Mga Ilustrasyon Gikan sa Pamilyar nga mga Kahimtangan

SA PAGKAMATUOD, importante nga bisan ano man nga mga ilustrasyon ang imo ginagamit nagahisanto ini sa materyal nga imo ginabinagbinag. Apang, agod mangin epektibo gid ini, importante man nga nagakabagay ini sa imo mga tagpalamati.

Paano ang sahi sang mga tagpalamati nagaapektar sa pagpili mo sing mga ilustrasyon para sa pamulongpulong sa isa ka grupo? Ano ang ginhimo ni Jesucristo? Nagahambal man sia sa kadam-an ukon sa iya mga disipulo, wala ginkuha ni Jesus ang iya mga halimbawa gikan sa mga dalanon sang pagkabuhi nga masapwan lamang sa kadutaan sa guwa sang Israel. Ini nga mga halimbawa indi pamilyar sa iya mga tagpalamati. Halimbawa, wala ginsambit ni Jesus ang pagkabuhi sa palasyo sang Egipto ukon ang relihioso nga mga buhat sa India. Walay sapayan sini, ang iya mga ilustrasyon ginkuha sa mga hilikuton sang ordinaryo nga mga tawo sa tanan nga kadutaan. Naghambal sia tuhoy sa pagtukap sang mga panapton, pagnegosyo, pagkadula sang malahalon nga butang, kag pagtambong sa mga punsion sa kasal. Nahangpan niya kon ano ang reaksion sang mga tawo sa idalom sang nagkalainlain nga mga kahimtangan, kag gingamit niya ini. (Mar. 2:21; Luc 14:7-11; 15:​8, 9; 19:15-23) Bangod ang iya dayag nga pagbantala ginpatuhoy ilabi na sa katawhan sang Israel, ang mga ilustrasyon ni Jesus masunson gid nga may kaangtanan sa mga butang kag mga hilikuton nga nangin bahin sang ila matag-adlaw nga pagkabuhi. Sa amo, ginpatuhuyan niya ang mga butang subong sang pagpanguma, ang pagsunod sang mga karnero sa ila manugbantay, kag ang paggamit sing mga panit sang sapat agod taguan sing alak. (Mar. 2:22; 4:​2-9; Juan 10:​1-5) Ginpatuhuyan man niya ang maragtason nga mga halimbawa​—ang pagtuga sa unang mag-asawa, ang Anaw sang adlaw ni Noe, ang kalaglagan sang Sodoma kag Gomorra, ang kamatayon sang asawa ni Lot, sa pagsambit lamang sing pila ka halimbawa. (Mat. 10:15; 19:​4-6; 24:37-39; Luc. 17:32) Ginabinagbinag mo man bala sing maayo ang mga hilikuton nga kinaandan sa imo mga tagpalamati kag ang ila gindak-an nga kultura kon nagapili sing mga ilustrasyon?

Ano abi kon nagahambal ka, indi sa daku nga grupo, kundi sa isa ukon ayhan sa pila lamang ka tawo? Panikasugi nga pilion ang ilustrasyon nga nagakaigo gid para sa sining diutay nga tagpalamati. Sang nagpanaksi si Jesus sa isa ka Samaritana sa bubon malapit sa Sicar, naghambal sia tuhoy sa “buhi nga tubig,” “indi na gid pag-uhawon,” kag ‘tuburan sang tubig nga nagaibwal agod maghatag sing kabuhi nga walay katapusan’​—tanan ini malaragwayon nga mga ekspresyon nga naangot sing direkta sa hilikuton sining babayi. (Juan 4:7-15) Kag sang naghambal sia sa mga lalaki nga nagatinlo sang ila mga lambat, gingamit niya ang malaragwayon nga ekspresyon nga nagadalahig sa pagpangisda. (Luc. 5:2-11) Sa bisan diin sini nga kahimtangan, mahimo niya kuntani mapatuhuyan ang pagpanguma, bangod nagapuyo sila sa duog sang agrikultura, apang daw ano ka epektibo pa ang pagpatuhoy niya sa ila mismo hilikuton samtang nagahatag sia sing paglaragway sa hunahuna! Ginapanikasugan mo man bala nga himuon ini?

Samtang ginpatuhoy ni Jesus ang iya atension sa “nadula nga mga karnero sa panimalay sang Israel,” si apostol Pablo ginpadala indi lamang sa Israel kundi sa Gentil man nga mga pungsod. (Mat. 15:24; Binu. 9:15) Naghimo bala ini sing kinatuhayan sa paagi sang paghambal ni Pablo? Huo. Sang nagsulat sa mga Cristiano sa Corinto, ginpatuhuyan niya ang mga palumba sa dalagan, ginsambit ang pagkaon sa mga templo sang idolo, kag ginpatuhuyan ang mga prosesyon sang kadalag-an, mga butang nga pamilyar sa sini nga mga Gentil.​—1 Cor. 8:1-10; 9:​24, 25; 2 Cor. 2:14-16.

Mahalungon ka man bala subong nanday Jesus kag Pablo sa pagpili sing mga ilustrasyon kag mga halimbawa nga gamiton sa imo pagpanudlo? Ginabinagbinag mo bala ang ginhalinan kag ang adlaw-adlaw nga hilikuton sang imo mga tagpalamati? Sa pagkamatuod, may mga pagbag-o sa kalibutan sugod pa sang unang siglo. Madamong tawo ang nakahibalo sang mga balita sa kalibutan paagi sa telebisyon. Ang mga kahimtangan sa iban nga pungsod masami nga pamilyar sa ila. Kon amo sini ang kahimtangan sa inyo duog, indi gid malain nga magkuha sing mga ilustrasyon sa sini nga mga balita. Apang, ang mga butang nga nagatandog gid sa mga tawo amo sa masami ang nagadalahig sa ila personal nga kabuhi​—ang ila puluy-an, ang ila pamilya, ang ila trabaho, ang pagkaon nga ila ginakaon, ang panahon sa ila duog.

Kon ang imo ilustrasyon nagakinahanglan sang madamo nga pagpaathag, mahimo nga nagahambal ka sing butang nga indi pamilyar sa imo mga tagpalamati. Ini nga ilustrasyon madali magpalubog sa punto nga ginatudlo. Subong resulta, mahimo madumduman sang imo mga tagpalamati ang imo ilustrasyon apang indi ang Makasulatanhon nga kamatuoran nga ginapanikasugan mo nga ipaalinton.

Sa baylo nga maghimo sing masibod nga mga pagpaanggid, si Jesus naggamit sing simple kag kinaandan nga mga butang. Gingamit niya ang magagmay nga mga butang sa pagpaathag sing dalagku nga mga butang kag ang mahapos nga mga butang sa pagpaathag sing mabudlay nga mga butang. Paagi sa pag-angot sang matag-adlaw nga mga hitabo sa espirituwal nga mga kamatuoran, ginbuligan ni Jesus ang mga tawo nga madali mahangpan ang espirituwal nga mga kamatuoran nga ginatudlo niya kag agod madumduman ini. Daw ano kaayo nga halimbawa nga sundon!