PAGMAHAL SANG MGA BALAKLON—ANO ANG PUEDE MO HIMUON?

Padayon nga Maglaum

Nagamahal bala ang mga balaklon sa inyo pungsod pero amo lang gihapon ang imo sueldo? Nabalaka ka bala kon paano mo mabuhi ang imo kaugalingon ukon ang imo pamilya? Kon huo, mahimo magbatyag ka nga daw wala sing kasiguraduhan ang palaabuton. Pero sa sining mabudlay nga mga sitwasyon, makabulig gid sa aton kon may ginalauman kita.

KON NGAA IMPORTANTE INI

Ang mga tawo nga may ginalauman wala lang nagahulat nga may maayo nga mga butang nga matabo sa ila. Kundi, ginahimo nila ang tanan nila nga masarangan para magnami ang ila sitwasyon. Halimbawa, ang mga researcher nagasiling nga ang mga tawo nga may paglaum . . .

mas makabatas bisan pa mabudlay ang ila kabuhi
mas madali maka-adjust ano man ang ila sitwasyon
makahimo sang maalamon nga desisyon para mangin maayo ang ila panglawas kag ang ila kabuhi

ANG PUEDE MO HIMUON

Una, hibalua kon paano ka mabuligan sang Biblia subong. May mga laygay ang Biblia nga makabulig sa imo nga mabal-an kon ano ang himuon mo kon nagamahal ang presyo sang mga balaklon. Ini nga mga panugda mahimo makabulig sa imo sa mabudlay nga mga sitwasyon subong kag sa palaabuton.

“Kon kahibalo ka magdesisyon sing husto, makaprotektar ini sa imo. Kon may pag-intiendi ka, makatipig ini sa imo.”—Hulubaton 2:11, APD.

Ikaduha, hibalua kon ano ang ginasugid sang Biblia parte sa palaabuton. Kon makita mo na nga maayo gid ang mga laygay sa Biblia, mahimo nga gusto mo man mabal-an ang ginasugid sini parte sa palaabuton. Halimbawa, indi lang gusto sang Dios nga mabal-an mo nga may maayo ka nga “palaabuton kag paglaum” kundi gusto niya man nga mabal-an mo ang rason kon ngaa makasalig ka sa sini. (Jeremias 29:11) Kag ina, amo ang Ginharian sang Dios.

ANO ANG GINHARIAN SANG DIOS, KAG ANO ANG HIMUON SINI?

Ang Ginharian sang Dios isa ka gobierno nga magagahom sa bilog nga kalibutan. (Daniel 2:44; Mateo 6:10) Magagahom ini sa langit kag dulaon sini ang pag-antos kag kapigaduhon. Ang tanan mabuhi na nga may kalinong kag mangin bastante na ang kinahanglanon sang kada isa, pareho sa ginasugid sang masunod nga mga teksto.

“Mangin malipayon ka kag magaagom sing kabuganaan.”—Salmo 128:2.

“Indi sila [ukon ang mga sakop sang Ginharian] magpangabudlay sa wala sing pulos.”—Isaias 65:23.

“Mangin bugana ang mga uyas sa duta.”—Salmo 72:16.

Minilyon ka tawo ang nagasalig sa sini nga mga promisa kag kumbinsido sila nga ang Dios “indi makabutig.” (Tito 1:2) Puede mo basahon ini nga mga teksto sa Biblia. Ini nga paglaum makahatag sa imo sang kabakod nga makabatas sa sining mabudlay nga mga sitwasyon bangod sa nagamahal nga presyo sang mga balaklon kag makasalig ka nga may maayo gid nga palaabuton.