Ngaa Dapat Isugid ang Malain?
“SIA nga nagabuyagyag sing isa ka butang mangin kaaway sang mga tawo,” isa ka hambalanon sa Katundan nga Aprika. Amo sina ang natabo kay Olu sang ginsumbong niya ang iya magulang nga lalaki sing sala nga incesto upod sa iya manghod nga babayi. “Butigon ka!” singgit sang magulang. Nian ginsakit niya sing todo si Olu, gintabog sia gikan sa balay sang pamilya, kag ginsunog ang tanan nga bayo ni Olu. Gin-apinan sang mga tagaminuro ang magulang. Bangod wala na sia ginaabiabi sa minuro, si Olu naglakat. Narealisar lamang sang mga tawo nga matuod gali ang ginsiling ni Olu sang nagmabdos ang babayi. Ang magulang nagtu-ad, kag si Olu liwat nga ginpakitaan sing kahamuot. Mahimo kuntani nga nangin tuhay ang natabo. Mahimo kuntani nga ginpatay si Olu.
Sing maathag, ang mga wala nagahigugma kay Jehova wala nagapasalamat nga ang ila sala nabuyagyag. Ang makasasala nga huyog sang tawo amo ang pamatukan ang pagsabdong kag batuan ang bisan sin-o nga nagahatag sini. (Ipaanggid ang Juan 7:7.) Indi katingalahan nga madamo ang nagahipos subong sang mga bato kon tuhoy sa pagsugid sang mga sala sang iban sa mga may awtoridad sa pagtadlong sa ila.
Pag-apresyar sa Balor Sang Pagsabdong
Apang, sa tunga sang katawhan ni Jehova, tuhay ang panimuot tuhoy sa pagsabdong. Ginaapresyar sing tudok sang diosnon nga mga lalaki kag mga babayi ang kahimusan nga ginhimo ni Jehova agod buligan ang mga nakasala sa sulod sang Cristianong kongregasyon. Ginakilala nila ina nga disiplina subong pagpakita sang iya mahigugmaon nga kaluoy.—Hebreo 12:6-11.
Mahimo ini mailustrar sa isa ka hitabo sa kabuhi ni Hari David. Walay sapayan nga isa sia ka matarong nga tawo kutob sang iya pagkapamatan-on, may isa ka tion nga nakasala sia sing mabug-at. Una, nanghilahi sia. Nian, sa panikasog nga takpan ang iya sala, ginplano niya nga mapatay ang bana sang babayi. Apang ginsugid ni Jehova ang sala ni David kay Natan nga manalagna, nga maisugon nga nagsukna kay David nahanungod sini. Nagagamit sing isa ka epektibo nga ilustrasyon, ginpamangkot ni Natan si David kon ano ang dapat himuon sa isa ka tawo nga manggaranon nga may madamong karnero apang ginkuha niya kag gin-ihaw ang isaisa gid lang nga kordero, isa ka ginapakamahal nga hinuptanan, sang isa ka tawo nga imol sa pag-abiabi sa iya abyan. Si David, nga isa anay ka manugbantay, naakig kag nagsingkal. Sia nagsiling: “Ang tawo nga nagahimo sini takus mapatay!” Nian ginpadapat ni Natan ang ilustrasyon kay David, nga nagasiling: “Ikaw mismo amo ang tawo!”—2 Samuel 12:1-7.
Si David wala maakig kay Natan; wala niya gintinguhaan nga pangapinan ang iya kaugalingon ukon nagbalos man sing panumbungon. Sa baylo, ang pagsabdong ni Natan nagtandog sing tudok sang iya konsiensia. Nagkasubo, si David nagtu-ad: “Nakasala ako batok kay Jehova.”—2 Samuel 12:13.
Ang pagbuyagyag ni Natan sa sala ni David, nga ginsundan sing diosnon nga pagsabdong, nagbunga sing maayo. Walay sapayan nga wala gintamingan si David gikan sa mga resulta sang iya sala, naghinulsol sia kag nagpasag-uli kay Jehova. Ano ang balatyagon ni David sa sinang pagsabdong? Sia nagsulat: “Kon lampusan ako sang isa nga matarong, mangin mahigugmaon nga kaluoy ini; kag kon sabdungon niya ako, mangin lana ini sa ulo, nga indi luyag pangindian sang akon ulo.”—Salmo 141:5.
Sa aton man adlaw, ang mga alagad ni Jehova mahimo nga makahimo sing mabug-at nga sala, bisan yadtong madamong tinuig na nga matutom. Nagakilala nga ang mga gulang mahimo makabulig, ang kalabanan nagapalapit sa ila para magpabulig. (Santiago 5:13-16) Apang kon kaisa mahimo taguon sang nakasala ang iya sala, subong sang ginhimo ni Hari David. Ano ang dapat naton himuon kon may mahibaluan kita nga mabug-at nga sala sa kongregasyon?
Kay Sin-o Ini Salabton?
Kon mahibaluan sang mga gulang ang tuhoy sa mabug-at nga sala, ginapalapitan nila ang indibiduwal nga nakasala agod hatagan sia sing kinahanglanon nga bulig kag pagtadlong. Salabton sang mga gulang nga hukman ang subong sina nga mga makasasala sa sulod sang Cristianong kongregasyon. Nagabantay sing suod sa espirituwal nga kahimtangan sini, ginabuligan kag ginalaygayan nila ang bisan sin-o nga nagahimo sing dimaalamon ukon sayop nga tikang.—1 Corinto 5:12, 13; 2 Timoteo 4:2; 1 Pedro 5:1, 2.
Apang kamusta kon indi ikaw isa ka gulang kag may nahibaluan ka tuhoy sa pila ka mabug-at nga sala sang isa pa ka Cristiano? Ang mga panuytoy makita sa Kasuguan nga ginhatag ni Jehova sa pungsod sang Israel. Ang Kasuguan nagsiling nga kon ang isa ka tawo makasaksi sing apostata nga mga buhat, sedisyon, pagpatay, ukon iban pa mabug-at nga mga krimen, salabton niya nga isugid ini kag saksihan ang iya nahibal-an. Ang Levitico 5:1 nagasiling: “Karon kon ang isa ka kalag makasala sa bagay nga nagapamati sia sang dayag nga pagsumpa kag saksi sia ukon nakita niya ini ukon nahibaluan ini, kon indi niya ini isugid, nian dapat sia manabat sang iya sala.”—Ipaanggid ang Deuteronomio 13:6-8; Ester 6:2; Hulubaton 29:24.
Walay sapayan nga wala mapaidalom sa Mosaikong Kasuguan, ang mga Cristiano karon mahimo matuytuyan sang mga prinsipio sa likod sini. (Salmo 19:7, 8) Gani kon may nahibaluan ikaw nga mabug-at nga sala sang isa ka masigka-Cristiano, ano ang dapat mo himuon?
Pagtatap sa Problema
Una sa tanan, importante nga may yara nagakaigo nga rason sa pagpati nga tunay gid nga natabo ang mabug-at nga sala. “Indi ka magsaksi sa walay kabangdanan batok sa imo isigkatawo,” siling sang maalamon nga tawo. “Nian mangin buangbuang ka paagi sa imo mga bibig.”—Hulubaton 24:28.
Mahimo ka mamat-od sa pagkadto sing direkta sa mga gulang. Indi ini malain nga himuon. Apang, sa masami, ang labing mahigugmaon nga paagi amo ang palapitan ang tawo nga nakasala. Ayhan ang mga katunayan indi subong sang kon daw ano ini. Ukon ayhan ang problema ginatatap na sang mga gulang. Ipakighambal ini sing matawhay sa iya. Kon may rason gihapon sa pagpati nga may mabug-at nga sala nga nahimo, palig-una sia nga magpangayo sing bulig sa mga gulang, kag ipaathag ang kaalam sang paghimo sini. Indi ini pag-ipamaba sa iban, kay mangin kutsokutso ina.
Kon indi sia manugid sa mga gulang sa sulod sang nagakaigo nga kadugayon sang tion, nian ikaw ang dapat manugid. Nian hambalan ini sang isa ukon duha ka gulang upod sa ginsumbong. Dapat “makisayod kag magpangusisa kag magpamangkot sing maayo” ang mga gulang agod hibaluon kon may nahimo nga sala. Kon may nahimo, tatapon nila ang kaso suno sa Makasulatanhon nga mga panuytoy.—Deuteronomio 13:12-14.
Sa dimagkubos duha ka saksi ang ginakinahanglan agod masumbong ang sala. (Juan 8:17; Hebreo 10:28) Kon ipanghiwala niya ang panumbungon kag ang imo panaysayon nagaisahanon lamang, ang problema itugyan sa mga kamot ni Jehova. (1 Timoteo 5:19, 24, 25) Ginahimo ini sa pagkahibalo nga ang tanan nga butang “ginabuyagyag sing dayag” ni Jehova kag nga kon nakasala gid man sia, ang iya sala “magalagas” sa ulihi sa iya.—Hebreo 4:13; Numeros 32:23.
Apang pananglitan ginapanghiwala niya ang panumbungon kag ikaw lamang ang nagaisahanon nga saksi batok sa iya. Mahimo ka bala karon masumbong sing pasipala? Indi, luwas lamang kon ginkutsokutso nimo ini sa mga wala labot sa problema. Indi mapasipalahon nga isugid ang mga kahimtangan nga nagaapektar sa kongregasyon sa mga may awtoridad kag responsabilidad sa pagtatap kag sa pagtadlong sa mga bagay. Sa katunayan, nahisuno ini sa handum naton nga pirme himuon ang husto kag matuod.—Ipaanggid ang Lucas 1:74, 75.
Paghupot Sing Pagkabalaan sa Kongregasyon
Ang isa ka rason sa pagsugid sa sala amo nga nagabulig ini agod maamligan ang katinlo sang kongregasyon. Si Jehova isa ka matinlo nga Dios, isa ka balaan nga Dios. Ginasugo niya ang tanan nga nagasimba sa iya nga mangin matinlo sa espirituwal kag moral. Ang iya inspirado nga Pulong nagalaygay: “Subong nga mga anak nga matinumanon, indi magpauyon sa lakas nga mga balatyagon sang inyo unang pagkakulang sing ihibalo, kundi, nahisuno sa Isa nga Balaan nga nagtawag sa inyo, magpakabalaan man kamo gid sa tanan nga paggawi, bangod nasulat na: ‘Magpakabalaan kamo, kay balaan ako.’ ” (1 Pedro 1:14-16) Ang mga indibiduwal nga nagahimo sing kahigkuan ukon sala mahimo nga magadala sing dagta kag sing indi kahamuot ni Jehova sa bug-os nga kongregasyon kon wala sing tikang nga ginahimo agod matadlong ukon mapahalin sila.—Ipaanggid ang Josue, kapitulo 7.
Ang mga sulat ni apostol Pablo sa Cristianong kongregasyon sa Corinto nagapakita kon paano ang pagsugid sa sala nagabulig agod matinluan ang katawhan sang Dios didto. Sa iya unang sulat, si Pablo nagsulat: “Ginasugid sing matuod nga may pagpakighilawas sa tunga ninyo, kag ang amo nga pagpakighilawas wala bisan sa tunga sang mga pungsod, nga ang isa nga nagahupot sang asawa sang iya amay.”—1 Corinto 5:1.
Wala ginasugid sa aton sang Biblia kon kay sin-o nabaton sang apostol ining balita. Ayhan nabalitaan ni Pablo ang tuhoy sa kahimtangan gikan kanday Estefanas, Fortunato, kag Acaico, nga naglakbay halin sa Corinto pakadto sa Efeso diin nagatener si Pablo. Nakabaton man si Pablo sing isa ka nagapangusisa nga sulat halin sa Cristianong kongregasyon sa Corinto. Bisan ano man ang ginhalinan, sang ginsugid ini kay Pablo sang masaligan nga mga saksi, naghatag sia nian sing panuytoy tuhoy sini. “Isikway ninyo ang tawo nga malaut sa tunga ninyo,” sulat niya. Ang tawo ginsikway gikan sa kongregasyon.—1 Corinto 5:13; 16:17, 18.
Nagresulta bala sing maayo ang instruksion ni Pablo? Huo! Maathag gid nga nakamarasmas ang nakasala. Sa iya ikaduhang sulat sa mga taga-Corinto, ginlaygayan ni Pablo ang kongregasyon nga “patawaron kag lugpayan sing maluluy-on” ang tawo nga mahinulsulon. (2 Corinto 2:6-8) Busa ang pagsugid sa sala nagdul-ong sa buhat nga nagresulta sa pagtinlo sa kongregasyon kag sa pagpasag-uli sa pabor sang Dios sang tawo nga naghalit sang iya kaangtanan sa Dios.
Makasapo kita sing isa pa ka halimbawa sa nahaunang sulat ni Pablo sa Cristianong kongregasyon sa Corinto. Sini nga tion ginhingadlan sang apostol ang mga saksi nga nagsugid sang problema. Sia nagsulat: “Ginsugid sa akon ang nahanungod sa inyo, mga kauturan ko, sang mga yara sa balay ni Cloe, nga may dipaghangpanay nga nagaluntad sa tunga ninyo.” (1 Corinto 1:11) Nahibaluan ni Pablo nga ining dipaghangpanay, lakip ang paghatag sing dinagakaigo nga kadungganan sa mga tawo, nagtuga sing sektaryan nga panimuot nga nagbutang sa katalagman sang paghiusa sang kongregasyon. Gani, bangod sang tudok nga pagtahod sa espirituwal nga kaayuhan sang iya mga masigkatumuluo didto, si Pablo nagpanghikot gilayon kag nagsulat sing nagatadlong nga laygay sa kongregasyon.
Sa karon, ang kalabanan nga kauturan nga lalaki kag babayi sa kongregasyon sa bug-os nga duta nagapangabudlay sing lakas agod amligan ang espirituwal nga katinlo sang kongregasyon paagi sa paghupot sang tagsa ka indibiduwal sing kalahamut-an nga tindog sa atubangan sang Dios. Ang iban nagaantos agod himuon ini; ang iban naman napatay pa gani agod mahuptan ang integridad. Pat-od gid nga ang indi pagsapak ukon pagtabon sa sala nagapakita sing kakulang sing apresasyon sa sining mga panikasog.
Bulig Para sa mga Nakasala
Ngaa ang pila nga nakahimo sing mabug-at nga sala nagaisol sa pagpalapit sa mga gulang sang kongregasyon? Sa masami bangod wala sila makahibalo sang mga benepisyo sang pagkadto sa mga gulang. Ang iban nagapati sing sayop nga kon magtu-ad sila, ang ila sala mabuyagyag sa bug-os nga kongregasyon. Ginapakadiutay naman sang iban ang kabug-aton sang ila dalanon. Ang iban naman nagahunahuna nga mahimo nila mabag-o ang ila kaugalingon nga wala ang bulig sang mga gulang.
Apang ining mga nakasala nagakinahanglan sing mahigugmaon nga bulig gikan sa mga gulang sang kongregasyon. Si Santiago nagsulat: “May nagamasakit bala sa inyo? Magpatawag sia sang mga gulang sang kongregasyon, kag pangamuyuan nila sia, nga ginahaplasan sia sing lana sa ngalan ni Jehova. Kag ang pangamuyo sang pagtuo magaayo sang nagamasakit, kag si Jehova magabangon sa iya. Subong man, kon nakasala sia, patawaron ini sa iya.”—Santiago 5:14, 15.
Daw ano katahom nga aman agod buligan ang mga nakasala nga mapasag-uli ang ila espirituwalidad! Paagi sa pag-aplikar sang nagapaumpaw nga laygay gikan sa Pulong sang Dios kag paagi sa pagpangamuyo tungod sa ila, mabuligan sang mga gulang ang mga nagamasakit sa espirituwal nga mag-ayo gikan sa ila sayop nga mga dalanon. Busa, sa baylo nga magbatyag nga gintagudilian, ang mga mahinulsulon masunson nga nagabatyag nga narepreskuhan kag napaumpawan sang makigkita sila sa mahigugmaon nga mga gulang. Isa ka lamharon nga lalaki sa Katundan nga Aprika ang nakahimo sing pakighilawas kag nagtago sang iya sala sa sulod sang pila ka bulan. Sang madayag ang iya sala, nagsiling sia sa mga gulang: “Kuntani may namangkot anay sa akon tuhoy sa akon relasyon sa sinang babayi! Daku gid nga kaumpawan nga matu-ad ko ining akon sala.”—Ipaanggid ang Salmo 32:3-5.
Isa ka Buhat Sang May Prinsipio nga Gugma
Ang bawtismado nga mga alagad sang Dios ‘nagliton halin sa kamatayon pakadto sa kabuhi.’ (1 Juan 3:14) Apang kon makahimo sila sing mabug-at nga sala, nagpadulong sila sa dalan sang kamatayon. Kon indi sila mabuligan, mahimo nga magkabalan sila sa paghimo sing sala, nga indi na maluyag sa paghinulsol kag magbalik sa pagsimba sa matuod nga Dios.—Hebreo 10:26-29.
Ang pagsugid sa sala isa ka buhat sang matuod nga pag-ulikid sa nakasala. Si Santiago nagsulat: “Mga kauturan ko, kon may yara sa inyo nga nagatalang sa kamatuoran kag may isa nga nagapaliso sa iya, pahibalua sia nga ang nagapaliso sing makasasala gikan sa pagtalang sang iya paggawi magaluwas sang iya kalag gikan sa kamatayon kag magatabon sing kadam-an nga mga sala.”—Santiago 5:19, 20.
Gani, nian, ngaa dapat isugid ang malain? Bangod nagaresulta ini sa maayo. Matuod, ang pagsugid sa sala isa ka buhat sang Cristianong may prinsipio nga gugma nga ginapakita sa Dios, sa kongregasyon, kag sa nakasala. Samtang ang tagsa ka katapo sang kongregasyon mainunungon nga nagasakdag sang matarong nga mga talaksan sang Dios, si Jehova magapakamaayo sing bugana sa kongregasyon subong kabilugan. Si apostol Pablo nagsulat: “[Si Jehova] magapalig-on man sa inyo tubtob sa katapusan, agod mangin hilway kamo sa panumbungon sa adlaw sang aton Ginuong Jesucristo.”—1 Corinto 1:8.
[Kapsion sa pahina 26]
Pagpakita sing gugma nga palig-unon ang Saksi nga nakasala nga makighambal sa mga gulang
[Kapsion sa pahina 28]
Ang mga gulang nagabulig sa pagpasag-uli sa mga nakasala sa kahamuot sang Dios