MAKAY-O PA BALA ANG ATON PLANETA?
HANGIN
ANG hangin kinahanglan naton indi lang para magginhawa. Ginaproteksionan sang hangin ang aton planeta sa makahalalit nga radiation sang adlaw. Kon wala sang hangin, mangin tama katugnaw ang bilog nga kalibutan.
Mga Halit sa Aton Hangin
Ang polusyon sa hangin makahalit sa buhi nga mga tinuga sa duta. Suno sa World Health Organization, isa ka porsiento lang sang populasyon sa duta ang nagahaklo sang matinlo nga hangin.
Bangod sa polusyon sa hangin, madamo ang may balatian sa baga, lung cancer, kag balatian sa tagipusuon. Kada tuig, mga 7,000,000 ka tawo ang temprano pa nga nagakapatay bangod sa polusyon sa hangin.
Gindesinyo ang Aton Planeta nga Indi Maguba
Ang aton planeta may natural nga ikasarang sa paghatag sang bastante kag matinlo nga hangin para sa tanan nga buhi nga tinuga. Makabenepisyo gid ang mga tawo sa sining natural nga mga proseso kon tinguhaan nila nga buhinan ang polusyon. Binagbinaga ang pila ka halimbawa.
Nakahibalo kita nga ang kagulangan may ikasarang sa pagsuyop sang carbon dioxide. Pero diutay lang ang nakahibalo nga mas maayo pa gid ang ginahimo sang mga bakhaw nga nagatubo sa mga katunggan. Masuyop sang mga bakhaw ang carbon dioxide sing sobra lima ka beses sangsa mahimo sang mga kagulangan sa tropikal nga mga lugar.
Ginapakita sang mga pagtuon sining karon lang nga ang pila ka dalagku nga hilamon sa dagat pareho sang kelp wala lang nagasuyop sang carbon dioxide halin sa atmospera kundi nagapalugdang man sini. Ang mga daw dahon nga bahin sang kelp may bilog-bilog nga puno sang hangin amo nga makalutaw ini sing malayo. Kon malayo na ini sa higad-baybay, nagalupok ining mga bilog-bilog, kag ang kelp nga puno sang carbon dioxide, nagalugdang sa salog sang dagat kag nagapabilin ini diri sa sulod sang ginatos ka tuig.
Ang ikasarang sang aton atmospera nga makarekober sa makahalalit nga polusyon nakita gid sang COVID-19 nga lockdown. Sang 2020, nangin mas maayo ang hangin sa palibot sang nag-untat ang kalabanan nga mga pabrika kag halos wala naggamit ang mga tawo sang ila salakyan. Suno sa “2020 World Air Quality Report,” sobra 80 porsiento sa gin-obserbahan nga mga pungsod ang nagreport nga nangin mas matinlo ang ila hangin wala madugay sang ginpatuman ang lockdown.
Ang Ginahimo nga Solusyon
Ang pagbisikleta makabulig para mabuhinan ang polusyon sa hangin
Ang mga gobierno padayon nga nagapahanumdom sa mga negosyante nga buhinan ang paghigko sa hangin. Padayon man nga ginatun-an sang mga scientist kon ano ang himuon para mauntat ang polusyon. Halimbawa, ang isa sa ginahimo nila amo ang paggamit sang mga bakterya para mauntat ang polusyon sa hangin. Ginapanugda man sang mga eksperto nga maglakat ukon magbisikleta imbes nga magsakay sa salakyan, kag magkinot sang kuryente sa balay.
Sa pila ka pungsod, ang gobierno nagahatag sa ila pumuluyo sing moderno nga mga kalan para mabuhinan ang polusyon sa hangin, pero madamo gihapon nga tawo ang wala sini
Pero may dapat pa nga himuon suno sa ginpakita nga report sang 2022 nga gintipon sang mga ahensia sa bilog nga kalibutan, lakip ang World Health Organization kag ang World Bank.
Ginapakita sang report nga sang 2020, sobra 30 porsiento sang populasyon sa kalibutan ang nagagamit sang galamiton sa pagluto nga makahigko sa hangin. Sa madamo nga lugar, diutay lang ang makabakal sang bag-o nga kalan ukon sang iban pa nga moderno nga galamiton sa pagluto.
Kon Ano ang Ginasiling sang Biblia
“Amo ini ang ginasiling sang matuod nga Dios nga si Jehova, ang Manunuga sang langit kag . . . ang nagpahamtang sang duta kag ang naghimo sang tanan sa sini, ang naghatag sang ginhawa sa mga tawo.”—Isaias 42:5.
Ang Dios ang nagtuga sang hangin nga aton ginahaklo kag sang natural cycle nga nagatinlo sa hangin, kag wala tupong ang iya gahom kag gugma sa mga tawo. Gani, makasalig gid kita nga dulaon niya ang polusyon sa hangin. Tan-awa ang artikulo nga “Ang Dios Nagpromisa nga Indi Maguba ang Aton Planeta.”