LEKSION 13
Kon Paano Ginapakahuy-an sang Butig nga Relihion ang Dios
Kon ang Dios gugma, ngaa madamo sang malain nga ginahimo ang mga relihion nga nagasiling nga ginarepresentar nila ang Dios? Ginapakita lang sini nga butig sila nga relihion kag ginapakahuy-an nila ang Dios. Paano nila ini ginahimo? Ano ang ginabatyag sini sang Dios? Kag ano ang himuon niya sa ila?
1. Paano ang mga panudlo sang butig nga relihion nagapakahuya sa Dios?
Ang butig nga relihion nagapati sa “kabutigan sa baylo sang kamatuoran tuhoy sa Dios.” (Roma 1:25) Halimbawa, ang kalabanan nga relihion wala nagatudlo sa ila mga miembro sang ngalan sang Dios. Pero, ang Biblia nagasiling nga dapat gamiton ang ngalan sang Dios. (Roma 10:13, 14) Siling sang iban nga lider sang relihion kon may malain nga matabo, pagbuot ini sang Dios. Pero indi ina matuod, kay ang Dios wala gid nagahimo sing malain. (Basaha ang Santiago 1:13.) Bangod sini, madamo nga tawo ang wala na nagasimba sa Dios.
2. Paano ang ginahimo sang butig nga relihion nagapakahuya sa Dios?
Ang ginahimo sang butig nga relihion indi gid suno sa gusto ni Jehova. Nagsiling ang Biblia nga ang mga sala sang butig nga relihion “nagtangkas na tubtob sa langit.” (Bugna 18:5) Ginatos ka tuig na nga ang mga relihion nagasuporta sa pulitika kag inaway. Sila man ang rason sang kamatayon sang madamo katama nga tawo. Gusto gid sang iban nga lider sang relihion nga mangin manggaranon. Gani, ginapangayuan nila sang kuarta ang ila mga miembro. Ang ila mga ginahimo nagapakita nga indi nila kilala ang Dios. Gani wala gid sila sing kinamatarong nga irepresentar sia.—Basaha ang 1 Juan 4:8.
3. Ano ang ginabatyag sang Dios sa butig nga relihion?
Kon naakig ka sa ginahimo sang butig nga relihion, ano sa banta mo ang ginabatyag ni Jehova? Palangga niya ang mga tawo, pero akig sia sa mga lider sang relihion nga nagapakahuya sa iya kag nagapamentaha sa ila mga miembro. Nagpromisa sia nga laglagon ang butig nga relihion kag ‘indi na gid ini makita liwat.’ (Bugna 18:21) Sa indi madugay, dulaon sang Dios ang tanan nga butig nga relihion.—Bugna 18:8.
USISAA PA GID
Usisaon pa gid naton kon ano ang ginabatyag sang Dios sa butig nga relihion kag kon ano pa gid ang mga ginhimo sini. Tun-an man naton kon ngaa indi ini dapat magpauntat sa imo nga kilalahon pa gid si Jehova.
4. Indi tanan nga relihion ginabaton sang Dios
Madamo ang nagapati nga ang mga relihion daw pareho sa lainlain nga dalan nga nagapakadto tanan sa Dios. Pero insakto bala ina? Basaha ang Mateo 7:13, 14, dayon binagbinaga ini nga pamangkot:
Ano ang ginasiling sang Biblia parte sa dalan nga nagapadulong sa kabuhi?
Tan-awa ang VIDEO, dayon binagbinaga ang masunod nga pamangkot.
Nagsiling bala ang Biblia nga madamo nga relihion ang nagapalipay sa Dios?
5. Ang butig nga relihion wala nagapakita sang gugma sang Dios
Ginapakahuy-an sang mga relihion ang Dios sa madamo nga paagi. Ang isa sini, amo ang ila pagsuporta sa inaway. Para makita mo ang isa ka halimbawa, tan-awa ang VIDEO. Dayon binagbinaga ang masunod nga mga pamangkot.
Ano ang ginhimo sang madamo nga relihion sang Bug-os Kalibutan nga Inaway II?
Ano ang imo masiling sa ginhimo nila?
Basaha ang Juan 13:34, 35 kag 17:16. Dayon binagbinaga ini nga mga pamangkot:
Ano ayhan ang ginabatyag ni Jehova sa mga relihion nga nagasuporta sa inaway?
Madamo sing malain nga ginahimo ang butig nga relihion. May nakita ka pa bala nga ginahimo sang mga relihion nga wala nagapakita sang gugma sang Dios?
Ang butig nga relihion wala nagapakita sang gugma sang Dios
6. Gusto sang Dios nga makagua ang mga tawo sa butig nga relihion
Basaha ang Bugna 18:4,a dayon binagbinaga ini nga pamangkot:
Ano ang masiling mo kay gusto sang Dios nga buligan ang mga tawo nga napatalang sang butig nga relihion?
7. Padayon nga magtuon parte sa matuod nga Dios
Nagbag-o bala ang imo pagtan-aw sa Dios bangod sa ginahimo sang butig nga relihion? Halimbawa, may isa ka bata nga wala nagasunod sa ginasiling sang iya amay. Naglayas sia kag naghimo sing malain. Indi gusto sang amay ang ginhimo sang iya anak. Ngaa indi insakto nga basulon ang amay kay naghimo sing malain ang iya bata?
Insakto bala nga basulon si Jehova kag mag-untat sa pagtuon parte sa iya kay malain ang ginahimo sang butig nga relihion?
KON MAGSILING ANG IBAN: “Nadulaan na ako sing gana magsimba sa Dios kay ang relihion amo man ang rason sang madamo nga problema.”
Amo man bala sina ang ginabatyag mo?
Ngaa ang mga ginahimo sang butig nga relihion indi dapat magpabag-o sang imo pagtan-aw kay Jehova?
SUMARYO
Ginapakahuy-an sang butig nga relihion ang Dios paagi sa butig nga mga panudlo sini kag malain nga mga ginahimo. Laglagon sang Dios ang butig nga relihion.
Rebyu
Ano ang masiling mo sa ginatudlo kag ginahimo sang butig nga relihion?
Ano ang ginabatyag ni Jehova sa butig nga relihion?
Ano ang himuon sang Dios sa butig nga relihion?
DUGANG NGA IMPORMASYON
Basaha ang duha ka paagi nga ginahimo sang kalabanan nga relihion nga wala nagapalipay sa Dios.
“Pareho Lang Bala ang Tanan nga Relihion? Tanan Bala Nagapadulong sa Dios?” (Artikulo sa website)
Ngaa gusto ni Jehova nga simbahon naton sia upod sa iban?
“Kinahanglan Gid Bala nga May Relihion Kita?” (Artikulo sa website)
Nakita sang isa ka pari nga may diperensia ang iya relihion. Pero wala ini nagpauntat sa iya nga tun-an ang kamatuoran parte sa Dios.
“Kon Ngaa Naghalin sa Simbahan ang Isa ka Pari” (Magmata!, Pebrero 2015)
Halin sang una, ginatudlo sang mga relihion ang kabutigan nga ang Dios wala nagaulikid sa aton kag mapintas sia. Hibalua ang kamatuoran sa tatlo sina nga kabutigan.
“Ngaa Nabudlayan ang Iban nga Higugmaon ang Dios?” (Ang Lalantawan, Nobiembre 1, 2013)