Kabuhi nga Walay Katapusan sa Duta—Ginhatag sang Dios nga Paglaum
“Ang tinuga ginpasakop sa pagkawala-pulos . . . pasad sa paglaum.”—ROMA 8:20.
1, 2. (a) Ngaa ang paglaum nga kabuhi nga walay katapusan sa duta importante sa aton? (b) Ngaa madamo nga tawo ang nagaduhaduha tuhoy sa kabuhi nga walay katapusan sa duta?
MAHIMO madumduman mo ang kalipay nga imo nabatyagan sang una mo nga nahibal-an nga malapit na ang tion nga ang mga tawo indi na magtigulang kag mapatay kundi mabuhi sing walay katapusan sa duta. (Juan 17:3; Bug. 21:3, 4) Mahimo nalipay ka gid nga isugid sa iban ang imo paglaum nga ginsaad sa Biblia. Ang kabuhi nga walay katapusan importante gid nga bahin sang maayong balita nga aton ginabantala. Nagaapektar ini sa aton pagtamod sa kabuhi.
2 Ang kalabanan nga relihion sang Cristiandad wala nagalaum sa kabuhi nga walay katapusan sa duta. Bisan pa ginatudlo sang Biblia nga ang kalag nagakapatay, ining mga relihion nagatudlo sang doktrina nga wala napasad sa Biblia. Halimbawa, ginatudlo nila nga kon mapatay ang isa, ang iya kalag padayon nga nagakabuhi sa duog sang mga espiritu. (Ezeq. 18:20) Amo nga madamo nga tawo ang nagaduhaduha kon bala matuod ang kabuhi nga walay katapusan sa duta. Gani, mahimo mamangkot kita: Ginasakdag bala sang Biblia ini nga paglaum? Kon amo, san-o ini una nga ginpahibalo sang Dios sa mga tawo?
“Ginpasakop sa Pagkawala-pulos . . . Pasad sa Paglaum”
3. Paano ginpadayag sang Dios ang iya katuyuan para sa katawhan sugod sang gintuga ang tawo?
3 Ginpadayag ni Jehova ang iya katuyuan para sa katawhan sugod pa sang gintuga niya ang tawo. Maathag nga ginsiling sang Dios kay Adan nga kon mangin matinumanon sia, magakabuhi sia sing walay katapusan. (Gen. 2:9, 17; 3:22) Pat-od gid nga nakita sang una nga mga kaliwat ni Adan ang mga resulta sang pagpakasala sang tawo. Indi na sila makasulod sa hardin sang Eden, kag ang mga tawo nagatigulang kag nagakapatay. (Gen. 3:23, 24) Samtang nagaligad ang tion, ang kabuhi sang tawo nagalip-ot. Si Adan nagkabuhi sing 930 ka tuig. Si Sem, nga nakalampuwas sa Anaw, nagkabuhi sing 600 ka tuig, kag ang iya anak nga si Arpacsad sing 438 ka tuig. Si Tera, nga amay ni Abraham, nagkabuhi sing 205 ka tuig. Ang kabuhi naman ni Abraham naglawig sing 175 ka tuig, ang iya anak nga si Isaac nagkabuhi sing 180 ka tuig, kag si Jacob sing 147 ka tuig. (Gen. 5:5; 11:10-13, 32; 25:7; 35:28; 47:28) Bangod sa paglip-ot sang kabuhi, madamo nga tawo ang naghunahuna nga wala na sing paglaum nga kabuhi nga walay katapusan. May rason bala sila nga lauman ini liwat?
4. Ngaa nagsalig gid ang matutom nga mga tawo sang una nga ipasag-uli sang Dios ang mga pagpakamaayo nga nadula ni Adan?
4 Ang Pulong sang Dios nagsiling: “Ang [tawhanon] nga tinuga ginpasakop sa pagkawala-pulos . . . pasad sa paglaum.” (Roma 8:20) Ano nga paglaum? Ginpatuhuyan sa una nga tagna sang Biblia ang isa ka “kaliwat” [ukon “binhi,” NW] nga ‘magadugmok sa ulo sang man-ug.’ (Basaha ang Genesis 3:1-5, 15.) Ang ginsaad nga Binhi nagpasalig sa matutom nga mga tawo nga indi pagdulaon sang Dios ang iya katuyuan para sa katawhan. Ini nga saad amo ang nagpasalig kanday Abel kag Noe nga ipasag-uli sang Dios ang mga pagpakamaayo nga nadula ni Adan. Mahimo narealisar nila nga ang ‘pagdugmok sa tikod sang binhi’ nagakinahanglan sing pagpatulo sang dugo.—Gen. 4:4; 8:20; Heb. 11:4.
5. Ngaa nagapati gid si Abraham sa pagkabanhaw?
5 Binagbinaga si Abraham. Sang gintilawan sia, “daw subong nga ginhalad na niya si Isaac, . . . ang iya bugtong nga anak.” (Heb. 11:17) Ngaa handa sia nga himuon ini? (Basaha ang Hebreo 11:19.) Bangod nagapati gid sia sa pagkabanhaw! May mabakod gid sia nga rason sa sini. Una, ginpasag-uli ni Jehova ang ikasarang nila ni Sara nga makaanak bisan pa tigulang na sila. (Gen. 18:10-14; 21:1-3; Roma 4:19-21) Ginsaaran man ni Jehova si Abraham: “Paagi sa kay Isaac tawgon ang imo mga kaliwatan.” (Gen. 21:12) Gani, may mabakod gid nga mga rason si Abraham nga banhawon sang Dios si Isaac.
6, 7. (a) Ano nga katipan ang ginhimo ni Jehova kay Abraham? (b) Paano naghatag sing paglaum sa katawhan ang ginsaad ni Jehova kay Abraham?
6 Bangod sang mabakod nga pagtuo ni Abraham, nakigkatipan si Jehova sa iya may kaangtanan sa iya kaliwat, ukon “binhi.” (Basaha ang Genesis 22:18.) Ang panguna nga bahin sang “binhi” amo si Jesucristo. (Gal. 3:16) Ginsilingan ni Jehova si Abraham nga ang iya “binhi” magadamo “subong sang kabitoonan sang langit kag subong sang balas nga yara sa baybayon sang dagat.” Wala nahibaluan ni Abraham ang kadamuon sini. (Gen. 22:17) Apang, ginpahibalo ini sang ulihi. Si Jesucristo kag ang 144,000 nga magagahom kaupod niya sa iya Ginharian, amo ang magahuman sina nga “binhi.” (Gal. 3:29; Bug. 7:4; 14:1) Paagi sa Mesianiko nga Ginharian, “pakamaayohon ang tanan nga pungsud sang duta.”
7 Mahimo nga wala gid nahangpan ni Abraham ang bug-os nga kahulugan sang katipan ni Jehova sa iya. Apang, “ginahulat niya ang siudad nga may matuod nga mga sadsaran,” siling sang Biblia. (Heb. 11:10) Ina nga siudad amo ang Ginharian sang Dios. Agod matigayon ni Abraham ang mga pagpakamaayo sina nga Ginharian, dapat sia mabuhi liwat. Matigayon lamang niya ang kabuhi nga walay katapusan diri sa duta kon banhawon sia. Ang kabuhi nga walay katapusan mahimo man matigayon sang mga makalampuwas sa Armagedon ukon sang mga pagabanhawon.—Bug. 7:9, 14; 20:12-14.
“Ang Espiritu sa Sulud Nakon Nagapilit sa Akon”
8, 9. Ngaa ang tulun-an sang Job indi lamang kasaysayan sang mga pagtilaw sang isa ka tawo?
8 Sa tungatunga sang pagkabuhi ni Jose, nga apo sa tuhod ni Abraham, kag sang manalagna nga si Moises, nagkabuhi ang isa ka tawo nga si Job. Ang tulun-an sang Job, nga mahimo ginsulat ni Moises, nagapaathag kon ngaa gintugutan ni Jehova nga mag-antos si Job kag kon ano ang resulta sini sa iya. Apang, ang tulun-an sang Job indi lamang kasaysayan sang mga pagtilaw sang isa ka tawo kundi ginapaathag man sini ang mga hulusayon nga nagadalahig sa tanan nga tawo kag mga anghel. Matun-an man naton diri ang matarong nga paagi sang paggahom ni Jehova. Ginapakita man sini nga ang integridad kag paglaum sa palaabuton sang tanan nga mga alagad sang Dios sa duta nadalahig sa hulusayon nga nag-utwas sa Eden. Bisan pa wala mahangpan ni Job ini nga hulusayon, wala sia naimpluwensiahan sang iya tatlo ka abyan nga maghunahuna nga napaslawan sia nga huptan ang iya integridad. (Job 27:5) Nagapabakod ini sang aton pagtuo kag nagapalig-on sa aton nga sarang naton mahuptan ang aton integridad kag sakdagon ang soberanya ni Jehova.
9 Sa tapos nakahambal ang tatlo ka indi matuod nga manuglugpay ni Job, “si Elihu nga anak ni Baraquel nga Buzhanon nagsabat.” Ano ang nagpahulag sa iya? “Puno ako sang mga polong,” siling niya. “Ang espiritu sa sulud nakon nagapilit sa akon.” (Job 32:5, 6, 18) Bisan pa ang inspirado nga pinamulong ni Elihu natuman na sang natapos ang mga pagtilaw ni Job, may daku ini gihapon nga kahulugan para sa iban. Nagahatag ini sing paglaum sa tanan nga nagahupot sing integridad.
10. Ngaa kon kaisa ang mensahe ni Jehova sa isa ka tawo may daku man nga katumanan para sa tanan nga katawhan?
10 Kon kaisa, ang mensahe nga ginpahayag ni Jehova sa isa ka tawo may daku man nga katumanan para sa tanan nga katawhan. Ang isa ka halimbawa sini amo ang tagna ni Daniel may kaangtanan sa damgo ni Hari Nabocodonosor sang Babilonia. Ginpakita sa sini nga damgo ang pagpulod sa isa ka daku nga kahoy. (Dan. 4:10-27) Ini nga damgo natuman kay Nabocodonosor, apang may daku pa ini nga katumanan. Ginapakita sini nga ang paggahom sang Dios sa duta, nga ginarepresentar sang isa ka ginharian sa linya ni Hari David, ipasag-uli liwat sa tapos sang 2,520 ka tuig sugod sang 607 B.C.E.a Ini nga pagginahom sang Dios ginpasag-uli sang 1914 sang nagpungko na si Jesucristo subong Hari sa langit. Hunahunaa nga tumanon sining Ginharian ang mga ginalauman sang matinumanon nga katawhan!
“Luwasa Sia Gikan sa Pagpanaug sa Boho”
11. Ano ang ginapakita sang mga pinamulong ni Elihu tuhoy sa Dios?
11 Sang ginsabat ni Elihu si Job, nagsiling sia nga “may manugtunda . . . isa ka manugpatpat, isa sa isa ka libo, sa pagpakita sa tawo sang matarung sa iya.” Paano kon ini nga manugtunda ‘mangamuyo sa Dios kag mahamuut Sia sa iya’? Si Elihu nagsiling: “Niyan [ang Dios] maloloy-on sa iya, kag nagasiling, ‘Luwasa sia gikan sa pagpanaug sa Boho, nakakita ako sing gawad; ang iya unud manginlinghud pa sang sa bata; nagabalik sia sa mga adlaw sang iya pagkapamatan-on.’” (Job 33:23-26) Ini nga pinamulong nagapakita nga handa gid ang Dios nga batunon ang “gawad” para sa mahinulsulon nga mga katawhan.—Job 33:24.
12. Ano nga paglaum para sa katawhan ang ginapakita sang pinamulong ni Elihu?
12 Mahimo nga wala nahangpan ni Elihu ang bug-os nga kahulugan sang gawad, subong nga wala man nahangpan sing bug-os sang mga manalagna ang tanan nila nga ginsulat. (Dan. 12:8; 1 Ped. 1:10-12) Apang, ginapakita sang pinamulong ni Elihu nga magaabot ang tion nga batunon sang Dios ang gawad kag dulaon Niya ang pagtigulang kag kamatayon. Ginapakita man sini ang matahom nga paglaum nga kabuhi nga walay katapusan. Ginasugid man sang tulun-an sang Job nga may yara pagkabanhaw.—Job 14:14, 15.
13. Ano ang kahulugan sang mga pinamulong ni Elihu para sa mga Cristiano?
13 Sa karon, ang pinamulong ni Elihu may kahulugan gihapon para sa minilyon ka Cristiano nga may paglaum nga maluwas sa kalaglagan sining malauton nga kalibutan. Ang mga tigulang nga makalampuwas mangin mabakod liwat pareho sang pamatan-on pa sila. (Bug. 7:9, 10, 14-17) Makalilipay pa gid para sa matutom nga katawhan nga masaksihan nga nagabalik sa pagkapamatan-on ang mga ginbanhaw. Siempre pa, matigayon lamang sang hinaplas nga mga Cristiano ang di-mamalatyon nga kabuhi sa langit, kag sang “iban nga mga karnero” ni Jesus ang kabuhi nga walay katapusan sa duta kon magtuo sila sa halad gawad ni Cristo.—Juan 10:16; Roma 6:23.
Dulaon ang Kamatayon sa Duta
14. Ngaa indi lamang Mosaikong Kasuguan ang kinahanglan para matigayon sang mga Israelinhon ang paglaum nga kabuhi nga walay katapusan?
14 Ang mga kaliwat ni Abraham nangin isa ka pungsod sang nakigkatipan sila sa Dios. Sang ginhatag sa ila ang Kasuguan, si Jehova nagsiling: “Bantayan ninyo ang akon mga palatukuran kag ang akon mga pagsolondan, nga kon himoon sang tawo magakabuhi sia sa ila.” (Lev. 18:5) Apang, bangod indi matuman sing bug-os sang mga Israelinhon ang himpit nga mga talaksan sang Kasuguan, ginpakamalaut sila sang Kasuguan kag kinahanglan nga hilwayon.—Gal. 3:13.
15. Ano nga pagpakamaayo sa palaabuton ang ginpasulat sang Dios kay David?
15 Magluwas kay Moises, gin-inspirar man ni Jehova ang iban pa nga manunulat sang Biblia nga isulat ang paglaum nga kabuhi nga walay katapusan. (Sal. 21:4; 37:29) Halimbawa, sang ginhinakpan ni salmista David ang isa ka salmo nga nagasambit sang paghiusa sang matuod nga mga sumilimba sa Sion, nagsiling sia: “Didto ang GINOO nagsaad sa paghatag sang iya mga kaayuhan, ang kabuhi nga wala sing katapusan.”—Sal. 133:3, Maayong Balita nga Biblia.
16. Paagi kay Isaias, ano ang ginsaad ni Jehova tuhoy sa palaabuton sang “bug-os nga duta”?
16 Gin-inspirar ni Jehova si Isaias nga magtagna tuhoy sa kabuhi nga walay katapusan sa duta. (Basaha ang Isaias 25:7, 8.) Ang sala kag kamatayon daw kaangay sang “tabon” ukon habol nga nagapuot sa katawhan. Ginapasalig ni Jehova ang iya katawhan nga dulaon niya ang sala kag kamatayon “sa bug-os nga duta.”
17. Ano ang gintagna nga papel sang Mesias nga nagabukas sang dalan padulong sa kabuhi nga walay katapusan?
17 Binagbinaga man ang pamaagi nga dapat sundon sa Mosaikong Kasuguan tuhoy sa kanding para kay Azazel. Kada tuig, sa Adlaw sang Katumbasan, ang mataas nga saserdote ‘nagabutang sang iya duha ka kamut sa olo sang kanding nga buhi kag ginatuad sa iya ang tanan nga kalautan sang katawohan sang Israel, kag ginatungtung niya sila sa olo sang kanding, kag ang kanding magadala sa iya sang tanan nga kalautan nila sa duta nga mamingaw.’ (Lev. 16:7-10, 21, 22) Gintagna ni Isaias nga ang magaabot nga Mesias magadala man sang mga “kalisud,” “kasubo,” kag “sala sang madamu.” Sa amo, nabuksan ang dalan padulong sa kabuhi nga walay katapusan.—Basaha ang Isaias 53:4-6, 12.
18, 19. Ano nga paglaum ang ginapadaku sa Isaias 26:19 kag Daniel 12:13?
18 Paagi kay Isaias, ginsilingan ni Jehova ang mga Israelinhon: “Ang imo mga patay magakabuhi, ang akon mga bangkay magabangon. Pagmata kag mag-amba, kamo nga nagapuyo sa yab-ok! Kay ang imo ton-og subong sang ton-og sang mga gamhon, kag ang duta magaluad sang mga patay.” (Isa. 26:19) Maathag nga ginpakita sang Hebreong Kasulatan ang paglaum nga pagkabanhaw kag kabuhi sa duta. Halimbawa, sang mga 100 ka tuig na ang edad ni Daniel ginpalig-on sia ni Jehova: “Magpahuway ka kag magbangon sa pagbaton sang imo padya sa katapusan nga panahon.”—Dan. 12:13, Biblia sang Katilingban sang mga Kristiano.
19 Bangod sa paglaum nga pagkabanhaw, si Marta nakasiling kay Jesus tuhoy sa iya napatay nga utod: “Nakahibalo ako nga mabanhaw sia sa pagkabanhaw sa katapusan nga adlaw.” (Juan 11:24) Ginbag-o bala sang mga panudlo ni Jesus kag sang inspirado nga mga sinulatan sang iya mga disipulo ini nga paglaum? Ginatanyag bala gihapon ni Jehova sa katawhan ang paglaum nga kabuhi nga walay katapusan sa duta? Binagbinagon naton ang mga sabat sa sini nga mga pamangkot sa masunod nga artikulo.
[Nota]
a Tan-awa ang kapitulo 6 sang libro nga Binagbinaga ang Tagna ni Daniel!
Mapaathag Mo Bala?
• Pasad sa ano nga paglaum “ginpasakop sa pagkawala-pulos” ang katawhan?
• Ngaa nagapati gid si Abraham sa pagkabanhaw?
• Ano nga paglaum sang katawhan ang ginapakita sang pinamulong ni Elihu kay Job?
• Paano ginpakita sang Hebreong Kasulatan ang paglaum nga pagkabanhaw kag kabuhi walay katapusan sa duta?
[Retrato sa pahina 5]
Ang ginpamulong ni Elihu kay Job nagahatag sing paglaum nga dulaon na ang pagtigulang kag kamatayon
[Retrato sa pahina 6]
Ginpalig-on si Daniel nga ‘magabaton sia sing padya sa katapusan nga panahon’