Pag-abot sing Temprano

Ngaa importante ang pag-abot sing temprano?

KON NGAA IMPORTANTE INI

Nakita sang pila nga ang temprano nga pag-abot sa mga kaladtuan nagabuhin sang stress. Ang pag-abot sing temprano nagapanami man sa reputasyon sang isa ka tawo. Paano?

Ang pag-abot sing temprano nagapakita nga may ikasarang ka. Kon temprano ka mag-abot, nagapakita ini nga ginapanikasugan mo nga kontrolon ang imo kabuhi imbes nga kontrolon ini sang mga kahimtangan nga magapugong sa imo sa paghimo sang gusto mo himuon.

Ang pag-abot sing temprano nagapakita nga masaligan ka. Sa karon, masami nga wala ginatuman ang mga promisa kag ginabalewala ang mga pangako, gani ginapabaloran sang mga tawo ang nagatuman sang ila ginahambal. Ang masaligan nga mga tawo ginarespeto sang ila mga abyan kag pamilya. Ginapabaloran sang mga amo ang mga nagaabot sing temprano sa trabaho kag nagatapos sini sa natalana nga tion. Ginapasakaan pa gani sing sueldo kag ginahatagan sing promosyon ang masaligan nga mga empleyado.

ANG GINASILING SANG BIBLIA

May mabasa sa Kasulatan parte sa sini nga topiko. Halimbawa, ang Biblia nagsiling: “Himua ninyo ang tanan sing nagakaigo kag suno sa kahimusan.” (1 Corinto 14:40) Kon may kasugtanan ang duha ka tawo nga magkitaay sa isa ka lugar kag sa espesipiko nga oras, maayo gid kag nagakaigo nga mag-abot sila sing temprano. Ang Biblia nagsiling man: “May tion para sa tagsa ka butang, may tion para sa tagsa ka hilikuton sa idalom sang langit.” (Manugwali 3:1) Ang masunod nga bersikulo sini nagasiling nga may “tion sa pagtanom kag tion sa paggabot.” (Manugwali 3:2) Ang mga mangunguma nagatanom sa husto nga tion, sa eksakto gid nga tion, para madamo ang ila patubas. Sa aton pa, bangod nagtanom ang mangunguma sa eksakto nga tion, nangin maayo ang resulta.

Ginapakita sang Biblia ang mas daku nga rason kon ngaa mag-abot sing temprano: Pagrespeto ini sa iban kag sa ila hamili nga tion. (Filipos 2:3, 4) Sa kabaliskaran, ang pirme nagapahulat sa iban daw pareho lang nga ginakawat niya ang ila tion.

“[Pangitaa] ninyo indi lamang ang inyo personal nga kaayuhan, kundi ang iya man sang iban.”​—Filipos 2:4.

Ano ang mahimo mo para makaabot ka sing temprano?

ANG GINASILING SANG BIBLIA

Ginapalig-on sang Biblia nga magplano sing abanse. (Hulubaton 21:5) Kon pirme ka leyt sa imo mga kaladtuan, basi puno na katama ang imo iskedyul. Ngaa indi mo pagbuhinan ang tion nga ginagamit mo sa indi importante nga mga hilikuton? Dugangi ang tion sa tunga sang imo mga kaladtuan, kag tinguhai nga mag-abot sing temprano. Kon himuon mo ini, indi ka maleyt bisan pa may wala ginapaabot nga mga sitwasyon, pareho sang trapik ukon malain nga tiempo.

Ginapalig-on man sang Biblia nga mangin maugdang kita. (Hulubaton 11:2) Sa aton pa, hibalua ang imo mga limitasyon. Pamensara anay kon masarangan sang imo iskedyul ang inyo ginaplanuhan nga himuon ukon tapuson ang ginapaobra antes ka magpasugot. Kon puno katama ang imo iskedyul, nagapadugang ini sang stress kag kapaslawan—sa imo kag sa iban!

Ginasugiran pa gid kita sang Biblia nga gamiton sing maayo ang aton tion. (Efeso 5:15, 16) Unaha ang pinakaimportante nga mga ulubrahon. (Filipos 1:10) Halimbawa, samtang nagasakay ka sa pangpubliko nga salakyan ukon nagahulat sa iban, hingaliti ini nga tion sa pagbasa ukon pagplano sang imo himuon sa bilog nga adlaw.

“Ang mga plano sang mapisan pat-od nga magamadinalag-on.”​—Hulubaton 21:5.