-on nga butang nga hunahunaon. Mahimo ini makapahulag sa iya nga mamati sa masunod nga higayon.

Sing kaanggid, kon ginaagda ka nga magpamulongpulong, indi pagpatam-i sing negatibo nga impormasyon ang imo mga tagpalamati bangod lamang may yara madamo sini. Kon magpadugay ang humalambal sa kapaslawan sang tawhanon nga mga manuggahom, sa mga report sang krimen kag kasingki, kag sa makapakibot nga paglapnag sang imoralidad, ang epekto mahimo nga makapasubo. Ilakip lamang ang negatibo nga bahin sang topiko kon may mapuslanon ini nga katuyuan. Ang limitado nga kadamuon sini nga materyal mahimo magpadaku sang pagkasibu sang imo pamulongpulong. Mahimo man ini magpakilala sang panguna nga mga rason nga nagaamot sa isa ka kahimtangan kag sa amo magamit sa pagpakita kon ngaa ang solusyon nga ginapakita sang Biblia praktikal. Kon posible, mangin espesipiko apang wala nagapadugay sa mga problema.

Masami nga indi posible ni maayo nga dulaon ang tanan nga negatibo nga materyal sa imo pamulongpulong. Ang hangkat amo ang pagpresentar sing kombinasyon sang positibo kag negatibo sa paagi nga ang kabug-usan sini nga epekto mangin positibo. Agod mahimo ini, dapat hibaluon mo kon ano ang ilakip, kon ano ang indi dapat ilakip, kag kon diin ibutang ang empasis. Sa Sermon sa Bukid, ginlaygayan ni Jesus ang iya mga tagpalamati nga likawan ang maiyaiyahon nga mga dalanon sang mga escriba kag mga Fariseo, kag nagsambit sia sing pila ka halimbawa agod iilustrar ang punto. (Mat. 6:​1, 2, 5, 16) Apang, sa baylo nga binagbinagon sing malawig ang negatibo nga mga halimbawa sining relihiosong mga lider, ginpadaku ni Jesus ang paghangop sa matuod nga mga dalanon sang Dios kag ang pagkabuhi suno sa sini. (Mat. 6:​3, 4, 6-​15, 17-​34) Ang epekto positibo gid.

Hupti nga Positibo ang Pagpamulongpulong. Kon gin-asayn ka sa pagpamulongpulong sa inyo kongregasyon tuhoy sa pila ka bahin sang Cristianong hilikuton, panikasugi nga mangin makapalig-on sa baylo nga mamulayon. Pat-ura nga ginahimo mo ang ginapalig-on mo nga himuon sang iban. (Roma 2:​21, 22; Heb. 13:7) Tuguti nga ang gugma, indi ang kaugot, ang magapahulag sang imo isiling. (2 Cor. 2:4) Kon may pagsalig ka nga luyag sang imo mga masigkatumuluo nga pahamut-an si Jehova, ang imo ginasiling magapabanaag sini nga pagsalig, kag may maayo ini nga epekto. Talupangda kon paano ginpabutyag ni apostol Pablo ina nga pagsalig, subong sang ginsulat sa 1 Tesalonica 4:​1-​12; 2 Tesalonica 3:​4, 5; kag Filemon 4, 8-​14, 21.

Kon kaisa kinahanglan nga magpaandam ang mga gulang tuhoy sa indi maalamon nga pagginawi. Apang ang pagkamapainubuson makabulig sa ila nga pakig-angutan ang ila mga utod sa espiritu sang pagkalulo. (Gal. 6:1) Ang paagi sang paghambal sina nga mga butang dapat magpakita nga ang mga yara sa kongregasyon ginatahod. (1 Ped. 5:​2, 3) Ang Biblia nagalaygay sa lamharon nga mga lalaki nga dapat nahibaluan gid nila ini. (1 Tim. 4:​12; 5:​1, 2; 1 Ped. 5:5) Kon kinahanglan ang pagsabdong, pagdisiplina, pagtadlong sa mga butang, dapat himuon ini suno sa ginasiling mismo sang Biblia. (2 Tim. 3:16) Ang pag-aplikar sing Kasulatan indi dapat pag-ipilit ukon patikuon agod sakdagon ang pila ka ideya nga tuhoy sini ang humalambal may mabaskog nga pagtamod. Bisan pa kinahanglan ang nagatadlong nga laygay, ang paagi sang pagpamulongpulong mahuptan nga positibo kon panguna nga ginahatagan sing empasis ang kon paano malikawan nga madalahig sa paghimo sing sayop, kon paano lubaron ang mga problema, kon paano landason ang mga kabudlayan, kon paano tadlungon ang sayop nga dalanon, kag kon paano kita maamligan sang mga ginapatuman ni Jehova.​—Sal. 119:​1, 9-16.

Kon nagahanda sang imo pamulongpulong, hunahunaa sing maayo kon paano mo hinakpan ang tagsa ka panguna nga punto kag ang pamulongpulong sa kabilugan. Ang katapusan mo nga ginahambal masami nga amo ang pinakadugay nga malimtan. Positibo bala ini?

Kon Nagapakighambal sa mga Masigkatumuluo. Ginapakabahandi sang mga alagad ni Jehova ang mga kahigayunan nga makapakig-upod sa mga masigkatumuluo sa Cristianong mga miting. Mga tinion ini nga makapapagsik sa espirituwal. Ginapalig-on kita sang Biblia nga dumdumon ‘ang pagpalig-unay sa isa kag isa’ kon nagatipon kita sa aton mga duog sang pagsimba. (Heb. 10:25) Ginahimo ini indi lamang paagi sa mga pamulongpulong kag mga komento sa tion sang mga miting kundi paagi man sa pagpakigsugilanon antes kag pagkatapos sang miting.

Bisan pa normal lamang sa paghambalanay ang pagkabalaka sa aton matag-adlaw nga pagkabuhi, ang labing daku nga pagpalig-on nagagikan sa paghambalanay tuhoy sa espirituwal nga mga butang. Nagalakip ini sang mga eksperiensia naton sa balaan nga pag-alagad. Ang pagpakita sing maayo nga interes sa isa kag isa makapalig-on man.

Bangod sang impluwensia sang kalibutan sa palibot naton, kinahanglan ang paghalong. Sang nagsulat sa mga Cristiano sa Efeso, si Pablo nagsiling: “Karon nga gindula na ninyo ang kabutigan, maghambal sing kamatuoran ang tagsatagsa sa inyo sa iya isigkatawo.” (Efe. 4:25) Ang paghambal sing kamatuoran sa baylo sang kabutigan wala nagalakip sang paghimaya sa mga butang kag mga tawo nga ginaidolo sang kalibutan. Sing kaanggid, si Jesus nagpaandam batok sa “malimbungon nga gahom sang manggad.” (Mat. 13:22) Busa kon nagapakighambal sa isa kag isa, kinahanglan maghalong kita nga indi pagsakdagon ini nga limbong paagi sa paghimo nga labi ka makagalanyat ang pagpanag-iya sing materyal nga mga butang.​—1 Tim. 6:​9, 10.

Kon nagalaygay tuhoy sa kinahanglanon nga mangin makapalig-on, si apostol Pablo nagapanugyan sa aton nga indi paghukman ukon pagpakanubuon ang isa ka utod nga mahimo nagalikaw sa pila ka butang bangod sang “mga kaluyahon sa iya pagtuo,” buot silingon, bangod wala niya mahangpan ang kabug-usan sang Cristianong kahilwayan. Sa pagkamatuod, agod ang aton pagpakigsugilanon makapalig-on sa iban, dapat naton hatagan sing konsiderasyon ang ila mga ginhalinan kag ang kasangkaron sang ila pagtubo sa espirituwal. Daw ano ka makapasubo nga “magbutang sa atubangan sang isa ka utod sing kasandaran ukon sing kabangdanan sang pagkasandad”!​—Roma 14:1-4, 13, 19.

Ang mga nagaatubang sang serioso nga personal nga mga problema​—halimbawa, nagalukmatlukmat nga balatian—​nagaapresyar sang makapalig-on nga paghambalanay. Ini nga tawo mahimo nagapanikasog sing daku agod makatambong sa mga miting. Ang mga nakahibalo sang iya kahimtangan ayhan magapamangkot: “Kamusta na ang imo pamatyag?” Wala sing duhaduha nga apresyahon niya ang ila kabalaka. Apang, ang kahimtangan sang iya panglawas mahimo indi amo ang topiko nga para sa iya makapalig-on gid nga hambalan. Mahimo nga labi nga makapahalipay sa iya ang mga pulong sang apresasyon kag komendasyon. Makita mo bala ang pamatuod sang padayon niya nga gugma kay Jehova kag sang pagbatas niya sa idalom sang mabudlay nga kahimtangan? Napalig-on ka bala kon magkomento sia? Indi bala nga mas makapalig-on nga ipatuhoy ang igtalupangod sa iya kabakod kag sa iya naamot sa kongregasyon sa baylo nga sa iya mga limitasyon?​—1 Tes. 5:11.

Agod makapalig-on ang aton pagpakigsugilanon, importante gid nga binagbinagon ang pagtamod ni Jehova sa butang nga ginahambalan. Sa dumaan nga Israel, ang mga nagpamulong batok sa mga tiglawas ni Jehova kag nagkumod tuhoy sa manna nakaeksperiensia sang daku nga kaakig sang Dios. (Num. 12:1-16; 21:​5, 6) Ginapamatud-an naton nga nakabenepisyo kita sa amo nga mga halimbawa kon ginatahod naton ang mga gulang kag ginaapresyar ang espirituwal nga pagkaon nga ginaaman paagi sa matutom kag mainandamon nga ulipon nga klase.​—1 Tim. 5:17.

Ang pagpangita sing mapuslanon nga mga butang nga mahambalan kon kaupod sa aton mga kauturan indi gid problema. Apang, kon ang komento sang isa mamulayon gid, maghimo sing tikang nga iliso ang paghambalanay pakadto sa makapalig-on.

Nagapanaksi man kita sa iban, nagapamulongpulong sa plataporma, ukon nagasugilanon sa mga masigkatumuluo, kabay nga gamiton naton ang paghantop agod makapaguwa kita gikan sa bahandi sang aton tagipusuon sing “bisan anong pulong nga maayo para sa pagpalig-on suno sa kinahanglan, agod mahatag sini kon ano ang maayo sa mga nagapamati.”​—Efe. 4:29.