Pagbisita sa New Zealand

MAHIMO nga mga 800 ka tuig na ang nagligad sang naglakbay ang mga tribo sang Maori sing linibo ka kilometro sa kadagatan kag nag-istar sa New Zealand. Nakita nila ang lugar nga lain gid sa ila ginhalinan, sa tropikal nga isla sang Polynesia. May mga kabukiran diri kag mga yelo, mainit nga mga tuburan kag snow. Pagligad sang mga lima ka siglo, may bag-o naman nga rasa nga nag-abot halin sa Europa. Subong, ginabaton sang kalabanan nga taga-New Zealand ang mga tradisyon sang Anglo-Saxon kag Polynesia. Halos 90 porsiento sang mga tawo ang nagaistar sa siudad. Ang siudad sang Wellington amo ang pinakabagatnan nga kapital sa kalibutan.

Bangod sang lainlain kag matahom nga palibot, indi katingalahan nga bisan malayo ang New Zealand, halos tatlo ka milyon ka turista ang nagakadto diri kada tuig.

Ginapabugal sang New Zealand ang sarisari nga ilahas nga mga sapat kag tanom, kag sa bilog nga kalibutan sila ang may pinakamadamo nga espesyi sang pispis nga wala nagalupad. Makita man diri ang tuatara, nga daw ibid ang hitsura, nga mahimo magkabuhi sing asta sa 100 ka tuig. Ang mga mamalya nga diri lang makita, amo ang pila ka espesyi sang kabog kag dalagku nga mga mamalya sa dagat, pareho sang mga balyena kag dolpin.

Halos 120 na ka tuig nga aktibo ang mga Saksi ni Jehova sa New Zealand. Ginatudlo nila ang Biblia sa mga 19 ka lenguahe, lakip ang lenguahe sang mga Polynesian nga Niuean, Rarotongan, Samoan, kag Tongan.