LEKSION 12
Ano ang Makabulig sa Imo Para Makapadayon sa Pagtuon sa Biblia?
Ang pagtuon sa Biblia madamo sing benepisyo, pero kon kaisa indi ini mahapos. Mahimo nagapensar ka kon mapadayon mo ang pagtuon sa Biblia. Ngaa maayo gid nga tinguhaan mo nga makapadayon? Ano ang makabulig sa imo nga mahimo ini bisan pa may mga kabudlayan?
1. Ngaa importante ang pagtuon sa Biblia?
“Ang pulong sang Dios buhi kag gamhanan.” (Hebreo 4:12) Ang Biblia importante kay mabasa mo diri ang panghunahuna sang Dios kag ang iya pagpalangga sa imo. Makakuha ka diri indi lang sang ihibalo kundi matun-an mo man ang matuod nga kaalam kag paglaum. Ang pinakaimportante sa tanan, mabuligan ka sang Biblia nga mangin abyan ni Jehova. Ang pagtuon sa Biblia makabulig para mangin maayo pa gid ang imo kabuhi.
2. Ngaa importante gid ang kamatuoran sa Biblia?
Ang kamatuoran sa Biblia pareho sa mga bahandi ukon malahalon nga mga butang. Amo nga ginasilingan kita sang Biblia nga “bakla ang kamatuoran kag indi ini pag-ibaligya.” (Hulubaton 23:23) Kon dumdumon naton nga importante gid ang kamatuoran sa Biblia, tinguhaan gid naton nga magpadayon sa pagtuon bisan pa may mga kabudlayan.—Basaha ang Hulubaton 2:4, 5.
3. Paano ka mabuligan ni Jehova nga magpadayon sa pagtuon?
Si Jehova ang imo labing gamhanan nga Manunuga kag Abyan, kag gusto niya nga buligan ka nga magtuon parte sa iya. Mahatagan ka niya sang ‘handum kag kusog nga himuon ini.’ (Basaha ang Filipos 2:13.) Gani kon daw naluyahan ka sa pagtuon ukon nabudlayan nga himuon ang imo natun-an, mabuligan ka niya. Mahatagan ka niya sing kusog para masarangan mo ang mga kabudlayan kag mga paghingabot. Pirme mangamuyo kay Jehova nga buligan ka niya nga makapadayon sa pagtuon sa Biblia.—1 Tesalonica 5:17.
USISAA PA GID
Hibaluon naton kon paano ka makapadayon sa pagtuon sa Biblia bisan pa masako ka ukon ginahingabot sang iban. Dayon tun-an naton kon paano ka buligan ni Jehova.
4. Unaha ang imo pagtuon sa Biblia
Kon kaisa, bangod sobra kita kasako daw wala na kita sing tion sa pagtuon sa Biblia. Ano ang makabulig sa aton? Basaha ang Filipos 1:10, dayon binagbinaga ini nga mga pamangkot:
Ano sa banta mo ang “mas importante nga mga butang” sa kabuhi?
Paano mo mauna ang imo pagtuon sa Biblia?
Kon unahon mo sulod ang balas sangsa mga bato, indi na makaigo ang mga bato
Kon unahon mo sulod ang mga bato, makaigo pa ang balas. Kon unahon mo man ang “mas importante nga mga butang,” matapos mo ini kag may tion ka pa sa iban nga butang
Ang pagtuon sa Biblia makahatag sang aton espirituwal nga kinahanglanon—ang aton kinahanglanon para makilala kag masimba ang Dios. Basaha ang Mateo 5:3, dayon binagbinaga ini nga pamangkot:
Ano ang mga benepisyo kon unahon naton ang pagtuon sa Biblia?
5. Magpadayon bisan pa may paghingabot
Kon kaisa, basi hambalon ka sang iban nga untatan ang pagtuon sa Biblia. Binagbinaga ang halimbawa ni Francesco. Tan-awa ang video, dayon binagbinaga ang masunod nga mga pamangkot.
Sa video, ano ang reaksion sang mga amigo kag pamilya ni Francesco sang ginsugiran niya sila sang iya natun-an?
Ano ang maayo nga resulta kay nagpadayon sia sa pagtuon?
Basaha ang 2 Timoteo 2:24, 25, dayon binagbinaga ini nga mga pamangkot:
Ano ang reaksion sang imo pamilya kag mga abyan kay nagatuon ka sa Biblia?
Suno sa sini nga mga bersikulo, ano ang himuon mo kon wala nalipay ang iban sa imo pagtuon sa Biblia? Ngaa?
6. Magpabulig kay Jehova
Samtang nagalapit ang aton relasyon kay Jehova, gusto pa gid naton nga malipay sia. Pero, basi nabudlayan kita maghimo sing mga pagbag-o para matuman ang iya mga sugo. Kon nabudlayan ka, indi mag-untat. Buligan ka ni Jehova. Tan-awa ang VIDEO, dayon binagbinaga ang masunod nga mga pamangkot.
Sa video, ano nga mga pagbag-o ang ginhimo ni Jim para malipay sa iya si Jehova?
Ano ang nanamian mo sa iya halimbawa?
Basaha ang Hebreo 11:6, dayon binagbinaga ini nga mga pamangkot:
Ano ang himuon ni Jehova sa mga “hanuot nga nagapangita sa iya” ukon sa mga nagatinguha gid nga makilala kag mapalipay sia?
Sa sini nga bersikulo, ano ang ginabatyag ni Jehova kon makita niya nga nagatinguha ka sa pagtuon sa Biblia?
KON PAMANGKUTON KA: “Ngaa nagatuon ka sa Biblia?”
Ano ang isabat mo?
SUMARYO
Bisan pa kon kaisa indi mahapos ang pagtuon sa Biblia, makabulig ini sa imo nga mabaton ang kabuhi nga wala sing katapusan. Padayon nga magpabulig kay Jehova kag padyaan ka niya.
Rebyu
Ngaa importante gid ang mga kamatuoran sa Biblia?
Paano mo mauna ang “mas importante nga mga butang”?
Ngaa dapat ka magpabulig kay Jehova para makapadayon sa pagtuon sa Biblia?
DUGANG NGA IMPORMASYON
Basaha ang apat ka paagi nga nakabulig sa madamo nga tawo nga magamit sing maalamon ang ila tion.
“Kon Paano Gamiton sing Maalamon ang Imo Tion” (Magmata!, Pebrero 2014)
Tan-awa kon paano ginbuligan ni Jehova ang isa ka babayi nga ginapabudlayan sang iya bana nga maalagad ang Dios.
Si Jehova Nagapabakod sa Aton nga Dal-on ang Aton Lulan (5:05)
Tan-awa kon paano nakabenepisyo ang isa ka bana kay nagpadayon sa pagtuon ang iya asawa.
Kon kaisa ginahambalan ang mga Saksi ni Jehova nga ginaguba nila ang mga pamilya. Matuod bala ina?
“Ginapabakod Bala Ukon Ginaguba sang mga Saksi ni Jehova ang mga Pamilya?” (Artikulo sa website)