LEKSION 47
Handa Ka Na Bala Magpabawtismo?
Madamo ka na sing natun-an parte kay Jehova sa imo pagtuon sa Biblia. Posible naghimo ka sing mga pagbag-o base sa imo natun-an. Pero, basi pamatyag mo indi ka pa handa nga idedikar ang imo kaugalingon kay Jehova kag magpabawtismo. Binagbinagon sa sini nga leksion ang pila ka kabudlayan nga nagapugong sa isa nga magpabawtismo kag kon paano mo ini masarangan.
1. Daw ano kadamo ang dapat mo mahibaluan antes ka bawtismuhan?
Para mabawtismuhan ka, dapat may ara ka sing “sibu nga ihibalo tuhoy sa kamatuoran.” (1 Timoteo 2:4) Indi buot silingon nga dapat nabal-an mo ang sabat sa tanan nga pamangkot parte sa Biblia antes ka bawtismuhan. Bisan ang madugay na nga nabawtismuhan nga mga Cristiano padayon pa nga nagatuon. (Colosas 1:9, 10) Pero dapat mo mahibaluan ang panguna nga mga panudlo sang Biblia. Buligan ka sang mga gulang sa kongregasyon para maintiendihan mo ini nga mga panudlo.
2. Ano ang mga dapat mo himuon antes ka bawtismuhan?
Antes ka bawtismuhan, dapat ka “maghinulsol . . . kag magbag-o.” (Basaha ang Binuhatan 3:19.) Buot silingon, ginahinulsulan mo gid ang imo mga sala kag nagapangayo ka sing patawad kay Jehova. Determinado ka man nga indi maghimo sing malain kag magkabuhi nga nagapalipay sa Dios. Dapat nagapakig-upod ka na sa kongregasyon paagi sa pagtambong sa mga miting kag pagbantala bilang indi bawtismado nga manugbantala.
3. Ngaa indi ka dapat makulbaan magpabawtismo?
Ang iban nakulbaan magpabawtismo kay basi indi nila mahimo ang ila ginpromisa kay Jehova. Matuod makasala ka gid man kon kaisa, bisan ang matutom nga mga lalaki kag babayi sa Biblia nakasala man. Wala ginapaabot ni Jehova nga indi gid makasala ang iya mga sumilimba. (Basaha ang Salmo 103:13, 14.) Malipay sia kon tinguhaan mo gid nga himuon ang maayo. Buligan ka niya. Ang matuod, si Jehova nagpasalig sa aton nga wala sing ‘makapugong nga mabaton naton ang iya gugma.’—Basaha ang Roma 8:38, 39.
USISAA PA GID
Usisaon naton kon paano mo masarangan ang mga kabudlayan nga nagapugong sa imo nga magpabawtismo paagi sa pagkilala pa gid kay Jehova kag pagpabulig sa iya.
4. Kilalaha pa gid si Jehova
Daw ano kadamo ang dapat mo mabal-an parte kay Jehova antes ka bawtismuhan? Dapat makilala mo sia sing maayo para palanggaon mo sia kag himuon mo ang makapalipay sa iya. Tan-awa ang VIDEO, para mabal-an mo kon paano ini ginhimo sang mga nagatuon sa Biblia sa bilog nga kalibutan. Dayon binagbinaga ang masunod nga pamangkot.
Sa video, ano ang nakabulig sa iban para mangin handa sila sa pagpabawtismo?
Basaha ang Roma 12:2, dayon binagbinaga ini nga mga pamangkot:
Nagaduhaduha ka bala sa ginatudlo sang Biblia ukon kon matuod gid ang ginatudlo sang mga Saksi ni Jehova?
Kon huo, ano ang puede mo himuon?
5. Masarangan mo ang mga kabudlayan nga magpugong sa imo nga magpabawtismo
Kon magdesisyon kita nga magdedikar kay Jehova kag magpabawtismo, makaeksperiensia kita sang mga kabudlayan. Tan-awa ang VIDEO para makita mo ang isa ka halimbawa, dayon binagbinaga ang masunod nga mga pamangkot.
Sa video, ano ang nagpugong kay Narangerel nga mag-alagad kay Jehova?
Paano ang iya pagpalangga kay Jehova nakabulig sa iya nga masarangan ang mga kabudlayan?
Basaha ang Hulubaton 29:25 kag 2 Timoteo 1:7, dayon binagbinaga ini nga pamangkot:
Ano ang nagahatag sa aton sing kaisog para masarangan ang mga kabudlayan?
6. Magsalig sa bulig ni Jehova
Buligan ka ni Jehova nga mapalipay mo sia. Tan-awa ang VIDEO, dayon binagbinaga ang masunod nga mga pamangkot.
Sa video, ano ang nagpugong sa isa ka Bible study nga magpabawtismo?
Ano ang natun-an niya nga nakapabakod sang iya pagsalig kay Jehova?
Basaha ang Isaias 41:10, 13, dayon binagbinaga ini nga pamangkot:
Ngaa makasalig ka nga mahimo mo ang imo ginpromisa sang nagdedikar ka?
7. Apresyaha pa gid ang pagpalangga ni Jehova
Kon pirme mo pamensaron kon daw ano ikaw ka palangga ni Jehova, mas gusto mo sia pasalamatan kag alagaron sing wala katapusan. Basaha ang Salmo 40:5, dayon binagbinaga ini nga pamangkot:
Ano nga mga pagpakamaayo ni Jehova ang ginapasalamatan mo gid?
Palangga gid ni propeta Jeremias si Jehova kag ginaapresyar gid niya ang Iya pulong. Ginapabaloran man niya ang pribilehiyo nga gamiton ang ngalan ni Jehova. Sia nagsiling: “Naghugyaw kag nagkalipay ang akon tagipusuon tungod sang imo pulong, kay gintawag ako sa imo ngalan, O Jehova nga Dios.” (Jeremias 15:16) Sabta ini nga mga pamangkot:
Ngaa pribilehiyo gid nga mangin isa sa mga Saksi ni Jehova?
Gusto mo bala mabawtismuhan bilang isa sa mga Saksi ni Jehova?
May nagapugong bala sa imo nga magpabawtismo?
Ano sa banta mo ang dapat mo himuon para mabawtismuhan ka?
KON MAGSILING ANG IBAN: “Nakulbaan ’ko kay basi indi ko mahimo ang akon ginpromisa kon mabawtismuhan ako.”
Amo bala sina ang imo ginabatyag?
SUMARYO
Sa bulig ni Jehova, masarangan mo ang mga kabudlayan nga nagapugong sa imo sa pagpabawtismo.
Rebyu
Daw ano kadamo ang dapat mo mabal-an sa Biblia antes ka bawtismuhan?
Sa banta mo, ano nga mga pagbag-o ang dapat mo himuon antes ka bawtismuhan?
Ngaa indi ka dapat makulbaan magpabawtismo?
DUGANG NGA IMPORMASYON
Binagbinaga kon ano dapat ang magapahulag sa imo nga magpabawtismo.
“Handa Ka Na Bala nga Magpabawtismo?” (Ang Lalantawan, Marso 2020)
Hibalua kon paano mo masarangan ang mga kabudlayan nga makapugong sa imo sa pagpabawtismo.
“Ano ang Nagapugong sa Akon sa Pagpabawtismo?” (Ang Lalantawan, Marso 2019)
Tan-awa kon paano nasarangan sang isa ka lalaki ang daku nga kabudlayan para mabawtismuhan sia.
Sa primero, nahadlok si Ataa nga magpabawtismo. Tan-awa kon ano ang nagkumbinsi sa iya nga magpabawtismo.