LEKSION 15
Sin-o si Jesus?
Si Jesus isa sa pinakakilala nga tawo sa kasaysayan. Pero madamo nga tawo nga kilala lang nila si Jesus sa ngalan. Lainlain pa gani ang ila pagpati kon sin-o gid si Jesus. Ano ang ginasiling sang Biblia parte sa iya?
1. Sin-o si Jesus?
Si Jesus gamhanan nga espiritu nga nagaistar sa langit. Sia ang una nga gintuga ni Jehova nga Dios, amo nga gintawag sia nga “panganay sa tanan nga tinuga.” (Colosas 1:15) Gintawag sang Biblia si Jesus nga “bugtong nga Anak” sang Dios kay sia lamang ang direkta nga gintuga ni Jehova. (Juan 3:16) Si Jesus nangin kabulig sang iya Amay nga si Jehova sa pagtuga sang iban pa nga butang. (Basaha ang Hulubaton 8:30.) Malapit gid ang kaangtanan ni Jesus kay Jehova. Sia “ang Pulong,” ukon humalambal sang Dios kay sia ang nagahatag sing mensahe kag mga instruksion sang Dios.—Juan 1:14.
2. Ngaa nagkadto si Jesus sa duta?
Mga 2,000 ka tuig na ang nagligad, gingamit ni Jehova ang iya balaan nga espiritu para isaylo ang kabuhi ni Jesus halin sa langit pakadto sa tiyan sang birhen nga si Maria. Gani, nabun-ag si Jesus bilang tawo. (Basaha ang Lucas 1:34, 35.) Nagkadto si Jesus sa duta para mangin Mesias ukon Cristo, kag para luwason ang katawhan.a Ang tanan nga tagna sa Biblia parte sa Mesias natuman sa iya. Paagi sini, nakilala sang mga tawo nga si Jesus amo “ang Cristo, ang Anak sang buhi nga Dios.”—Mateo 16:16.
3. Diin subong si Jesus?
Sa tapos napatay si Jesus bilang tawo, ginbanhaw sia sang Dios bilang espiritu kag nagbalik sia sa langit. Didto, “ginbayaw sia sang Dios sa mataas gid nga posisyon.” (Filipos 2:9) Subong, si Jesus may daku nga awtoridad, pero ikaduha lang sia kay Jehova.
USISAA PA GID
Hibaluon naton kon sin-o gid si Jesus kag kon ngaa importante nga magtuon kita parte sa iya.
4. Si Jesus indi ang Labing Gamhanan nga Dios
Ginatudlo sang Biblia nga si Jesus gamhanan nga espiritu sa langit, pero nagapasakop sia sa iya Dios kag Amay nga si Jehova. Ngaa masiling naton ina? Tan-awa ang VIDEO para mabal-an mo ang ginatudlo sang Biblia parte sa posisyon ni Jesus kon ikumparar sa Labing Gamhanan nga Dios.
Ang masunod nga mga bersikulo makabulig sa aton nga maintiendihan kon ano ang kaangtanan ni Jehova kag ni Jesus. Basaha ini, dayon binagbinaga ang masunod nga mga pamangkot.
Basaha ang Lucas 1:30-32.
Suno sa anghel, ano ang kaangtanan ni Jesus sa “Labing Mataas” nga si Jehova nga Dios?
Basaha ang Mateo 3:16, 17.
Sang ginbawtismuhan si Jesus, ano ang ginsiling sang tingog halin sa langit?
Sa banta mo, kay sin-o tingog ang nabatian?
Basaha ang Juan 14:28.
Sin-o ang nauna kag mas may awtoridad, ang amay ukon ang anak?
Ano ang buot silingon ni Jesus sang gintawag niya si Jehova nga iya Amay?
Basaha ang Juan 12:49.
Para kay Jesus, isa lang bala sila sang iya Amay? Ano sa banta mo?
5. Si Jesus gid ang Mesias
Mabasa sa Biblia ang madamo nga tagna nga makabulig sa mga tawo para makilala ang Mesias—ang ginpili sang Dios para luwason ang mga tawo. Tan-awa ang VIDEO para mabal-an mo ang pila ka tagna nga natuman kay Jesus sang diri sia sa duta.
Basaha ini nga mga tagna sa Biblia, dayon binagbinaga ang masunod nga mga pamangkot:
Basaha ang Miqueas 5:2 para mabal-an mo kon diin matawo ang Mesias.b
Natuman bala ini nga tagna kay Jesus?—Mateo 2:1.
Basaha ang Salmo 34:20 kag Zacarias 12:10 para mabal-an mo ang mga tagna parte sa kamatayon sang Mesias.
Ini bala nga mga tagna natuman?—Juan 19:33-37.
Sa banta mo, ginpangitaan bala ni Jesus sing paagi para matuman sa iya ini nga mga tagna?
Ano ang ginapamatud-an sini parte kay Jesus?
6. Makabenepisyo gid kita kon magtuon kita parte kay Jesus
Nagsiling ang Biblia nga importante gid nga magtuon parte kay Jesus kag kon ano ang ginapahimo sang Dios sa iya. Basaha ang Juan 14:6 kag 17:3, dayon binagbinaga ini nga pamangkot:
Ngaa importante gid nga magtuon parte kay Jesus?
Si Jesus ang nagbukas sing dalan para mangin abyan kita sang Dios. Gintudlo niya ang kamatuoran parte kay Jehova, kag paagi sa iya, mabaton naton ang kabuhi nga wala sing katapusan
KON MAGSILING ANG IBAN: “Ang mga Saksi ni Jehova wala nagapati kay Jesus.”
Ano ang isabat mo?
SUMARYO
Si Jesus gamhanan nga espiritu. Anak sia sang Dios kag sia ang Mesias.
Rebyu
Ngaa gintawag si Jesus nga “panganay sa tanan nga tinuga”?
Ano ang ginhimo ni Jesus antes sia magkadto sa duta?
Ngaa masiling naton nga si Jesus ang Mesias?
DUGANG NGA IMPORMASYON
Hibalua pa gid ang mga pamatuod nga si Jesus ang Mesias.
“Ang mga Tagna Bala Parte sa Mesias Nagapamatuod nga si Jesus ang Mesias?” (Artikulo sa website)
Hibalua kon bala ginatudlo sang Biblia nga ang Dios nangin literal nga amay ni Jesus pareho sa mga tawo nga nagbun-ag sang ila bata.
“Ngaa Gintawag si Jesus nga Anak sang Dios?” (Artikulo sa website)
Basaha kon ngaa ang Trinidad wala ginatudlo sang Biblia.
Basaha kon paano nagbag-o ang kabuhi sang babayi sang gin-usisa niya ang ginasiling sang Biblia parte kay Jesus.
“Ginpaathag sang Judiyo nga Babayi Kon Ngaa Ginbag-o Niya ang Iya Pagpati” (Magmata!, Mayo 2013)
a Tun-an sa leksion 26 kag 27 kon ngaa kinahanglan luwason ang katawhan kag kon paano kita luwason ni Jesus.