Gahom sa Pagpasag-uli—‘Ginahimo ni Jehova nga Bag-o ang Tanan nga Butang’

1, 2. Ano nga mga butang ang mahimo madula sa aton subong, kag paano ini nagaapektar sa aton?

NADULA ukon naguba sang isa ka bata ang iya paborito gid nga hampanganan gani naghilibion sia. Nasubuan ka man magpamati sa iya hibi. Pero kon makita ukon makay-o sang ginikanan ang hampanganan, malipayon na liwat ang bata. Para sa ginikanan, daw simple lang nga butang nga makita ang hampanganan ukon makay-o pa gani ini. Pero ang bata nagaudyak gid kag bilib gid sa iya ginikanan. Nabalik ang iya hampanganan nga abi niya wala na!

² Si Jehova, ang pinakamaayo nga Amay, may gahom sa pagpasag-uli sang butang nga mahimo abi sang iya mga anak diri sa duta nadula na. Ang matuod, indi lang mga hampanganan ang ginaistoryahan naton. Sa sining “makahalanguyos nga mga tion nga mabudlay atubangon,” mas importante pa sangsa hampanganan ang nagakadula sa aton. (2 Timoteo 3:1-5) Madamo sa ginapabaloran sang mga tawo ang puede madula pareho sang puluy-an, pagkabutang, obra, kag ang maayo nga panglawas pa gani. Mahimo masubuan man kita kon binagbinagon naton ang pagkaguba sang palibot nga nagaresulta sa pagkaubos sang madamo nga species sang buhi nga mga butang. Pero wala na sing mas masakit pa sangsa mapatyan sing hinigugma. Ang kasubo nga napatay ang imo pinalangga kag wala ka sing mahimo, daw indi masarangan.—2 Samuel 18:33.

3. Ano nga makalilipay nga paglaum ang ginasiling sa Binuhatan 3:21, kag paano ini tumanon ni Jehova?

³ Gani, makalilipay gid nga mahibaluan ang parte sa gahom ni Jehova sa pagpasag-uli! Pareho sang binagbinagon pa naton, makatilingala ang kasangkaron sang masarangan nga ipasag-uli sang Dios sa iya mga anak sa duta. Ang matuod, ginapakita sang Biblia nga katuyuan ni Jehova nga ‘ipasag-uli ang tanan nga butang.’ (Binuhatan 3:21) Para mahimo ini, gamiton ni Jehova ang Mesianikong Ginharian, nga ginagamhan sang iya Anak, si Jesucristo. Ginapakita sang ebidensia nga ining Ginharian nagsugod sa paggahom sa langit sang 1914.a (Mateo 24:3-14) Ano ang ipasag-uli? Binagbinagon naton subong ang pila ka dalayawon nga butang nga himuon ni Jehova nga bag-o. Sa palaabuton, may iban pa nga mga butang nga bag-uhon.

Ang Pagpasag-uli sang Putli nga Pagsimba

4, 5. Ano ang natabo sa katawhan sang Dios sang 607 B.C.E., kag ano nga paglaum ang ginhatag sa ila ni Jehova?

⁴ Ang isa ka butang nga napasag-uli na ni Jehova amo ang putli nga pagsimba. Para maintiendihan kon ano ang kahulugan sini, usisaon naton sing makadali ang kasaysayan sang ginharian sang Juda. Magabulig ini sa aton nga maintiendihan kon paano ginagamit ni Jehova ang iya gahom sa pagpasag-uli.—Roma 15:4.

⁵ Imadyina lang kon ano ang ginbatyag sang matutom nga mga Judiyo sang ginlaglag ang Jerusalem sang 607 B.C.E. Naguba ang ila hinigugma nga siudad, ang mga pader sini ginrumpag. Ang malain pa, ginguba ang matahom nga templo nga ginpatukod ni Solomon, ang sentro sang putli nga pagsimba kay Jehova sa bilog nga duta. (Salmo 79:1) Ang mga nakalampuwas gindala sa Babilonia, kag ang ila dutang natawhan nangin isa ka naguba nga lugar nga ginaistaran sang ilahas nga mga sapat. (Jeremias 9:11) Sa pagtan-aw sang tawo, daw wala na sing paglaum. (Salmo 137:1) Pero si Jehova, nga madugay na nagtagna sini nga kalaglagan, naghatag sing paglaum nga ang tion sang pagpasag-uli malapit na lang.

6-8. (a) Ano nga promisa ang ginsulat sang madamo nga mga manalagna, kag paano ini nga mga tagna una nga natuman? (b) Sa aton tion subong, paano naeksperiensiahan sang mga alagad sang Dios ang katumanan sang mga tagna parte sa pagpasag-uli?

⁶ Ang matuod, madamo nga manalagna ang nagsulat parte sa sini nga mga promisa.b Paagi sa ila, ginpromisa ni Jehova ang isa ka duta nga napasag-uli kag naistaran liwat, matambok, wala sang mabangis nga mga sapat kag wala sang kaaway nga magasalakay. Nagsiling si Jehova nga ang ila duta mangin pareho sa isa ka paraiso! (Isaias 65:25; Ezequiel 34:25; 36:35) Pero ang pinakaimportante, ang mga Judiyo magasimba liwat kay Jehova sa insakto nga paagi kag tukuron liwat ang templo. (Miqueas 4:1-5) Ini nga mga tagna naghatag sing paglaum sa ginbihag nga mga Judiyo, gani nabuligan sila nga batason ang ila 70 ka tuig nga pagkabihag sa Babilonia.

⁷ Sang ulihi, nag-abot ang tion sang pagpasag-uli. Sang mahilway sa Babilonia, nagbalik ang mga Judiyo sa Jerusalem kag gintukod nila liwat didto ang templo ni Jehova. (Esdras 1:1, 2) Samtang ginasimba nila si Jehova sa insakto nga paagi, pakamaayuhon niya sila para madamo sila sang pagkaon kag mangin maayo ang ila sitwasyon. Gin-amligan niya sila sa mga kaaway kag sa mabangis nga mga sapat nga nag-istar sa ila duta sa sulod sang mga dekada. Sigurado nga nagkasadya gid sila sa gahom ni Jehova sa pagpasag-uli! Pero ini nga mga hitabo una lang kag limitado nga katumanan sang mga tagna parte sa pagpasag-uli. Ang daku pa nga katumanan magaabot “sa ulihi nga bahin sang mga adlaw,” sa aton mismo adlaw, kon magapungko sa trono ang madugay na ginpromisa nga Manunubli ni Hari David.—Isaias 2:2-4; 9:6, 7.

⁸ Wala lang madugay sa tapos makapungko sa trono si Jesus sa Ginharian sa langit sang 1914, gin-atipan niya ang espirituwal nga mga kinahanglanon sang matutom nga mga alagad sang Dios sa duta. Pareho sa paghilway sang Persianhon nga manuggahom nga si Ciro sa mga nagkalabilin sang mga Judiyo halin sa Babilonia sang 537 B.C.E., ginhilway man ni Jesus ang iya mga sumulunod halin sa butig nga relihion. Ining bug-os kalibutan nga emperyo sang butig nga relihion ginatawag sang Biblia nga “Babilonia nga Daku.” (Bugna 18:1-5; Roma 2:29) Halin sang 1919, ang matuod nga mga Cristiano nagasimba na liwat kay Jehova sa paagi nga gusto niya. (Malaquias 3:1-5) Sugod sadto, ang mga alagad ni Jehova nagasimba sa iya sa natinluan nga espirituwal nga templo, ang kahimusan sang Dios para sa putli nga pagsimba. Ngaa importante ini sa aton subong?

Espirituwal nga Pagpasag-uli—Kon Ngaa Importante Ini

9. Sang napatay na ang mga apostoles, ano ang ginhimo sang mga simbahan sang Cristiandad sa pagsimba sa Dios, pero ano ang ginhimo ni Jehova sa aton tion?

⁹ Binagbinaga ang mga natabo sa kasaysayan. Ang mga Cristiano sang una nga siglo nagasimba sa Dios sa insakto nga paagi. Pero gintagna ni Jesus kag sang mga apostoles nga ang matuod nga pagsimba masimpunan sang kabutigan kag madula. (Mateo 13:24-30; Binuhatan 20:29, 30) Sang napatay na ang mga apostoles, nagdamo ang Cristiandad ukon butig nga mga Cristiano. Ginbaton sang mga klero sini ang pagano nga mga panudlo kag mga kustombre. Ginhimo nila nga imposible ang pagpalapit sa Dios, kay nagasiling sila nga ang Dios isa ka indi maintiendihan nga Trinidad. Gintudluan man ang mga tawo nga mangumpisar sa mga pari kag mangamuyo kay Maria kag sa sarisari nga mga “santos” imbes kay Jehova. Subong, pagligad sang ginatos ka tuig nga pagpatalang, ano ang ginhimo ni Jehova? Ang kalibutan subong puno sing kabutigan sa relihion kag nahigkuan sang indi diosnon nga mga buhat. Pero, nagpasilabot ang Dios kag ginpasag-uli ang matuod nga pagsimba! Masiling gid naton nga ini nga pagpasag-uli isa sa pinakaimportante nga mga hitabo sa aton tion subong.

10, 11. (a) Ano ang duha ka bahin nga nalakip sa espirituwal nga paraiso, kag paano ka mangin bahin sini? (b) Ano nga klase sang mga tawo ang ginatipon ni Jehova sa espirituwal nga paraiso, kag ano ang ila pribilehiyo nga masaksihan?

¹⁰ Gani, ara subong ang matuod nga mga Cristiano sa isa ka espirituwal nga paraiso nga padayon nga naganami kag nagalapad. Ini nga paraiso may duha ka importante nga bahin. Ang una amo ang putli nga pagsimba sa matuod nga Dios, si Jehova. Ginsigurado niya nga masimba naton sia kag indi kita madaya sang kabutigan sang butig nga relihion. Ginpakamaayo niya kita paagi sa paghatag sa aton sang espirituwal nga pagkaon. Nagabulig ini nga makatuon kita parte sa aton Amay sa langit, mapalipay sia, kag mangin malapit sa iya. (Juan 4:24) Ang ikaduha nga bahin sang espirituwal nga paraiso may koneksion sa mga tawo. Pareho sa gintagna ni Isaias, “sa ulihi nga bahin sang mga adlaw,” gintudluan ni Jehova ang iya mga sumilimba kon paano magkabuhi nga may paghidait. Gintudluan niya kita nga indi mag-entra sa mga inaway. Bisan pa indi kita perpekto, ginabuligan niya kita nga isuklob ang “bag-o nga personalidad.” Ginapakamaayo niya ang aton mga panikasog paagi sa iya balaan nga espiritu, amo nga mapakita naton ang matahom nga mga kinaiya. (Efeso 4:22-24; Galacia 5:22, 23) Kon nagapagiya ka sa espiritu sang Dios, bahin ka gid sang espirituwal nga paraiso.

¹¹ Gintipon ni Jehova sa sining espirituwal nga paraiso ang mga tawo nga ginahigugma niya. Amo ini ang mga tawo nga nagahigugma sa iya, nagahigugma sa paghidait, kag “mahunahunaon sa ila espirituwal nga kinahanglanon.” (Mateo 5:3) Amo ini nga klase sang mga tawo ang may pribilehiyo nga masaksihan ang mas talalupangdon nga pagpasag-uli sa mga tawo kag sa bilog nga duta.

“Yari Karon! Ginahimo Ko nga Bag-o ang Tanan nga Butang”

12, 13. (a) Ngaa dapat gid nga may isa pa ka katumanan ang mga tagna parte sa pagpasag-uli? (b) Ano ang katuyuan ni Jehova para sa duta base sa iya ginhambal sa Eden, kag ngaa nagahatag ini sa aton sang paglaum sa palaabuton?

¹² Madamo nga tagna parte sa pagpasag-uli ang matuman man sing literal, indi lang sa espirituwal. Halimbawa, ginsambit ni Isaias nga maabot ang tion nga ang mga masakiton, piang, bulag, kag mga bungol ayuhon kag bisan gani ang kamatayon dulaon sing dayon. (Isaias 25:8; 35:1-7) Ini nga mga promisa wala matuman sing literal sa Israel sadto. Kag bisan pa nakita naton ang espirituwal nga katumanan sini nga mga promisa sang Dios sa aton tion, may rason gid sa pagpati nga sa palaabuton, literal nga matuman ang tanan niya nga promisa. Paano naton nahibaluan ini?

¹³ Nahibaluan naton nga matuod ini kay sa Eden sadto, maathag nga ginhambal ni Jehova ang iya katuyuan para sa duta: Istaran ini sang malipayon, mapagros, kag nahiusa nga pamilya sang mga tawo. Atipanon sang lalaki kag babayi ang duta kag ang tanan nga gintuga sa sini, kag himuon ang bilog nga planeta nga isa ka paraiso. (Genesis 1:28) Baliskad gid ini sa mga nagakatabo subong. Pero, makasigurado kita nga wala gid sing makapugong kay Jehova nga matuman ang iya mga promisa. (Isaias 55:10, 11) Si Jesus, ang Mesianikong Hari nga gintangdo ni Jehova, magahimo sining bilog nga kalibutan nga Paraiso.—Lucas 23:43.

14, 15. (a) Paano ginahimo ni Jehova nga “bag-o ang tanan nga butang”? (b) Ano ang mangin kabuhi sa Paraiso, kag ano ang nanamian mo gid?

¹⁴ Imadyina nga ginatan-aw mo ang bilog nga duta nga nangin isa ka Paraiso! Si Jehova nagsiling parte sa sina nga tion: “Yari karon! Ginahimo ko nga bag-o ang tanan nga butang.” (Bugna 21:5) Binagbinaga kon ano ang mangin kahulugan sini. Kon magamit na ni Jehova ang iya gahom sa paglaglag sa sining malain nga daan nga sistema, magapabilin ang “bag-o nga langit kag bag-o nga duta.” Nagakahulugan ini nga gamhan sang isa ka bag-o nga gobierno sa langit ang isa ka bag-o nga grupo sang mga tawo sa duta nga nagahigugma kay Jehova kag nagahimo sang iya kabubut-on. (2 Pedro 3:13) Si Satanas, kag ang iya mga demonyo, indi na makapanghalit. (Bugna 20:3) Sa una nga tion sa sulod sang linibo ka tuig, wala na sang magaimpluwensia sa mga tawo nga maghimo sang malain, magdumot, ukon manghalit. Sigurado gid nga maumpawan kita.

¹⁵ Sa katapusan, maatipan na naton ining matahom nga planeta base gid sa orihinal nga ginpahimo sa aton. Ang duta may natural nga ikasarang sa pagpasag-uli. Ang nahigkuan nga mga linaw kag mga suba makatinlo sang ila kaugalingon kon madula na ang ginahalinan sang polusyon. Ang naguba sang inaway nga palibot makapasag-uli kon wala na sing mga inaway. Malipay gid kita sa pagpangabudlay para mangin isa ka matahom nga paraiso ang bilog nga duta pareho sa hardin sang Eden nga may madamo nga sarisari nga mga sapat kag tanom! Indi na paghalitan sang mga tawo ang mga sapat kag mga tanom. May paghidait na ang tanan nga tawo kag atipanon na nila ang ila palibot. Bisan gani ang mga bata indi na mahadlok sa ilahas nga mga sapat.—Isaias 9:6, 7; 11:1-9.

16. Sa Paraiso, ano nga pagpasag-uli ang maeksperiensiahan sang kada tawo nga nagpabilin nga matutom?

¹⁶ Makaeksperiensia man kita sing pagpasag-uli sa aton kaugalingon. Sa tapos sang Armageddon, masaksihan sang mga makalampuwas ang pagpang-ayo paagi sa milagro sa bilog nga kalibutan. Pareho sang ginhimo ni Jesus sang ari sia sa duta, gamiton niya ang gahom nga ginhatag sa iya sang Dios para ipasag-uli ang panulok sang mga bulag, ang palamatin-an sang mga bungol, kag ang mapagros nga panglawas sang mga piang kag mga balatianon. (Mateo 15:30) Ang mga tigulang magakalipay kay mangin mapagsik kag mapagros na sila liwat pareho sang pamatan-on pa sila. (Job 33:25) Madula na ang mga kurinot, ang mga butkon kag mga batiis mauluuntay na, kag ang mga maskulo maunat-unat na nga may ginpasag-uli nga kusog. Mabatyagan sang tanan nga matutom nga tawo nga amat-amat nga nagakadula ang mga epekto sang sala kag iban pa nga malain nga resulta kay indi sila perpekto. Pasalamatan gid naton si Jehova nga Dios sa iya dalayawon nga gahom sa pagpasag-uli! Binagbinagon naton subong ang isa ka makalilipay nga bahin sining pagpasag-uli nga ginahulat gid naton.

Pagpasag-uli sing Kabuhi sa mga Patay

17, 18. (a) Ngaa ginsabdong ni Jesus ang mga Saduceo? (b) Ano ang natabo nga nagresulta sa pagpangabay ni Elias kay Jehova nga magbanhaw?

¹⁷ Sang una nga siglo C.E., ang pila ka lider sang relihion, nga gintawag mga Saduceo, wala magpati sa pagkabanhaw. Ginsabdong sila ni Jesus paagi sa pagsiling: “Sala gid kamo, bangod wala kamo makahangop sang Kasulatan ukon sang gahom sang Dios.” (Mateo 22:29) Huo, ginapakita sang Kasulatan nga si Jehova may gahom sa pagbanhaw sa mga patay. Paano?

¹⁸ Imadyina ang natabo sang panahon ni Elias. Ginaalay-ay sang babayi nga balo ang iya bugtong nga bata nga wala na nagahulag. Ang bata nga lalaki patay na. Nakabisita sadto si manalagna Elias sa balay sining balo, gani mahimo nga nakibot gid sia. Nakabulig pa gani sia para indi magutman ini nga bata. Mahimo nga nangin malapit ang buot ni Elias sa sini nga bata. Nasubuan gid ang iloy. Ini nga bata amo na lang ang iya buhi nga handumanan sa iya napatay nga bana. Basi naglaum sia nga ang iya anak nga lalaki amo ang magaatipan sa iya kon magtigulang na sia. Nagasalasala kag hinadlukan ang babayi nga balo kay basi ginasilutan sia bangod sang sala nga nahimo niya sadto. Indi mabatas ni Elias nga makita ini nga trahedya. Gani, ginkuha niya sing hinayhinay ang bangkay sa dughan sang iloy, gindala ini sa iya kuarto, kag nangabay kay Jehova nga Dios nga ibalik ang kabuhi sang bata.—1 Hari 17:8-21.

19, 20. (a) Paano ginpakita ni Abraham nga may pagtuo sia sa gahom ni Jehova sa pagpasag-uli, kag ano ang basihan sini nga pagtuo? (b) Paano ginpadyaan ni Jehova ang pagtuo ni Elias?

¹⁹ Indi si Elias ang una nga tawo nga nagtuo sa pagkabanhaw. Ginatos ka tuig antes sini, nagtuo si Abraham nga si Jehova may gahom sa pagpasag-uli sang kabuhi. Ngaa sigurado sia sini? Sang si Abraham nagaedad sing 100 kag si Sara 90, ginpasag-uli ni Jehova ang ila ikasarang sa pagpanganak, gani paagi sa milagro nakabata si Sara sing lalaki. (Genesis 17:17; 21:2, 3) Sang ulihi, sang daku na ang bata nga lalaki, ginpangabay ni Jehova si Abraham nga ihalad ang iya bata. May pagtuo kag pagsalig si Abraham nga mapasag-uli ni Jehova ang kabuhi sang iya hinigugma nga si Isaac. (Hebreo 11:17-19) Mahimo nga ining daku nga pagtuo amo ang rason kon ngaa, antes magtaklad sa bukid para ihalad ang iya bata, ginpasalig ni Abraham ang iya mga alagad nga sia kag si Isaac magabalik.—Genesis 22:5.

²⁰ Ginluwas ni Jehova si Isaac, gani indi kinahanglan ang pagbanhaw sadto nga tion. Sa bahin naman ni Elias, ang bata nga lalaki sang balo nga babayi patay na, pero wala pa lang madugay. Ginpadyaan ni Jehova ang pagtuo sang manalagna paagi sa pagbanhaw sa bata! Dayon, gindaho ni Elias ang bata nga lalaki sa iya iloy. Indi niya gid malipatan ang ginsiling ni Elias sa iya: “Tan-awa, buhi ang imo anak”!—1 Hari 17:22-24.

21, 22. (a) Ano ang katuyuan sang mga pagbanhaw nga narekord sa Kasulatan? b) Sa Paraiso, daw ano kadamo ang banhawon, kag sin-o ang magahimo sini?

²¹ Gani sa una nga tion sa rekord sang Biblia, nakita naton nga gingamit ni Jehova ang iya gahom sa pagpasag-uli sang kabuhi sang tawo. Sang ulihi, ginhatagan man ni Jehova sing gahom sanday Eliseo, Jesus, Pablo, kag Pedro sa pagbanhaw sang mga patay. Ang matuod, ining mga ginbanhaw napatay liwat sang ulihi. Pero, ini nga mga rekord sa Biblia nagahatag sa aton sing dalayawon nga ideya kon ano ang matabo sa palaabuton.

²² Sa Paraiso, tumanon ni Jesus ang iya papel bilang “ang pagkabanhaw kag ang kabuhi.” (Juan 11:25) Banhawon niya ang minilyon ka tawo, para may kahigayunan sila nga mabuhi sing wala katapusan sa Paraiso sa duta. (Juan 5:28, 29) Imadyina ang pagkitaay liwat sang nagahigugmaanay nga mga mag-abyan kag mga magparyentehanay, nga madugay nga nagbulagay bangod sang kamatayon. Magahaksanay sila nga may daku nga kalipay! Ang tanan nga tawo magadayaw kay Jehova bangod sang iya gahom sa pagpasag-uli.

23. Ano ang pinakadaku sa tanan nga pagpakita sang gahom ni Jehova, kag paano sini ginagarantiyahan ang aton paglaum sa palaabuton?

²³ Naghatag si Jehova sing mabakod nga garantiya nga masaligan gid ini nga paglaum. Ginhimo niya ang pinakadaku sa tanan nga pagpakita sang iya gahom. Ginbanhaw niya ang iya Anak, si Jesus, bilang isa ka gamhanan nga espiritu nga tinuga, gani nangin ikaduha sia kay Jehova. Ang ginbanhaw nga si Jesus nagpakita sa ginatos ka saksi. (1 Corinto 15:5, 6) Bastante na ini nga ebidensia, bisan sa mga nagaduhaduha. Si Jehova may gahom sa pagpasag-uli sang kabuhi.

24. Ngaa makasalig kita nga banhawon ni Jehova ang mga patay, kag ano nga paglaum ang ginahulat gid sang kada isa sa aton?

²⁴ May gahom si Jehova sa pagbanhaw sang mga patay kag handum gid niya nga himuon ini. Ang matutom nga tawo nga si Job gingiyahan sang balaan nga espiritu sa pagsiling nga ginahandum gid ni Jehova nga banhawon ang mga patay. (Job 14:15) Sigurado nga gusto gid naton nga mangin suod sa aton Dios kay gusto gid niya gamiton ang iya gahom sa pagpasag-uli sa sining mahigugmaon nga paagi. Pero, dumduma nga ang pagkabanhaw isa lang ka bahin sang daku nga hilikuton ni Jehova sa pagpasag-uli sa palaabuton. Samtang nagasuod ka sa iya, pabalori gid ang imo matahom nga paglaum nga ato ka didto kag makita mo kon paano ‘ginahimo ni Jehova nga bag-o ang tanan nga butang.’—Bugna 21:5.