TULUN-AN 2

Nagapakigsugilanon nga Paagi

2 Corinto 2:17

KON ANO ANG HIMUON: Mangin natural kag sinsero sa paghambal sang imo ginabatyag sa topiko kag sa mga tagpalamati.

Magpangamuyo kag maghanda sing maayo. Magpangamuyo para makakonsentrar sa mensahe, indi sa imo kaugalingon. Dapat maathag sa imo ang panguna nga mga punto nga luyag mo isiling. Ipabutyag ini sa imo kaugalingon nga mga tinaga; indi lang pagbasaha ang kada tinaga.

Kon luyag mo basahon ang Biblia ukon ang iban nga publikasyon, dapat sunado mo ini para mabasa mo sing maayo. Kon ginkutlo ang ginsiling sang isa ka tawo, basaha ini nga may balatyagon, pero indi magsobra ka dramatiko.
Maghambal sing tinagipusuon. Hunahunaa kon ngaa dapat mabatian sang imo mga tagpalamati ang mensahe. Magpokus sa ila. Ipakita sa imo postura, pagkumpas, kag ekspresyon sang nawong ang pagkasinsero kag pagkamainabyanon.

Ang pagkanatural wala nagakahulugan nga wala mo ginabantayan ang imo ginahambal. Hupti ang dignidad sang imo mensahe paagi sa paghambal sing maathag kag paggamit sing husto nga gramatika.
Tuluka ang imo mga tagpalamati. Kon wala man lang sing malain, tuluka sa mata ang imo mga tagpalamati. Kon nagapamulongpulong, tuluka ang kada indibiduwal sa baylo sang kabilugan nga grupo.