Pagrespeto sa Sarisari nga mga Tawo—Kon Paano Makabulig ang Biblia

“Ang pagrespeto sa sarisari nga mga tawo kinahanglan gid para may paghidait sa kalibutan.”—UNESCO Declaration of Principles on Tolerance, 1995.

Ang indi pagrespeto sa sarisari nga mga tawo mahimo magresulta sa pagpakanubo sa iban ukon pagdumot sa ila. Kon amo sini ang ginabatyag sang isa, masami nga nagaresulta ini sa paghambal sang masakit sa iban, diskriminasyon, kag pagpamintas.

Pero indi magkapareho ang pag-intiende sang mga tawo kon paano ipakita ang pagrespeto sa sarisari nga mga tawo. Ang iban nagapati nga dapat batunon mo ang tanan nga klase sang paggawi kag pamatasan. Ginasunod naman sang iban ang ginatudlo sang Biblia. Ginarespeto nila ang kinamatarong sang isa nga magpili kon ano ang iya patihan, paggawi, kag mga prinsipio bisan pa wala sila nagaugyon sa sini.

Makabulig bala ang Biblia subong sa mga tawo para respetuhon nila ang sarisari nga mga tawo?

Ang basihan sa Biblia sa pagrespeto sa sarisari nga mga tawo

Ginatudlo sang Biblia ang pagrespeto sa sarisari nga mga tawo. Nagasiling ini: “Ipakita sa tanan nga tawo ang inyo pagkamakatarunganon.” (Filipos 4:5) Ginapalig-on kita sang Biblia nga trataron ang iban sing patas, may respeto, kag konsiderasyon. Ang nagasunod sini nga laygay mahimo nga wala nagabaton ukon nagahimo sang ginapatihan sang iban, pero ginapabay-an niya sila nga maggawi base sa gusto nila.

Ginapakita sang Biblia nga may pagsulundan ang Dios kon paano dapat maggawi ang mga tawo. Ini nagasiling: “O tawo, ginsiling [sang Dios] sa imo kon ano ang maayo.” (Miqueas 6:8) Ginasugid sini ang giya sang Dios nga ginhatag niya sa mga tawo para malipay gid sila sa ila kabuhi.—Isaias 48:17, 18.

Wala kita ginhatagan sang Dios sang kinamatarong nga hukman ang iban. Nagasiling ang Biblia nga, “May isa lamang ka Manughatag sing Kasuguan kag Hukom . . . Sin-o ka nga maghukom sa imo isigkatawo?” (Santiago 4:12) Ginhatagan sang Dios ang kada isa sa aton sang kahilwayan nga maghimo sang desisyon nga kita man mismo ang manabat.—Deuteronomio 30:19.

Ang ginasiling sang Biblia parte sa pagrespeto

Ang Biblia nagasiling nga dapat naton ‘tahuron ang tanan nga tawo.’ (1 Pedro 2:17, Maayong Balita nga Biblia) Gani, ang mga nagdesisyon nga sundon ang mga sugo sang Biblia nagarespeto sa tanan nga tawo, ano man ang ila ginapatihan ukon pagkabuhi. (Lucas 6:31) Indi buot silingon sini nga ang mga nagasunod sa ginatudlo sang Biblia magaugyon sa tanan nga ginapatihan ukon opinyon sang iban ukon suportahan ang tanan nga desisyon nga ila ginahimo. Pero imbes nga trataron sila sing indi maayo ukon wala sing respeto, dapat nila himuon ang tanan para ilugon ang pagtrato ni Jesus sa iban.

Halimbawa, isa ka bes, naistorya ni Jesus ang isa ka babayi nga may relihion nga indi komporme si Jesus. Ini nga babayi may ginapuyopuyo nga lalaki nga indi niya bana. Indi gid ini insakto para kay Jesus. Pero, matinahuron gihapon ang pagpakig-istorya sa iya ni Jesus.—Juan 4:9, 17-24.

Si Jesus nga matinahuron nga nagapakig-istorya sa isa ka babayi sa bubon.

Pareho kay Jesus, ang mga Cristiano handa magpaathag sang mga rason sang ila mga ginapatihan sa mga gusto mamati, pero ginahimo nila ini nga may “tudok nga pagtahod.” (1 Pedro 3:15) Ginatudlo sang Biblia sa mga Cristiano nga indi pag-ipilit ang ila opinyon sa iban. Nagasiling ini nga ang mga sumulunod sang Cristo “indi kinahanglan makig-away, kundi kinahanglan mangin malulo sa tanan,” pati na sa mga lain ang ginapatihan.—2 Timoteo 2:24.

Ang ginasiling sang Biblia parte sa pagdumot

Ang Biblia nagasiling nga ‘tinguhaan naton ang pagpakighidait sa tanan nga tawo.’ (Hebreo 12:14) Ang isa nga nagatinguha nga makighidait wala nagadumot. Bisan pa nga wala sia sang ginahimo nga supak sa iya mga pagpati, ginatinguhaan gid niya nga magkabuhi sing malinong upod sa iban. (Mateo 5:9) Ginapalig-on gid sang Biblia ang mga Cristiano nga palanggaon ang ila mga kaaway paagi sa paghimo sing maayo sa mga nagatratar sing malain sa ila.—Mateo 5:44.

Nagasiling ang Biblia nga “ginadumtan,” ukon “ginakangil-aran” sang Dios ang ginahimo sang mga tawo nga nagapakanubo ukon nagahalit sa iban. (Hulubaton 6:16-19) Gingamit diri sang Biblia ang tinaga nga “dumot” para ipakita ang grabe nga kaugot sa malain nga paggawi. Ginapakita sang Biblia nga ang Dios handa magpatawad kag magbulig sa mga tawo nga gusto magbag-o kag magsunod sa iya mga sugo.—Isaias 55:7.

Mga bersikulo sa Biblia parte sa pagrespeto

Tito 3:2: “Mangin makatarunganon, kag mangin malulo gid sa tanan nga tawo.”

Ang makatarunganon nga tawo malulo bisan sarisari ang opinyon sang iban, kag nagabulig sia para mapakita sang kada isa ang respeto.

Mateo 7:12: “Himua ninyo sa inyo isigkatawo ang tanan nga luyag ninyo nga himuon nila sa inyo.”

Nanamian gid kita kon ginarespeto kita sang iban kag ginapabaloran nila ang aton ginapatihan kag ginabatyag. Para sa dugang nga impormasyon kon paano masunod ining pamilyar gid nga pagsulundan nga gintudlo ni Jesus, tan-awa ang artikulo nga “Ano ang Golden Rule?”

Josue 24:15: “Magpili kamo subong kon sin-o ang inyo alagaron.”

Kon ginarespeto naton ang kinamatarong sang iban nga magdesisyon para sa ila kaugalingon, nagabulig kita para may paghidait.

Binuhatan 10:34: “Ang Dios wala sing ginapasulabi.”

Ang Dios wala sang ginapasulabi sa mga tawo bisan ano man ang ila kultura, lalaki man ukon babayi, nasyonalidad, rasa, ukon ginhalinan. Ang mga gusto mag-ilog sa Dios nagapakita sang respeto sa tanan nga tawo.

Habacuc 1:12, 13: ‘Indi mabatas sang Dios ang kalautan.’

Wala nagakunsinti ang Dios. Indi sia magtugot nga magpadayon sa paghimo sang malain ang mga tawo sing wala katapusan. Para sa dugang nga impormasyon, tan-awa ang video nga Ngaa Ginapasugtan sang Dios ang Pag-antos?

Roma 12:19: “Pabay-i nga ang Dios ang magpakita sang iya kaakig; kay nasulat na: ‘Akon ang pagtimalos; ako ang magabalos,’ siling ni Jehova.”a

Wala ginatugutan ni Jehova nga Dios ang bisan sin-o nga magbalos. Ginasigurado niya nga mapadapat gid ang hustisya sa iya gintalana nga tion. Para sa dugang nga impormasyon, basaha ang artikulo nga “Masabat Bala ang Pagpangayo sang Hustisya?”

a Si Jehova ang personal nga ngalan sang Dios. (Salmo 83:18) Tan-awa ang artikulo nga “Sin-o si Jehova?”

Ginarespeto bala sang mga Saksi ni Jehova ang iban nga tawo kag relihion?

Abi sang pila ka tawo wala namon ginarespeto ang pagpati sang iban bangod nagabantala kami. Pero, ginarespeto namon ang kinamatarong sang iban nga tawo bisan ano man ang ila ginapatihan. Wala man namon ginapilit sa iban ang amon mga ginapatihan. Para mahibaluan mo kon ngaa nagapakig-istorya kami sa iban nga tawo nga may relihion na, basaha ang artikulo nga “Ginapilit Bala sang mga Saksi ni Jehova ang mga Tawo nga Islan ang Ila Relihion?”

Wala namon ginapilit ang bisan sin-o nga mangin isa sa mga Saksi ni Jehova ukon magpabilin nga Saksi. Kon ang isa indi na gusto nga mangin Saksi ni Jehova, ginarespeto namon ang iya desisyon. Pero basi nagapamensar ang iban, ‘Kon ginarespeto sang mga Saksi ni Jehova ang pagpati sang iban, ngaa gina-disfellowship nila kag wala na sila nagapakig-upod sa iban nga kaupod nila sa pagsimba sang una?’ (1 Corinto 5:11, 13) Para sa dugang nga impormasyon, basaha ang artikulo nga “Ginasikway Bala sang mga Saksi ni Jehova ang Ila Anay mga Kaupod?”