Mga Reperensia Para sa Pagkabuhi kag Pagministeryo nga Workbook Para sa Miting
© 2023 Watch Tower Bible and Tract Society of Pennsylvania
SEPTIEMBRE 4-10
MGA BAHANDI SA PULONG SANG DIOS | ESTER 1-2
“Mangin Maugdang Pareho kay Ester”
Makapabilin Ka nga Maugdang Bisan Mabudlay
11 Matilawan man ang aton kaugdang kon dayawon kita sang iban. Binagbinaga ang reaksion ni Ester sa wala niya ginapaabot nga mga hitabo. Matahom gid sia, kag isa ka tuig nga gin-asikaso ang pagpatahom pa gid sa iya. Adlaw-adlaw nga kaupod niya ang madamo nga dalaga sa bilog nga Emperyo sang Persia nga nagatinguha nga magustuhan sang hari. Pero matinahuron gihapon sia kag maugdang. Wala sia nangin bugalon ukon matinaastaason bisan sang ginpili sia sang hari nga mangin rayna.—Ester 2:9, 12, 15, 17.
Ginpangapinan Niya ang Katawhan sang Dios
15 Sang tion nga dalhon na si Ester sa hari, ginpagustuhan sia sa pagpili sang mga butang nga mahimo kinahanglan pa niya sa pagpatahom. Pero wala na sia nangayo sang iban pa nga butang luwas lang sa ginhambal ni Hegai sa iya. (Est. 2:15) Mahimo narealisar ni Ester nga indi lang katahom ang makaganyat sa hari; mas importante ang kaugdang kag pagkamapainubuson. Husto ayhan sia?
Makapabilin Ka nga Maugdang Bisan Mabudlay
12 Kon maugdang kita, pirme disente kag talahuron ang aton pamayo, pamustura, kag paggawi. Mas nanamian ang mga tawo sa nagapakita sang “malinong kag malulo nga espiritu” sangsa nagapabugal ukon nagapadayawdayaw. (Basaha ang 1 Pedro 3:3, 4; Jer. 9:23, 24) Ang ginabatyag naton nga bugal makita sa ulihi sa aton paggawi. Halimbawa, basi ipabatyag naton sa iban nga pinasahi gid kita bangod sang aton mga pribilehiyo, impormasyon nga nahibaluan, ukon bangod suod kita sa mga utod nga nagapanguna. Ukon basi ginahambal naton nga kita lang ang nakapensar ukon naghimo sang isa ka butang, bisan pa may nagbulig sa aton. Dapat naton sundon ang maayo nga halimbawa ni Jesus. Pirme niya ginakutlo ukon ginapatuhuyan ang Hebreong Kasulatan. Bangod maugdang sia, nahibaluan sang mga nagapamati sa iya nga halin kay Jehova ang iya ginsiling kag indi bangod sang iya kaalam.—Juan 8:28.
Espirituwal nga mga Hiyas
Nahibaluan Mo Bala?
May nakit-an ang mga researcher nga isa ka sinulatan sang Persia sang una. Ang paagi sang pagsulat sini ginatawag nga cuneiform. Ginsambit sa sini ang ngalan nga Marduka (Mardoqueo sa Hiligaynon). Isa sia ka manugdumala sa Susan kag posible sia ang accountant. Si Arthur Ungnad, isa ka eksperto sa history sa mga lugar sa Sidlangan, nagsiling nga ini nga cuneiform “amo lamang ang sinulatan nga nagsambit kay Mardoqueo magluwas sa Biblia” sadto nga tion.
Sugod sang ginsiling ini ni Ungnad, gin-translate sang mga eksperto ang linibo ka cuneiform sang Persia. Nalakip sa sini ang mga sinulatan sa daga nga nakit-an sa isa ka guba nga siudad sang Persepolis. Nakit-an ini sa Treasury, malapit sa pader sang siudad. Ginsulat ini nga mga sinulatan sang panahon ni Hari Xerxes I. Nasulat ini sa lenguahe sang mga Elaminhon kag mabasa sa sini ang pila ka ngalan nga makita sa libro sang Ester.
Mabasa sa pila ka sinulatan sa daga nga nakit-an sa Persepolis ang ngalan nga Marduka. Isa sia ka sekretaryo sang hari sa palasyo sang Susan sang panahon ni Hari Xerxes I. Ginsambit sa isa ka sinulatan nga si Marduka isa ka translator. Nagasanto gid ini sa ginasiling sang Biblia parte kay Mardoqueo. Suno sa Biblia, isa sia ka opisyal nga nagaalagad kay Hari Ahasuero (Xerxes I) kag nagahambal sia sing duha ka lenguahe. Pirme nagapungko si Mardoqueo sa gawang sang hari sa palasyo sang Susan. (Est. 2:19, 21; 3:3) Ini nga gawang isa ka daku nga bilding kag diri nagatrabaho ang mga opisyal sang palasyo.
May talalupangdon nga pagkaanggid si Marduka nga ginsambit sa mga sinulatan sa daga kag si Mardoqueo nga ginsambit sa libro sang Biblia nga Ester. Nagkabuhi sila sa pareho nga tion kag lugar, kag pareho sila nga nag-alagad bilang opisyal sa palasyo. Ginapakita sini nga posible isa lang ka tawo si Marduka kag si Mardoqueo.
SEPTIEMBRE 11-17
MGA BAHANDI SA PULONG SANG DIOS | ESTER 3-5
“Buligi ang Iban nga Himuon ang Ila Pinakamaayo”
it-2-E 431 ¶7
Mardoqueo
Wala Magduko kay Haman. Masunod sini, si Haman nga Agagnon ginhimo nga primer ministro ni Ahasuero, nga nagmando sa tanan nga ara gawang sang hari nga maghapa kay Haman bangod sa iya bag-o nga mataas nga posisyon. Malig-on nga nangindi si Mardoqueo bangod siling niya isa sia ka Judiyo. (Es 3:1-4) Ginhimo ini ni Mardoqueo bangod bilang Judiyo, nakadedikar sia sa iya Dios nga si Jehova. Kabalo sia nga ang paghapa kay Haman indi lang basta pagyaub sa isa ka tawo nga may mataas nga posisyon, pareho sang ginahimo sang mga Israelinhon sadto, bilang pagkilala lamang sa awtoridad sina nga tawo bilang manuggahom. (2Sa 14:4; 18:28; 1Ha 1:16) May rason gid si Mardoqueo kon ngaa wala sia magduko kay Haman. Si Haman mahimo isa ka Amaleknon, kag si Jehova mismo nagsiling nga nagapakig-away sia sa mga Amaleknon “sa tanan nila nga kaliwatan.” (Ex 17:16; tan-awa ang HAMAN.) Ang isyu diri indi parte sa pulitika kundi parte sa katutom ni Mardoqueo sa Dios.
it-2-E 431 ¶9
Mardoqueo
Gingamit Para Luwason ang Israel. Bisan pa may mando nga papason ang tanan nga Judiyo sa bilog nga emperyo, nagapati gid si Mardoqueo nga si Ester ginhimo nga rayna sa sina nga tion para luwason ang mga Judiyo. Ginpakita niya kay Ester ang mabug-at nga responsibilidad sini kag ginpangabay sia nga makitluoy kag mangayo sing bulig sa hari. Bisan pa posible patyon si Ester, nagtuman sia.—Est 4:7–5:2.
Ginpangapinan Niya ang Katawhan sang Dios
22 Kinulbaan gid si Ester sang nabatian niya ina nga mensahe. Daku gid ini nga pagtilaw sa iya pagtuo. Makita sa iya sabat kay Mardoqueo nga nahadlok gid sia. Ginpahanumdom niya kay Mardoqueo ang sugo sang hari nga ang bisan sin-o nga magkadto sa hari nga wala ginapatawag pagapatyon. Maluwas lang ang naghimo sini kon untayon sang hari ang iya setro nga bulawan. Mapaabot ayhan ni Ester nga kaluuyan sia sang hari, kay si Vasti gani wala ginkaluuyan sang wala niya ginsapak ang pagpatawag sa iya sang hari? Ginsugiran niya si Mardoqueo nga 30 na ka adlaw nga wala sia ginpatawag sang hari! Bangod sini, naghunahuna sia nga basi wala na nahamuot sa iya ang hari nga pirme nagabag-obag-o ang pensar.—Est. 4:9-11.
23 Ginpabakod ni Mardoqueo ang pagtuo ni Ester. Ginsilingan niya si Ester nga kon indi sia maghulag, pat-od nga may iban nga mabulig para maluwas ang mga Judiyo. Kag indi man mapat-od ni Ester nga makaluwas sia kon grabe na ang paghingabot. Ginpakita diri ni Mardoqueo ang daku niya nga pagtuo kay Jehova, nga indi magtugot nga mapapas ang Iya katawhan kag mapaslawan ang Iya mga saad. (Jos. 23:14) Dayon ginpamangkot ni Mardoqueo si Ester: “Wala ka bala makahibalo nga basi amo ini ang rason nga nangin rayna ka?” (Est. 4:12-14, New World Translation of the Holy Scriptures) Takus gid nga ilugon si Mardoqueo. Nagsalig sia sing bug-os sa iya Dios nga si Jehova. Kita man bala?—Hulu. 3:5, 6.
Espirituwal nga mga Hiyas
Pagpakigbato Para sa Kahilwayan sa Pagsimba
14 Kaangay nanday Ester kag Mardoqueo sang una, ang katawhan ni Jehova nagapakigbato man para sa kahilwayan sa pagsimba kay Jehova suno sa paagi nga ginsugo niya. (Est. 4:13-16) Makapakigbahin ka man bala? Huo. Mahimo mo ilakip pirme sa imo mga pangamuyo ang mga kauturan nga nagaantos subong bangod sang mga inhustisya sa kasuguan. Daku gid ang mabulig sini nga mga pangamuyo sa aton mga kauturan nga nagaatubang sing kabudlayan kag paghingabot. (Basaha ang Santiago 5:16.) Ginasabat bala ni Jehova ini nga mga pangamuyo? Ginapakita sang aton mga kadalag-an nga ginasabat gid niya!—Heb. 13:18, 19.
SEPTIEMBRE 18-24
MGA BAHANDI SA PULONG SANG DIOS | ESTER 6-8
“Ang Matun-an Naton Parte sa Maayo nga Komunikasyon”
Maalamon Sia, Maisog, kag Masinakripisyuhon
15 Bangod mapailubon nga naghulat si Ester sang isa pa ka adlaw para isugid sa hari ang iya pangabay, nahatagan sing tion si Haman nga maghimo sing plano nga nagresulta sa iya kahuy-anan. Kag mahimo nga si Jehova nga Dios ang sa likod kon ngaa wala matulugan ang hari. (Hulu. 21:1) Gani, nagsiling ang Biblia nga dapat kita ‘maghulat’! (Basaha ang Miqueas 7:7.) Kon maghulat kita sa Dios, makita naton nga mas maayo ang iya mga solusyon sa aton mga problema.
Naghambal Sia nga May Kaisog
16 Wala na ginpahulat ni Ester ang hari. Sa iya ikaduha nga sinalusalo, isugid na niya ang tanan. Paano? Ginhatagan sia sang hari sing kahigayunan; ginpamangkot sia liwat kon ano ang iya pangabay. (Est. 7:2) Ini na ang ‘tion sa paghambal’ ni Ester.
Maalamon Sia, Maisog, kag Masinakripisyuhon
17 Mahimo nga nangamuyo sing mahipos si Ester sa iya Dios antes niya ini ginsiling: “Kon nakapahamuut ako sa imo itololok, O hari, kag kon nahamut-an ini sang hari, ihatag sa akon ang akon kabuhi sa akon pakilooy, kag ang akon katawohan sa akon pangabay.” (Est. 7:3) Talupangda nga ginpasalig niya ang hari nga ginarespeto niya ang paghukom nga nahamut-an sini. Lain gid si Ester kay Vasti, ang una nga asawa sang hari, nga hungod nga nagpakahuya sa iya bana! (Est. 1:10-12) Wala man ginpakalain ni Ester ang hari sa pagsalig sini kay Haman. Sa baylo, nakitluoy sia nga proteksionan ang iya kabuhi.
Maalamon Sia, Maisog, kag Masinakripisyuhon
18 Sigurado nga interesado ang hari sa sini nga pangabay. Kay man, sin-o ang gusto magpatay sa iya rayna? Si Ester nagpadayon: “Ginbaligya kami, ako kag ang akon katawohan, nga laglagon, patyon, kag walaon. Kon nabaligya kami nga ulipon nga mga lalaki kag ulipon nga mga babayi, naghipus ako kuntani; kay ang amon kapipit-an indi mapaanggid sa kasamaran sang hari.” (Est. 7:4) Prangka nga ginbuyagyag ni Ester ang problema, pero nagsiling sia nga mahipos lang sia kuntani kon ulipunon lang sila. Pero bangod pagpapas ang himuon sa ila, daku ang epekto sini sa hari kag indi puede nga maghipos lang sia.
19 Ginatudluan man kita sang halimbawa ni Ester kon paano magkumbinsi. Kon kinahanglan mo isugid ang serioso nga problema sa tawo nga may awtoridad ukon sa imo hinigugma, ang pagpailob, pagrespeto, kag katampad makabulig gid.—Hulu. 16:21, 23.
Espirituwal nga mga Hiyas
Talalupangdon nga mga Punto Gikan sa Tulun-an sang Ester
7:4—Ngaa ang pagpapas sa mga Judiyo mangin “kasamaran sang hari”? Paagi sa mataktikanhon nga pagpatalupangod sa posibilidad nga ibaligya ang mga Judiyo subong mga ulipon, ginpadaku ni Ester ang kasamaran sang hari kon papason sila. Ang 10,000 ka bilog nga pilak nga ginsaad ni Haman diutay gid lamang nga ganansia para sa bahandian sang hari kon ikumparar sa kamanggaran nga matigayon kon nagpadihot si Haman nga ibaligya nga ulipon ang mga Judiyo. Magakahulugan man nga mapatay ang reyna kon nagmadinalag-on ang plano.
SEPTIEMBRE 25–OKTUBRE 1
MGA BAHANDI SA PULONG SANG DIOS | ESTER 9-10
“Gingamit Niya ang Iya Awtoridad Para sa Kaayuhan sang Iban”
it-2-E 432 ¶2
Mardoqueo
Si Mardoqueo ang nagbulos kay Haman bilang primer ministro kag ginhatagan sia sing singsing nga pangpat-in sang hari para sa mga dokumento sang estado. Ginhimo ni Ester si Mardoqueo nga manugdumala sang balay ni Haman, nga ginhatag sang hari kay Ester. Dayon gingamit ni Mardoqueo ang awtoridad nga ginhatag sa iya sang hari para magmando nga hatagan sang kinamatarong ang mga Judiyo nga pangapinan ang ila kaugalingon. Para sa mga Judiyo, nagakahulugan ini sang ila kaluwasan kag kalipay. Madamo sa Emperyo sang Persia ang nagdampig sa mga Judiyo, kag sang Adar 13, ang adlaw nga ipatuman ang mga kasuguan, nakahanda gid ang mga Judiyo. Ginsuportahan sila sang tanan nga opisyal bangod sa mataas nga posisyon ni Mardoqueo. Sa Susan, naglawig pa gid sang isa ka adlaw ang inaway. Sobra 75,000 ka kaaway sang mga Judiyo ang napatay sa Emperyo sang Persia, lakip ang napulo ka anak nga lalaki ni Haman. (Est 8:1–9:18) Sa pahanugot ni Ester, nagmando si Mardoqueo nga saulugon kada tuig ang kapiestahan sa kada ika-14 kag ika-15 nga mga adlaw sang Adar, nga ginatawag nga “mga adlaw sang Kapiestahan sang Pagabutgabot,” para magkalipay, magsinalusalo kag maghinatagay sang mga regalo sa isa kag isa kag sa mga imol. Ginsaulog ini sang mga Judiyo kag gin-obligar nila nga saulugon ini sang ila kaliwatan lakip ang tanan nga nagabuylog sa ila. Bangod ikaduha sa hari si Mardoqueo, ginatahod sia sang katawhan sang Dios, kag padayon sia nga nagpanghikot para sa ila kaayuhan.—Est 9:19-22, 27-32; 10:2, 3.
it-2-E 716 ¶5
Purim
Katuyuan. Ginasiling sang pila ka komentarista nga ang Kapiestahan sang Pagabutgabot nga ginaselebrar subong sang mga Judiyo isa na lang ka sekular kag indi na relihioso nga okasyon nga kon kaisa sobra na ang ginahimo nila nga pagpangalipay. Pero indi amo sini ang ginahimo sang ginsugdan ini nga kapiestahan kag ginsaulog sadto. Sanday Mardoqueo kag Ester mga alagad sang matuod nga Dios nga si Jehova, kag ginsugdan nila ang kapiestahan para padunggan Sia. Masiling nga naluwas ang mga Judiyo sa sina nga tion tungod kay Jehova nga Dios, bangod may isyu sadto parte sa katutom ni Mardoqueo nga nagadalahig sang iya eksklusibo nga pagsimba kay Jehova. Si Haman mahimo isa ka Amaleknon, ang pungsod nga ginpakamalaut ni Jehova kag ginhukman niya nga laglagon. Gintuman ni Mardoqueo ang sugo sang Dios, gani wala sia nagduko kay Haman. (Est 3:2, 5; Ex 17:14-16) Ang ginhambal ni Mardoqueo kay Ester (Est 4:14) nagapakita man nga nagasalig sia nga may isa nga mas gamhanan nga magaluwas sa mga Judiyo. Ang pagpuasa ni Ester antes sia nag-atubang sa hari para mangabay nga magtambong ang hari sa iya sinalusalo, nagapakita nga nangayo sia sing bulig sa Dios.—Est 4:16.
“Mangin mga Manug-ilog Kamo sang Dios” sa Paggamit Ninyo sing Gahom
12 Nag-aman si Jehova sing mga manugtatap agod manguna sa Cristianong kongregasyon. (Hebreo 13:17) Dapat gamiton sining kalipikado nga mga lalaki ang ila hatag-Dios nga awtoridad agod maghatag sing kinahanglanon nga bulig kag agod mapauswag ang espirituwalidad sang panong. May kinamatarong bala ang mga gulang nga magpakaginuo sa ila mga masigkatumuluo bangod sang ila posisyon? Wala gid! Dapat maghupot ang mga gulang sing isa ka balanse, mapainubuson nga pagtamod sa ila papel sa kongregasyon. (1 Pedro 5:2, 3) Ginasugo sang Biblia ang mga manugtatap: ‘Bantayi ang kongregasyon sang Dios, nga ginbakal niya sang dugo sang iya kaugalingon nga Anak.’ (Binuhatan 20:28) Amo ini ang mabaskog nga rason kon ngaa dapat pakig-angutan sing mapinalanggaon ang tagsa ka katapo sang panong.
13 Mahimo naton ini iilustrar sing subong sini: Ginpangabay ka sang imo suod nga abyan nga taguon ang iya ginapakabahandi nga butang. Nahibaluan mo nga mahal ang bakal niya sini. Indi bala nga halungan mo gid ini? Sing kaanggid, gintugyanan sang Dios ang mga gulang sing salabton nga atipanon ang isa ka ginapakabahandi gid nga butang: ang kongregasyon, nga ang mga katapo sini ginpaangay sa mga karnero. (Juan 21:16, 17) Ginahigugma ni Jehova ang iya mga karnero—ginahigugma gid, nga sa katunayan, ginbakal niya sila paagi sa hamili nga dugo sang iya bugtong nga Anak, si Jesucristo. Ginbayad ni Jehova ang pinakamataas nga bili para sa iya mga karnero. Ginatandaan ini sang mapainubuson nga mga gulang kag ginapakig-angutan nila ang mga karnero ni Jehova nahisanto sa sini.
Espirituwal nga mga Hiyas
Talalupangdon nga mga Punto Gikan sa Tulun-an sang Ester
9:10, 15, 16—Bisan pa nga ginapahanugutan sang kasuguan ang pagkuha sing inagaw, ngaa wala ini ginhimo sang mga Judiyo? Ang indi nila paghimo sini maathag nga nagpamatuod nga ang ila katuyuan amo ang pag-amlig sa kaugalingon, indi ang pagpamanggaranon sa kaugalingon.
OKTUBRE 2-8
MGA BAHANDI SA PULONG SANG DIOS | JOB 1-3
“Padayon nga Ipakita nga Mabakod ang Imo Gugma kay Jehova”
Iluga ang Pagtuo kag Pagtuman Nanday Noe, Daniel, kag Job
16 Ang mga kabudlayan nga naatubang ni Job. Naagyan ni Job ang daku nga pagbag-o sa iya kabuhi. Sang primero, “sia ang pinakamanggaranon nga tawo sa Sidlangan.” (Job 1:3) Bantog man sia kag ginataha gid sang iban. (Job 29:7-16) Pero wala gid sia maghunahuna nga mas maayo sia sa iban ukon magbatyag nga indi na niya kinahanglan ang Dios. Ang matuod, gintawag sia ni Jehova nga “akon alagad,” kag nagsiling: “Matarong sia kag may integridad nga tawo. Nagakahadlok sia sa Dios kag nagalikaw sa malain.”—Job 1:8.
17 Pero gulpi lang nga nagbag-o ang kabuhi ni Job. Nadula ang tanan niya nga pagkabutang kag nagbatyag sia sang grabe nga kasubo. Nabal-an naton nga ginpahanabo ini ni Satanas, nga nagsiling nga nagaalagad lang kuno si Job sa Dios bangod sa kaayuhan nga makuha niya. (Basaha ang Job 1:9, 10.) Wala ini ginbalewala ni Jehova. Ginhatagan niya si Job sing kahigayunan nga pamatud-an ang iya katutom kag ipakita nga nagaalagad sia bangod sa gugma.
Mangin Malig-on sa Imo Integridad!
10 Ginkuestyon man ni Satanas ang kada isa sa aton. Ngaa nalakip ka sa sini? Daw pareho lang nga nagasiling sia nga indi mo palangga si Jehova nga Dios, indi ka na kuno magaalagad sa iya kon mabutang sa ital-ital ang imo kabuhi, kag indi ka mangin malig-on sa imo integridad! (Job 2:4, 5; Bug. 12:10) Ano ang batyagon mo sa sini? Siempre, masakitan ka gid. Pero pamensara ini: Gintugutan ni Jehova si Satanas nga testingan ang imo integridad. May salig sia sa imo amo nga ginhatagan ka niya sing kahigayunan nga ipakita ang imo integridad kag pamatud-an nga butigon si Satanas. Nagasalig si Jehova nga mangin malig-on ka sa imo integridad, kag nagpromisa sia nga buligan ka niya. (Heb. 13:6) Nalipay gid kita nga may salig sa aton ang Soberano sang uniberso! Gani importante gid ang integridad. Paagi sa sini, mapamatud-an naton nga butigon si Satanas, kag mapadunggan naton ang aton Amay kag masuportahan ang iya paggahom. Ano ang himuon naton para mangin malig-on kita sa aton integridad?
Espirituwal nga mga Hiyas
Ang Matun-an Naton sa mga Ginsiling ni Jesus Antes Sia Mapatay
9 Ano ang ginsiling ni Jesus? Antes mapatay si Jesus, nagsinggit sia: “Dios ko, Dios ko, ngaa ginpatumbayaan mo ako?” (Mat. 27:46) Wala ginapaathag sang Biblia kon ngaa ginsiling ini ni Jesus. Pero binagbinaga kon ano ang matun-an naton sa iya ginsiling. Matun-an naton nga ginatuman ni Jesus ang tagna sa Salmo 22:1. Matun-an man naton nga sadto nga tion, wala ‘gin-amligan’ ni Jehova ang iya Anak. (Job 1:10) Nahangpan ni Jesus nga gintugutan sang iya Amay ang iya mga kaaway nga tilawan sia sing bug-os asta sa iya kamatayon. Si Jesus pa lang ang nakaagi sang amo sini nga pagtilaw. Matun-an man naton sa iya ginsiling nga wala sia sing nahimo nga sala kag wala sing rason nga patyon sia.
OKTUBRE 9-15
MGA BAHANDI SA PULONG SANG DIOS | JOB 4-5
“Likawi ang Indi Matuod nga Impormasyon”
it-1-E 713 ¶11
Elifaz
2. Isa sa tatlo ka kaupod ni Job. (Job 2:11) Isa sia ka Temanhon. Mahimo kaliwat sia sang panganay nga anak nga lalaki ni Esau, gani kaliwat sia ni Abraham kag malayo nga paryente ni Job. Ginapabugal niya kag sang iya mga kaliwatan ang ila kaalam. (Jer 49:7) Sa tatlo ka “mga manuglugpay,” si Elifaz ang daw pinasahi gid kay sia ang pinakaimportante kag impluwensiado, nga daw nagapakita man nga sia ang pinakamagulang. Sia ang una nga naghambal sa tatlo ka hugna sang debate, kag mas lawig ang iya ginhambal.
Batui ang Sayop nga Panghunahuna!
Nagahinumdom sang iya anay labi sa kinaugali nga eksperiensia, si Elifaz nagsiling: “Isa ka espiritu ang naglabay sa akon nawong; nagpalanindog ang balahibo sang akon lawas. Nagdulog ini, apang wala ko makilala ang dagway sini; may dagway sa atubangan sang akon mga mata; may kalinong, kag nabatian ko ang isa ka tingog.” (Job 4:15, 16) Ano nga sahi sang espiritu ang nag-impluwensia sa panghunahuna ni Elifaz? Ginapakita sang kasugpon nga mamulayon nga mga tinaga nga ang espiritu pat-od gid nga indi isa sang matarong nga mga anghel sang Dios. (Job 4:17, 18) Isa ini ka malauton nga espiritu nga tinuga. Kay kon indi, ngaa abi ginsabdong ni Jehova si Elifaz kag ang iya duha ka kaupdanan sa paghambal sing kabutigan? (Job 42:7) Huo, naimpluwensiahan sang demonyo si Elifaz. Ang iya mga komento nagpadayag sing di-diosnon nga panghunahuna.
Pamatuki ang mga Propaganda ni Satanas
Si Elifaz nga isa sa tatlo ka abyan ni Job nga nagbisita sa iya, gingamit ni Satanas agod mangatarungan nga ang tawo indi makapabilin nga matutom sa Dios. Nagapatuhoy sa mga tawo subong “nagapuyo sa mga balay nga lunang,” ginsilingan niya si Job: “Ang [ila] sadsaran yara sa yab-ok, nga ginapigsa kaangay sang sipit. Kutub sa kaagahon tubtub sa kagab-ihon ginalaglag sila; nagakawala sing dayon nga wala sing bisan sin-o nga nagasapak sini.”—Job 4:19, 20.
Sa iban pa nga teksto, ginpaanggid kita sa “daga nga mga suludlan” nga madali mabuka. (2 Cor. 4:7) Maluya kita bangod sang aton napanubli nga sala kag pagkadihimpit. (Roma 5:12) Gani, kon sa aton lang kaugalingon nga kusog, mahapos kita salakayon ni Satanas. Apang subong mga Cristiano, makasalig kita sa bulig ni Jehova. Bisan pa may mga kaluyahon kita, bilidhon kita sa mga mata sang Dios. (Isa. 43:4) Dugang pa, nagahatag si Jehova sang iya balaan nga espiritu sa mga nagapangayo sini sa iya. (Luc. 11:13) Ang iya espiritu makahatag sa aton sang “gahom nga labaw sa kinaandan.” Makabulig ini sa aton nga maatubang ang mga pagtilaw ni Satanas. (2 Cor. 4:7; Fil. 4:13) Kon manindugan kita nga “malig-on sa pagtuo” batok sa Yawa, buligan kita sang Dios nga mangin mabakod. (1 Ped. 5:8-10) Gani, indi kita dapat mahadlok kay Satanas nga Yawa.
Maghalong sa Indi Matuod nga mga Impormasyon
● Hibalua kon diin naghalin ang impormasyon kag ang ginasiling sini
Ang ginasiling sang Biblia: “Pat-ura ninyo ang tanan nga butang.”—1 Tesalonica 5:21.
Antes mo patihan ang isa ka istorya ukon ipasa ini sa iban, siguraduha gid anay nga matuod ini, bisan pa nagsikat na ini ukon ginasulitsulit sa mga balita. Paano?
Usisaa kon bala masaligan gid ang ginhalinan sini. Mahimo bag-uhon sang pila ka media kag sang iban pa nga organisasyon ang isa ka istorya para makakuarta sila ukon suportahan ang ila partido sa pulitika. Ipaanggid ang imo nabatian nga balita sa isa ka estasyon sa iban pa nga manugbalita. Kon kaisa, indi hungod nga mapasahan ka sang imo mga abyan sing indi matuod nga mga impormasyon paagi sa email ukon sa social media. Gani, indi gid ini pagpatihi mientras wala mo pa nausisa ang ginhalinan gid sini.
Siguraduha nga bag-o kag insakto ang imo nabaton nga impormasyon. Usisaa ang mga petsa, ang mga detalye, kag ang iban nga mga ebidensia para masigurado mo nga matuod gid ang nabaton mo nga impormasyon. May mga impormasyon nga dapat maid-id ang pagpaathag. Gani maghalong kon daw kasimple kaayo sang pagpaathag sini. May mga report man nga hungod nga ginhimo para matandog ang imo balatyagon kag mag-react ka. Dapat ka man maghalong sa sini.
Espirituwal nga mga Hiyas
Magpabilin Kamo nga Mapag-on Agod Magdaug sa Palumba Para sa Kabuhi
Makapapag-on nga bahin kita sang bug-os kalibutan nga organisasyon sang matuod nga mga sumilimba. Isa gid ka pagpakamaayo nga makaupod ang mahigugmaon kag bug-os kalibutan nga paghiliutod! (1 Pedro 2:17) Kag mapapag-on man naton ang aton mga masigkatumuluo.
Binagbinaga ang mabuligon nga ginhimo sang matadlong nga tawo nga si Job. Bisan gani ang nagapakunokuno nga manuglugpay nga si Elifaz napilitan sa pagbaton: “Ang imo mga pulong magapapag-on sa iya nga nagakasandad; kag pabakuron mo ang nagaluya nga mga tuhod.” (Job 4:4) Kamusta kita sa sining bahin? May salabton kita subong mga indibiduwal nga buligan ang aton espirituwal nga mga kauturan nga magpadayon sa pag-alagad sa Dios. Sa aton pagpakig-angot sa ila, mahimo naton ini: “Pabaskuga ninyo ang mga kamot nga maluya, kag palig-una ninyo ang mga tuhod nga nagakurog.” (Isaias 35:3) Gani ngaa indi tinguhaan nga pabakuron kag palig-unon ang isa ukon duha ka masigka-Cristiano sa kada tion nga magtipon kamo? (Hebreo 10:24, 25) Ang makapalig-on nga mga pulong sang komendasyon kag pasalamat sa ila padayon nga panikasog nga pahamut-an si Jehova makabulig gid sa ila nga magpabilin nga mapag-on agod magdaug sa palumba para sa kabuhi.
OKTUBRE 16-22
MGA BAHANDI SA PULONG SANG DIOS | JOB 6-7
“Kon Daw Indi Mo Na Masarangan ang mga Problema”
Talalupangdon nga mga Punto Gikan sa Tulun-an ni Job
7:1; 14:14—Ano ang buot silingon sang “pilit nga pagpangabudlay”? Tuman gid ang kalisod ni Job amo nga para sa iya, ang kabuhi kaangay sang mabudlay kag makalalapyo nga pilit nga pagpangabudlay. (Job 10:17) Sanglit obligado ang isa nga magpabilin sa Sheol sa tion sang iya kamatayon tubtob sa tion sang iya pagkabanhaw, ginpaanggid ni Job ini nga tion sa pilit nga pagpangabudlay.
‘Ginaluwas ni Jehova ang mga Naluyahan sing Buot’
KON kaisa, mahimo ginapamensar naton nga malip-ot lang ang aton kabuhi kag ‘puno ini sing kagamo.’ (Job 14:1) Bangod sini, may mga tion nga nagaluya ang aton buot. Amo sini ang ginbatyag sang pila ka alagad ni Jehova sang una. Gusto gani sadto sang iban sa ila nga kuntani mapatay na lang sila. (1 Hari 19:2-4; Job 3:1-3, 11; 7:15, 16) Pero pirme sila ginapaumpawan kag ginapalig-on ni Jehova. Ginsulat sa Biblia ang ila mga eksperiensia kay may matun-an kita sa sini kag makapaumpaw ini sa aton.—Roma 15:4.
Kon Daw Mangampo Ka Na Gid
Bisan pa nga daw wala ka na sing paglaum, dumduma nga indi lang ikaw, kundi halos tanan nga tawo may problema. Ang Biblia nagsiling: “Ang tanan nga tinuga padayon nga nagaugayong sing tingob kag ginasakitan sing tingob.” (Roma 8:22) Mahimo nga daw wala dayon sing solusyon ang imo problema, pero pagligad sang tion, mahimo magaayo-ayo ang imo kahimtangan. Pero ano ang makabulig sa imo sa karon?
Isugid ang imo ginabatyag sa hamtong kag masaligan nga abyan. Ang Biblia nagsiling: “Ang isa ka abyan nagahigugma sa tanan nga tion, kag . . . isa ka utud [nga] natawo tungud sa kapiotan” ukon problema. (Hulubaton 17:17) Suno sa Biblia, sang grabe ang problema sang matarong nga si Job, ginsugid niya ang iya ginabatyag sa iban. Sang nagbatyag sia sing ‘kaugot sa iya kabuhi,’ nagsiling sia: “Igahambal ko ang akon pag-antus, ang pagpangabudlay sang akon kalag.” (Job 10:1, Biblia sang Katilingban sang mga Kristiano, BKK) Ang pagsugid sa iban magapahaganhagan sang imo ginabatyag, kag mahimo magbag-o ang imo panan-aw sa imo mga problema.
Isugid sa Dios ang imo ginabatyag paagi sa pangamuyo. Ang pila nagapati nga ang pangamuyo makapatawhay lang sa aton hunahuna, pero indi amo sina ang ginasiling sang Biblia. Nagsiling ang Salmo 65:2 nga si Jehova nga Dios “nagapamati sang pangamuyo,” kag ang 1 Pedro 5:7 nagsiling: “Nagaulikid sia sa inyo.” Pirme ginahambal sang Biblia nga importante ang pagsalig sa Dios. Halimbawa:
“Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.”—HULUBATON 3:5, 6.
“Tumanon [ni Jehova] ang handum sang mga nagakahadluk sa iya, pamatian man niya ang ila pagtuaw, kag luwason sila.”—SALMO 145:19.
“Amo ini ang pagsalig naton sa iya, nga bisan ano ang pangayuon naton suno sa iya kabubut-on, nagapamati sia sa aton.”—1 JUAN 5:14.
“Ang GINOO malayo sa malauton, apang nagapamati sia sang pangamuyo sang matarung.”—HULUBATON 15:29.
Kon isugid mo sa Dios ang imo mga kabudlayan, buligan ka gid niya. May rason gid ang Biblia nga magsiling sa imo nga ‘magsalig ka sa iya sa tanan nga tion kag iula sa atubangan niya ang imo tagiposoon.’—Salmo 62:8.
Espirituwal nga mga Hiyas
Magpamati, Kilalaha ang mga Kauturan, kag Magpakita sang Kaluoy
10 Mailog naton si Jehova kon tinguhaan naton nga hangpon ang aton mga kauturan. Kilalaha pa gid sing maayo ang imo mga kauturan. Istoryaha sila antes kag pagkatapos sang miting, makig-upod sa ila sa ministeryo, kag agdaha sila sa pagkaon kon posible. Kon himuon mo ini, mabal-an mo nga ang sister nga daw suplada mahuluy-on gali, ang manggaranon nga brother indi gali materyalistiko kundi maalwan gid, ukon ang pamilya nga pirme ulihi mag-abot sa miting ginahingabot gali sa ila puluy-an. (Job 6:29) Matuod, indi naton dapat ‘paghilabtan ang kabuhi sang iban.’ (1 Tim. 5:13) Pero, mas maayo kon may nabal-an kita parte sa aton mga kauturan kag sa ila mga sitwasyon kay makabulig ini para mahangpan pa gid naton sila.
OKTUBRE 23-29
MGA BAHANDI SA PULONG SANG DIOS | JOB 8-10
“Ang Mainunungon nga Gugma sang Dios Makaamlig sa Aton sa mga Kabutigan ni Satanas”
Mapahamut-an Gid Bala Naton ang Dios?
Si Job nag-antos sing sunodsunod nga mga kabudlayan nga daw indi makatarunganon. Nagsala sia sa paghinakop nga indi importante sa Dios kon bala mahuptan niya ang pagtuo sa Iya ukon indi. (Job 9:20-22) Kumbinsido gid si Job nga matarong sia nga para sa iban daw ginapakamatarong pa niya ang iya kaugalingon sangsa Dios.—Job 32:1, 2; 35:1, 2.
Paano Ka Mabuligan sang Mainunungon nga Gugma ni Jehova?
14 Ang mainunungon nga gugma sang Dios nagaamlig sa aton para indi maguba ang aton kaangtanan sa iya. Nangamuyo si David kay Jehova: “Ikaw ang akon palanaguan; amligan mo ako sa katalagman. Palibutan mo ako sang malipayon nga mga singgit sang kaluwasan. . . . Ginapalibutan ni Jehova sang iya mainunungon nga gugma ang nagasalig sa Iya.” (Sal. 32:7, 10) Sang panahon sang Biblia, ang mga pader nga nagapalibot sa isa ka siudad nagaamlig sa mga tawo sa ila mga kaaway. Pareho sini nga mga pader, ang mainunungon nga gugma ni Jehova nagaamlig man sa aton para indi maguba ang aton kaangtanan sa iya. Kag bangod sang mainunungon nga gugma ni Jehova, ginpapalapit niya kita sa iya.—Jer. 31:3.
Espirituwal nga mga Hiyas
“Sin-o ang Nakahibalo sang Hunahuna ni Jehova?”
19 Ano ang natun-an naton tuhoy sa “hunahuna ni Jehova”? Dapat naton tugutan ang Pulong sang Dios nga magdihon sang aton paghangop sa hunahuna ni Jehova. Indi naton paghunahunaon nga si Jehova may mga limitasyon kaangay naton kag hukman sia suno sa aton mga talaksan kag panghunahuna. Si Job nagsiling: ‘Kay ang Dios indi tawo, subong sa akon, nga magsabat ako sa iya, nga magkadto kami sing tingub sa hulukmanan.’ (Job 9:32) Kaangay ni Job, kon mahangpan na naton ang hunahuna ni Jehova, makasiling gid kita: “Yari karon, ini sila mga higad lamang sang iya mga dalanon; kag daw ano ka diotay nga hutik nga mabatian ta sa iya! Apang ang daguub sang iya gahum sin-o bala ang makahangup?”—Job 26:14.
20 Samtang ginabasa naton ang Kasulatan, ano ang dapat naton himuon kon may makita kita nga mabudlay hangpon, ilabi na kon tuhoy sa panghunahuna ni Jehova? Kon indi naton makita ang maathag nga sabat pagkatapos sang aton pagpanalawsaw, mahimo naton ini tamdon nga isa ka pagtilaw sa aton pagsalig kay Jehova. Dumduma nga kon kaisa ang pila ka teksto nagahatag sa aton sing kahigayunan nga mapakita ang aton pagtuo sa mga kinaiya ni Jehova. Dapat kita magpakita sing pagkamapainubuson paagi sa pagbaton nga indi naton mahangpan ang tanan niya nga ginahimo. (Man. 11:5) Sa amo, mapahulag kita nga mag-ugyon sa ginsiling ni apostol Pablo: “O pagkadalom sang kamanggaran kag kaalam kag ihibalo sang Dios! Indi gid mahangpan sing bug-os ang iya mga paghukom kag indi mausoy sing bug-os ang iya mga dalanon! Kay ‘sin-o ang nakahibalo sang hunahuna ni Jehova, ukon sin-o ang nangin manuglaygay niya?’ Ukon, ‘Sin-o ang una nga naghatag sa iya, agod dapat sia balusan?’ Bangod ang tanan nga butang gikan sa iya kag paagi sa iya kag para sa iya. Ang himaya mangin sa iya sing dayon. Kabay pa.”—Roma 11:33-36.
OKTUBRE 30–NOBIEMBRE 5
MGA BAHANDI SA PULONG SANG DIOS | JOB 11-12
“Tatlo ka Paagi nga Matigayon Naton ang Kaalam kag Makabenepisyo sa Sini”
Gindayaw ni Job ang Ngalan ni Jehova
17 Ano ang nakabulig kay Job nga mahuptan ang iya integridad? Maathag nga antes nag-abot sa iya ang mga kalamidad, nakapalambo na sia nga daan sing suod nga kaangtanan kay Jehova. Bisan wala kita sing pamatuod nga nahibaluan ni Job ang panghangkat ni Satanas kay Jehova, determinado sia nga magpabilin nga mainunungon. Nagsiling sia: “Tubtub nga mapatay ako indi ko pag-isikway gikan sa akon ang akon pagkatadlong.” (Job 27:5) Paano napalambo ni Job ining suod nga kaangtanan? Wala duhaduha nga ginpamalandungan gid niya ang pagpakig-angot ni Jehova sa iya malayo nga mga paryente nga sanday Abraham, Isaac, kag Jacob. Kag mahimo nga nahantop ni Job ang madamo nga kinaiya ni Jehova paagi sa pagpanilag sa mga gintuga sang Dios.—Basaha ang Job 12:7-9, 13, 16.
Wala Ka Nagaisahanon kay Kaupod Mo si Jehova
10 Panikasugi nga mangin abyan mo ang matutom nga mga kauturan. Pilia ang mga kauturan nga madamo ka sing matun-an. Puede nga manghod sila ukon magulang sila sa imo, kag puede man nga lain ang ila kultura. Ang Biblia nagasiling nga “may kaalam sa mga tigulang.” (Job 12:12) Makatuon man ang mga tigulang sa matutom nga mga pamatan-on sa kongregasyon. Halimbawa, mas magulang si Jonatan kay David, pero nangin suod sila nga mag-abyanay. (1 Sam. 18:1) Nagbuligay sila para maalagad nila si Jehova bisan pa sa mabudlay nga mga kahimtangan. (1 Sam. 23:16-18) Si Irina, nga isa ka sister kag nagaisahanon nga Saksi sa ila pamilya, nagsiling: “Daw mga ginikanan na naton ukon mga utod ang aton mga kauturan. Puede sila gamiton ni Jehova para buligan kita.”
11 Indi mahapos magpakig-abyan kon mahuluy-on ka. Si Ratna, nga isa ka mahuluy-on nga sister kag nakaeksperiensia sang pagpamatok sang naga-Bible study pa lang sia, nagsiling, “Narealisar ko nga kinahanglan ko ang bulig sang akon mga kauturan.” Mahimo nga nabudlayan ka nga isugid sa iban ang imo ginabatyag. Pero kon isugid mo ini sa isa ka utod, posible nga mangin suod kamo nga mag-abyanay. Gusto gid sang imo mga abyan nga palig-unon ka kag buligan, pero dapat mo ipabalo sa ila kon ano ang puede nila himuon.
12 Ang isa sa pinakamaayo nga paagi para mangin abyan naton ang mga kauturan amo ang pagbantala upod sa ila. Si Carol, nga ginsambit kaina, nagsiling: “Madamo ako sing nangin abyan nga sister paagi sa pagbantala upod sa ila kag paghimo sang iban pa nga hilikuton sa pag-alagad kay Jehova. Halin pa sang una, ginabuligan gid ako ni Jehova paagi sa ila.” Makabenepisyo gid kita kon panikasugan naton nga mangin abyan ang matutom nga mga kauturan. Ginagamit ni Jehova ini nga mga abyan para palig-unon kita kon naluyahan kita sing buot ukon nasubuan.—Hulu. 17:17.
it-2-E 1190 ¶2
Kaalam
Kaalam Halin sa Dios. Ang kaalam sa bug-os nga kahulugan sini naghalin kay Jehova nga Dios, nga “amo lamang ang maalam.” (Ro 16:27; Bug 7:12) Ang ihibalo amo ang paghibalo sang kamatuoran, kag bangod si Jehova ang Manunuga, nga “halin sa wala sing katubtuban tubtob sa wala sing katubtuban” (Sa 90:1, 2), nabal-an niya ang tanan parte sa uniberso, kon paano ini ginhuman kag ang mga bahin sini, ang kasaysayan sini asta sa aton panahon. Sia ang naghimo sang pisikal nga mga kasuguan, mga siklo, kag mga talaksan nga ginabasihan sang mga tawo sang ila research kag imbension, nga kon wala ini, mabudlayan gid sila kag wala sila sing masaligan nga basihan. (Job 38:34-38; Sa 104:24; Hul 3:19; Jer 10:12, 13) Gani, ang iya moral nga mga talaksan mas importante pa gid para matigayon ang kalig-unan, makahimo sang insakto nga desisyon, kag mangin madinalag-on ang kabuhi. (Deu 32:4-6; tan-awa ang JEHOVA [Ang Dios sang moral nga mga talaksan].) Wala sing makalabaw sa iya paghangop. (Isa 40:13, 14) Mahimo niya tugutan nga matabo ukon mag-uswag pa gani sing makadali ang mga butang nga kontra sa iya matarong nga mga talaksan, pero ang palaabuton nagadepende gihapon sa iya kag mahanabo ini suno gid sa iya kabubut-on, kag ang iya ginhambal “pat-od nga magamadinalag-on.”—Isa 55:8-11; 46:9-11.
Espirituwal nga mga Hiyas
Pagpakigsugilanon sa mga Pamatan-on
▪ ‘Nahantop ko bala kon ano gid ang buot silingon sang akon bata?’ Ang Job 12:11 nagsiling: “Wala bala ang dulunggan nagatilaw sang mga polong subong nga ang ngalagngag nagadimdim sang iya kalan-on?” Gani kinahanglan mo ‘tilawan’ kon ano gid ang buot silingon sang imo bata. Sa masami, kon maghambal ang mga bata daw husto gid sila. Halimbawa, mahimo magsiling ang imo bata, “Abi mo pirme sa akon bata!” ukon “Wala ka gid nagapamati sa akon!” Sa baylo nga baisan ini, dapat mo mahangpan nga indi man gid amo sini ang buot silingon sang imo bata. Halimbawa, kon magsiling ang anak mo nga “Abi mo pirme sa akon bata” ayhan ang iya buot silingon, “pamatyag ko daw wala ka gid salig sa akon.” Kag kon magsiling sia nga, “Wala ka gid nagapamati sa akon,” mahimo ang iya buot silingon, “Gusto ko mahibal-an mo kon ano gid ang akon ginabatyag.” Hantupa kon ano gid ang iya buot silingon.