TULUN-AN 6

Maathag nga Pag-aplikar sang Kasulatan

Juan 10:33-36

KON ANO ANG HIMUON: Indi lang pagbasaha ang kasulatan dayon magsaylo sa iban nga punto. Pat-ura nga nakita sang imo mga tagpalamati ang koneksion sang ginbasa nga kasulatan sa punto nga imo ginapadaku.

KON PAANO INI HIMUON:

Paina ang yabi nga mga tinaga. Pagkatapos mabasa ang kasulatan, ipadaku ang mga tinaga nga naangot sa panguna nga punto. Mahimo mo ini paagi sa pagsulit sinang mga tinaga ukon pagpamangkot para makita sang imo mga tagpalamati ang yabi nga mga tinaga.

Kon naggamit ka sang lain nga mga tinaga para suliton ang ideya sang kasulatan, pat-ura nga makita gihapon sang mga tagpalamati ang koneksion sang mga tinaga sa Biblia sa imo panguna nga punto.
Ipadaku ang punto. Kon ginpakilala mo ang kasulatan upod ang rason kon ngaa gingamit mo ini, ipaathag kon paano ang yabi nga mga tinaga sang kasulatan naangot sa sina nga rason.

Samtang ginabinagbinag mo ang kasulatan, ibilin nga bukas ang imo Biblia. Makabulig ini sa imo mga tagpalamati nga maangot ang imo mga tinaga sa bersikulo nga bag-o mo lang nabasa.
Himua nga simple ang pag-aplikar sini. Indi pagkomentuhi ang mga detalye nga wala naangot sa panguna nga punto. Base sa nahibaluan na sang imo mga tagpalamati parte sa topiko, magdesisyon kon ano pa ang dapat mo ipaathag para mahangpan ang punto.