Kon Paano Makasugod sa Pag-istoryahanay Paagi sa mga Tract

Sugod sang Enero 2018, makita sa kober sang Pagkabuhi kag Pagministeryo nga Workbook Para sa Miting ang mga sampol nga pag-istoryahanay. Ginapalig-on kita sini nga magpokus kon paano mag-istorya sa mga tawo imbes nga magpresentar lang sang literatura sa ila. Para buligan kita, may mga video para sa sampol nga pag-istoryahanay kon paano makasugod sa pag-istoryahanay nga ginagamit lang ang Biblia. Buot bala silingon sini nga indi na naton paggamiton ang literatura sa pagbantala? Indi man. Halimbawa, epektibo gid ang mga tract para makasugod sa pag-istoryahanay. Tilawi ang masunod nga paagi kon ginagamit ang bisan ano nga tract:

1. Gamita ang pamangkot nga may pililian nga sabat sa atubang sang tract.

2. Ipakita ang sabat sang Biblia sa (mga) teksto nga ara sa ibabaw sang ikaduha nga pahina. Kon may tion pa, basaha kag binagbinaga ang pila ka impormasyon sa sulod sang tract.

3. Ihatag ang tract sa tagbalay, kag silinga sia nga basahon ang iban nga impormasyon sa tract.

4. Antes maghalin, ipakita sa iya ang pamangkot sa “Binagbinaga” kag silinga sia nga istoryahan ninyo ang sabat sang Biblia sa sunod nga tion.

Sa pagbalik mo, istoryahi ninyo ang sabat sang Biblia kag magbilin liwat sing pamangkot nga sabton mo sa masunod. Puede ka makapili sing pamangkot sa aton website ukon sa publikasyon nga makita sa likod sang tract. Sa nagakaigo nga tion, ipresentar sa iya ang brosyur nga Maayong Balita Halin sa Dios! ukon ang iban pa nga publikasyon nga ginagamit sa pagtuon nga makita sa aton Teaching Toolbox.