Pagdaug kay Satanas kag sa Iya mga Binuhatan

“Busa, magpasakop kamo sa Dios; apang sumpunga ang Yawa, kag magapalagyo sia sa inyo.”​—⁠SANTIAGO 4:⁠7.

1. Paano ‘ang kamot sang isa nga malauton’ nag-apektar sa katawhan karon?

SI Job husto nga nagsiling: “Ang duta ginhatag sa kamot sang isa nga malauton.” (Job 9:24) Kag karon ginaatubang naton ang labing makahalanguyos nga mga tion sa bug-os nga maragtas sang tawo. Ngaa? Bangod amo ini “ang katapusan nga mga adlaw” sang demonyohanon nga paggahom ni Satanas sa duta. Indi katingalahan nga, sa idalom sang pagsutsot ni Satanas, ‘ang malaut nga mga tawo kag mga malimbong nagalain kag nagalain pa, nga nagadaya kag ginadayaan.’ (2 Timoteo 3:​1, 13) Dugang pa, ang mga paghingabot, mga inhustisya, mga pagpamintas, mga krimen, mga kabudlayan sa pangabuhi, madugay mag-ayo nga mga balatian, mga kasakit sang katigulangon, kapung-aw​—⁠ini kag ang madamo pa mahimo nga nagapasubo sa aton.

2. Paano naton malandas ang mga pagsalakay ni Satanas karon?

² Ang dakung kaaway, nga si Satanas nga Yawa, nagakonsentrar sa pagsalakay sa katawhan kag labi na sa matuod nga mga sumilimba sang Dios. Ang iya tulumuron amo nga palisuon batok sa Dios ang tanan nga mahimo mangin manughupot sing integridad kag ulamiron sila sa iya kalaglagan upod sa iya demonyo nga mga anghel. Apang, ginapasalig kita nga kon magbatas kita nga may integridad, ang Yawa magapalagyo sa aton. Kaangay ni Jesus, kita ‘makatuon sing pagkamatinumanon’ sa Dios paagi sa mga butang nga aton ginaantos, kag paagi sa Iya dibagay nga kaluoy, makatigayon kita sing kabuhi nga walay katapusan.​—⁠Hebreo 5:​7, 8; Santiago 4:7; 1 Pedro 5:​8-10.

3, 4. (a) Anong naguwa nga mga pagtilaw ang gin-atubang ni Pablo? (b) Ano ang ginkabalak-an ni Pablo subong isa ka Cristianong gulang?

³ Si apostol Pablo gintilawan man sa madamo nga paagi. Nagasugid sang iya mga ebidensia subong isa ka ministro ni Cristo, nagsulat sia: “Ako kapin pa nga talalupangdon: sa mga pagpangabudlay labi pa, sa mga bilangguan labi pa, sa mga lapdos tama pa gid, sa bibi sang kamatayon masami. Sa mga Judiyo makalima ako nakabaton sing kap-atan ka lapdos kulang isa, makatlo bunalon ako, makaisa ginbato ako, makatlo nga naagihan ko ang pagkaguba sang barko, isa ka gab-i kag isa ka adlaw ang ginhinguyang ko sa kadagatan; sa mga panlakatan masunson, sa mga katalagman sa mga suba, sa mga katalagman sa mga buyong, sa mga katalagman sa akon mga kasimanwa, sa katalagman sa mga pungsod, sa mga katalagman sa siudad, sa mga katalagman sa kahanayakan, sa mga katalagman sa dagat, sa mga katalagman sa tunga sang dimatuod nga mga kauturan, sa pagpangabudlay kag paghimakas, sa mga pagpulaw masunson, sa kagutom kag kauhaw, sa pagpuasa madamo nga beses, sa tugnaw kag kahubo.

⁴ “Walay labot sining naguwa nga mga butang, may nagasalakay sa akon sa adlaw-adlaw, ang kabalaka para sa tanan nga kongregasyon. Sin-o bala ang maluya, kag indi ako maluya? Sin-o bala ang ginapasandad, kag wala ako nagasingkal?” (2 Corinto 11:​23-29) Sa amo, ginhuptan ni Pablo ang integridad sang nagaatubang sia sing mga paghingabot kag mga pagtilaw gikan sa guwa, kag subong isa ka Cristianong gulang, naghimud-os gid sia sa pagpalig-on sa maluya nga kauturan nga mga lalaki kag mga babayi sa kongregasyon, ginbuligan sila sa paghupot sing integridad. Daw ano kaayo nga huwaran para sa Cristianong mga gulang sa karon!

Integridad sa Idalom sang Paghingabot

5. Ano ang sabat sa direkta nga paghingabot?

⁵ Ano nga mga pahito ang ginagamit ni Satanas sa pagbungkag sang integridad? Subong ginpakita kaina, ang isa sang labing mapintas nga mga estratehiya ni Satanas amo ang direkta nga paghingabot, apang may solusyon ini. Ang Efeso 6:​10, 11 nagalaygay sa aton: “Padayon nga tigayuna ang gahom sa Ginuo kag sa kusog sang iya gahom. Isuklob ang bug-os nga hinganib gikan sa Dios agod nga makatindog kamo sing malig-on batok sa mga daya [ukon, “malalangon nga mga buhat,” foot­note] sang Yawa.”

6. Paano mapakita nga ang mga Saksi ni Jehova nagguwa nga “nagadaug sing bug-os”?

⁶ Sa sining katapusan nga mga adlaw, ang mga Saksi ni Jehova masami nga dapat mag-atubang sa mga pagtilaw. Sa amo, makasiling kita upod kay Pablo: “Sa sining tanan nga butang nagaguwa kita nga nagadaug sing bug-os paagi sa iya nga nagahigugma sa aton.” (Roma 8:37) Ginapamatud-an ini sang rekord sang integridad sang mga Saksi ni Jehova sa mga kampo konsentrasyon sa Alemanya, sa Austria, sa Poland, kag sa Yugoslavia sa tion sang dag-on sang mga Nazi sa ulot sang 1933 kag 1945, sa idalom sang pagpamigos sang mga Komunista sa Nasidlangan nga Europa sa ulot sang 1945 kag 1989, kag sa tion sang mga paghingabot nga nag-apektar sa mga bahin sang Aprika kag Latin Amerika sining ulihi gid lang.

7. Anong makapahulag nga mga huwaran sang integridad ang ginareport gikan sa Etiopia?

⁷ Ang mga Saksi ni Jehova sa Etiopia naghatag sing isa ka makapahulag nga huwaran sang integridad sa ulot sang 1974 kag 1991. Ang isa sang politikanhon sing panghunahuna nga mga manugdakop nagsiling sa isa ka nabilanggo nga utod: “Mas diutay pa ang peligro nga paguwaon ang mga leon gikan sa zoo sangsa tugutan kamo nga mangin hilway liwat!” Ginpaantos sining mapintas nga mga manughingabot ang mga alagad ni Jehova, kag pagligad sang pila ka mga tuig ginmando sang gin-apelahan nga korte nga pamatyon sila. Ang bangkay sang isa ka utod nga lalaki ginpasundayag sa publiko agod mangin isa ka nagapaandam nga halimbawa. Ang iban nga kauturan nga mga lalaki nga nag-apelar sang pamatbat nga kamatayon ginhilway sang isa ka mas makatarunganon nga korte, kag ang iban sining matutom nga ‘mga mandadaug’ ginhatagan sing mga bahin sa programa sang “Diosnon nga Panudlo” nga Distrito nga Kombension sa Addis Ababa sang maaga nga bahin sang 1994.a​—⁠Juan 16:33; ipaanggid ang 1 Corinto 4:⁠9.

8. Paano gintinguhaan ni Satanas nga gamiton ang ginatawag nga “eth­nic clean­sing”?

⁸ Napaslawan si Satanas sa pagbungkag sang integridad sinang matutom nga kauturan nga mga lalaki kag mga babayi paagi sa direkta nga pagsalakay. Gani, ano pa nga malalangon nga mga pahito ang ginagamit niya? Ang Bugna 12:12 nagasiling tuhoy sining katapusan nga mga adlaw: “Kailo sa duta kag sa dagat, kay ang Yawa nagpanaug sa inyo, nga may dakung kasingkal, bangod nahibaluan niya nga may malip-ot na lamang sia nga tion.” Bangod napaslawan sia sa paglaglag sa matutom nga katawhan sang Dios paagi sa mga paghingabot, sa iya kaakig nagatinguha sia nga ubuson pamatay ang bug-os nga mga populasyon, ayhan sa tuyo nga papason ang katawhan ni Jehova upod sa nabilin nga bahin sang populasyon. Sa amo, ang ginatawag nga eth­nic clean­sing (pagpapas sa minoridad nga grupo sang rasa) ginhimo sa mga bahin sang anay Yugoslavia, kag ang geno­cide (pagpapas sa isa ka bug-os nga rasa ukon tribo) gintinguhaan nga himuon sa Liberia, Burundi, kag Rwanda.

9. Ngaa masami nga nagakapaslawan ang mga pahito ni Satanas? Maghatag sing mga halimbawa.

⁹ Apang, sa masami, ang mga pahito ni Satanas nagabalik sa iya, kay ang iya sataniko nga pagpaantos nagaparealisar sa bunayag sing tagipusuon nga mga tawo nga ang ila lamang nga paglaum yara sa Ginharian sang Dios, nga makugi nga ginawali sang mga Saksi ni Jehova. (Mateo 12:21) Sa pagkamatuod, nagapanong ang mga interesado padulong sa Ginharian! Halimbawa, sa ginatublag sang inaway nga Bosnia kag Herzegovina, sang Marso 26, 1994, sa pagsaulog sing Memoryal sang kamatayon ni Jesus, 1,307 ang nagtambong, 291 ang kalabawon sangsa nagligad nga tuig. Pinakamataas ang nagtambong sa Sarajevo (414), sa Zenica (223), sa Tuzla (339), sa Banja Luka (255), kag sa iban pa nga mga banwa. Sa kaiping nga ­Croatia 8,326 ang ila bag-o nga kataason sang nagtambong. Ang kasingki nga nagakatabo sa palibot nila wala magpugong sa mga Saksi ni Jehova sa sadtong kadutaan gikan sa pagtuman sa sugo nga ‘padayon nga ibantala ang kamatayon sang Ginuo, tubtob nga magkari sia.’​—⁠1 Corinto 11:⁠26.

Sa Ginatublag sang Inaway nga Rwanda

10, 11. (a) Ano ang natabo sa ginatawag nga Cristianong Rwanda? (b) Paano ang matutom nga mga misyonero nagpabutyag sang ila kaugalingon?

¹⁰ Sang 1993, sa Rwanda, nga may 2,080 ka manugbantala sang Ginharian, 4,075 ang nagtambong sa ila “Diosnon nga Panudlo” nga Distrito nga Kombension, kag 230 ang nabawtismuhan. Sa sini, 142 ang nag-aplay sa gilayon para sa auxiliary payunir nga pag-alagad. Ang mga pagtuon sa Biblia sa puluy-an nga ginadumalahan nag-uswag tubtob sa 7,655 sang 1994​—⁠tuman kadamo nga indi gid maluyagan ni Satanas! Bisan pa ang kalabanan sang mga pumuluyo nagapangangkon nga Cristiano, nagsugod ang pagpinatyanay sa ulot sang mga tribo. Ang L’Osservatore Romano sang Batikano nagbaton: “Isa gid ini ka ubusay sing tribo nga pagpamapas, nga sing makapasubo bisan ang mga Katoliko may salabton.” Ginabanta nga tunga sa milyon ka mga lalaki, mga babayi, kag kabataan ang napatay, kag mga duha ka milyon ang nadulaan sing puluy-an ukon napilitan sa pagpalagyo. Nagahupot sang ila dimasingki nga Cristianong neutralidad, ang mga Saksi ni Jehova nagtinguha sa pagpabilin nga natingob. Ginatos sang aton kauturan nga mga lalaki kag mga babayi ang ginpatay. Apang sa isa ka kongregasyon nga may 65 ka manugbantala sang Ginharian, diin 13 ang ginpatay, ang nagatambong sa miting nag-uswag tubtob sa 170 sang Agosto 1994. Ang bulig nga mga suplay halin sa mga Saksi sa iban nga mga pungsod amo ang lakip sa una nga nag-alabot. Nagapangamuyo kita para sa mga nabilin.​—⁠Roma 12:12; 2 Tesalonica 3:​1, 2; Hebreo 10:​23-25.

¹¹ Sa tunga sang tanan nga kakugmat, ang tatlo ka misyonero nga didto sa Rwanda nakalampuwas. Nagsulat sila: “Narealisar namon nga ang aton kauturan sa bug-os nga kalibutan nagaatubang sing kaanggid nga mga kahimtangan ukon mas makatalagam pa, kag nahibaluan namon nga bahin ini tanan sang tanda sang katapusan nga adlaw sining malauton nga sistema. Sa gihapon, kon ang isa personal nga nadalahig, ginapatalupangod sini ang matuod nga kahimtangan sang mga butang kag nagapahulag sa iya sa pag-apresyar kon daw ano ka hamili ang kabuhi. Para sa amon, ang pila ka kasulatan nakatigayon sing bag-o nga importansia, kag malangkagon nga ginapaabot namon ang tion nga ang mga butang sang nagligad indi na pagdumdumon. Samtang wala pa ini, luyag namon magmasako sa pag-alagad kay Jehova.”

Pamatan-on nga mga Manughupot sing Integridad

12, 13. (a) Anong nagahupot sing integridad nga dalanon ang ginpili sang isa ka pamatan-on? (b) Sa diin makasapo karon sing pagpalig-on ang aton mga pamatan-⁠on?

¹² Ginpakita ni Jesus nga ang mga ginsikway sang ila pamilya bangod sa kamatuoran pagapadyaan sing “isa ka gatos ka pilo.” (Marcos 10:​29, 30) Natabo ini kay Entellia, isa ka dies-anyos nga lin-ay sa naaminhan nga Aprika, nga naghigugma sa ngalan sang Dios​—⁠nga Jehova⁠—​sang mabatian niya ini. Nagtuon sia upod sa mga Saksi ni Jehova kag nagalakat sing 90 minutos pakadto-pakari sa mga miting, bisan pa sa masami wala sia ginapasulod sa ila balay sang iya nagapamatok nga pamilya kon magpauli sia. Sa edad nga 13 anyos, nagsugod sia sa pagbantala sa balay kag balay, kag nagbaskog pa gid ang pagpamatok sang iya pamilya. Isa ka adlaw ginhigtan sang iya mga paryente ang iya mga kamot kag mga tiil kag ginpainitan sia sa nagatagiti nga adlaw sing pito ka oras, kag ginabasyahan sing mahigko nga tubig. Mapintas nga ginsakit nila sia, ginpierdi ang isa sang iya mga mata, kag sang ulihi gintabog sia sa ila balay. Apang, nakakita sia sing trabaho sa isa ka ospital kag sang ulihi nakalipikar subong isa ka nars. Sa edad nga 20 ginbawtismuhan sia kag nag-auxil­iary payunir sia sa gilayon. Nahamuot sa iya integridad, ginpabalik sia sang iya pamilya sa ila balay, kag siam sa ila ang nagbaton sing pagtuon sa Biblia.

¹³ Nakatigayon si Entellia sing daku nga pagpalig-on gikan sa Salmo 116, labi na ang bersikulo 1-4, nga iya ginabasa sing sulit-sulit: “Ginahigugma ko si Jehova bangod nga nagapamati sia sang akon tingog kag sang akon mga pag-ampo. Bangod nga ginlingig niya sa akon ang iya igdulungog, kag magapanawag ako sa iya tubtob nga nagakabuhi ako. Nagsabod sa akon ang mga lubid sang kamatayon kag ang mga kasakit sang Sheol nagdakop sa akon. Nakakita ako sing kalisod kag kasubo. Apang nagpanawag ako sa ngalan ni Jehova: ‘O, Jehova, luwasa ang akon kalag!’ ” Ginasabat ni Jehova ang subong sina nga mga pangamuyo!

14. Paano ang taga-Poland nga mga Saksi nagpakita sing talalupangdon nga integridad?

¹⁴ Subong sang sa adlaw ni Jesus, masami ginagamit ni Satanas ang relihioso nga panatisismo sa pagpadabdab sa kalayo sang paghingabot​—⁠apang wala ini nagamadinalag-on. Talalupangdon ang huwaran sang aton kauturan sa Poland, nga ginlaragway sa 1994 Yearbook of Jehovah’s Witnesses. Bisan ang mga pamatan-on nagpamatuod sang ila kaugalingon subong mga manughupot sing integridad. Sang 1946 ang isa sina nga mga pamatan-on amo ang 15-anyos nga lin-ay nga ginsugo: “Manguros ka sang panguros sang mga Katoliko. Kay kon indi, tiruhon ikaw!” Nagahupot sang iya integridad, ginganoy sia padulong sa isa ka kagulangan, mapintas nga ginpaantos, kag gintiro.​—⁠Ipaanggid ang Mateo 4:​9, 10.

Iban Pa sang Malalangon nga mga Pahito ni Satanas

15, 16. (a) Ano ang demonyohanon nga pagsulundan ni Satanas, kag paano naton sia mapamatukan? (b) Ngaa indi dapat masandad ang aton mga pamatan-on?

¹⁵ Ang demonyohanon nga pagsulundan ni Satanas amo gid ang “maggahom ukon manglaglag”! Madamo sia sing mapintas nga mga hinganiban. Indi katingalahan, nian, nga si apostol Pablo nagapaandam: “May pakig-away kita, indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malauton nga mga espiritu sa langitnon nga mga duog. Bangod sini gamita ang bug-os nga hinganib gikan sa Dios, agod nga makapamatok kamo sa adlaw nga malaut kag, sa tapos ninyo mahimo ang tanan nga butang sing bug-os, makatindog kamo sing malig-on.” (Efeso 6:​12, 13) Materyalistiko nga mga handum, malaw-ay nga kalingawan kag propaganda, sataniko nga musika, pag-ipit sang mga katubutubo sa eskwelahan, pag-abuso sa droga, kag pagpahubog​—⁠ang bisan diin sini makaguba sang aton kabuhi. Busa, nagapadayon ang apostol sa paglaygay: “Labaw sa tanan nga butang, gamita ang daku nga taming sang pagtuo, nga paagi sa sini mapalong ninyo ang tanan nga nagadabadaba nga baslay sang malauton.”​—⁠Efeso 6:⁠16.

¹⁶ Daw kinahanglanon gid ini labi na sa karon bangod sang talamayon nga musika nga ginapalatom ni Satanas sa sining kalibutan. Sa pila ka mga kaso may yara ini direkta nga kaangtanan sa Satanismo. Ang isa ka report gikan sa talatapan sang serip sa San Diego ­County (E.U.A.) nagsiling: “May konsierto nga ginhiwat diri diin ginsugo sang banda ang 15,000 ka kabataan nga sulit-suliton sing hambal ang ‘Natas’​—⁠kon sayuron, Satanas nga gintigbato sing suli.” Ginalaragway ang Satanismo subong isa ka buho nga ginasandaran sang mga pamatan-on “bangod nagadalangdalang sila nga walay pasingadtuan, akig kag nagaisahanon.” Kamo nga mga pamatan-on sa Cristianong kongregasyon, indi kamo dapat masandad! Ginaamanan kamo ni Jehova sing espirituwal nga hinganiban nga indi gid madutlan sang mga baslay ni Satanas.​—⁠Salmo 16:​8, 9.

17. Paano malandas ang emosyonal nga kapung-aw?

¹⁷ Ang nagadabadaba nga mga baslay ni Satanas ginadesinyo sa pagmaniobra sa mga emosyon. Paagi sa mga pag-ipit sang kabuhi, subong sang pisikal nga balatian ukon malala nga kapung-aw, mahimo nga pabatyagon kita sang aton kaaway nga wala kita sing pulos. Ang isa mahimo nga maluyahan sing buot bangod indi sia makahinguyang sing madamo nga oras sa pag-alagad sa Dios ukon bangod wala sia makatambong sa pila sang mga miting sang kongregasyon. Ang mahigugmaon nga pag-atipan sang mga gulang kag sang iban pa sang maluluy-on nga kauturan nga mga lalaki kag mga babayi mahimo nga makabulig sa paglandas sang mabudlay nga mga nagligad. Dumduma pirme nga ginahigugma ni Jehova ang iya matutom nga mga alagad. (1 Juan 4:​16, 19) Ang Salmo 55:22 nagasiling: “Itungtong kay Jehova ang imo lulan, kag sia magaalay-ay sa imo. Indi gid sia magtugot nga malingkang ang matarong.”

18. Anong sataniko nga mga pahito ang dapat landason sang iban?

¹⁸ Ang malalangon nga “mga daya” ni Satanas nagguwa kasan-o lang sa isa pa ka porma. Sa pila ka kadutaan madamo nga mga hamtong ang nakaeksperiensia sing makatulublag nga mga panghunahuna nga nagapaalinton sing impresyon nga sang bata pa sila mapintas sila nga gin-abusuhan sang sataniko nga mga kulto. Sa diin nagahalin ina nga mga ideya? Walay sapayan sang masangkad nga pagpanalawsaw, wala nagapalareho ang mga opinyon sang kalibutanon nga mga espesyalista. Ginatamod sang iban ina nga mga panghunahuna subong mga memorya, sang iban naman subong mga panghandurawan​—⁠ayhan resulta sang maduhaduhaan nga terapiya⁠—​kag sang iban pa gid subong isa ka sahi sang halusinasyon nga resulta sang isa ka masakit nga nagligad sang bata pa.

19. (a) Anong mga panghunahuna ang ginlandas ni Job? (b) Paano masunod sang mga gulang ang huwaran ni Elihu?

¹⁹ Talalupangdon nga ang alagad sang Dios nga si Job nakig-away batok sa “makatulublag nga mga panghunahuna” nga ginpaalinton ni Satanas paagi kay Elifaz kag kay Zofar. (Job 4:​13-18; 20:​2, 3) Sa amo si Job nag-antos sing “kasakit,” nga nagresulta sa iya “pahinali nga mga pulong” nahanungod sa “mga kakugmat” nga nagapaantos sa iya hunahuna. (Job 6:​2-4; 30:​15, 16) Mahipos nga namati si Elihu kay Job kag sinsero nga ginbuligan sia nga mahangpan ang labing maalamon nga pagtamod ni Jehova sa mga butang. Amo man sa karon, ginapakita sang mahinangpanon nga mga gulang nga nagaulikid sila sa mga nagaantos paagi sa indi pagdugang sing mga “pag-ipit” sa ila. Sa baylo, kaangay ni Elihu, mapailubon nga nagapamati sila kag dayon ginaaplikar nila ang makapaumpaw nga lana sang Pulong sang Dios. (Job 33:​1-3, 7; Santiago 5:​13-15) Sa amo ang bisan sin-o nga ginatublag ang ila emosyon sang masakit nga inagihan, matuod man ukon handurawan lamang, ukon “ginapahadlok . . . sang mga damgo, kag sang mga palanan-awon” subong sang natabo kay Job, mahimo nga makasapo sing makapaumpaw nga Makasulatanhon nga paglipay sa sulod sang kongregasyon.​—⁠Job 7:14; Santiago 4:⁠7.

20. Paano ang ginasit-an nga mga Cristiano mabuligan sa paghupot sang ila espirituwal nga pagkabalanse?

²⁰ Mapat-od gid sa karon sang isa ka Cristiano nga, sa isa ukon tuhay nga paagi, si Satanas yara sa likod sining makahaladlok nga mga panghunahuna. Kon ang pila sa kongregasyon nagaantos sa sining paagi, maalamon sila sa pagtamod sinang makahaladlok nga mga panghunahuna subong isa ka direkta nga pagtinguha ni Satanas nga tay-ugon ang ila espirituwal nga pagkabalanse. Nagakinahanglan sila sing mapailubon kag mahinangpanon nga pagsakdag pasad sa Kasulatan. Paagi sa mapangamuyuon nga pagdangop kay Jehova kag paagi sa pagbenepisyo gikan sa espirituwal nga pagbantay, ang mga nagaantos sing kalisod mapalig-on sang gahom nga labaw sa kinaugali. (Isaias 32:2; 2 Corinto 4:​7, 8) Sa amo makabatas sila sing matutom kag indi magtugot sa malauton nga mga panghunahuna nga tublagon ang paghidait sang kongregasyon. (Santiago 3:​17, 18) Huo, mapamatukan nila ang Yawa, nga nagapakita sing kaangay man nga espiritu nga ginpakita ni Jesus sang nagsiling sia: “Palayo ka, Satanas!”​—⁠Mateo 4:10; Santiago 4:⁠7.

21. Paano ang Kasulatan nagapaandam tuhoy sa malalangon nga mga paagi ni Satanas?

²¹ Nahibaluan naton nga ang tulumuron ni Satanas amo nga palainon ang aton mga panghunahuna, kay si apostol Pablo nagpaandam sa 2 Corinto 11:3: “Nagakahadlok ako nga sa pila ka paagi, kon paano ginlimbungan sang man-ug si Eva, paagi sa pagkadaya sini, ang inyo mga hunahuna mapalain gikan sa pagkasinsero kag pagkaputli nga dapat kay Cristo.” Ang karon nga pagkalaglag sang tanan nga unod, ukon katilingban sang tawo nga napain sa Dios, nagapahanumdom sa aton sang kalautan nga ginhimo sang masingki nga mestiso nga mga “Manugpukan” sang adlaw ni Noe. (Genesis 6:​4, 12, 13, foot­note; Lucas 17:26) Busa, indi makatilingala nga si Satanas nagagamit sing madaya nga mga buhat kag malalangon nga mga paagi sa pagpautwas sang iya kaakig, labi na batok sa katawhan sang Dios.​—⁠1 Pedro 5:8; Bugna 12:17.

22. Kon wala na si Satanas, anong mga pagpakamaayo ang mapaabot?

²² Si Satanas wala gani ginasambit sa nagahinakop nga mga kapitulo sang tulun-an nga Job sang Biblia. Ang iya malaut nga hangkat nga ang mga tawo indi makahupot sing integridad sa Dios ginpamatud-an nga butig sang integridad ni Job. Subong man, sa malapit nga palaabuton kon ang “isa ka dakung kadam-an” sang mga manughupot sing integridad ‘magaguwa sa dakung kapipit-an,’ si Satanas itagbong sa kadadalman. Ang mga lalaki kag mga babayi sang pagtuo, lakip ang matutom nga si Job, magabuylog sa sinang “dakung kadam-an,” sa pag-agom sang mga pagpakamaayo sa paraiso, nga mas daku pa sangsa ginpadya kay Job!​—⁠Bugna 7:​9-17; 20:​1-3, 11-13; Job 14:⁠13.

[Footnote]

Mga Pamangkot sa Repaso

◻ Anong maayong huwaran sang integridad ang ginpahamtang nanday Job, Jesus, kag Pablo?

◻ Paano gin-atubang sang mga manughupot sing integridad si Satanas?

◻ Paano mapamatukan sang mga pamatan-on ang malalangon nga mga pahito ni Satanas?

◻ Ano ang mahimo agod malandas ang mga pahito ni Satanas?

[Retrato sa pahina 7]

Sa Etiopia, sanday Meswat kag Yoalan nagaalagad karon kay Jehova sing bug-os tion bilang pagsunod sa huwaran sang ila amay, nga ginpatay

[Retrato sa pahina 7]

Si Entellia, isa ka pamatan-on nga manughupot sing integridad sa naaminhan nga Aprika