Pagpanikasog nga Malab-ot ang Tagipusuon

DUGANG pa sa pagpanaksi sa mga tawo, dapat panikasugan mo nga malab-ot ang ila tagipusuon. Sa Biblia, ang tagipusuon masami nga ginapatuhay sa kon ano ang makita sa naguwa nga panagway sang isa ka tawo. Ang malaragwayon nga tagipusuon nagarepresentar sa kon ano ang yara sa sulod sang isa ka tawo​—ang iya ginabatyag, ang tanan niya nga ginahunahuna, kon ngaa ginahunahuna niya ini, kag kon paano ining mga panghunahuna nagaapektar sa iya mga buhat. Sa sining malaragwayon nga tagipusuon nga ang binhi sang kamatuoran ginasab-ug. (Mat. 13:19) Kag sa tagipusuon dapat maggikan ang pagkamatinumanon sa Dios.​—Hulu. 3:1; Roma 6:17.

Agod magtudok sa tagipusuon ang imo panudlo, magkonsentrar sa sining mga tulumuron: (1) Hantupa kon ano na ang nagaimpluwensia sa tagipusuon sang imo tagpalamati. (2) Pabakura ang positibo nga mga kinaiya, subong sang gugma kag diosnon nga kahadlok. (3) Palig-una ang imo tagpalamati nga analisahon ang iya mga motibo agod mangin kalahamut-an gid sia kay Jehova.

Paggamit Sing Paghantop. Nanuhaytuhay ang mga rason kon ngaa wala pa ginabaton sang mga tawo ang kamatuoran. Kon nagadumala sing isa ka pagtuon sa Biblia sa puluy-an, dapat dulaon mo ang sayop nga mga pagpati kag ipresentar ang mga katunayan sa pagdula sa sayop nga mga ideya sang estudyante, ukon mahimo kinahanglan lamang nga ihatag mo ang pamatuod. Pamangkuta ang imo kaugalingon: ‘Nahibaluan bala niya nga subong isa ka tawo may espirituwal sia nga mga kinahanglanon? Ano na ang iya mga ginapatihan? Ano ang wala niya ginapatihan? Ngaa amo sini ang iya mga konklusion? Nagakinahanglan bala sia sing bulig agod malandas ang mga kailigbon nga makapugong sa iya sa pagbaton sing mga responsabilidad nga resulta sang pagtuon sing kamatuoran?’

Indi pirme mahapos ang paghibalo kon ngaa ginapatihan sang mga tawo ang pila ka butang. “Ang laygay sa tagipusuon sang tawo kaangay sang tubig nga madalom,” siling sang Hulubaton 20:5, “apang ang tawo nga mahantupon nagasag-ub sini.” Ang paghantop amo ang ikasarang sa paghangop sang indi halos makita. Nagakinahanglan ini sing maayo nga pagpanilag kag mabinalak-on nga panimuot.

Indi tanan nga komunikasyon ginahambal. Ang isa ka topiko mahimo makapabag-o sang pangguyahon ukon tono sang tingog sang estudyante. Kon ikaw isa ka ginikanan, wala sing duhaduha nga nahibaluan mo nga ang pagbag-o sa panimuot sang imo anak mahimo nagapakita sang iya reaksion sa bag-o nga impluwensia sa kabuhi. Indi pagpasapayani ini nga mga palatandaan. Mga tanda ini sa kon ano ang iya nasulod nga pagkatawo.

Ang ginpili sing maayo nga mga pamangkot makabulig sa imo nga mapautwas ang yara sa tagipusuon sang isa. Mahimo ka mamangkot: “Ano ang pamatyag mo tuhoy sa . . . ?” “Ano ang nagkumbinsi sa imo nga . . . ?” “Ano ang imo himuon kon . . . ?” Apang, maghalong nga wala mo ginapisapisa sang pamangkot ang tawo. Mahimo mataktikanhon mo nga sugdan ang imo mga pamangkot sing, “Puwede bala ako makapamangkot . . . ?” Ang paghibalo sa kon ano ang yara sa tagipusuon isa ka mabudlay nga hilikuton nga indi mahakuhako. Sa kalabanan nga kaso dapat mapalambo anay ang pagsalig sa sulod sang pila ka tion antes mangin handa ang tawo nga ipabutyag ang iya nasulod nga mga balatyagon. Bisan pa amo sina, dapat maghalong nga indi sia magbatyag nga nagapamangkot ka sang mga butang nga wala ikaw sing labot.​—1 Ped. 4:15.

Ang imo reaksion sa imo nabatian mahimo nagakinahanglan man sing paghantop. Dumduma nga ang imo tulumuron amo ang paghangop sa mga tawo agod mapat-od mo kon anong pasad-sa-Biblia nga impormasyon ang mahimo makapahulag sa ila. Punggi gilayon ang bisan ano nga huyog nga pakamalauton ang ila sayop nga mga pagtamod. Sa baylo, mangin alisto sa paghantop sang mga balatyagon sa likod sang mga pulong. Nian mahibaluan mo kon ano ang himuon; kag bangod nabatyagan sang imo estudyante nga nahangpan mo sia, mahimo gid nga magahunahuna sia sing serioso tuhoy sa imo ginasiling.​—Hulu. 16:23.

Sa pila ka kasangkaron, mapahulag mo ang mga indibiduwal bisan kon nagapamulongpulong ka sa isa ka daku nga grupo. Kon nagatulok ka sing maayo sa imo mga tagpalamati, alisto sa mga pangguyahon, kag magpamangkot sing nagapahunahuna nga retoriko nga mga pamangkot, mahimo makakuha ka sing ideya kon ano ang ginabatyag sang imo mga tagpalamati tuhoy sa imo ginasiling. Kon kilala mo gid ang imo mga tagpalamati, magpakita sing konsiderasyon sa ila mga kahimtangan. Binagbinaga ang kabilugan nga panimuot sang kongregasyon samtang nagapangatarungan ka sa ila gikan sa Pulong sang Dios.​—Gal. 6:18.

Pagpukaw Sing Mapuslanon nga mga Balatyagon. Sa tapos nga may nahangpan ka na sa kon ano ang ginapatihan sang tawo, kon ano ang wala niya ginapatihan, kag ngaa, mahimo mo mapasangkad ini. Pagkatapos sang iya pagkabanhaw, ginlab-ot ni Jesus ang tagipusuon sang iya mga disipulo paagi sa ‘pagbukas sing bug-os sang Kasulatan’ sa ila nahanungod sa mga hitabo nga bag-o lang matabo. (Luc. 24:32) Dapat mo man panikasugan nga makita ang kaangtanan sa ulot sang naeksperiensiahan sang isa ka tawo, sang iya ginahandum, kag sang iya nakita sa Pulong sang Dios. Ang tagipusuon sang isa ka estudyante matandog sa mapuslanon nga paagi kon mahangpan gid niya nga: “Ini amo ANG KAMATUORAN!”

Kon ginapadaku mo ang kaayo ni Jehova, ang iya gugma, ang iya di-bagay nga kaayo, kag ang pagkamatarong sang iya mga dalanon, ginabuligan mo ang imo mga ginatudluan nga mapalambo ang ila gugma sa Dios. Kon maghinguyang ka sing tion nga ipakita sa imo mga tagpalamati ang maayo nga mga kinaiya nga nakita sang Dios sa ila subong mga indibiduwal, ginahatagan mo sila sing rason nga magpati nga posible ang personal nga kaangtanan sa iya. Mahimo ini paagi sa pagpamalandong sa mga teksto subong sang Salmo 139:​1-3, Lucas 21:​1-4, kag Juan 6:44 kag paagi sa pagbulig sa imo mga tagpalamati nga mahangpan ang kadalumon sang paghigugma ni Jehova sa iya matutom nga mga alagad. (Roma 8:​38, 39) Ipaathag nga wala lamang ginatalupangod ni Jehova ang aton mga sayop kundi ang aton bug-os nga dalanon sang pagkabuhi, ang aton kakugi sa putli nga pagsimba, ang aton gugma sa iya ngalan. (2 Cron. 19:​2, 3; Heb. 6:10) Ginadumdom niya bisan ang pinakagamay nga mga detalye sang aton pagkahuman, kag sa tumalagsahon nga paagi, ipasag-uli niya ang kabuhi sang “tanan nga yara sa handumanan nga mga lulubngan.” (Juan 5:​28, 29; Luc. 12:​6, 7) Bangod ginhimo ang mga tawo sa dagway kag larawan sang Dios, ang paghinun-anon tuhoy sa iya mga kinaiya masami nga ginatunaan sang maayo kag tinagipusuon nga reaksion sang tawo.​—Gen. 1:27.

Matandog man ang tagipusuon kon matun-an sang isa ka tawo nga tamdon ang iban subong sang pagtamod ni Jehova. Lohiko lamang nga kon ang aton Dios nagapakita sing mahigugmaon nga pagtamod sa aton subong mga indibiduwal, nian nagapakita man sia sing kaanggid nga konsiderasyon sa iban, walay sapayan sang ila ginhalinan, nasyonalidad, ukon rasa. (Binu. 10:​34, 35) Sa tion nga nakahinakop na sing subong sini ang isa ka tawo, may mabakod na sia nga Makasulatanhon nga basihan agod dulaon sa iya tagipusuon ang dumot kag pagdampigdampig. Magabulig ini sa iya sa pagpakig-angot sing mahidaiton sa iban samtang nagatuon sia sa pagtuman sing kabubut-on sang Dios.

Ang diosnon nga kahadlok isa pa ka balatyagon nga dapat mo buligan ang iban sa pagpalambo. (Sal. 111:10; Bug. 14:​6, 7) Ining tudok nga pagtahod, ukon kahadlok sa Dios, makapahulag sa isa ka tawo nga matigayon ang butang nga mahimo indi mangin posible paagi sa iya kusog. Paagi sa paghinun-anon tuhoy sa makahalawhaw nga mga binuhatan ni Jehova kag sa iya tumalagsahon nga mahigugmaon nga kaayo, mabuligan mo ang iban sa pagpalambo sing nagakaigo nga kahadlok nga indi sia mapahamut-an.​—Sal. 66:5; Jer. 32:40.

Pat-ura nga nahangpan sang imo mga tagpalamati nga importante kay Jehova ang ila paggawi. May balatyagon sia, kag paagi sa aton reaksion sa iya panuytoy, mahimo naton sia mapasubo ukon mapahalipay. (Sal. 78:40-42) Ipakita sa mga tawo kon ngaa ang ila personal nga paggawi importante sa pagsabat sa mga hangkat ni Satanas sa Dios.​—Hulu. 27:11.

Buligi ang imo mga tagpalamati nga mahangpan nga ang paghimo sa mga ginapatuman sang Dios mapuslanon sa ila. (Isa. 48:17) Ang isa ka paagi nga mahimo ini amo ang pagpakita sing mga epekto sa lawas kag sa emosyon bangod sang pagsikway sa kaalam sang Dios, bisan sing makadali lamang. Ipaathag kon paano ang sala nagapahilayo sa aton gikan sa Dios, nagadingot sa iban sang kahigayunan nga makatuon sang kamatuoran gikan sa aton, kag nagalapas sang ila mga kinamatarong. (1 Tes. 4:6) Buligi ang imo mga tagpalamati nga pakabahandion ang mga pagpakamaayo nga ila na naagom bilang resulta sang pagtuman nila sa mga kasuguan sang Dios. Pabakura ang ila apresasyon sa katunayan nga ang paglakat sa matarong nga mga dalanon ni Jehova nagahilway sa aton gikan sa madamo nga kabudlayan. Sa tion nga may pagtuo na ang isa ka tawo sa kaalam sang mga dalanon sang Dios, kangil-aran niya ang tagsa ka dalanon nga supak sa sini. (Sal. 119:104) Tamdon niya ang pagkamatinumanon, indi subong kabug-atan, kundi subong paagi sang pagpabutyag sing mahigugmaon nga debosyon kay Jehova subong isa ka persona.

Pagbulig sa Iban sa Pagpangusisa. Agod makapadayon sa pag-uswag sa espirituwal, kinahanglan nga mangin sensitibo ang mga tawo sa kon ano ang yara sa ila tagipusuon. Ipaathag kon paano ang Biblia makabulig sa ila sa paghimo sini.

Buligi ang imo mga tagpalamati nga marealisar nga ang Biblia indi lamang isa ka rekord sang mga kasuguan, mga laygay, mga hitabo sa maragtas, kag mga tagna. Ginapahayag man sini ang panghunahuna sang Dios. Sa Santiago 1:22-25, ang Pulong sang Dios ginapaanggid sa isa ka salaming. Paagi sa aton reaksion sa ginasiling sini kag sa paagi nga ginatuman ni Jehova ang iya katuyuan, ginapadayag sang mensahe sang Biblia ang yara sa aton tagipusuon. Sa amo ginapakita sini kon paano kita ginatamod sang Dios, ang “manug-usisa sang mga tagipusuon.” (Hulu. 17:3) Palig-una ang imo mga tagpalamati nga dumdumon ini. Palig-una sila nga hunahunaon ang rekord sa Biblia nga gintipigan sang Dios para sa aton kag kon ano nga mga pagbag-o sa ila kabuhi ang dapat nila himuon agod mangin kalahamut-an pa sa iya. Buligi sila nga tamdon ang pagbasa sing Biblia subong paagi nga mahibaluan ang pag-usisa ni Jehova sa “mga hunahuna kag mga tinutuyo sang tagipusuon” agod makakooperar sila sa Dios sa paghimo sing bisan ano nga kinahanglanon nga mga pagbag-o.​—Heb. 4:12; Roma 15:4.

Mahimo nga luyag sang pila ka estudyante sa Biblia nga manghikot suno sa ila natun-an; apang nagakabalaka sila sa kon ano ang hunahunaon sang iban nga tawo. Mahimo nga nagapakigbato sila batok sa mabaskog nga mga kailigbon sang unod. Ukon mahimo nagapangatarungan sila nga nagapangita sila sang pila ka paagi nga maalagad ang Dios samtang nagapabilin sa mga buhat sang kalibutan. Ipatalupangod ang mga katalagman sining pag-alang-alang. (1 Hari 18:21) Palig-una sila nga mangamuyo sa Dios nga usisaon kag putlion ang ila tagipusuon.​—Sal. 26:2; 139:​23, 24.

Ipakita sa ila nga nahangpan ni Jehova ang ila pagpakig-away kag ginapaathag sang Biblia kon ano ang nagakatabo. (Roma 7:​22, 23) Buligi sila nga maghalong agod indi sila madaug sang mga huyog sang di-himpit nga tagipusuon.​—Hulu. 3:​5, 6; 28:26; Jer. 17:​9, 10.

Palig-una ang kada isa nga analisahon ang iya mga motibo sa paghimo sing mga butang. Tudlui sia nga pamangkuton ang iya kaugalingon: ‘Ngaa luyag ko ini himuon? Magapakita bala ini kay Jehova nga ginaapresyar ko gid ang tanan nga ginahimo niya sa akon?’ Panikasugi nga pabakuron ang kombiksion nga ang isa ka nahamut-an nga kaangtanan kay Jehova amo ang labing hamili nga butang nga matigayon sang isa.

Buligi ang imo mga tagpalamati nga mahangpan ang importansia sang pag-alagad kay Jehova upod ang ila “bug-os nga tagipusuon.” (Luc. 10:27) Nagakahulugan ini nga ang tanan nila nga balatyagon, handum, kag motibo dapat nahisanto sa mga dalanon ni Jehova. Busa tudlui ang imo mga tagpalamati nga analisahon indi lamang ang ila ginahimo kundi ang ila man ginabatyag tuhoy sa mga ginapatuman sang Dios kag ang ila mga motibo sa pag-alagad sa iya. (Sal. 37:4) Samtang nahantop sang imo mga estudyante kon diin nga mga bahin ang kinahanglan pauswagon, palig-una sila nga mangamuyo kay Jehova: “Bug-usa ang akon tagipusuon sa pagkahadlok sa imo ngalan.”​—Sal. 86:11.

Kon mapalambo sang isa ka estudyante ang personal nga kaangtanan kay Jehova, tumanon niya ang Dios bangod sang pagtuo kag indi lamang bangod sang imo pagpalig-on. Nian sa iya kaugalingon, ‘padayon niya nga pat-uron kon ano ang kalahamut-an sa Ginuo.’ (Efe. 5:10; Fil. 2:12) Ining tinagipusuon nga pagtuman nagapahalipay kay Jehova.​—Hulu. 23:15.

Dumduma nga si Jehova amo ang nagausisa sang mga tagipusuon kag nagabuyok sa mga tawo agod makatigayon sing kaangtanan sa iya. (Hulu. 21:2; Juan 6:44) Ang aton papel amo ang pagbulig. (1 Cor. 3:9) ‘Daw subong bala nga ang Dios nagapakiluoy paagi sa aton.’ (2 Cor. 5:20; Binu. 16:14) Wala ginapilit ni Jehova ang bisan sin-o nga batunon ang kamatuoran, apang samtang ginagamit naton ang Kasulatan, mahimo niya pahanabuon nga marealisar sang aton mga tagpalamati nga ang ila nabatian amo ang sabat sa ila mga pamangkot​—ukon sa ila mga pangamuyo. Dumduma ini nga katunayan kon may kahigayunan ka sa pagpanudlo, kag hanuot nga mangabay kay Jehova sang iya panuytoy kag bulig.​—1 Cron. 29:​18, 19; Efe. 1:16-18.