Magdungan sa Langitnon nga Kangga ni Jehova

“Ipamulong mo sa ila ang akon mga pulong, kon magpamati sila ukon indi.”​—⁠EZEQUIEL 2:⁠7.

1, 2. Anong harianon nga karwahe ang nakita ni Ezequiel, kag ano ang ginsugo sa iya?

ANG langitnon nga kangga ni Jehova nagatindog karon sa atubangan sang iya mga alagad. Paagi sa mata sang pagtuo, nakita nila inang harianon nga behikulo sang ila Soberanong Ginuo. Matahom ini, makahalawhaw, halangdon.

² Amo man inang harianon nga karwahe ang nakita ni Ezequiel nga manalagna sang Dios sang nagligad nga mga 2,600 ka tuig. Gikan sining kangga nga may trono—ang langitnon nga organisasyon sang espiritu nga mga tinuga sang Dios—ginhatag ni Jehova ining dramatiko nga sugo kay Ezequiel: “Ang katawhan lampingasan kag matig-a sing tagipusuon​—⁠ginapadala ko ikaw sa ila, kag isiling mo sa ila, ‘Amo ining ginasiling sang Soberanong Ginuo nga si Jehova.’ Kag kon magpamati sila ukon indi​—⁠kay sila panimalay nga mabinatuon​—⁠magakilala sila nga may manalagna sa tunga nila.”​—⁠Ezequiel 2:4, 5.

3. Ano ang modernong adlaw nga katumbas ni Ezequiel?

³ Gintuman ni Ezequiel ini nga sugo sing makugi, nagaalagad subong isahanon nga instrumento sang Dios. Sa kaanggid, ang Dios karon may isahanon nga organisasyonal nga instrumento nga kontrolado niya. Ang Ezequiel nga klase, ang hinaplas nga nagkalabilin, amo ang nagapanguna sa buluhaton nga paghatag sing katapusan nga panaksi, kag ang “dakung kadam-an” sang “iban nga mga karnero” nagatipon sa pagsupurta. (Bugna 7:​9, 10; Juan 10:16) Sing tingob sila “isa ka panong,” kag ang Maayo nga Manugbantay, si Jesucristo, nagapanguna sa ila sa idalom sang pagkasoberano sang dungganon nga Nagasakay sa Kangga, si Jehova nga Dios.

4, 5. Paano nagluntad ang kitaon nga organisasyon sang Dios, kag ano ang naeksperiensiahan sini nahisanto sa Isaias 60:⁠22?

⁴ Sa panuytoy ni Jehova, ining bug-os kalibutan nga organisasyon nagtubo halin sa diutay nga ginsuguran agod mangin makusog nga ahensia para sa pagbantala sang sugo nga ‘kahadlukan ang Dios kag hatagan sia sing himaya, kay nag-abot na ang takna sang iya paghukom.’ (Bugna 14:7) Subong nga wala ginbangon ukon gintangdo ni Ezequiel ang iya kaugalingon subong manalagna, ang kitaon nga organisasyon sang Dios wala magtuga ukon magtangdo sang iya kaugalingon. Wala ini magluntad bangod sang kabubut-on ukon panikasog sang tawo. Ang balaan nga Nagasakay sa Kangga ang nagpaluntad sini nga organisasyon. Ginhatagan sing gahom sang espiritu sang Dios kag ginasakdag sang balaan nga mga anghel, naeksperiensiahan sang katawhan ni Jehova inang dramatiko nga pagsangkad sa bagay nga ang ‘diutay nangin gamhanan nga pungsod.’​—⁠Isaias 60:22.

⁵ Kapin sa 4,000,000 ka mga Saksi ni Jehova ang nagabantala sang mensahe sang Ginharian sa 212 ka kadutaan. Gingrupo sila sa kapin sa 63,000 ka kongregasyon nga gin-organisar sa mga sirkito kag mga distrito. Ang ekstensibo nga sanga talatapan kag mga pasilidad sa pag-imprinta nagapanghikot sa idalom sang panuytoy sang Nagadumala nga Hubon subong ang sentro sang organisasyon sa ulong-talatapan. Subong nga daw isa sila ka tawo, ang tanan nagalakat sing abante, nagabantala sang maayong balita, nagatudlo sa mga nagapamati, nagapatindog sing mga duog tiliponan. Huo, ang kitaon nga organisasyon ni Jehova nagadungan sa langitnon nga kangga kag sa Nagasakay diri.

6. Ano ang ginalakip sang pagdungan sa kitaon nga organisasyon ni Jehova?

⁶ Kon ikaw isa ka Saksi ni Jehova, nagadungan ka bala sa kitaon nga organisasyon sang Dios? Indi lamang ini pagtambong sa Cristianong mga miting kag paghinguyang sing tion sa ministeryo. Una, ang pagdungan nagahilabot sa pag-uswag kag espirituwal nga pagtubo. Nagalakip ini sang pagtigayon sing positibo nga panimuot, pagpahamtang sing nagakaigo nga mga prioridad, kag nagahisuno sa tion. Kon nagadungan kita sa langitnon nga kangga ni Jehova, ang aton kabuhi nagahisanto sa mensahe nga aton ginabantala.

7. Ngaa binagbinagon ang paggawi ni Ezequiel subong manalagna sang Dios?

⁷ Nahanungod sa pagdungan, ang modernong-adlaw nga mga alagad ni Jehova makatuon sing daku gikan sa halimbawa ni Ezequiel. Bisan pa gintangdo sing pinasahi subong manalagna ni Jehova, si Ezequiel may mga balatyagon, mga kabalaka, kag mga kinahanglanon sa gihapon. Halimbawa, subong hoben pa nangasawa, nagkasubo gid sia sing daku sang napatay ang iya asawa. Apang, wala niya ginkalimti ang gintangdo sa iya subong manalagna ni Jehova. Paagi sa pagbinagbinag sa kon paano man naggawi si Ezequiel sa iban nga mga butang, mapabakud naton ang aton kaugalingon nga magdungan sa kitaon nga organisasyon sang Dios. Nagahimo ini sa aton nga magdungan sa iya kitaon nga organisasyon.

Ginbaton kag Gintuman ang Sugo

8. Nahanungod sa sugo sa iya, anong halimbawa ang ginpahamtang ni Ezequiel?

⁸ Si Ezequiel nagpahamtang sing maayong halimbawa paagi sa pagbaton kag sa pagtuman sang ginsugo sa iya. Apang, nagakinahanglan sing pagkamasinulundon kag kaisog agod matuman ini, kay aton mabasa: “O anak sang tawo, dili magkahadlok sa ila; ukon magkahadlok sa ila pulong, bisan ang mga sapinit kag mga talongon yara sa imo kag nagapuyo ka sa mga iwiiwi. Dili magkahadlok sa ila mga pulong ukon magkahangawa sa ila mga panulok, kay panimalay sila nga mabinatuon. Kag ipamulong mo sa ila ang akon mga pulong, kon magpamati sila ukon indi, kay mabinatuon gid sila. Apang ikaw, O anak sang tawo, pamatii ang isiling ko sa imo. Dili ka magmabinatuon kaangay sinang panimalay nga mabinatuon.”​—⁠Ezequiel 2:​6-8.

9. Paagi lamang sa paghimo sang ano nga si Ezequiel wala sing kasal-anan sa dugo?

⁹ Si Ezequiel indi dapat mangin walay interes ukon mahinadlukon, nga nagakinahanglan pirme tuslukon agod tumanon ang sugo sa iya. Mangin wala lamang sia sing kasal-anan sa dugo kon kinabubut-on kag masidla niya nga ipamulong ang mga pulong ni Jehova. Si Ezequiel ginsugo: “Apang kon ikaw magpaandam sa malauton kag wala sia magtalikod sa iya pagkamalaut ukon sa iya malaut nga dalanon, mapatay sia sa iya kalautan; apang naluwas mo ang imo kalag.”​—⁠Ezequiel 3:⁠19.

10. Paano napamatud-an ang Ezequiel nga klase nga kaangay sang manalagna?

¹⁰ Subong sa kaso ni Ezequiel, ginbaton sang hinaplas nga Ezequiel nga klase ang ginhatag sa ila sang Dios nga sugo kag ginatuman ini. Kon kita mga Saksi ni Jehova, dapat naton dumdumon nga ang aton kabuhi kag ang kabuhi sang iban nasandig sa aton pagkamasinulundon. (1 Timoteo 4:​15, 16) Ang tagsa ka Saksi dapat magdungan sa organisasyon ni Jehova. Ang Dios indi magahigot sa aton sa iya kangga kag magaguyod sa aton. Ang dipagsapak kag nabahinbahin nga tagipusuon nagapakahuya sa Nagasakay sa Kangga. Gani ang kitaon nga organisasyon ni Jehova nagalaygay sa aton nga pirme huptan ang balaan nga mga interes sa sentro sang aton kabuhi. Ang dalayon nga pagsunod sa sina nga laygay nagahupot sa aton nga makadungan sa organisasyon sang Dios kag nagahimo sang aton sagrado nga ministro nga indi lamang rutina, de-makina. Sa pagkamatuod, ang katawhan ni Jehova subong kabilugan nagapakita sing talalupangdon nga debosyon. Ang aton indibiduwal nga bahin amo ang pagpabilin nga nagadungan.

Nagapasulod sa Tagipusuon sang mga Pulong sang Dios

11. Anong halimbawa ang ginpahamtang ni Ezequiel may kaangtanan sa mga pulong sang Dios?

¹¹ Si Ezequiel nagpahamtang man sing maayong halimbawa paagi sa pagpasulod sa iya tagipusuon sang mga pulong sang Dios. Sang ginsugo, ginkaon niya ang ginhatag sang Dios nga linukot. “Nangin subong ini sang dugos katam-is sa akon baba,” siling ni Ezequiel. Bisan pa ang linukot puno sang “mga panalabiton kag paglalaw kag pagkakailo,” matam-is ini kay Ezequiel bangod gin-apresyar niya ang kadungganan nga marepresentar si Jehova. Matam-is nga eksperiensia para sa manalagna nga tumanon ang ginhatag sang Dios sa iya nga asaynment. Ang Dios nagsiling sa iya: “Anak sang tawo, batuna sa imo tagipusuon ang tanan kong pulong nga ipamulong ko sa imo, kag pamatii sang imo mga igdulungog.” (Ezequiel 2:9–3:3, 10) Ang mga palanan-awon nagpaalisto gid kay Ezequiel kon ano ang gintugot sang Dios sa iya nga pakigbahinan kag nagpabakud sang iya kaangtanan kay Jehova.

12. Ano ang ginhimo ni Ezequiel sa kapin sa duha ka dekada nga matagnaon nga pag-alagad?

¹² Si Ezequiel ginhatagan sing mga palanan-awon kag mga mensahe para sa lainlain nga mga katuyuan kag mga pagpakigsugilanon. Dapat sia mamati sing maayo kag nian magpamulong kag magpanghikot subong sang ginsugo. Ang bag-ong impormasyon kag mga paagi ginsugid sa iya sing amat-amat sa sulod sang mga 22 ka tuig sang matagnaon nga pag-alagad. Kon kaisa si Ezequiel nagpamulong sang ginhatag sing pinasahi nga pinamulong sa mensahe. Sa iban nga mga okasyon, gin-akto niya nga wala sing hambal ang sugo sang Dios, subong sang paghigda sa tisa nga nagasimbulo sa Jerusalem. (Ezequiel 4:​1-8) Ang iya personal nga halimbawa, subong sang iya reaksion sang napatay ang iya asawa, nagadala man sing mensahe. (Ezequiel 24:​15-19) Dapat sia mangin nahisuno sa tion, pirme nagahatag sing husto nga mensahe kag nagahimo sing husto nga buhat sa husto nga tion. Si Ezequiel may tuman kalapit kag progresibo nga kaangtanan sa pagpangabudlay upod kay Jehova.

13. Paano naton matukod ang suod nga kaangtanan kay Jehova?

¹³ Sa kaanggid, agod matukod kag mahuptan ang suod nga kaangtanan kay Jehova subong mga masigkamanugpangabudlay niya, dapat naton ipasulod sa tagipusuon ang Pulong sang Dios. (1 Corinto 3:9) Ang pagdungan sa kitaon nga organisasyon sang Dios sa sining bahin nagakinahanglan nga magdungan kita sa pag-ilig sang espirituwal nga pagkaon samtang ginasuplay ini sa nagakaigo nga tion. (Mateo 24:​45-47) Ang “putli nga hambal” padayon nga nagasangkad. (Sofonias 3:9) Lamang kon kita nahisuno sa tion nga matuman naton sing masinulundon ang panuytoy sang Nagasakay sa Kangga.

14, 15. Anong rutina ang kinahanglanon agod magdungan sa lakat sang organisasyon sang Dios?

¹⁴ Bangod sina, kinahanglan nga may yara kita maayo nga rutina sang personal nga pangamuyo, pribado nga pagtuon, kag pagpakigbahin sa balaan nga pagministeryo sang maayong balita. (Roma 15:16) Dumduma ang halimbawa ni Ezequiel sang ginkaon niya ang linukot nga nagaunod sang mensahe sang Dios. Ginkaon ni Ezequiel ang bug-os nga linukot, indi lamang ang bahin sini. Wala niya ginpudyot kag ginpili ang diutay lang nga bahin nga luyag niya. Sa kaanggid, dapat naton himuson ang aton personal nga pagtuon sang Biblia kag sang Cristianong mga publikasyon agod magdungan sa ilig sang espirituwal nga pagkaon, kag dapat naton kaunon ang tanan nga ginbutang sa espirituwal nga latok, lakip ang madalom nga mga kamatuoran.

¹⁵ Mapangamuyuon nga ginapanikasugan bala naton nga hangpon ang kahulugan sang matig-a nga mga pagkaon? Ang pagdungan nagakinahanglan nga ang aton ihibalo kag paghangop nagalabaw sa panugod, kay aton mabasa: “Ang tagsatagsa nga nagakabuhi sa gatas disampaton sa pulong sang pagkamatarong, kay bata sia. Apang ang pagkaon nga mabaskug naigo sa mga hamtong, sa mga nahanas sa ila painoino sa pagpain sang maayo gikan sa malaut.” (Hebreo 5:​13, 14) Huo, ang espirituwal nga pag-uswag importante nga bahin sang pagdungan sa lakat sang organisasyon sang Dios.

Wala Nagluya Bangod sang Dipagsapak

16, 17. Paano gin-atubang ni Ezequiel ang dipagsapak, yaguta, kag indi pagpamati?

¹⁶ Nagpahamtang man si Ezequiel sing maayo nga halimbawa paagi sa pagkamasinulundon kag wala nagtugot sang iya kaugalingon nga magluya bangod sang dipagsapak ukon yaguta. Sa kaanggid, paagi sa pagdungan sa pag-uswag sang putli nga hambal, ginasunod naton ang panuytoy sang harianon nga Nagasakay sa Kangga. Busa nasangkapan kita sa pagpamati sa iya mga sugo, napabakud nga indi magluya bangod sang dipagsapak ukon yaguta sang ginasugiran naton sang mensahe sa paghukom ni Jehova. Kaangay ni Ezequiel, ang Dios nagpaandam sa aton nga ang iban nga tawo magapamatok sing daku, mangin lampingasan kag matig-a sing ulo. Ang iban indi magapamati bangod indi sila mamati kay Jehova. (Ezequiel 3:​7-9) Apang ang iban mangin salimpapaw, subong sang ginasiling sang Ezequiel 33:​31, 32: “Nagaabot sila sa imo subong sang pag-abot sang katawhan, kag nagalingkod sila sa imo atubangan subong nga akon katawhan; kag nagapamati sila sang imo mga pulong apang wala nila sila ginahimua, kay sa ila baba nagapakita sila sing daku nga gugma apang ang tagipusuon nila nagasunod sa ila daug. Kag, yari karon! ikaw sa ila subong sang kalantahon nga makawiwili gid sang isa nga may tingog nga matahom kag makalanton sing maayo sa tulunggon. Kay ginapamatian nila ang imo mga pulong, apang wala nila sila paghimua.”

¹⁷ Ano ang mangin resulta? Ang bersikulo 33 nagadugang: “Kon ini mahanabo​—⁠yari karon! nagaabot ini​—⁠nian makahibalo sila nga may manalagna sa tunga nila.” Ginapakita sina nga mga pulong nga si Ezequiel wala nag-untat bangod kay wala sing namati. Ang indi pagsapak sang iban wala naghimo sa iya nga dimagsapak. Mamati man ukon indi ang mga tawo, ginsunod niya ang Dios kag gintuman ang ginsugo sa iya.

18. Anong mga pamangkot ang mapamangkot mo sa imo kaugalingon?

¹⁸ Ginapadaku pa gid karon sang kitaon nga organisasyon ni Jehova ang pahibalo nga ang tanan dapat magkahadlok sa Dios kag maghatag sa iya sing himaya. Nagabatas ka bala kon ginamulay bangod sang pagtindog sing masidla sa pagpanaksi sa Ginharian, bangod sang maayo nga moralidad sang imo estilo sang pagkabuhi? Nagatindog ka bala sing malig-on kon ikaw ang puntariya sang pag-ipit bangod sang indi pagbaton sang dugo, indi pagsimba sa pungsodnon nga mga emblema, indi pagsaulog sang kalibutanon nga mga piesta opisyal?​—⁠Mateo 5:​11, 12; 1 Pedro 4:​4, 5.

19. Nahanungod sa panuytoy, ano ang himuon naton agod magdungan sa langitnon nga kangga ni Jehova?

¹⁹ Indi ini mahapos, apang ang nagabatas tubtob sa katapusan maluwas. (Mateo 24:13) Sa bulig ni Jehova, indi naton pagatugutan ang mga tawo sang kalibutan nga maghimo sa aton nga kaangay nila kag gani indi na makadungan sa langitnon nga kangga ni Jehova. (Ezequiel 2:​8; Roma 12:21) Kon nagadungan kita sa kaangay sang kangga nga anghelikong organisasyon, magasunod kita dayon sa panuytoy kag mga instruksion nga nabaton paagi sa kitaon nga organisasyon sang Dios. Si Jehova nagaaman sang kon ano ang ginakinahanglan naton agod maatubang ang mga pagsalakay sa aton pagtuo, mahuptan ang aton pagpanguyapot sa Pulong sang kabuhi, kag mahuptan ang aton mga mata nga natuon sa espirituwal nga mga katunayan nga nasentro sa Harianon nga Nagasakay sa langitnon nga kangga.

Ginpahulag nga Magdungan

20. Anong iban nga mga butang nga ginrekord ni Ezequiel ang dapat magpahulag sa aton sa pagdungan?

²⁰ Ang mga palanan-awon ni Ezequiel dapat magpahulag sa aton nga magdungan. Indi lamang niya ginbantala ang paghukom sang Dios sa Israel kundi ginrekord man ang mga tagna sang pagpasag-uli. Gintudlo ni Ezequiel ang Isa nga may legal nga kinamatarong sa paggahom sa trono ni Jehova sa gintalana nga tion. (Ezequiel 21:27) Inang Harianon nga Alagad, “si David,” magatipon liwat sang katawhan sang Dios kag magabantay sa ila. (Ezequiel 34:​23, 24) Bisan pa salakayon sila ni Gog sang Magog, ang Dios magaluwas sa ila, kag ang Iya mga kaaway mapilitan sa ‘pagkilala kay Jehova’ bisan pa nga sila malaglag. (Ezequiel 38:​8-12; 39:​4, 7) Nian ang mga alagad sang Dios magaagom sing kabuhi nga walay katapusan sa sistema sang putli nga pagsimba nga nagahilabot sa espirituwal nga templo. Ang tubig sang kabuhi nga nagailig halin sa santuario mangin tuburan sang kalan-on kag inugbulong, kag ang duta nga palanublion bahinbahinon para sa kabulahanan nila.​—⁠Ezequiel 40:​2; 47:9,12, 21.

21. Ngaa ang katungdanan sang modernong-adlaw nga mga Saksi labi pa sang sa kay Ezequiel?

²¹ Daw ano gid ang kalipay ni Ezequiel nga isulat inang mga tagna! Apang, ang katungdanan sang modernong-adlaw nga mga Saksi labi pa. Nagakabuhi kita nga ang iban sadtong mga tagna ginatuman. Sa katunayan, aktibo kita nga nagapakigbahin sa iban nga mga katumanan. Paagi sa aton pagkabuhi, ginapakita bala naton sing indibiduwal ang aton pagtuo nga si Jesus karon nagagahom subong ang Isa nga may legal nga kinamatarong? Personal bala kita nga kombinsido nga pakabalaanon sa ulihi ni Jehova ang iya kaugalingon kag luwason pasulod sa bag-ong kalibutan yadtong nagadungan sa iya organisasyon? (2 Pedro 3:13) Ina nga pagtuo, ginaupdan sang mga buhat sang pagtuo, nagapakita nga sa pagkamatuod nagadungan kita sa langitnon nga kangga ni Jehova.

Padayon sa Pagdungan

22. Ano ang mahimo agod malikawan ang mga tublag sa paghupot sang maathag nga espirituwal nga panan-aw?

²² Bangod ‘nakakaput na sa arado,’ indi kita dapat magbalikid nga may kahidlaw sa bisan ano nga mahatag sang kalibutan. (Lucas 9:​62; 17:​32; Tito 2:​11-13) Gani punggan naton ang bisan anong huyog sa pagtipon sing mga bahandi sa duta, kag huptan naton ang aton mata nga simple, natuon sa Ginharian. (Mateo 6:​19-22, 33) Ang pagpasimple sang aton kabuhi, pagbuhin sang kalibutanon nga mga bug-at kon mahimo, magabulig sa aton sa pagdungan sa organisasyon ni Jehova. (Hebreo 12:​1-3) Ang mga tublag magaburon sang aton pagtan-aw sa langitnon nga kangga kag sa Nagasakay diri. Apang paagi sa bulig niya, mahuptan naton ang maathag nga espirituwal nga pagtan-aw, subong sang kay Ezequiel.

23. Ano ang dapat himuon sang matutom nga mga Saksi tungod sa mga bag-ohan?

²³ Ang aton responsabilidad subong mga Saksi ni Jehova nagalakip sang pagbulig sa madamong mga bag-ohan nga magdungan sa langitnon nga kangga sang Dios. Sang 1990 halos 10,000,000 ang nagtambong sa Memoryal sang kamatayon ni Jesucristo. Samtang madamo sining mga indibiduwal ang nagatambong sa iban nga Cristianong mga miting, dapat nila mahangpan ang importansia sang pag-uswag upod sang kitaon nga organisasyon ni Jehova. Subong matutom nga mga Saksi, mabuligan naton sila paagi sa espiritu nga aton ginapakita kag sa pagpalig-on nga aton ginahatag.

24. Ano ang dapat naton himuon sa sining katapusan nga mga tion?

²⁴ Amo ining katapusan nga mga tion. Paagi sa mata sang pagtuo, nakita naton ang langitnon nga kangga nga nagdulog sa atubangan naton. Ang harianon nga Nagasakay sa Kangga naghatag sa iya kitaon nga organisasyon sing sugo nga magbantala sa mga pungsod agod nga, sa katapusan, makilala nila kon sin-o si Jehova. (Ezequiel 39:7) Himusli ining dakung kahigayunan sa pagpakigbahin sa pagbindikar sa pagkasoberano sang Dios kag sa pagpakabalaan sa iya balaan nga ngalan paagi sa pagdungan sa langitnon nga kangga ni Jehova.

Paano Mo Sabton?

◻ Anong halimbawa ang ginpahamtang ni Ezequiel kon tuhoy sa sugo sa iya?

◻ Ano ang kahulugan sang pagdungan sa organisasyon sang Dios?

◻ Paano gintamod ni Ezequiel ang mga pulong ni Jehova?

◻ Paano naton masunod ang halimbawa ni Ezequiel sa pag-atubang sa dipagsapak?

◻ Ano ang dapat magapahulag sa mga alagad ni Jehova sa pagdungan sa iya langitnon nga kangga?

[Mga Laragway sa pahina 15]

Ano ang ginakinahanglan agod magdungan sa langitnon nga kangga ni Jehova?

[Laragway sa pahina 16]

Gin-apresyar ni Ezequiel ang hatag-Dios nga mga pribilehiyo niya. Ikaw bala?