Ang mga Abyan sang Dios Nagalikaw sa Malain

Ginasulay ni Satanas ang mga tawo nga maghimo sing malain nga mga butang. Dapat dumtan sang isa ka tawo nga luyag mangin abyan sang Dios ang ginadumtan ni Jehova. (Salmo 97:10) Yari ang pila ka butang nga ginalikawan sang mga abyan sang Dios:

Seksuwal nga mga sala. “Dili ka magpanglahi.” (Exodo 20:14) Ang paghulid antes sang kasal sayop man.—1 Corinto 6:18.

Pagpahubog. Ang “mga palahubog . . . [indi] makapanubli sang ginharian sang Dios.”—1 Corinto 6:10.

Pagpatay, Aborsion. “Dili ka magpatay.”—Exodo 20:13.

Pagpangawat. “Dili ka magpangawat.”—Exodo 20:15.

Pagbinutig. Ginadumtan ni Jehova ang “butigon nga dila.”—Hulubaton 6:17.

Kasingki kag Indi Makontrol nga Kaakig. ‘Ang bisan sin-o nga nagahigugma sang kasingki pat-od nga ginadumtan [ni Jehova].’ (Salmo 11:5) “Ang mga buhat sang unod [nagalakip sang] . . . mga pagsilabo sang kaakig.”—Galacia 5:19, 20.

Pagsugal. “Mag-untat sa pagpakig-upod kay bisan sin-o . . . nga isa ka . . . tawo nga mahamkunon.”—1 Corinto 5:11.

Mga Dumot sa Iban nga Rasa kag Minoridad nga Rasa. “Padayon nga higugmaa ang inyo mga kaaway kag ipangamuyo ang mga nagahingabot sa inyo.”—Mateo 5:43, 44.

Ang mga butang nga ginasugid sa aton sang Dios para sa aton kaayuhan. Indi pirme mahapos likawan ang paghimo sing malain nga mga butang. Paagi sa bulig ni Jehova kag sang iya mga Saksi, malikawan mo ang paghimo sing mga butang nga wala nagapahamuot sa Dios.—Isaias 48:17; Filipos 4:13; Hebreo 10:24, 25.