Kon Paano Gamiton ang Sampol nga Pag-istoryahanay

Sugod sang Enero 2018, makita ang sampol nga pag-istoryahanay sa una nga pahina sang Ang Aton Cristianong Pagkabuhi kag Pagministeryo—Workbook Para sa Miting. Paano naton ini gamiton?

Kon Nagahatag sang Bahin: Dapat mo gamiton ang pamangkot, teksto, kag ang sunod nga istoryahan sa sampol nga pag-istoryahanay. Pero indi buot silingon nga sundon mo ang tanan nga ginhimo kag ginsiling sa video. Puede ka maggamit sang lain nga setting, introduksion, pangatarungan, kag iban pa. Mahimo ka man magtanyag sang publikasyon nga ara sa aton Teaching Toolbox, bisan pa wala ini sa instruksion sa imo bahin.

Kon Nagaministeryo: Ang sampol nga pag-istoryahanay makahatag sa aton sing epektibo nga mga ideya. Kon interesado ang tagbalay kag gusto niya makahibalo sing dugang pa, puede mo padayunon ang pag-istoryahanay kag mahimo mo gamiton ang ideya sang sampol nga sunod nga pag-istoryahanay. Puede mo bag-uhon ang sampol nga pag-istoryahanay ukon maggamit sang lain nga paagi. Mas interesado bala ang mga tawo sa inyo teritoryo sang topiko sang nagligad nga bulan ukon sang lain nga teksto? Mas interesado bala sila sa mga butang nga bag-o lang natabo ukon sa balita sa inyo lugar? Puede mo gamiton ang sampol nga pag-istoryahanay sa lainlain nga paagi, pero dapat ang imo tulumuron amo nga ‘himuon ang tanan tungod sa maayong balita agod mabantala ini sa iban.’—1Co 9:22, 23.