Mga Distrito nga Kombension—Mabaskog nga Pamatuod sa Kamatuoran
1. Paagi sa mga kapiestahan kada tuig, anong espirituwal nga mga kamatuoran ang mapamalandungan kag maistoryahan sang mga Israelinhon?
1 Ang mga Israelinhon sang una nagatipon sing tatlo ka beses kada tuig para sa mga kapiestahan. Bisan pa mga lalaki lang ang kinahanglan magtambong, masami nga nagalakbay ang bug-os nga pamilya pakadto sa Jerusalem para sa sining makalilipay nga mga pagtilipon. (Deut. 16:15, 16) Paagi sini, mapamalandungan nila kag maistoryahan ang espirituwal nga mga kamatuoran. Ano ang pila sini? Ang isa amo nga si Jehova maalwan kag mahigugmaon nga Manug-aman. (Deut. 15:4, 5) Ang isa pa amo nga makasalig sila sa iya panuytoy kag pangamlig. (Deut. 32:9, 10) Mapamalandungan man nila nga subong katawhan nga ginpili ni Jehova, dapat nila ipakita ang iya pagkamatarong. (Deut. 7:6, 11) Sa karon, amo man sini ang aton mabenepisyo sa aton mga distrito nga kombension.
2. Paano ang programa sa distrito nga kombension nagapabanaag sang kapawa sang kamatuoran?
2 Ang Programa Nagapabanaag sang Kapawa sang Kamatuoran: Sa aton distrito nga kombension, makapanginpulos kita sa mga pamulongpulong, drama, pasundayag, kag mga interbyu nga nagapabanaag sang kapawa sang kamatuoran sa Biblia. (Juan 17:17) Ang organisasyon ni Jehova naghanda sing programa para gid sa mga kinahanglanon karon sang mga tawo sa bug-os nga kalibutan. (Mat. 24:45-47) Nalangkag ka na bala nga makita kag mabatian ini?
3. Ano ang dapat naton himuon para makabenepisyo sa programa?
3 Siempre, makabenepisyo lamang kita kon magtambong kita kag mamati sing maayo sa sulod sang tatlo ka adlaw. Kon wala ka pa makalisensia sa imo ginaubrahan, himua na ini subong. Magpahuway sing maayo kada gab-i para makakonsentrar ka sa tion sang programa. Makabulig man ang pagtulok sa humalambal kag pagkuha sing mga nota. Likawi nga makadisturbo ang imo cell phone. Likawi ang pagpakig-istorya, pagtext, pagkaon, ukon pag-inom sa tion sang programa.
4. Paano mabuligan sang mga ginikanan ang ila kabataan nga makabenepisyo sa kombension?
4 Sa mga tuig sang Inugpahuway, samtang nagatipon ang mga pamilya para pamatian ang pagbasa sang Kasuguan sa Piesta sang mga Kayangkayang, ginaupod nila ang ila mga kabataan agod ‘magpamati kag magtuon.’ (Deut. 31:12) Makapalig-on gid nga makita ang mga pamilya nga ululupod sa tion sang kombension, lakip ang mga kabataan nga wala nagatulog kundi nagapamati sing maayo! Kada gab-i, mahimo man ninyo tan-awon ang inyo mga nota kag istoryahan ang mga punto nga nanamian ninyo. “Ang kabuangan naputus sa tagiposoon sang bata,” gani indi dapat ‘pagpabay-an’ sang mga ginikanan ang ila mga kabataan lakip na ang mga tin-edyer. Sa baylo, dapat sila bantayan kon udto kag kon yara sa ila dalayunan.—Hulu. 22:15; 29:15.
5. Paano ang aton paggawi, pamayo, kag pamustura nagapatahom sa kamatuoran samtang yara kita sa duog sang kombension?
5 Ang Aton Maayo nga Paggawi Nagapatahom sa Kamatuoran: Ang aton maayo nga paggawi samtang yara sa duog sang kombension nagapatahom sa kamatuoran. (Tito 2:10) Kon ginasuksok naton ang aton badge card, wala lamang ini nagapahibalo parte sa kombension kag nagapakilala sa aton subong delegado kundi nagakuha man sing atension sang iban. Matalupangdan nila nga ang mga nagasuksok sang badge card nakapamayo sing mahipid kag maugdang, indi pareho sa estilo sang pamayo sang kalibutan nga daw nagapangganyat. (1 Tim. 2:9, 10) Gani, dapat naton talupangdon ang aton pamayo kag pamustura sa duog sang kombension. Bisan pa ang kombension hiwaton sa istadyum, ang aton pamayo dapat maugdang. Kon luyag naton mag-ilis pagkatapos sang programa kag magkadto sa mga kalan-an, dapat dumdumon naton nga mga delegado gihapon kita sang kombension kag gani ang aton pamayo dapat indi sobra ka kaswal.
6. Ano ang isa ka paagi nga mapanginpuslan naton ang Cristianong paghiliutod sa kombension?
6 Sa mga kapiestahan, nalipay ang mga Israelinhon sa makapalig-on nga pagpakig-upod sa ila masigkasumilimba halin sa iban nga lugar, kag nagapahiusa ini sa ila. (Binu. 2:1, 5) Sa distrito nga kombension makita ang aton pinasahi nga Cristianong paghiliutod. Masami nga nagadayaw gid ang mga nakatalupangod sini. (Sal. 133:1) Sa baylo nga maggua sa pasilidad para magbakal sing pagkaon, mas maayo kon magdala kita sing diutay nga balon para may tion kita nga makilala kag maistorya ang mga utod!
7. Ngaa mas maayo nga magboluntaryo kon ginatugot sang imo kahimtangan?
7 Madamo ang nagadayaw sa aton mahim-ong kag naorganisar sing maayo nga kombension, ilabi na kon mahibaluan nila nga ang tanan nga obra ginahimo sang mga boluntaryo. Puede mo bala ‘mahalad ang imo kaugalingon sing kinabubut-on’ para sa mga hilikuton sa kombension? (Sal. 110:3) Masami nga nagaboluntaryo ang bug-os nga pamilya para matudluan ang ila kabataan nga magbulig sa iban. Kon mahuluy-on ka, ang pagboluntaryo isa ka maayo nga paagi para makilala ang mga kauturan. Ang isa ka sister nagsiling: “Luwas sa akon pamilya kag pila ka abyan wala na ako sing kilala didto. Apang sang nagbulig ako sa pagpaninlo, madamo ako sing nakilala nga utod. Makalilipay gid ini!” Ang pagpasangkad paagi sa pagbulig sa kombension magahatag sa aton sing daku nga kalipay. (2 Cor. 6:12, 13) Kon wala ka pa nakaboluntaryo, pamangkuta ang mga gulang kon paano ka mangin kalipikado.
8. Paano naton maagda ang iban nga magtambong sa kombension?
8 Agdaha ang Iban nga Mamati sang Kamatuoran: Subong sang nagligad nga tuig, tatlo ka semana antes sang aton kombension, may kampanya kita sa pagpangagda sa iban nga magtambong. Ginatinguhaan gid sang mga kongregasyon nga mapanagtagan sang imbitasyon ang ila teritoryo. (Tan-awa ang kahon nga “Paano Itanyag ang Imbitasyon?”) Ang tanan nga nabilin nga imbitasyon dapat dal-on sa kombension. Gamiton ini sang mga delegado sa di-pormal nga pagpanaksi sa duog sang kombension.
9. Ano ang pila ka eksperiensia nga nagapakita nga may maayo nga resulta ang aton kampanya?
9 May maayo man bala nga resulta ang aton kampanya? Sa isa ka kombension, ginbuligan sang atendant nga makakita sing pulungkuan ang isa ka mag-asawa. Ginhambalan nila sia nga nakabaton sila sang imbitasyon kag “nakapainteres ini” sa ila. Gani nagbiyahe sila sing sobra 320 ka kilometro! Ang isa naman ka sister nga nagapamalaybalay naghatag sing imbitasyon sa tawo nga madamo sing pamangkot parte sa kombension. Gani ginpaathag sang sister ang imbitasyon sa iya. Pagligad sang pila ka adlaw, nakita sang sister ang tawo upod sa iya amigo didto sa kombension nga may ginauyatan nga bag-ong gua nga publikasyon!
10. Ngaa importante nga magtambong kita sa aton distrito nga kombension kada tuig?
10 Ang mga kapiestahan mahigugmaon nga aman halin kay Jehova para mabuligan ang mga Israelinhon nga maalagad sia “nga wala sing kasawayan kag sa kamatuoran.” (Jos. 24:14, NW) Ang aton pagtambong sa distrito nga kombension kada tuig makabulig man sa aton nga ‘padayon nga maglakat sa kamatuoran’ kag importante ini nga bahin sang aton pagsimba. (3 Juan 3) Kabay nga pakamaayuhon ni Jehova ang panikasog sang tanan nga nagahigugma sa kamatuoran nga makatambong kag makabenepisyo sing bug-os!
[Blurb sa pahina 3]
Ang aton maayo nga paggawi samtang yara sa duog sang kombension nagapatahom sa kamatuoran
[Blurb sa pahina 3]
Tatlo ka semana antes sang aton kombension, may kampanya kita sa pagpangagda sa iban nga magtambong
[Kahon sa pahina 5]
Mga Pahanumdom Para Sa 2012 Distrito nga Kombension
◼ Iskedyul sang Programa: Ang programa magasugod sa 8:20 s.a. sa Biernes asta sa Domingo. Kon ipahibalo na ang musika, dapat makadto na kita tanan sa aton mga pulungkuan agod makasugod ang programa sing mahim-ong. Ang programa sa Biernes kag Sabado matapos sa 3:55 s.h. kag 2:40 s.h. naman sa Domingo.
◼ Palarkingan: Ang pagparking sa duog sang kombension first-come, first-served. Bangod masami nga limitado lang ang palarkingan, mas maayo nga magtingob kamo sa isa lang ka salakyan.
◼ Pagreserba sang Pulungkuan: Mahimo lamang kamo makareserba sing pulungkuan para sa mga kaupod ninyo sa salakyan ukon sa balay, subong man sa inyo mga ginatun-an sa Biblia.—1 Cor. 13:5.
◼ Panyaga: Palihug magbalon kamo imbes nga maggua agod magbakal sing pagkaon. Puede kamo magdala sing bulutangan sang pagkaon nga mabutang sa idalom sang inyo pulungkuan. Apang ang dalagku nga mga suludlan kag mabuluk-on nga mga kagamitan wala ginatugutan sa pasilidad sang kombension.
◼ Amot: Mapakita naton nga ginaapresyar naton ang mga kahimusan sa kombension paagi sa paghatag sing boluntaryo nga mga amot para sa bug-os kalibutan nga hilikuton sa duog sang kombension. Kon luyag ninyo mag-amot paagi sa tseke, ipangalan ini sa “Watch Tower.”
◼ Aksidente kag Emerhensia: Kon may emerhensia nga matabo sa duog sang kombension, palihug pahibalua ang pinakamalapit nga atendant, nga amo ang magapahibalo sa First Aid agod makahatag sing bulig ang kalipikado nga utod sa sini nga departamento. Kon kinahanglanon, ang aton utod nga naasayn sa First Aid amo ang matawag sa pinakamalapit nga ospital.
◼ Bulong: Kon nagatomar ka sing bulong nga nagakinahanglan sing reseta, palihug magdala sing bastante nga suplay kay indi ini matigayon sa duog sang kombension. Ang mga indyeksion para sa diabetes ginakabig nga hazardous waste, gani indi ini dapat ihaboy sa mga basurahan sa duog sang kombension.
◼ Sapatos: Kada tuig, madamo ang nagakaaksidente bangod sa sapatos. Mas maayo nga magsuksok sing maugdang kag indi halog ukon gutok nga sapatos nga puede ilakat sa mga rampa, hagdanan, alagyan nga salsalon nga may buhobuho, kag iban pa.
◼ Rekording: Indi dapat ikonektar sa sound system ukon sa salaksakan sang koryente sa pasilidad ang bisan ano nga rekorder. Mahimo lamang ini magamit sa paagi nga indi makatublag sa iban.
◼ Pagkuha sing Retrato: Kon luyag ninyo magkuha sing retrato sa tion sang sesyon, palihug indi maggamit sing flash ukon lipdan ang iban nga nagapamati sa programa.
◼ Please Follow Up (S-43) Form: Dapat gamiton ang Please Follow Up nga pormas agod matatap ang bisan sin-o nga nagpakita sing interes sa di-pormal nga pagpanaksi sa tion sang kombension. Ang mga manugbantala dapat magdala sing isa ukon duha ka pormas. Ang nasulatan nga mga pormas mahimo ihatag sa Book Room ukon sa sekretaryo sang inyo kongregasyon.—Tan-awa ang Nobiembre 2009 nga Ang Aton Ministeryo sa Ginharian, pahina 4.
◼ Restawran: Padunggi ang ngalan ni Jehova paagi sa inyo maayo nga paggawi sa mga restawran. Maghatag sing tip kon kinabatasan ini sa inyo lugar.
◼ Badge Card: Palihug isuksok ang inyo badge card samtang yara sa kombension kag kon nagalakbay pakadto-pakari sa duog sang kombension. Makuha ninyo ini sa inyo kongregasyon. Dapat kamo magkuha sini gilayon para sa inyo kag sa katapo sang inyo pamilya.
◼ Bawtismo: Ang mga kandidato sa bawtismo dapat magpungko sa pulungkuan nga gin-aman para sa ila antes magsugod ang programa sa Sabado sang aga. Ang kada isa dapat magdala sing maugdang nga pangpaligo nga bayo kag tualya. Agod mapat-od nga nagakaigo ang panapton sang mga balawtismuhan, dapat ini binagbinagon sa ila sang mga gulang nga magarepaso sang mga pamangkot sa Organisado nga libro.
◼ Pagboluntaryo: Madugangan pa gid ang aton kalipay sa pagtambong sa kombension kon magboluntaryo kita. (Binu. 20:35) Ang bisan sin-o nga luyag magboluntaryo dapat magreport sa Volunteer Service Department. Ang mga kabataan nga wala pa nagaedad sing 16 anyos mahimo magboluntaryo upod sa ila ginikanan, guardian, ukon iban pa nga adulto nga ginsaligan sang ila mga ginikanan ukon guardian.
[Kahon sa pahina 4]
Paano Itanyag ang Imbitasyon?
Para matuptupan ang aton teritoryo, dapat malip-ot lang ang aton ihambal. Mahimo kita magsiling: “Kamusta ka. Ginapanagtag namon ining imbitasyon sa bilog nga kalibutan. Ari ang imo kopya. Ara dira sa imbitasyon ang mga detalye.” Mangin mapagsik. Kon Sabado kag Domingo, mahimo mo man matanyag ang mga magasin kon nagakaigo.