“Ginatan-aw Ko ang Buhi nga mga Tinuga”

Sigurado nga nakita ni Ezequiel ang dalagku nga mga estatwa nga toro nga baka ukon leon nga may pakpak kag may ulo sang tawo nga nagabantay sa atubang sang mga palasyo kag mga templo. Ini nga mga estatwa makita bisan diin sa dumaan nga Asiria kag Babilonia. Pareho sa tanan nga nakakita sini, sigurado nga nahalawhaw man si Ezequiel sa sining dalagku nga mga estatwa, nga mga halos seis metros ang kataason. Pero bisan pa dalagku ini nga mga estatwa, wala ini sang kabuhi kag human lang sa bato.

Pero, tuhay gid ang apat ka tinuga nga nakita ni Ezequiel sa palanan-awon kay ‘buhi ini nga mga tinuga.’ Daku gid ang epekto kay Ezequiel sini nga palanan-awon kay ginsambit niya ang “buhi nga mga tinuga” sing sobra 10 ka beses sa introduksion sang iya tagna. (Ezeq. 1:5-22) Ang palanan-awon parte sa apat ka buhi nga tinuga nga nagahulag sing dungan sa isa lang ka direksion kag ara sa idalom sang trono sang Dios nagpasalig pa gid kay Ezequiel nga kontrolado ni Jehova ang tanan niya nga tinuga. Subong, ini nga palanan-awon nagapasalig man sa aton nga dalayawon kag gamhanan si Jehova kag halangdon gid ang iya pagkasoberano.—1 Cron. 29:11.