Kon Paano Ginapakitaan sang Gugma kag Kaluoy ang mga Nakahimo sang Serioso nga Sala

1. May paglaum pa bala ang mga nakahimo sang serioso nga sala?

NATUN-AN naton sa nagligad nga artikulo kon ano ang ginsiling ni apostol Pablo sa kongregasyon sa Corinto nga dapat himuon sa isa ka utod nga nakahimo sang serioso nga sala. Wala naghinulsol ang utod, gani dapat sia sikwayon sa kongregasyon. Pero, base sa teksto nga ginbasihan sini nga artikulo, puede mabuligan ang pila nga nakahimo sang serioso nga sala para maghinulsol sila. (Roma 2:4) Paano sila mabuligan sang mga gulang nga maghinulsol?

2-3. Ano ang dapat naton himuon kon nabal-an naton nga nakahimo sang serioso nga sala ang isa ka utod, kag ngaa?

² Kon wala kabalo ang mga gulang nga nakahimo sang serioso nga sala ang isa ka utod, indi nila sia mabuligan. Gani, ano ang dapat naton himuon kon nabal-an naton nga nakahimo sang serioso nga sala ang isa ka utod nga posible mangin rason para sikwayon sia sa kongregasyon? Dapat naton palig-unon ang utod nga magpalapit sa mga gulang para mabuligan sia.​—Isa. 1:18; Binu. 20:28; 1 Ped. 5:2.

³ Pero, ano abi kon indi niya gusto mag-istorya sa mga gulang? Dapat kita mismo ang mag-istorya sa mga gulang para mabuligan ang utod. Kon himuon naton ini, ginapakita naton nga palangga naton sia. Kay man, kon padayon nga himuon sang utod ang iya ginahimo nga malain, maguba ang iya kaangtanan kay Jehova. Kag maguba man ang reputasyon sang kongregasyon. Gani, bisan pa mabudlay, dapat naton istoryahon ang mga gulang bangod palangga naton si Jehova kag ang aton utod.​—Sal. 27:14.

KON PAANO GINABULIGAN SANG MGA GULANG ANG NAKASALA

4. Kon ginaistorya sang mga gulang ang nakasala, ano ang ginapanikasugan nila nga himuon?

⁴ Kon may isa ka utod nga nakahimo sang serioso nga sala, nagapili ang hubon sang mga gulang sing tatlo ka gulang para mag-alagad bilang komite.a Dapat mapainubuson ini nga mga gulang. Panikasugan gid nila nga buligan nga maghinulsol ang utod nga nakasala, pero kabalo man sila nga indi nila sia mapilit nga maghimo sang mga pagbag-o. (Deut. 30:19) Kabalo ang mga gulang nga indi tanan nga nakahimo sang serioso nga sala pareho ang panimuot kay Hari David. (2 Sam. 12:13) Kay man, posible balewalaon sang iban nga nakasala ang mga laygay ni Jehova. (Gen. 4:​6-8) Pero, panikasugan gid sang mga gulang nga buligan nga maghinulsol ang nakasala. Ano nga mga prinsipio ang ginadumdom sang mga gulang kon nagaistorya sila sa iya?

5. Ano nga mga kinaiya ang ginapakita sang mga gulang kon ginaistorya nila ang nakasala? (2 Timoteo 2:​24-26) (Tan-awa man ang piktyur.)

⁵ Kabalo ang mga gulang nga hamili gihapon kay Jehova ang nakahimo sang serioso nga sala nga daw pareho sa isa ka karnero nga nadula. (Luc. 15:​4, 6) Gani, kon ginaistorya sang mga gulang ang nakasala, wala sila nagaugtas ukon nagapangakig. Wala man nila ginahunahuna nga ang dapat lang nila himuon amo ang magpamangkot kag magkuha sang impormasyon. Sa baylo, ginapakita nila ang mga kinaiya nga mabasa sa 2 Timoteo 2:​24-26. (Basaha.) Ginapanikasugan sang mga gulang nga mangin malulo, kalmado, kag mainayuhon kay gusto nila nga buligan ang nakasala nga maghimo sang mga pagbag-o.

6. Ano ang himuon sang mga gulang para mahanda nila ang ila tagipusuon antes nila istoryahon ang nakasala? (Roma 2:4)

⁶ Ginahanda sang mga gulang ang ila tagipusuon. Ginapanikasugan sang mga gulang nga ilugon ang pagtratar ni Jehova sa nakasala, gani ginadumdom nila ang ginsiling ni Pablo: “Ang kaayo sang Dios nagatinguha sa pagtuytoy sa imo sa paghinulsol.” (Basaha ang Roma 2:4.) Dapat dumdumon sang mga gulang nga ang ila panguna nga responsibilidad amo ang bantayan ang panong. Gani, dapat nila sundon ang mga instruksion sang Cristo kag ang iya paagi sa pag-atipan sa kongregasyon. (Isa. 11:​3, 4; Mat. 18:​18-20) Antes istoryahon sang komite ang nakasala, nagapangamuyo sila kay Jehova para matuytuyan nila ukon mabuligan nila ang nakasala nga maghinulsol. Naga-research sila sa Biblia kag sa aton mga publikasyon, kag nagapangamuyo sila kay Jehova nga buligan sila nga maintiendihan ang nakasala kag ang iya sitwasyon. Ginabinagbinag nila ang mga dapat nila mabal-an parte sa nakasala nga posible nakaimpluwensia sa iya panghunahuna, panimuot, kag paggawi.​—Hulu. 20:5.

7-8. Paano mailog sang mga gulang ang pagkamapinasensiahon ni Jehova kon ginaistorya nila ang nakasala?

⁷ Ginailog sang mga gulang ang pagkamapinasensiahon ni Jehova. Ginadumdom nila ang pagtratar ni Jehova sa iya mga alagad sang una nga nakahimo sang serioso nga sala. Halimbawa, mapinasensiahon si Jehova kay Cain. Ginpaandaman niya si Cain kon ano ang matabo sa iya kon indi sia magbag-o, kag ginsilingan niya si Cain nga pakamaayuhon niya sia kon magtuman sia. (Gen. 4:​6, 7) Ginpadala ni Jehova si manalagna Natan para laygayan si David, kag naggamit si Natan sang ilustrasyon nga nakabulig kay David nga maghinulsol. (2 Sam. 12:​1-7) Kag ‘padayon nga ginasugo’ ni Jehova sing “sulitsulit” ang iya mga manalagna sa rebelyuso nga mga Israelinhon. (Jer. 7:​24, 25) Wala sia nagsiling nga hulaton niya anay nga maghinulsol ang iya katawhan antes niya sila buligan. Sa baylo, ginpalig-on niya sila nga maghinulsol bisan pa nga padayon sila nga nagahimo sang sala.

⁸ Ginailog sang mga gulang ang halimbawa ni Jehova kon ginabuligan nila ang nakahimo sang serioso nga sala. Ginasunod nila ang ginasiling sang 2 Timoteo 4:​2, gani ginabuligan nila ang nakasala nga “may bug-os nga pagkamapinasensiahon.” Ari ang ginasiling sang study note sang sini nga teksto parte sa mga kinaiya nga dapat ipakita sang isa ka gulang: “Dapat pirme sia kalmado kag mapinasensiahon niya nga palig-unon ang nakasala nga himuon ang husto. Kon maakig ukon maugot ang gulang, posible nga indi pagpamatian sang nakasala ang iya laygay ukon indi sia maghinulsol.”

9-10. Paano mabuligan sang mga gulang ang nakasala nga makita ang mga rason kon ngaa nakahimo sia sang serioso nga sala?

⁹ Ginatinguhaan sang mga gulang nga mabal-an ang mga rason kon ngaa nakahimo sang serioso nga sala ang isa ka indibiduwal. Halimbawa, nagluya bala ang iya kaangtanan kay Jehova bangod indi na regular ang iya pagtuon sang Biblia ukon ang iya pagbantala? Indi na bala regular ang iya pagpangamuyo kay Jehova? Wala bala niya ginapakigbatuan ang iya sala nga mga handum? Indi bala maayo ang iya mga kaupdanan ukon mga kalingawan? Paano nakaimpluwensia sa iya panghunahuna ang iya mga desisyon parte sa sini nga mga butang? Kabalo bala sia kon ano ang ginabatyag sang iya Amay nga si Jehova sa iya mga desisyon kag sa iya mga ginhimo?

¹⁰ Nagagamit ang mga gulang sang makapahunahuna nga mga pamangkot para buligan ang nakasala nga makita ang mga rason kon ngaa nakahimo sia sang serioso nga sala. Ginapamangkot nila sia sa mainayuhon nga paagi, kag wala sila nagapamangkot parte sa personal nga mga butang nga indi na nila kinahanglan mabal-an. (Hulu. 20:5) Nagagamit man sila sang mga ilustrasyon para buligan ang nakasala nga marealisar ang iya sala, pareho sa ginhimo ni Natan para buligan si David. Posible nga sa una nila nga pag-istorya sa nakasala, marealisar niya nga nakahimo sia sang indi maayo nga mga desisyon kag masubuan sia sa sini. Kag posible nga magahinulsol sia sa iya nahimo nga sala.

11. Paano ginbuligan ni Jesus ang mga makasasala?

¹¹ Ginapanikasugan sang mga gulang nga ilugon si Jesus. Makapahunahuna ang ginpamangkot ni Jesus kay Saulo nga taga-Tarso: “Saulo, Saulo, ngaa ginahingabot mo ako?” Paagi sa sini, ginbuligan sia ni Jesus nga marealisar nga sala ang iya ginahimo. (Binu. 9:​3-6) Kag sa bahin sang “babayi nga si Jezebel,” nagsiling si Jesus: “ginhatagan ko sia sing tion nga maghinulsol.”​—Bug. 2:​20, 21.

12-13. Paano mahatagan sang mga gulang sing tion ang nakasala nga maghinulsol? (Tan-awa man ang piktyur.)

¹² Bilang pag-ilog kay Jesus, wala nagapadasudaso ang mga gulang sa paghunahuna nga indi na maghinulsol ang nakasala. Sa bahin sang mga nakasala, may pila nga posible maghinulsol dayon sa una pa lang nga pag-istorya sa ila sang komite. Pero may pila nga posible nagakinahanglan sing tion para ipakita ang ila paghinulsol. Gani, mahimo magdesisyon ang komite nga istoryahon ang nakasala sing sobra sa isa ka beses. Posible nga pagkatapos sang una nila nga pag-istoryahanay, pamensaran sing maayo sang nakasala ang mga ginlaygay sa iya sang mga gulang. Kag posible nga magpaubos sia kag mangamuyo sia kay Jehova nga patawaron sia sa iya sala. (Sal. 32:5; 38:18) Gani, kon istoryahon sia liwat sang komite, posible nga lain na ang iya panimuot kon ikumparar sa una nga pag-istorya sa iya.

¹³ Para buligan ang nakasala nga maghinulsol, nagapakita ang mga gulang sang empatiya kag kaayo. Nagapangamuyo sila kay Jehova nga pakamaayuhon niya ang ila mga pagpanikasog, kag nagalaum sila nga makamarasmas ang ila utod kag maghinulsol.​—2 Tim. 2:​25, 26.

14. Sin-o ang dapat padunggan kon maghinulsol ang nakasala, kag ngaa?

¹⁴ Kon maghinulsol ang nakasala, dapat gid kita malipay. (Luc. 15:​7, 10) Sin-o ang dapat padunggan sa sini? Ang mga gulang bala ang dapat padunggan? Dumduma ang ginsiling ni Pablo parte sa mga nakasala: “Basi tugutan sang Dios nga maghinulsol sila.” (2 Tim. 2:25) Ang study note sa sini nga teksto nagasiling: “Ang dapat gid padunggan sa sini nga pagbag-o sang hunahuna ukon panimuot amo si Jehova, indi ang bisan sin-o nga tawo. Kay man si Jehova gid ang nagbulig sa nakasala nga maghimo sining daku nga pagbag-o. May ginsiling pa gid si Pablo nga maayo nga resulta sa sini nga paghinulsol—mas mahangpan pa gid sing sibu sang nakasala ang kamatuoran, makabulig ini sa iya nga makamarasmas, kag makapalagyo sa mga siod ni Satanas.​—2Ti 2:26.”

15. Ano ang ginahimo sang mga gulang para padayon nga buligan ang mahinulsulon nga nakasala?

¹⁵ Kon maghinulsol ang nakasala, padayon sia nga i-shepherding sang komite para buligan sia nga padayon nga pamatukan ang mga pagsulay ni Satanas kag mahimo niya ang husto. (Heb. 12:​12, 13) Siempre, wala ginasugid sang mga gulang sa iban ang mga detalye sang sala nga nahimo sang utod. Pero, ano ang posible dapat ipahibalo sa kongregasyon?

“SABDUNGA SA ATUBANGAN SANG TANAN NGA TUMALAN-AW”

16. Suno sa 1 Timoteo 5:​20, sin-o ang mga “tumalan-aw” nga ginsambit ni Pablo?

¹⁶ Basaha ang 1 Timoteo 5:20. Ginsilingan ni Pablo si Timoteo, nga isa man ka gulang, nga sabdungon “sa atubangan sang tanan nga tumalan-aw ang mga padayon nga nagapakasala.” Ano ang buot silingon sang ekspresyon nga “tanan nga tumalan-aw”? Pirme bala ini nagapatuhoy sa bilog nga kongregasyon? Indi. Sa pila ka kaso, puede ini magpatuhoy sa pila lang ka indibiduwal nga posible nakabalo sang sala sang utod. Posible nga nasaksihan sini nga mga indibiduwal ang parte sa sala sang utod, ukon posible nga ginsugiran sila sang utod parte sa nahimo niya nga sala. Sa sini nga sitwasyon, sila lang ang pabal-on sang mga gulang nga gin-asikaso na ang kaso sang utod.

17. Kon madamo ang nakabalo sa kongregasyon parte sa sala sang utod ukon posible nga maglapta ini, ano nga pahibalo ang dapat himuon, kag ngaa?

¹⁷ May mga tion nga posible madamo ang nakabalo sa kongregasyon parte sa sala sang utod ukon posible nga maglapta ini. Sa sini nga sitwasyon, ang “tumalan-aw” amo ang bilog nga kongregasyon. Gani, may isa ka gulang nga magapahibalo sa kongregasyon nga ginsabdong ang utod. Ngaa kinahanglan ini himuon? Amo ini ang sabat ni Pablo: “Subong paandam sa iban” para indi sila maghimo sang serioso nga sala.

18. Kon bawtismado nga menor de edad ang nakahimo sang serioso nga sala, paano ini ginaasikaso sang mga gulang? (Tan-awa man ang piktyur.)

¹⁸ Ano abi kon bawtismado nga menor de edad, ukon wala pa nag-18 anyos, ang nakahimo sang serioso nga sala? Magapili ang hubon sang mga gulang sing duha ka gulang nga magaistorya sa menor de edad kag sa iya Saksi nga mga ginikanan.b Hibaluon sang mga gulang kon ano na ang ginhimo sang mga ginikanan para buligan ang ila bata nga magbag-o kag maghinulsol. Kon maayo ang panimuot sang bata kag ginapamatian niya ang laygay sang iya mga ginikanan, mahimo magdesisyon ang duha ka gulang nga indi na kinahanglan maghimo sang komite para istoryahon sia kag ang iya mga ginikanan. Kay man, ginhatagan ni Jehova ang mga ginikanan sang responsibilidad nga tadlungon ang ila kabataan sa mahigugmaon nga paagi. (Deut. 6:​6, 7; Hulu. 6:20; 22:6; Efe. 6:​2-4) Kamustahon pirme sang mga gulang ang mga ginikanan para siguraduhon nga nagabaton ang ila bata sang bulig nga kinahanglan niya. Pero, ano abi kon indi mag-untat ang bawtismado nga menor de edad sa iya ginahimo nga malain? Sa sini nga sitwasyon, istoryahon sia sang komite sang mga gulang upod sa iya Saksi nga mga ginikanan.

“SI JEHOVA MAPINALANGGAON GID KAG MALULUY-ON”

19. Kon ginaistorya sang mga gulang ang nakasala, paano nila ginapakita nga ginailog nila si Jehova?

¹⁹ Sa bahin sang mga gulang nga nagaalagad sa komite, gusto ni Jehova nga amligan nila ang kongregasyon sa mga wala nagatuman sa iya mga kasuguan. (1 Cor. 5:7) Pero ginahimo man nila ang bug-os nila nga masarangan para buligan ang nakasala nga maghinulsol. Gani, wala sila nagakadulaan sang paglaum nga posible magbag-o pa ang nakasala. Ngaa? Bangod gusto nila ilugon si Jehova nga “mapinalanggaon gid kag maluluy-on.” (Sant. 5:11) Talupangda kon paano ini ginpakita ni apostol Juan sang tigulang na sia. Nagsiling sia: “Mga anak ko, ginasulat ko sa inyo ining mga butang agod indi kamo makahimo sang sala. Apang, kon may isa sa inyo nga makahimo sang sala, may manugbulig kita nga kaupod sang Amay, si Jesucristo, ang isa nga matarong.”​—1 Juan 2:1.

20. Ano ang binagbinagon naton sa katapusan nga artikulo sang sini nga serye?

²⁰ Makapasubo, may mga tion nga wala nagahinulsol ang isa ka utod nga nakasala. Sa sini nga sitwasyon, dapat sia sikwayon sa kongregasyon. Paano ini ginaasikaso sang mga gulang? Binagbinagon naton ini sa katapusan nga artikulo sang sini nga serye.