“Higugmaa ang Bug-os nga Paghiliutod”
Ining inspirado nga tig-ulo ginsulat sing halos duha ka libo ka tuig na ang nagligad. (1 Ped. 2:17) Pero kinahanglan naton ini iaplikar ilabi na subong. Posible ayhan nga mahigugma naton ang aton mga kauturan sa bug-os nga kalibutan? Sa sining kalibutan nga wala sing paghigugma, ano ang aton himuon para indi mag-ugdaw ang aton gugma? (Mat. 24:12) Sabta ang masunod nga mga pamangkot paagi sa pagtan-aw sang video nga Our Whole Association of Brothers.
(1) San-o kita nangin bahin sang aton Cristianong paghiliutod? (2) Ano ang tatlo ka hilikuton nga ginahimo naton kag sang aton mga kauturan sa bilog nga kalibutan? (3) Paano ginpakita sang aton mga kauturan ang ila determinasyon sa pagbantala (a) sa kahanayakan sang Alaska, (b) sa malapad nga mga pantalan sang Europa, kag (c) sa mga kagulangan sang Peru? (4) Ngaa indi naton dapat tamdon ang pagpanaksi nga isa lamang ka ordinaryo nga hilikuton? (5) Maghatag sing mga halimbawa kon paano ang mga Saksi ni Jehova naghatag sing lugpay kag bulig sa isa kag isa (a) pagkatapos sang linog, (b) pagkatapos sang bagyo, kag (c) sa tion sang inaway sibil? (6) Sa anong praktikal nga mga paagi mapakita naton ang panguna nga tanda sang aton Cristianong paghiliutod? (Juan 13:35) (7) Ano ang mga benepisyo bangod sa aton pagbuligay nga matukod ang aton mga Kingdom Hall? (8) Paano nahuptan sang aton mga kauturan sa Sidlangan nga Europa kag Rusya ang ila espirituwalidad sang gindumilian ang hilikuton? (9) Anong tumalagsahon nga panikasog ang ginahimo sang madamo nga Saksi agod makatambong sa mga kombension, kag ngaa? (10) Paano ini nga video nagpabakod sang imo determinasyon nga (a) simbahon si Jehova sing nahiusa upod sa imo mga kauturan sa Cristianong mga miting, (b) buligan ang iban sa tion sang kabudlayan, kag (c) magbantala sa imo bug-os nga masarangan? (11) San-o kag paano naton gamiton ini nga video sa ministeryo?
Ang panguna nga rason nga nangin bahin kita sang Cristianong paghiliutod amo ang aton gugma kay Jehova. Gani nalipay kita sa pagtuon sa iya kag sa pagtudlo sa iban parte sa iya. Ginahigugma naton ang mga ginahigugma niya. Kon ginabuligan naton ang iban sa tion sang kabudlayan, wala kita nagapaabot nga pasalamatan kita sang Dios. Sa baylo, ginapasalamatan naton ang Dios kay ginatamod naton ang aton Cristianong paghiliutod subong hamili nga regalo halin sa iya. Samtang nagahilapit na ang katapusan sining wala sing gugma nga kalibutan, kabay nga padayon naton nga higugmaon ang aton bug-os nga paghiliutod!