‘Tipuna ang Katawhan’
1. Ano ang pagkaanggid sang rehiyonal nga mga kombension sa importante nga pagtinipon sang mga Israelinhon paggua nila sa Egipto?
1 Sang makagua sila sa Egipto, ginsugo ni Jehova si Moises nga ‘tipunon ang katawhan’ sa Bukid Sinai para mamati sa Iya pulong agod magkahadlok sila sa Iya kag tudluan ang ila mga anak. (Deut. 4:10-13) Sa masunod nga binulan, magatipon ang katawhan ni Jehova sa rehiyonal nga mga kombension agod tudluan Niya. Ano ang himuon naton para makabenepisyo sing bug-os?
2. Ano ang aton himuon agod mangin ‘handa’ sa aton kombension?
2 “Maghanda”: Ginsugo ni Jehova ang mga Israelinhon nga “maghanda” para sa importante nga pagtinipon sa Bukid Sinai. (Ex. 19:10, 11) Dapat man maghanda ang tanan nga magatambong sa kombension. Halimbawa, madamo ang kinahanglan magbakasyon sa ila trabaho. Basi pareho ang imo kahimtangan kay Nehemias. Luyag niya nga bayaan ang iya katungdanan subong manugtagay ni Hari Artajerjes para magkadto sa Jerusalem, pero nahibaluan niya nga mahimo indi magpasugot ang hari. Nangamuyo si Nehemias kag maisugon nga naglisensia. Nagpasugot ang hari kag ginsakdag pa gani ang iya paglakbay! (Neh. 2:1-9) Sa bahin mo, may masakyan ka na bala kag dalayunan? Planuha nga makaabot sing temprano kada adlaw, kag mangin handa sa ‘paghatag sang labaw pa sa kinaandan nga igtalupangod’ sa imo mabatian.—Heb. 2:1.
3. Ano ang makabulig sa aton nga mahanda ang aton tagipusuon sa programa sang kombension?
3 Ang isa pa ka importante nga butang nga dapat naton himuon amo ang paghanda sang aton tagipusuon agod mamati kag magtuon. (Esd. 7:10) Ang programa sang kombension ibutang sing abanse sa jw.org/hil nga Web site kag makita diri ang tig-ulo sang tanan nga pamulongpulong upod ang isa ukon duha ka yabi nga teksto. Maayo nga binagbinagon ini sa aton Pangpamilya nga Pagsimba sa mga semana antes sang aton kombension. Ang iban nga manugbantala nagaimprinta sang programa kag ginagamit ini para sulatan sang mga nota sa tion sang kombension.
4. Paano ang kombension isa ka kahigayunan para tudluan sang mga ginikanan ang ila kabataan?
4 ‘Tudlui ang Imo mga Anak’: Ang isa nga ginsambit nga katuyuan sang pagtipon sang mga Israelinhon sa Bukid Sinai amo nga ‘tudluan sang mga ginikanan ang ila mga anak.’ (Deut. 4:10) Ang rehiyonal nga kombension maayo nga kahigayunan para sa mga ginikanan nga mahimo man ini. Sa tion sang sesyon, dapat yara sa tupad nila ang ila kabataan kag buligan sila nga mamati sing maayo. Pagkatapos sang sesyon kada adlaw ukon sa tion sang ila pangpamilya nga pagsimba, mahimo nila binagbinagon ang programa.
5. Ngaa makabenepisyo gid kita sa aton nagapakari nga rehiyonal nga kombension?
5 Sa tatlo ka adlaw nga kombension, mahilway kita sa makatalagam nga kalibutan ni Satanas kag makabaton sing espirituwal nga paumpaw kag makapalig-on nga pagpakig-upod sa sulod sang aton espirituwal nga paraiso. (Isa. 35:7-9) Samtang nagapalapit ang adlaw ni Jehova, kabay nga gamiton naton ini nga kahigayunan sa pagtipon para mapalig-on ang isa kag isa!—Heb. 10:24, 25.