Gindesinyo Bala Ini?

Ang Tuktok sang Toucan

◼Indi sia gawa makalupad, amo nga ang toucan sang Central kag Bagatnan nga Amerika nagaluksolukso lang. Ang iya huni daw kaangay sang paka, apang mas matunog ini. Sa pagkamatuod, mabatian ini tubtob sa isa ka kilometro nga kalayuon. Apang ang ginadayaw gid sang mga sientipiko amo ang tuktok sang toucan.

Binagbinaga ini: Ang tuktok sang pila ka toucan nagalaba sing sobra pa sa ikatlo nga bahin sang iya kabug-usan nga kalabaon. Daw mabug-at ini tan-awon, apang indi gali. “Ang gua sini human sa keratin, ang materyal nga nagahuman man sa aton mga kuko kag buhok,” paathag sang sientipiko nga si Marc André Meyers. “Sa pagkamatuod, madamo ini sing korte hexagon nga mga pinanid, nga nagasampawanay kaangay sang mga atop sa balay.”

Ang kapag-on sang tuktok sang toucan ginpaanggid sa nagtig-a nga espongha. Ang iban nga bahin sini kalong, apang ang iban naman may mga balayan nga naputos sa panit, amo nga mamag-an ang iya tuktok pero talalupangdon gid ang kapag-on sini. “Daw subong bala nga may madalom nga ihibalo sa mechanical engineering ang toucan,” siling ni Meyers.

Ang pagkahuman sang tuktok sang toucan nakabulig sa pispis nga indi masakitan bisan makabunggo ini. Nagapati ang mga sientipiko nga mahimo ini ilugon sang mga nagahimo sang eroplano kag mga salakyan. “Ang mga kaha sang mga salakyan nga ginsunod sa tuktok sang toucan mahimo nga mas makaamlig sa mga motorista kon maaksidente,” siling ni Meyers.

Ano sa banta mo? Natabuan lang bala ang mabakod apang mamag-an nga tuktok sang toucan? Ukon gindesinyo ini?

[Diagram/​Retrato sa pahina 17]

(Para sa aktual nga format, tan-awa ang publikasyon)

Kalong nga bahin

Ang plastada nga kaangay sang espongha