MAKAY-O PA BALA ANG ATON PLANETA?

TUBIG

WALA sing mabuhi sa duta kon wala sing tubig. Ang matuod, tubig ang kalabanan nga parte sang tanan nga buhi nga butang. Ang mga linaw, suba, katunggan, kag mga tubig sa idalom sang duta nagahatag sing tubig sa mga tawo, mga sapat, kag mga tanom.

Mga Halit sa Aton Tubig

Tubig ang daku nga bahin sang aton planeta. Pero, suno sa World Meteorological Organization, “0.5% lang sang tubig sa Duta ang puede mainom.” Ining diutay lang nga tubig bastante na para masuportahan ang kabuhi sa duta, pero ang kalabanan sini nangin mahigko na ukon nagakahubas bangod nagadamo ang tawo kag nagabag-o ang klima. Suno sa mga eksperto, kulangon sing bastante nga tubig ang lima ka bilyon ka tawo sa masunod nga 30 ka tuig.

Gindesinyo ang Aton Planeta nga Indi Maguba

Gindesinyo ang aton planeta nga may natural nga mga proseso para indi ini madulaan sing suplay sang tubig. Ang duta, ang buhi nga mga butang sa dagat, pati na ang silak sang adlaw nagabuligay para tinluan ang tubig. Binagbinaga ang pila ka ebidensia nga ang aton planeta gindesinyo nga indi maguba.

Suno sa pagtuon, makabulig ang duta para makuha ang mga higko sa tubig. May pila ka tanom sa mga katunggan nga makakuha sang nitrogen, phosphorus, kag mga pesticide.
Nadiskobrehan sang mga scientist nga paagi sa mga balas, bato, kag bakterya, matinluan ang tubig nga nahigkuan sang madunot nga mga butang. Ang mga higko sa nagailig nga tubig ginatunaw sang mga bakterya.
Ang mga pakinhason kag tahong makasarang sa pagkuha sang makahalalit nga mga kemikal sa tubig sa sulod lang sang pila ka adlaw. Kag posible, mas maayo pa ang ila mahimo sangsa mga planta nga nagatinlo sang tubig.
Ang aton planeta nagasupot sang tubig paagi sa water cycle. Ginapunggan sini kag sang iban pa nga natural nga proseso ang tubig nga makagua sa atmospera.

NAHIBALUAN MO BALA?

Ang Duta—Natural nga Salaan sang Tubig

Nadiskobrehan nga ang duta makasarang sa pagsala sang mga metal, makahalalit nga kemikal, madunot nga mga butang, kag iban pa nga higko sa tubig nga nagapanalupsop sa duta. Kon ang tubig ara na sa idalom sang duta, matinlo na ini kag puede mainom.

Balas kag Bato

Ang mga balas kag magagmay nga mga bato makasala sang mga higko.

Bakterya

Matunaw sang mga bakterya nga ara sa duta ang mga kemikal nga makahalit sa mga tawo. Masarangan pa gani sang pila ka bakterya nga himuon nga carbon dioxide kag tubig ang mga langis.

Kemikal

May klase sang duta nga may electric charge nga makadula sang makahalit nga kemikal nga may opposite charge. Halimbawa, ang daga nga may negative charge makasarang sa pagdula sang positive charge nga ammonium sa tubig.

Ang Ginahimo nga Solusyon

Mga piktyur: 1. Lalaki nga nagakay-o sang nagatagas nga langis sa iya salakyan. Nagagamit sia sang drain pan para saluron ang nagatulo nga langis. 2. Lalaki nga nagdala sang mga suludlan sang kemikal sa recycling center para mahaboy ini sing insakto. — Kon ginakay-o naton ang mga nagatagas nga langis kag ginahaboy sing insakto ang makahalalit nga mga kemikal, nagabulig kita nga mangin matinlo ang aton tubig

Ginapanugda sang mga eksperto nga indi pag-usikan ang tubig. Nagsiling pa sila nga para indi mahigkuan ang tubig, dapat kay-uhon naton ang mga nagatagas nga langis sa aton mga salakyan kag indi pag-i-flush sa basin ang wala naggamit nga mga bulong ukon iula ang makahalalit nga mga kemikal sa lababo ukon sa kanal.

Nakahimo ang mga engineer sang bag-o nga mga paagi para makuha ang parat sang tubig nga halin sa dagat nga ginatawag nga desalination. Ang tuyo sini para may dugang kita nga tubig nga puede mainom.

Pero may dapat pa nga himuon. Ang desalination indi praktikal nga solusyon bangod magasto ini kag nagakinahanglan sang tama ka daku nga enerhiya. Sa report sang 2021 parte sa pagkinot sang tubig, ang isa ka reperensia sang United Nations nagsiling: “Dapat doblehon pa gid ang ginahimo nga panikasog sa bilog nga kalibutan.”

Kon Ano ang Ginasiling sang Biblia

“Ginapasaka [sang Dios] ang tubig halin sa duta; ginahimo niya ang ulan halin sa iya alisngaw; dayon ginabubo ini sang panganod; kag nagaulan sing bugana sa mga tawo.”—Job 36:27, 28.

Gindesinyo sang Dios ang mga natural cycle para proteksionan ang tubig sang duta.—Manugwali 1:7.

Binagbinaga ini: Kon ang Manunuga ang nagdesinyo sang mga proseso para matinluan ang tubig, indi bala makasalig kita nga masarangan niya nga dulaon ang halit nga ginhimo sang mga tawo sa tubig? Tan-awa ang artikulo nga “Ang Dios Nagpromisa nga Indi Maguba ang Aton Planeta,” sa pahina 15.