Mga Reperensia Para sa Pagkabuhi kag Pagministeryo nga Workbook Para sa Miting
HULYO 6-12
MGA BAHANDI SA PULONG SANG DIOS | EXODO 6-7
“Karon Makita Mo Kon Ano ang Himuon Ko sa Paraon”
(Exodo 6:1) Nagsiling si Jehova kay Moises: “Karon makita mo kon ano ang himuon ko sa Paraon. Paagi sa akon gahom mapilitan sia nga palakton sila, kag paagi sa akon gahom mapilitan sia nga pahalinon sila sa iya duta.”
(Exodo 6:6, 7) “Gani, isiling sa mga Israelinhon: ‘Ako si Jehova, kag hilwayon ko kamo sa inyo mabug-at nga obra kag pagkaulipon sa Egipto. Hukman ko ang Egipto kag luwason ko kamo paagi sa akon gamhanan nga butkon. 7 Kuhaon ko kamo bilang akon katawhan, kag mangin Dios ninyo ako, kag mahibaluan ninyo nga ako si Jehova nga inyo Dios nga naghilway sa inyo sa pagkaulipon sa Egipto.
it-2-E 436 ¶3
Moises
May daku man nga pagbag-o sa mga lalaki sang Israel. Sang primero ginbaton nila ang kredensial ni Moises, pero sang naeksperiensiahan nila ang grabe nga kabudlayan bangod sa sugo sang Paraon, nagreklamo sila kontra kay Moises asta sa punto nga nagluya ang iya buot kag nagpakitluoy sia kay Jehova. (Ex 4:29-31; 5:19-23) Gani ginpalig-on sia sang Labing Gamhanan paagi sa pagpahayag nga tumanon Niya ang ginahulat nanday Abraham, Isaac, kag Jacob, nga amo ang bug-os nga pagpahayag sang kahulugan sang iya ngalan nga Jehova kon luwason na niya ang Israel kag tukuron ini bilang isa ka daku nga pungsod sa ginsaad nga duta. (Ex 6:1-8) Bisan pa sini, wala gihapon namati ang mga lalaki sang Israel kay Moises. Pero pagkatapos sang ikasiam nga kalalat-an, handa na sila nga suportahan sia kag magkooperar sa iya, amo nga pagkatapos sang ikanapulo nga kalalat-an, maorganisar kag mapangunahan na niya sila paggua sa mahim-ong nga paagi “nga daw organisado nga mga soldado.”—Ex 13:18.
(Exodo 7:4, 5) Apang indi magpamati ang Paraon sa inyo, kag gamiton ko ang gahom sang akon kamot batok sa Egipto kag paguaon ko sa duta sang Egipto ang mga Israelinhon, ang akon katawhan nga daw pareho sang mga soldado, kag hukman ko ang Egipto. 5 Kag makilala sang mga Egiptohanon nga ako si Jehova kon gamiton ko ang akon gahom batok sa Egipto kag paguaon ko ang mga Israelinhon halin sa ila.”
it-2-E 436 ¶1-2
Moises
Sa Atubang sang Paraon sang Egipto. Sanday Moises kag Aaron nangin panguna nga mga karakter sa ‘inaway sang mga dios.’ Paagi sa madyikero nga mga saserdote nga mahimo ginapangunahan nanday Jannes kag Jambres (2Ti 3:8), nangayo sing bulig ang Paraon sa tanan nga dios sang Egipto para kontrahon ang gahom ni Jehova. Ginpamatud-an sang una nga milagro nga ginhimo ni Aaron sa atubang sang Paraon suno sa sugo ni Moises nga mas gamhanan si Jehova sangsa mga dios sang Egipto, pero nagpakatig-a gihapon ang Paraon. (Ex 7:8-13) Sang ulihi, sang natabo ang ikatlo nga kalalat-an, bisan ang mga saserdote napilitan nga mag-aku, “Tudlo ini sang Dios!” Kag nahalitan gid sila sang kalalat-an nga mga hubag amo nga indi sila makaatubang sa Paraon para pamatukan si Moises sang natabo ina nga kalalat-an.—Ex 8:16-19; 9:10-12.
Ang mga kalalat-an nagpahumok kag nagpatig-a sang tagipusuon. Si Moises kag si Aaron ang nagpahibalo sang tagsa sa Napulo ka Kalalat-an. Natabo ang mga kalalat-an suno sa ginpahibalo ni Moises, nga nagapamatuod nga gintangdo sia bilang representante ni Jehova. Napahayag ang ngalan ni Jehova kag ginaistoryahan gid ini sa Egipto, nga nagresulta sa paghumok kag pagtig-a sang tagipusuon may kaangtanan sa sina nga ngalan—nagpahumok sa tagipusuon sang mga Israelinhon kag pila ka Egiptohanon; nagpatig-a sa tagipusuon sang Paraon kag sang iya mga manuglaygay kag mga nagasuporta sa iya. (Ex 9:16; 11:10; 12:29-39) Imbes magpati nga napaakig nila ang ila mga dios, nabal-an sang mga Egiptohanon nga si Jehova ang nagahukom sa ila mga dios. Pagkatapos sang ikasiam nga kalalat-an, ‘gintahod man si Moises sang mga alagad sang Paraon kag sang mga tawo sa duta sang Egipto.’—Ex 11:3.
Pagkutkot sing Espirituwal nga mga Hiyas
(Exodo 6:3) Nagpakita ako kay Abraham, kay Isaac, kag kay Jacob bilang Dios nga Labing Gamhanan, apang tuhoy sa akon ngalan nga Jehova wala ako magpakilala sa ila kon sin-o gid ako.
it-1-E 78 ¶3-4
Labing Gamhanan
Gingamit ni Jehova ang titulo nga “Dios nga Labing Gamhanan” (ʼEl Shad·daiʹ) sang nagpromisa sia kay Abraham parte sa pagbun-ag kay Isaac, ang promisa diin kinahanglan ni Abraham ang daku nga pagtuo sa gahom sang Dios sa pagtuman sina nga promisa. Pagkatapos sadto, gingamit ini nga titulo sang ginpatuhuyan ang Dios bilang ang isa nga magapakamaayo kay Isaac kag kay Jacob nga mga manunubli sang katipan kay Abraham.—Ge 17:1; 28:3; 35:11; 48:3.
May kaangtanan sa sini, si Jehova nagsiling kay Moises sang ulihi: “Nagpakita ako kay Abraham, kay Isaac, kag kay Jacob bilang Dios nga Labing Gamhanan [beʼElʹ Shad·daiʹ], apang tuhoy sa akon ngalan nga Jehova wala ako magpakilala sa ila kon sin-o gid ako.” (Ex 6:3) Pero indi buot silingon sini nga wala makilala sini nga mga patriarka ang ngalan nga Jehova, kay pirme nila ini ginagamit pati sang iban pa nga nauna sa ila. (Ge 4:1, 26; 14:22; 27:27; 28:16) Ang matuod, sa libro sang Genesis, nga nagasaysay sang kabuhi sang mga patriarka, ang tinaga nga “Labing Gamhanan” 6 ka beses lang nga mabasa, pero ang personal nga ngalan ni Jehova mabasa sing 172 ka beses sa orihinal nga Hebreo nga teksto. Pero bisan pa nahangpan sini nga mga patriarka, paagi sa ila eksperiensia, ang kinamatarong kag mga kalipikasyon sang Dios para sa titulo nga “Labing Gamhanan,” wala pa sila sing kahigayunan nga mahangpan ang bug-os nga kahulugan kag implikasyon sang iya personal nga ngalan nga Jehova. Parte sa sini, ang The Illustrated Bible Dictionary (Vol. 1, p. 572) nagsiling: “Ang una nga pagpahayag, sa mga Patriarka, may ara sing kaangtanan sa mga promisa parte sa malayo pa nga palaabuton; ginapakita sini nga sigurado sila nga Sia, si Yahweh, isa ka Dios (ʼel) nga may ikasarang (posible nga isa ka kahulugan sang sadday) nga tumanon ini nga mga promisa. Ang pagpahayag didto sa kahoykahoy mas labaw pa kag mas personal, kag ang gahom sang Dios kag ang iya direkta kag nagapadayon nga presensia upod sa ila nalakip tanan sa pamilyar nga ngalan nga Yahweh.”—Gin-edit ni J. D. Douglas, 1980.
(Exodo 7:1) Dayon nagsiling si Jehova kay Moises: “Ginhimo ko ikaw nga kaangay sang Dios sa Paraon, kag si Aaron nga imo utod ang mangin imo manalagna.
it-2-E 435 ¶5
Moises
Kalipikado gihapon si Moises bisan pa mahuluy-on sia. Pero mahuluy-on si Moises, amo kon ngaa nangatarungan sia nga indi sia maayo maghambal. Diri makita nga nagbag-o na si Moises kon ipaanggid sang tion nga nagpresentar sia nga luwason niya ang Israel 40 ka tuig na ang nagligad. Padayon sia nga nangatarungan kay Jehova para balibaran ang ginapahimo sa iya. Bisan pa naakig ang Dios sa sini, wala niya ginsikway si Moises kundi ginhimo niya nga humalambal para kay Moises ang utod sini nga si Aaron. Gani, pareho nga si Moises ang representante sang Dios, si Moises daw nangin “Dios” man ni Aaron, nga nangin humalambal para sa iya. Sang nakighambal sila liwat sa tigulang nga mga lalaki sang Israel kag nag-atubang sa Paraon, ginapakita nga ginhatag sang Dios kay Moises ang mga instruksion kag mga sugo, dayon ginpaalinton ini ni Moises kay Aaron, amo kon ngaa si Aaron ang aktual nga nakighambal sa Paraon (ang nagbulos sa Paraon nga ginpalagyuhan ni Moises 40 ka tuig na ang nagligad). (Ex 2:23; 4:10-17) Sang ulihi, ginpatuhuyan ni Jehova si Aaron bilang “manalagna” ni Moises, buot silingon, pareho nga si Moises ang manalagna sang Dios, nga ginhatagan Niya sing instruksion, si Aaron naman dapat hatagan ni Moises sang instruksion. Dugang pa, ginsilingan si Moises nga ginhimo sia nga “kaangay sang Dios sa Paraon,” buot silingon, ginhatagan sia sang Dios sing gahom kag awtoridad nga labaw sa Paraon, amo kon ngaa indi sia dapat mahadlok sa hari sang Egipto.—Ex 7:1, 2.
Pagbasa sa Biblia
(Exodo 6:1-15) Nagsiling si Jehova kay Moises: “Karon makita mo kon ano ang himuon ko sa Paraon. Paagi sa akon gahom mapilitan sia nga palakton sila, kag paagi sa akon gahom mapilitan sia nga pahalinon sila sa iya duta.” 2 Dayon nagsiling ang Dios kay Moises: “Ako si Jehova. 3 Nagpakita ako kay Abraham, kay Isaac, kag kay Jacob bilang Dios nga Labing Gamhanan, apang tuhoy sa akon ngalan nga Jehova wala ako magpakilala sa ila kon sin-o gid ako. 4 Nagpakigkatipan man ako sa ila nga ihatag ko sa ila ang duta sang Canaan, ang duta diin nag-istar sila bilang mga dumuluong. 5 Nabatian ko ang pag-ugayong sang katawhan sang Israel, nga ginaulipon sang mga Egiptohanon, kag gindumdom ko ang akon katipan. 6 “Gani, isiling sa mga Israelinhon: ‘Ako si Jehova, kag hilwayon ko kamo sa inyo mabug-at nga obra kag pagkaulipon sa Egipto. Hukman ko ang Egipto kag luwason ko kamo paagi sa akon gamhanan nga butkon. 7 Kuhaon ko kamo bilang akon katawhan, kag mangin Dios ninyo ako, kag mahibaluan ninyo nga ako si Jehova nga inyo Dios nga naghilway sa inyo sa pagkaulipon sa Egipto. 8 Dalhon ko kamo sa duta nga ginpanumpa ko nga ihatag kay Abraham, kay Isaac, kag kay Jacob. Ihatag ko ini sa inyo kag panag-iyahan ninyo ini. Ako si Jehova.’” 9 Sang ulihi, ginhambal ini ni Moises sa mga Israelinhon, apang wala sila magpati kay Moises tungod naluyahan sila sing buot kag tungod sa mapintas nga pag-ulipon sa ila. 10 Nagsiling si Jehova kay Moises: 11 “Lakat ka kag hambala ang Paraon, nga hari sang Egipto, nga palakton niya ang mga Israelinhon halin sa iya duta.” 12 Apang nagsiling si Moises kay Jehova: “Kon ang mga Israelinhon wala magpamati sa akon, mamati ayhan sa akon ang Paraon, kay indi ako maayo maghambal?” 13 Apang ginsiling liwat ni Jehova kay Moises kag kay Aaron kon ano nga mga sugo ang ihatag nila sa mga Israelinhon kag sa Paraon nga hari sang Egipto, agod paguaon ang mga Israelinhon sa duta sang Egipto. 14 Amo ini ang mga ulo sang panimalay sang ila mga amay: Ang mga anak ni Ruben nga panganay ni Israel amo si Hanoc, si Pallu, si Hezron, kag si Carmi. Amo ini ang mga pamilya ni Ruben. 15 Ang mga anak ni Simeon amo si Jemuel, si Jamin, si Ohad, si Jaquin, si Zohar, kag si Shaul nga anak sang Canaanhon nga babayi. Amo ini ang mga pamilya ni Simeon.
HULYO 13-19
MGA BAHANDI SA PULONG SANG DIOS | EXODO 8-9
“Wala Makahibalo ang Bugalon nga Paraon nga Ginatuman Niya ang Katuyuan sang Dios”
(Exodo 8:15) Sang makita sang Paraon nga wala na ang mga paka, ginpatig-a niya ang iya tagipusuon kag wala sia magpamati sa ila, subong sang ginsiling ni Jehova.
it-2-E 1040-1041
Pagkabatinggilan
Sa pagpakig-angot ni Jehova nga Dios sa katawhan, mapailubon nga ginatugutan niya ang mga indibiduwal kag mga pungsod nga padayon nga magluntad, bisan pa takus sila sa kamatayon. (Ge 15:16; 2Pe 3:9) Bisan may pila nga nagpabalor sa sini amo nga nabaton nila ang kaluoy (Jos 2:8-14; 6:22, 23; 9:3-15), ang iban mas nagpakatig-a pa gid batok kay Jehova kag sa iya katawhan. (Deu 2:30-33; Jos 11:19, 20) Bisan wala ginapunggan ni Jehova ang mga tawo nga mangin batinggilan, ginasiling parte sa iya nga ‘ginatugutan niya nga magtig-a ang ila tagipusuon.’ Kon ipatuman na niya ang pagtimalos sa mga batinggilan, mapasundayag sini ang iya daku nga gahom kag mapahayag ang iya ngalan.—Ipaanggid ang Ex 4:21; Ju 12:40; Ro 9:14-18.
(Exodo 8:18, 19) Nagtinguha ang madyikero nga mga saserdote nga magpagua man sing mga hamlok paagi sa ila makatilingala nga madyik, apang wala nila ini mahimo. Kag nagdalapo ang mga hamlok sa mga tawo kag sa mga sapat. 19 Gani nagsiling ang madyikero nga mga saserdote sa Paraon: “Tudlo ini sang Dios!” Apang matig-a gihapon ang tagipusuon sang Paraon, kag wala sia magpamati sa ila, subong sang ginsiling ni Jehova.
(Exodo 9:15-17) Mahimo ko na kuntani untayon ang akon kamot agod padalhan ka kag ang imo katawhan sing makamamatay nga balatian, kag malaglag ka sa duta. 16 Apang bangod sini gintugutan ko ikaw nga magpabilin nga buhi: agod ipakita ko sa imo ang akon gahom kag agod makilala ang akon ngalan sa bug-os nga duta. 17 Matinaastaason ka bala gihapon batok sa akon katawhan amo nga indi mo sila pagpalakton?
it-2-E 1181 ¶3-5
Kalautan
Dugang pa, ginagamit ni Jehova nga Dios ang mga kahimtangan sa paagi nga ang mga malauton wala makahibalo nga ginatuman nila ang iya katuyuan. Bisan ginapamatukan nila ang Dios, mapunggan niya sila kon kinahanglanon para maamligan ang iya mga alagad sa ila integridad, kag masarangan niya pahanabuon nga bisan ang buhat sina nga mga tawo magabayaw sang iya pagkamatarong. (Ro 3:3-5, 23-26; 8:35-39; Sa 76:10) Ginpahayag ini nga panghunahuna sa Hulubaton 16:4: “Ginhimo ni Jehova ang tanan nga butang para matuman ang iya katuyuan, bisan ang malauton para sa adlaw sang kalaglagan.”
Ang isa ka halimbawa amo ang Paraon nga ginsilingan ni Jehova, paagi kay Moises kag Aaron, nga hilwayon ang gin-ulipon nga mga Israelinhon. Wala ginhimo sang Dios nga malaut ini nga manuggahom sang Egipto, kundi gintugutan niya nga padayon nga magkabuhi ang Paraon kag nagpahanabo sing mga kahimtangan nga mapadayag ang kalautan sini kag sa amo takus nga mapatay. Ang katuyuan ni Jehova sa paghimo sini mabasa sa Exodo 9:16: “Bangod sini gintugutan ko ikaw nga magpabilin nga buhi: agod ipakita ko sa imo ang akon gahom kag agod makilala ang akon ngalan sa bug-os nga duta.”
Ang Napulo ka Kalalat-an nga ginpahanabo sa Egipto, nga natapos sa paglaglag sa Paraon kag sa iya mga hangaway sa Pula nga Dagat, dalayawon gid nga pagpahayag sang gahom ni Jehova. (Ex 7:14–12:30; Sa 78:43-51; 136:15) Tinuig pagkatapos sadto, ginaistoryahan gihapon ini sang mga pungsod sa palibot, gani ang ngalan sang Dios napahayag sa bilog nga duta. (Jos 2:10, 11; 1Sa 4:8) Kon ginpatay dayon ni Jehova ang Paraon, wala kuntani makita ang pagpasundayag sang daku nga gahom sang Dios para sa Iya kahimayaan kag kaluwasan sang Iya katawhan.
Pagkutkot sing Espirituwal nga mga Hiyas
(Exodo 8:21) Kon indi mo pagpalakton ang akon katawhan, magapadala ako sing nagapangutot nga mga langaw sa imo, sa imo mga alagad, sa imo katawhan, kag sa imo mga balay; kag ang mga balay sa Egipto mapuno sing nagapangutot nga mga langaw, kag amo man ang duta nga ila ginaistaran.
it-1-E 878
Nagapangutot nga mga Langaw
Indi mapat-od kon ano gid nga insekto ang ginapatuhuyan sa orihinal nga Hebreo nga tinaga nga mabasa sa Kasulatan parte sa ikap-at nga kalalat-an sa Egipto. Amo ini ang una nga kalalat-an nga wala mahalitan ang mga Israelinhon sa Gosen. (Ex 8:21, 22, 24, 29, 31; Sa 78:45; 105:31) Ang ʽa·rovʹ gin-translate sa lainlain nga paagi nga “langaw” (Maayong Balita nga Biblia, Ang Biblia sang Philippine Bible Society), “sapat-sapat” (Ang Pulong sang Dios), kag “lagong” (Biblia sang Katilingban sang mga Kristiano).
Nalakip sa Ingles nga termino nga “gadfly” ang lainlain nga klase sang mga horsefly kag botfly. Ginakutot sang babayi nga horsefly ang panit sang sapat kag tawo kag ginasuyop ang ila dugo. Samtang larva pa ang mga botfly, nagaistar ini sa sulod sang lawas sang mga sapat ukon tawo bilang isa ka parasito; ang mga klase sini nga nagaistar sa tawo makita sa tropiko nga mga lugar. Gani ang kalalat-an sang nagapangutot nga mga langaw nagresulta sa grabe nga pag-antos sang mga Egiptohanon kag sang ila kasapatan kag, sa pila ka kaso, sa kamatayon pa gani.
(Exodo 8:25-27) Sang ulihi, ginpatawag sang Paraon si Moises kag si Aaron kag nagsiling sia: “Lakat kamo, maghalad kamo sa inyo Dios sa sini nga duta.” 26 Apang nagsiling si Moises: “Indi mahimo nga diri namon ini himuon, bangod ang amon ihalad kay Jehova nga amon Dios makangilil-ad sa mga Egiptohanon. Kon maghalad kami sa atubangan sang mga Egiptohanon sing butang nga makangilil-ad sa ila, indi bala nila kami pagbatuhon? 27 Magalakbay kami sing tatlo ka adlaw sa kamingawan kag magahalad kami didto kay Jehova nga amon Dios, subong sang ginsiling niya sa amon.”
Talalupangdon nga mga Punto Gikan sa Tulun-an nga Exodo
8:26, 27—Ngaa nagsiling si Moises nga ang mga halad sang Israel “kangil-aran sa mga Egiptohanon”? Madamo nga mga sapat ang ginasimba anay sa Egipto. Busa ang pagsambit sa mga halad nagahatag sing rason kag katarungan sa pagpamilit ni Moises nga tugutan ang Israel sa paglakat agod maghalad kay Jehova.
Pagbasa sa Biblia
(Exodo 8:1-19) Dayon nagsiling si Jehova kay Moises: “Magkadto ka sa Paraon, kag isiling mo sa iya, ‘Amo ini ang ginasiling ni Jehova: “Palakta ang akon katawhan agod mag-alagad sila sa akon. 2 Kon indi mo sila pagpalakton, padalhan ko sing kalalat-an nga mga paka ang imo bug-os nga teritoryo. 3 Magadagsa ang mga paka sa Suba Nilo, kag magatakas ini kag magasulod sa imo balay, sa imo kuarto, sa imo hiligdaan, sa mga balay sang imo mga alagad kag sang imo katawhan, sa imo mga pugon kag sa imo mga lamasan. 4 Magatakas ang mga paka sa imo kag sa imo katawhan kag sa tanan mo nga alagad.”’” 5 Sang ulihi, nagsiling si Jehova kay Moises: “Isiling mo kay Aaron, ‘Untaya ang imo kamot nga nagauyat sing sungkod sa mga suba, sa dalagku nga mga kanal halin sa Nilo, kag sa mga katunggan, kag patakasa ang mga paka sa bug-os nga duta sang Egipto.’” 6 Gani gin-untay ni Aaron ang iya kamot sa katubigan sang Egipto, kag nagtakas ang mga paka kag naglapta sa bug-os nga duta sang Egipto. 7 Apang ginhimo man ini sang madyikero nga mga saserdote paagi sa ila makatilingala nga madyik, kag ginpatakas man nila ang mga paka sa bug-os nga duta sang Egipto. 8 Dayon ginpatawag sang Paraon si Moises kag si Aaron kag nagsiling sia: “Magpakiluoy kamo kay Jehova nga kuhaon niya ang mga paka sa akon kag sa akon katawhan, kay palakton ko na ang inyo katawhan agod makahalad sila kay Jehova.” 9 Nagsiling si Moises sa Paraon: “Ikaw ang magdesisyon kon san-o ako magpakiluoy sa Dios agod ang mga paka madula sa imo, sa imo mga alagad, sa imo katawhan, kag sa imo mga balay. Magpabilin na lang ini sa Suba Nilo.” 10 Nagsabat ang Paraon: “Sige, buas.” Nagsiling si Moises: “Matuman ang ginsiling mo agod mahibaluan mo nga wala na sing iban pa nga kaangay kay Jehova nga amon Dios. 11 Ang mga paka madula sa imo, sa imo mga balay, sa imo mga alagad, kag sa imo katawhan. Magapabilin na lang ini sa Suba Nilo.” 12 Gani naghalin si Moises kag si Aaron sa Paraon, kag nagpakiluoy si Moises kay Jehova nga kuhaon na ang mga paka nga ginpadala Niya sa Paraon. 13 Dayon ginhimo ni Jehova ang ginpangabay ni Moises, kag nagkalamatay ang mga paka sa mga balay, sa mga luwang, kag sa mga latagon. 14 Madamo gid nga tinumpok sang mga paka ang ila natipon, gani nagbaho ang bug-os nga kadutaan. 15 Sang makita sang Paraon nga wala na ang mga paka, ginpatig-a niya ang iya tagipusuon kag wala sia magpamati sa ila, subong sang ginsiling ni Jehova. 16 Nagsiling si Jehova kay Moises: “Isiling mo kay Aaron, ‘Alsaha ang imo sungkod kag hampaka ang yab-ok sa duta, kag mangin mga hamlok ini sa bug-os nga duta sang Egipto.’” 17 Kag ginhimo nila ini. Gin-alsa ni Aaron ang ginauyatan niya nga sungkod kag ginhampak ang yab-ok sa duta, kag nagdalapo ang mga hamlok sa mga tawo kag sa mga sapat. Ang tanan nga yab-ok sa duta nangin mga hamlok sa bug-os nga duta sang Egipto. 18 Nagtinguha ang madyikero nga mga saserdote nga magpagua man sing mga hamlok paagi sa ila makatilingala nga madyik, apang wala nila ini mahimo. Kag nagdalapo ang mga hamlok sa mga tawo kag sa mga sapat. 19 Gani nagsiling ang madyikero nga mga saserdote sa Paraon: “Tudlo ini sang Dios!” Apang matig-a gihapon ang tagipusuon sang Paraon, kag wala sia magpamati sa ila, subong sang ginsiling ni Jehova.
HULYO 20-26
MGA BAHANDI SA PULONG SANG DIOS | EXODO 10-11
“Si Moises kag si Aaron Nagpakita sing Daku nga Kaisog”
(Exodo 10:3-6) Gani nagkadto si Moises kag si Aaron sa Paraon kag nagsiling sa iya: “Amo ini ang ginsiling ni Jehova nga Dios sang mga Hebreo, ‘Tubtob san-o nga indi ka magpasakop sa akon? Palakta ang akon katawhan agod mag-alagad sila sa akon. 4 Kon indi mo gihapon pagpalakton ang akon katawhan, mapadala ako buas sing mga apan sa imo kadutaan. 5 Tabunan nila ang duta, gani indi ini makita. Kaunon nila ang nabilin sa inyo nga wala mahalitan sang yelo, kag kaunon nila ang tanan ninyo nga kahoy nga nagatubo sa latagon. 6 Mapuno sini ang imo mga balay kag ang mga balay sang imo mga alagad, kag ang mga balay sa bug-os nga Egipto, sa kadamuon nga wala pa makita sang imo mga amay kag mga lolo sugod sang nag-istar sila sa sini nga duta tubtob subong.’” Dayon nagtalikod sia kag naghalin sa Paraon.
Iluga si Jesus—Magbantala nga May Kaisog
6 Hunahunaa man ang kaisog nga ginpakita ni Moises sang nagpakighambal sia kay Paraon, isa ka gumalahom nga ginatamod indi lang subong tiglawas sang mga dios, kundi subong isa mismo ka dios nga anak ni Ra, ang dios sang adlaw. Pareho sang iban nga mga Paraon, mahimo nga ginsimba man niya ang iya mismo imahen. Ang bisan ano nga ihambal ni Paraon ginakabig nga kasuguan nga dapat tumanon. Ang gamhanan, arogante, kag batinggilan nga si Paraon wala maanad nga tudluan sang iban kon ano ang iya dapat himuon. Apang, ang isa ka mapainubuson nga manugbantay sang karnero nga si Moises sulit-sulit nga nakighambal kay Paraon bisan pa wala sia gin-agda ukon ginpatawag. Kag ano ang gintagna ni Moises? Gintagna niya nga magaabot ang mga kalalat-an. Kag ano ang iya ginpangabay? Ginpangabay niya si Paraon nga tugutan ang iya minilyon ka ulipon nga maggua sa Egipto. Kinahanglan bala ni Moises ang kaisog? Huo gid!—Num. 12:3; Heb. 11:27.
(Exodo 10:24-26) Dayon ginpatawag sang Paraon si Moises kag nagsiling sia: “Lakat na kamo kag mag-alagad kay Jehova. Ibilin lang ang inyo mga karnero kag ang inyo mga baka. Paupda ninyo bisan ang inyo magagmay nga kabataan.” 25 Apang nagsiling si Moises: “Hatagi man kami sing mga sapat para sa halad kag sa dulot nga sinunog, kag ihalad namon ini kay Jehova nga amon Dios. 26 Dalhon man namon ang amon kasapatan. Wala sing bisan isa ka sapat nga mabilin, bangod gamiton namon ang iban sini sa pagsimba kay Jehova nga amon Dios, kag wala pa namon mahibaluan kon ano ang ihalad namon sa amon pagsimba kay Jehova tubtob makaabot kami didto.”
(Exodo 10:28) Gani nagsiling ang Paraon sa iya: “Halin ka sa akon atubangan! Kag indi ka na magpakita liwat sa akon, bangod sa adlaw nga magpakita ka sa akon, mapatay ka.”
(Exodo 11:4-8) Nagsiling dayon si Moises: “Amo ini ang ginsiling ni Jehova, ‘Sa tungang-gab-i makadto ako sa bug-os nga Egipto, 5 kag mapatay ang tanan nga panganay sa duta sang Egipto, halin sa panganay sang Paraon nga nagapungko sa iya trono tubtob sa panganay sang alagad nga babayi nga nagagaling sa galingan, kag ang tanan nga panganay sang mga sapat. 6 Magahibi sing mabaskog ang bug-os nga Egipto, nga wala pa gid matabo kag indi na gid matabo liwat. 7 Apang wala sing bisan isa ka ido nga magtaghol sa mga Israelinhon, sa tawo man ukon sa sapat, agod mahibaluan ninyo nga makahimo si Jehova sing kinatuhayan sa mga Egiptohanon kag sa mga Israelinhon.’ 8 Ang tanan mo nga alagad magapalapit sa akon kag magayaub sa akon, nga nagasiling, ‘Lakat ka kag ang bug-os mo nga katawhan.’ Pagkatapos sini, malakat ako.” Dayon naghalin sia sa Paraon nga akig kaayo.
it-2-E 436 ¶4
Moises
Kinahanglan ang kaisog kag pagtuo sa pag-atubang sa Paraon. Paagi lamang sa kusog ni Jehova kag sa pagpanghikot sang iya espiritu sa ila amo nga nahimo nanday Moises kag Aaron ang asaynment nga ginhatag sa ila. Imadyina ang palasyo sang Paraon, ang hari sang pinakagamhanan nga pungsod sa bilog nga kalibutan sadto nga tion. Sa tunga sang wala tupong nga pagkahalangdon, ang bugalon nga Paraon, nga ginakabig nga dios mismo, napalibutan sang iya mga manuglaygay, mga kumandante sang militar, mga guardia, kag mga ulipon. Dugang pa, ara man ang mga lider sang relihion, madyikero nga mga saserdote, nga nagapanguna sa pagpamatok kay Moises. Ini nga mga lalaki, magluwas sa Paraon mismo, amo ang pinakagamhanan nga mga lalaki sa ginharian. Ining gamhanan nga mga lalaki handa sa pagsuporta sa Paraon kag sa mga dios sang Egipto. Si Moises kag si Aaron nag-atubang sa Paraon indi lang sing makaisa, kundi sa madamo nga beses, kag ang tagipusuon sang Paraon mas nagatig-a pa gid, kay determinado sia nga magpabilin sa iya kontrol ang iya Hebreo nga mga ulipon. Ang matuod, pagkatapos ginpahayag ang ikawalo nga kalalat-an, ginpahalin si Moises kag si Aaron sa atubang sang Paraon, kag sa tapos sang ikasiam nga kalalat-an ginsilingan sila sang Paraon nga indi na sila magpakita sa iya kon indi nila gusto mapatay.—Ex 10:11, 28.
Pagkutkot sing Espirituwal nga mga Hiyas
(Exodo 10:1, 2) Dayon nagsiling si Jehova kay Moises: “Magkadto ka sa Paraon, bangod gintugutan ko nga magtig-a ang iya tagipusuon kag ang tagipusuon sang iya mga alagad, agod mapakita ko ining akon mga tanda sa iya atubangan, 2 kag agod masugid mo sa imo mga anak kag mga apo kon paano ko ginsilutan ang Egipto kag kon ano ang mga tanda nga ginhimo ko sa tunga nila; kag makilala ninyo nga ako si Jehova.”
Mga Saksi Batok sa Butig nga mga Dios
11 Samtang didto pa sa Egipto ang mga Israelinhon, ginpadala ni Jehova si Moises kay Paraon kag nagsiling: “Kadtui sa sulod si Paraon, kay ginpatig-a ko ang iya tagipusuon kag ang tagipusuon sang iya mga alagad, agod nga mapakita ko ining akon mga tanda sa tunga nila, kag agod nga masugid mo sa igdulungog sang imo anak kag sa anak sang imo anak kon ano nga mga butang ang ginhimo ko sa mga Egiptohanon kag ano nga mga tanda ang nahimo ko sa tunga nila; agod nga kamo makahibalo nga ako si Jehova.” (Exodo 10:1, 2) Isugid sang matinumanon nga mga Israelinhon sa ila mga anak ang gamhanan nga mga buhat ni Jehova. Nian, isugid man sang ila mga anak, sa ila naman mga anak ang tuhoy sini, kag magapadayon ini halin sa isa ka kaliwatan padulong sa lain nga kaliwatan. Sa amo, indi malipatan ang gamhanan nga mga buhat ni Jehova. Sa karon man, may salabton ang mga ginikanan nga manaksi sa ila mga anak.—Deuteronomio 6:4-7; Hulubaton 22:6.
(Exodo 11:7) Apang wala sing bisan isa ka ido nga magtaghol sa mga Israelinhon, sa tawo man ukon sa sapat, agod mahibaluan ninyo nga makahimo si Jehova sing kinatuhayan sa mga Egiptohanon kag sa mga Israelinhon.’
it-1-E 783 ¶5
Paggua sa Egipto
Gani paagi sa isa ka makahalawhaw nga pagpasundayag sang gahom, ginbayaw ni Jehova ang iya ngalan kag ginluwas ang Israel. Sa S nga baybayon sang Pula nga Dagat, ginpangunahan ni Moises ang anak nga mga lalaki ni Israel sa pag-amba, samtang ang iya utod nga babayi nga si Miriam, nga isa ka manalagna, nagkuha sing tamburin kag ginpangunahan ang tanan nga babayi nga may mga tamburin kag nagasinaot, samtang nagakanta ang mga lalaki. (Ex 15:1, 20, 21) Ginpahanabo ang bug-os nga pagbulag sang Israel sa ila mga kaaway. Sang naggua sila sa Egipto wala gintugutan nga mahalitan sila sang mga sapat ukon tawo; wala gani sing ido nga nagtaghol sa ila ukon naghulag sang dila sini batok sa ila. (Ex 11:7) Bisan wala ginsambit sa kasaysayan sang paggua sa Egipto nga nagtabok man ang Paraon sa dagat upod sa iya mga hangaway kag napatay, ang Salmo 136:15 nagsiling nga “ginlumos [ni Jehova] ang Paraon kag ang iya mga kasuldadusan sa Pula nga Dagat.”
Pagbasa sa Biblia
(Exodo 10:1-15) Dayon nagsiling si Jehova kay Moises: “Magkadto ka sa Paraon, bangod gintugutan ko nga magtig-a ang iya tagipusuon kag ang tagipusuon sang iya mga alagad, agod mapakita ko ining akon mga tanda sa iya atubangan, 2 kag agod masugid mo sa imo mga anak kag mga apo kon paano ko ginsilutan ang Egipto kag kon ano ang mga tanda nga ginhimo ko sa tunga nila; kag makilala ninyo nga ako si Jehova.” 3 Gani nagkadto si Moises kag si Aaron sa Paraon kag nagsiling sa iya: “Amo ini ang ginsiling ni Jehova nga Dios sang mga Hebreo, ‘Tubtob san-o nga indi ka magpasakop sa akon? Palakta ang akon katawhan agod mag-alagad sila sa akon. 4 Kon indi mo gihapon pagpalakton ang akon katawhan, mapadala ako buas sing mga apan sa imo kadutaan. 5 Tabunan nila ang duta, gani indi ini makita. Kaunon nila ang nabilin sa inyo nga wala mahalitan sang yelo, kag kaunon nila ang tanan ninyo nga kahoy nga nagatubo sa latagon. 6 Mapuno sini ang imo mga balay kag ang mga balay sang imo mga alagad, kag ang mga balay sa bug-os nga Egipto, sa kadamuon nga wala pa makita sang imo mga amay kag mga lolo sugod sang nag-istar sila sa sini nga duta tubtob subong.’” Dayon nagtalikod sia kag naghalin sa Paraon. 7 Dayon nagsiling ang mga alagad sang Paraon sa iya: “Tubtob san-o mangin katalagman sa aton ini nga tawo? Palakta ang katawhan agod mag-alagad sila kay Jehova nga ila Dios. Wala mo pa bala mahibaluan nga nalaglag na ang Egipto?” 8 Gani ginpabalik si Moises kag si Aaron sa Paraon, kag nagsiling sia sa ila: “Lakat na kamo kag mag-alagad kay Jehova nga inyo Dios. Apang sin-o gid bala ang magalakat?” 9 Nagsiling si Moises: “Magalakat kami upod ang amon kabataan, ang amon mga tigulang, ang amon mga anak nga lalaki, ang amon mga anak nga babayi, ang amon mga karnero kag ang amon mga baka, kay magahiwat kami sing kapiestahan para kay Jehova.” 10 Nagsabat sia sa ila: “Nalipay kamo bangod kaupod ninyo si Jehova. Pagdumdom ninyo palakton ko kamo kag ang inyo magagmay nga kabataan! Malain ang inyo tuyo. 11 Indi puede! Ang mga lalaki lang ang maglakat kag mag-alagad kay Jehova, bangod amo ina ang ginpangabay ninyo.” Kag ginpahalin sila sa atubangan sang Paraon. 12 Gani nagsiling si Jehova kay Moises: “Untaya ang imo kamot sa duta sang Egipto agod mag-abot ang mga apan sa duta sang Egipto kag kaunon sini ang tanan nga tanom sa kadutaan, ang tanan nga wala mahalitan sang yelo.” 13 Ginbayaw dayon ni Moises ang iya sungkod sa duta sang Egipto, kag ginpahuyop ni Jehova sa sini nga duta ang hangin halin sa sidlangan sa bug-os nga adlaw kag bug-os nga gab-i. Pagkaaga, gindala sang hangin halin sa sidlangan ang mga apan. 14 Nag-abot ang mga apan sa bug-os nga duta sang Egipto kag nagdalapo ini sa bug-os nga duta sang Egipto. Grabe gid ang kahimtangan. Wala pa gid matabo ang pareho sini kadamo nga apan kag indi na matabo liwat. 15 Gintabunan sini ang bug-os nga kadutaan, kag nagdulom ang kadutaan tungod sini. Ginkaon sini ang tanan nga tanom sa duta kag ang tanan nga bunga sang mga kahoy nga wala mahalitan sang yelo. Wala sing nabilin nga bisan isa ka dahon sa mga kahoy ukon sing hilamon sa bug-os nga duta sang Egipto.
HULYO 27–AGOSTO 2
MGA BAHANDI SA PULONG SANG DIOS | EXODO 12
“Ang Paskua—Ang Kahulugan Sini sa mga Cristiano”
(Exodo 12:5-7) Ang inyo karnero dapat nga lalaki nga wala sing diperensia kag isa ka tuig ang edad. Magpili kamo sa tinday nga mga karnero ukon sa tinday nga mga kanding. 6 Bukuton ninyo ini tubtob sa ika-14 nga adlaw sini nga bulan, kag ihawon ini sang tagsa ka pamilya sa bug-os nga katilingban sang Israel sa kasisidmon. 7 Dayon magkuha sila sang dugo sini kag ipalhit sa duha ka bakalan sang puertahan kag sa ibabaw nayon sang puertahan sang mga balay diin magakaon sila.
“Magakalipay Ka sing Bug-os”
4 Si Jesus napatay sang Nisan 14, 33 C.E. Sa Israel, ang Nisan 14 isa ka malipayon nga adlaw sa pagsaulog sang Paskua. Kada tuig sa sina nga adlaw, ang mga pamilya nagakinaon, kag lakip sa ila handa ang isa ka bataon kag walay dagta nga kordero. Sa sining paagi, madumduman nila ang papel sang dugo sang kordero sa kaluwasan sang Israelinhon nga panganay sang ang nagapamatay nga anghel nagpamatay sang panganay sang mga Egiptohanon sang Nisan 14, 1513 B.C.E. (Exodo 12:1-14) Ang kordero sang Paskua nagalandong kay Jesus, nga sa iya si apostol Pablo nagsiling: “Nahalad na ang aton halad sa paskua, si Cristo.” (1 Corinto 5:7) Kaangay sang dugo sang kordero sang Paskua, ang ginpatulo nga dugo ni Jesus nag-aman sing kaluwasan para sa madamo.—Juan 3:16, 36.
(Exodo 12:12, 13) Kay maagi ako sa duta sang Egipto sa sini nga gab-i kag pamatyon ko ang tagsa ka panganay sa duta sang Egipto, halin sa tawo tubtob sa sapat; kag hukman ko ang tanan nga dios sang Egipto. Ako si Jehova. 13 Ang dugo mangin tanda sa inyo mga balay. Kon makita ko ang dugo, laktawan ko kamo. Indi mag-abot sa inyo ang kalalat-an kag indi kamo malaglag kon silutan ko ang duta sang Egipto.
it-2-E 583 ¶6
Paskua
Ang pila ka aspekto sang pagsaulog sang Paskua natuman kay Jesus. Ang isa sa sini amo nga kon paano ang pagpalhit sang dugo sa mga balay sa Egipto nagluwas sa mga panganay sa pagkalaglag sa kamot sang nagpanglaglag nga anghel. Ginpatuhuyan ni Pablo ang hinaplas nga mga Cristiano bilang ang kongregasyon sang panganay (Heb 12:23), kag ang Cristo bilang ila manluluwas paagi sa iya dugo. (1Te 1:10; Efe 1:7) Wala ginabali ang bisan ano nga tul-an sang kordero sang Paskua. Gintagna nga wala sing bisan isa ka tul-an ni Jesus ang balion, kag natuman ini sang napatay sia. (Sa 34:20; Ju 19:36) Gani, ang pagsaulog sang mga Judiyo sang Paskua sa sulod sang madamo nga siglo isa sa mga aspekto sang Kasuguan nga nagalandong sa mga butang nga magaabot kag nagapatuhoy ini kay Jesucristo, “ang Kordero sang Dios.”—Heb 10:1; Ju 1:29.
(Exodo 12:24-27) “Tumanon ninyo ini nga isa ka pagsulundan para sa inyo kag sa inyo mga anak tubtob san-o. 25 Kon mag-abot na kamo sa duta nga ihatag sa inyo ni Jehova, subong sang ginsiling niya, padayon ninyo nga himuon ini nga selebrasyon. 26 Kag kon pamangkuton kamo sang inyo mga anak, ‘Ano ang kahulugan sini nga selebrasyon?’ 27 isiling ninyo, ‘Halad ini sa Paskua para kay Jehova, nga naglaktaw sa mga balay sang mga Israelinhon sa Egipto sang nagdala sia sing kalalat-an sa mga Egiptohanon, apang ginluwas niya ang amon mga panimalay.’” Dayon nagduko ang katawhan kag nagyaub.
‘Mangin Handumanan Ini sa Inyo’
13 Samtang nagadaku ang bag-o nga mga henerasyon, mahimo gintudlo sang mga amay sa ila kabataan ang importante nga mga leksion. Ang isa sini amo nga maproteksionan ni Jehova ang iya mga sumilimba. Natun-an nila nga indi sia misteryo ukon ginhimuhimo lang nga diosdios. Si Jehova matuod kag buhi nga Dios nga interesado sa iya katawhan kag nagapanghikot para sa ila kaayuhan. Ginpamatud-an niya ini sang ginhuptan niya nga buhi ang panganay sang mga Israelinhon ‘sang ginpatay niya ang mga Egiptohanon.’
14 Wala ginasugo ang Cristiano nga mga ginikanan nga sugiran nila kada tuig ang ila kabataan sang sugilanon parte sa Paskua. Pero, ginatudlo mo bala sa imo kabataan ang leksion sini—nga ginaamligan sang Dios ang iya katawhan? Ginapakita mo bala sa ila nga kumbinsido ka nga si Jehova matuod gihapon nga Manug-amlig sa iya katawhan? (Sal. 27:11; Isa. 12:2) Kag ginatudlo mo bala ini sa ila sa makawiwili nga paagi, indi nga daw ginasermonan mo sila? Panikasugi nga ilakip ina nga leksion sa pagpauswag sang espirituwalidad sang imo pamilya.
Pagkutkot sing Espirituwal nga mga Hiyas
(Exodo 12:12) Kay maagi ako sa duta sang Egipto sa sini nga gab-i kag pamatyon ko ang tagsa ka panganay sa duta sang Egipto, halin sa tawo tubtob sa sapat; kag hukman ko ang tanan nga dios sang Egipto. Ako si Jehova.
it-2-E 582 ¶2
Paskua
Ang Napulo ka Kalalat-an sa Egipto nagpamatuod sang paghukom batok sa mga dios sang Egipto, ilabi na ang ikanapulo, diin napatay ang mga panganay. (Ex 12:12) Ang karnero nga lalaki sagrado sa dios nga si Ra, gani ang pagpalhit sang dugo sang kordero sang Paskua sa mga bakalan sang puertahan isa ka pagpasipala sa pagtan-aw sang mga Egiptohanon. Sagrado man para sa ila ang toro nga baka, gani ang pagpatay sa panganay sang mga toro nga baka isa ka pagpakahuya sa dios nga si Osiris. Si Paraon mismo ginasimba bilang anak ni Ra. Gani ang pagkapatay sang panganay nga anak sang Paraon nagapakita nga wala sing mahimo si Ra kag ang Paraon.
(Exodo 12:14-16) “‘Dumdumon ninyo ini nga adlaw, kag saulugon ninyo ini nga isa ka kapiestahan kay Jehova sa tanan ninyo nga kaliwatan. Saulugon ninyo ini nga isa ka pagsulundan tubtob san-o. 15 Magakaon kamo sing mga tinapay nga wala sing lebadura sa sulod sang pito ka adlaw. Kuhaon ninyo ang linamas nga may lebadura sa inyo mga balay sa una nga adlaw, bangod patyon sa Israel ang tawo nga magkaon sing may lebadura, sugod sa una nga adlaw tubtob sa ikapito. 16 Sa una nga adlaw magahiwat kamo sing balaan nga pagtilipon, kag sing isa pa ka balaan nga pagtilipon sa ikapito nga adlaw. Indi kamo mag-obra sa sini nga mga adlaw. Ang tugot lamang nga himuon ninyo amo ang paghanda sing kalan-on para sa tagsa ka tawo.
it-1-E 504 ¶1
Pagtilipon
Ang pinasahi sa sining “balaan nga mga pagtilipon” amo nga sa sini nga mga okasyon indi dapat mag-obra sing mabug-at nga trabaho ang mga tawo. Halimbawa, ang una kag ang ikapito nga adlaw sang Kapiestahan sang Tinapay nga Wala sing Lebadura “balaan nga mga pagtilipon,” parte sa sini si Jehova nagsiling: “Indi kamo mag-obra sa sini nga mga adlaw. Ang tugot lamang nga himuon ninyo amo ang paghanda sing kalan-on para sa tagsa ka tawo.” (Ex 12:15, 16) Pero, sa tion sang “balaan nga mga pagtilipon,” ang mga saserdote masako sa paghalad sang mga dulot kay Jehova (Le 23:37, 38), kag sigurado nga indi ini paglapas sa bisan ano nga sugo nga indi mag-obra sang adlaw-adlaw nga buluhaton. Ini nga mga okasyon indi tion nga wala na sing himuon ang mga tawo sa kabilugan, kundi amo ini ang mga tion nga makabenepisyo sing daku ang katawhan sa espirituwal. Sa Adlaw nga Inugpahuway kada semana, ang mga tawo nagatipon para sa publiko nga pagsimba kag instruksion. Paagi sini, mapalig-on sila sang pagbasa sing dayag kag pagpaathag sang nasulat nga Pulong sang Dios, nga ginhimo man sa mga sinagoga sang ulihi. (Bin 15:21) Gani, bisan wala nagatrabaho sing mabug-at ang mga tawo sa Adlaw nga Inugpahuway ukon sa iban pa nga “balaan nga mga pagtilipon,” ginagamit nila ini nga tion sa pagpangamuyo kag pagpamalandong sa ila Manunuga kag sa iya mga katuyuan.—Tan-awa ang KATILINGBAN.
Pagbasa sa Biblia
(Exodo 12:1-20) Nagsiling si Jehova kay Moises kag kay Aaron sa duta sang Egipto: 2 “Ini nga bulan amo ang una nga bulan sang tuig para sa inyo. 3 Isiling mo sa tanan nga Israelinhon, ‘Sa ikanapulo nga adlaw sini nga bulan, magakuha ang kada isa sa ila sing isa ka karnero para sa ila panimalay, isa ka karnero sa isa ka panimalay. 4 Apang kon gamay lang ang panimalay kag indi makaubos sing isa ka karnero, ini nga panimalay kag ang kaingod nga panimalay magasalo sa isa lang ka karnero suno sa kadamuon sang mga tawo sa ila panimalay. Partidahon ang karnero suno sa kadamuon sang tawo nga magakaon sini. 5 Ang inyo karnero dapat nga lalaki nga wala sing diperensia kag isa ka tuig ang edad. Magpili kamo sa tinday nga mga karnero ukon sa tinday nga mga kanding. 6 Bukuton ninyo ini tubtob sa ika-14 nga adlaw sini nga bulan, kag ihawon ini sang tagsa ka pamilya sa bug-os nga katilingban sang Israel sa kasisidmon. 7 Dayon magkuha sila sang dugo sini kag ipalhit sa duha ka bakalan sang puertahan kag sa ibabaw nayon sang puertahan sang mga balay diin magakaon sila. 8 “‘Kaunon nila ang karne sa sini nga gab-i. Asalon nila ini sa kalayo kag kaunon nila ini lakip ang mga tinapay nga wala sing lebadura kag ang mapait nga mga tanom. 9 Indi ini pagkaunon nga hilaw ukon linaga, kundi dapat inasal ini sa kalayo, ang ulo, ang mga batiis, kag ang mga kasudlan sini. 10 Dapat nga wala kamo sing ibilin tubtob sa aga. Apang kon may mabilin sini pagkaaga, sunugon ninyo ini. 11 Kaunon ninyo ini nga natakod ang inyo paha, nagasuksok sing sandalyas, kag nagauyat sing sungkod; kag kaunon ninyo ini sing dalidali. Paskua ini ni Jehova. 12 Kay maagi ako sa duta sang Egipto sa sini nga gab-i kag pamatyon ko ang tagsa ka panganay sa duta sang Egipto, halin sa tawo tubtob sa sapat; kag hukman ko ang tanan nga dios sang Egipto. Ako si Jehova. 13 Ang dugo mangin tanda sa inyo mga balay. Kon makita ko ang dugo, laktawan ko kamo. Indi mag-abot sa inyo ang kalalat-an kag indi kamo malaglag kon silutan ko ang duta sang Egipto. 14 “‘Dumdumon ninyo ini nga adlaw, kag saulugon ninyo ini nga isa ka kapiestahan kay Jehova sa tanan ninyo nga kaliwatan. Saulugon ninyo ini nga isa ka pagsulundan tubtob san-o. 15 Magakaon kamo sing mga tinapay nga wala sing lebadura sa sulod sang pito ka adlaw. Kuhaon ninyo ang linamas nga may lebadura sa inyo mga balay sa una nga adlaw, bangod patyon sa Israel ang tawo nga magkaon sing may lebadura, sugod sa una nga adlaw tubtob sa ikapito. 16 Sa una nga adlaw magahiwat kamo sing balaan nga pagtilipon, kag sing isa pa ka balaan nga pagtilipon sa ikapito nga adlaw. Indi kamo mag-obra sa sini nga mga adlaw. Ang tugot lamang nga himuon ninyo amo ang paghanda sing kalan-on para sa tagsa ka tawo. 17 “‘Saulugon ninyo ang Kapiestahan sang Tinapay nga Wala sing Lebadura, bangod sa sini nga adlaw paguaon ko kamo halin sa duta sang Egipto. Saulugon ninyo ini nga adlaw sa tanan ninyo nga kaliwatan nga isa ka pagsulundan tubtob san-o. 18 Magakaon kamo sing mga tinapay nga wala sing lebadura halin sa gab-i sang ika-14 nga adlaw tubtob sa gab-i sang ika-21 nga adlaw sang una nga bulan. 19 Dapat nga wala sing makita nga linamas nga may lebadura sa inyo balay sa sulod sang pito ka adlaw, bangod patyon sa Israel ang tawo nga nagakaon sing may lebadura, dumuluong man sia ukon tumandok. 20 Indi kamo dapat magkaon sing bisan ano nga may lebadura. Sa tanan ninyo nga puluy-an, mga tinapay nga wala sing lebadura ang dapat ninyo kaunon.’”