Pamangkot sang mga Pamatan-on

Malain Bala nga Mangin Popular?

Sulati ang blangko.

․․․․․ maayo nga mangin popular.

A. Pirme
B. Kon kaisa
C. Indi gid

ANG husto nga sabat “B.” Ngaa? Bangod kon popular ang isa, madamo ang nanamian sa iya, kag indi ini pirme malain. Ang Biblia nagtagna nga ang mga Cristiano mangin “kapawa sa mga kapungsoran” kag ang mga tawo manamian sa ila. (Isaias 42:6, HPV; Binuhatan 13:47) Sa sini nga kahulugan popular ang mga Cristiano.

Nahibaluan mo bala?

Si Jesus popular. Bisan sang bata pa sia, ‘ginkahamut-an sia sang Dios kag sang mga tawo.’ (Lucas 2:52) Ang Biblia nagsiling nga sang daku na si Jesus, “nagsunod sa iya ang daku nga kadam-an gikan sa Galilea kag Decapolis kag Jerusalem kag Judea kag gikan sa tabok sang Jordan.”—Mateo 4:25.

Ngaa indi ini malain?

Kay si Jesus wala nagtinguha nga dayawon ukon mangin popular, kag wala man sia naghingamo nga batunon sang iban. Ginhimo lang ni Jesus kon ano ang husto, gani may mga tawo nga nanamian sa iya. (Juan 8:29, 30) Dugang pa, nahibaluan ni Jesus nga temporaryo lang ang kahamuot sa iya sang mga tawo nga nagabulubag-o ang pensar. Nahibaluan man niya nga sa ulihi, pagapatyon nila sia!—Lucas 9:22.

Ang Punto:

Ang pagkapopular pareho sa manggad. Indi ini pirme malain. Ang problema lang, kon ano ang ginahimo sang mga tawo para makuha ukon mamentinar ini.

Paandam!

Ginahimo sang madamo nga pamatan-on ang bisan ano para mangin popular. Ang iban sa ila nagasunodsunod sa ginahimo sang kalabanan para batunon sila. Nagapamahog naman ang iban para dayawon sila.a

Sa masunod nga mga pahina, binagbinagon naton ang duha ka delikado nga alagyan ukon paagi para mangin popular. Dayon tan-awon naton kon ano ang mas maayo nga alagyan.

Ang iban pa nga artikulo sang “Young People Ask” makita sa Web site nga www.watchtower.org/ype

a Ang Biblia nagsambit parte sa tonto nga mga tawo nga ginatawag Nefilim ukon “mga higante.” Ginpatuhuyan man sila nga “bantog nga mga tawo,” kag gusto nila himayaon sila sang iban.—Genesis 6:4.

MGA ALAGYAN PARA MANGIN POPULAR

ANG NAGASUNODSUNOD SA IBAN

Dapat manamian ang iban sa akon.
Para batunon nila ako, dapat sundon ko ang ila ginahimo.

“Ginbag-o ko ang akon batasan para batunon ako sang iban. Sang primero daw OK man. Pero sang ulihi, narealisar ko nga indi ka dapat magbag-o para lang manamian sa imo ang iban.”—Nicole.

Prinsipio sa Biblia: “Indi kamo magsunod sa kadam-an sa paghimo sing malain. . . . Indi ninyo pagtikua ang hustisya tungod gusto mo lang magsunod sa kadam-an.” —Exodo 23:2, APD.

NAGAPAMAHOG

Damo na ang nanamian sa akon, kag gusto ko amo lang sini pirme.
Himuon ko ang tanan para ako pirme ang bida, bisan matapakan ko pa ang iban.

“Ang kalabanan nga pamatan-on malain ang batasan, pero bangod popular sila, nagatuman sa ila ang iban nga wala sing mahimo.”—Raquel.

Prinsipio sa Biblia: “Ang luyag ninyo nga himuon sang mga tawo sa inyo, himua man ninyo ini sa ila.”—Lucas 6:31.

ANG MAS MAAYO NGA ALAGYAN

Hibalua ang imo panindugan. Ang Biblia nagsiling nga ang mga hamtong nga tawo ‘nahanas nga makilala ang maayo kag malain.’—Hebreo 5:14.

Kon sundon mo ang tatlo ka paagi sa nawala nga bahin, mahimo nga indi ka mangin popular, pero manamian sa imo ang mga tawo nga nagahigugma sa Dios!
Manindugan sa imo pagpati. Iluga si Josue nga nagsiling: “Pat-ura ninyo karon nga adlaw kon sin-o ang inyo alagaron . . . Pero ako kag ang akon panimalay magaalagad sa GINOO.”—Josue 24:15, HPV.
Magsalig ka sa imo ginapatihan. Si apostol Pablo nagpahanumdom kay Timoteo: “Ginhatagan kita sang Dios indi sing espiritu sang katalaw, kundi sang gahom.”—2 Timoteo 1:7.