“Yari Karon! Ginahimo Ko nga Bag-⁠o ang Tanan nga Butang”

Ginahandum mo bala ang maayo nga panglawas kag malawig nga kabuhi para sa imo kag sa imo pamilya? Ukon magkabuhi sa kalibutan nga wala na sing kasakit, pag-antos, kag kamatayon? Ini nga kalibutan indi lang dalamguhanon. Ang matuod, isa ka matarong nga bag-⁠ong kalibutan ang malapit na lang matabo, kay amo ini ang katuyuan ni Jehova nga Dios. Talupangda kon paano ini ginlaragway sang Bugna 21:​3-5.​—Basaha.

“Pahiran [sang Dios] ang tagsa ka luha sa ila mga mata.” (Bugna 21:​4) Ano nga luha ang iya pahiran? Indi ini ang luha sang kalipay ukon kasubo nga nagaamlig sa aton mga mata. Nagapatuhoy ang saad sang Dios sa luha bangod sang pag-antos kag kasubo. Indi lang pahiran sang Dios ini nga luha, kundi dulaon niya ang kabangdanan sini nga pagluha​—ang pag-antos kag kasubo.

“Wala na sing kamatayon.” (Bugna 21:​4) Ang pinakadaku nga rason kon ngaa nagaluha kita amo ang kamatayon. Hilwayon ni Jehova ang mga matinumanon gikan sa sini. Paano? Paagi sa pagdula sang kabangdanan sang kamatayon: ang sala nga napanubli naton kay Adan. (Roma 5:​12) Himuon ni Jehova nga perpekto ang matinumanon nga mga tawo base sa halad nga gawad ni Jesus.a Dayon, ang katapusan nga kaaway nga amo ang kamatayon “dulaon.” (1 Corinto 15:26) Ang mga matutom magakabuhi sing dayon suno sa gintuyo sang Dios nga may perpekto nga panglawas.

“Wala na sing . . . kasakit pa.” (Bugna 21:​4) Ano nga kasakit ang madula? Ang tanan nga kasakit sa mental, emosyonal, kag pisikal bangod sa sala kag pagkadi-perpekto nga nagapaantos sa minilyon.

Mangin matuod na sa indi madugay ang kabuhi nga wala sing pagluha, kamatayon, kag kasakit. ‘Pero sa diin?’ mahimo mamangkot ka. ‘Indi ayhan amo ini ang ginsaad sang Dios nga kabuhi sa langit?’ Indi. Ngaa? Una, ginsugdan ang saad sang pinamulong nga “ang tolda sang Dios yara sa mga tawo,” kag ang mga tawo nagakabuhi sa duta. (Bugna 21:​3) Ikaduha, ginalaragway sa saad ang kalibutan nga “wala na sing kamatayon”​—isa ka kalibutan diin nagaluntad anay ang kamatayon pero gindula ini. Wala gid sing kamatayon sa langit, pero madugay na ini nga nagaluntad sa duta. Gani, maathag nga ang saad sang Dios nga mas maayo nga kabuhi matuman diri mismo sa duta.

Luyag ni Jehova nga saligan naton ang iya saad parte sa isa ka matarong nga bag-⁠ong kalibutan. Pagkatapos nga malaragway ang mga pagpakamaayo sa palaabuton, nagpasalig sia: “Yari karon! Ginahimo ko nga bag-⁠o ang tanan nga butang.” Dayon nagdugang sia: “Ini nga mga pulong masaligan kag matuod.” (Bugna 21:​5) Ginapangabay ka namon nga magtuon sing dugang pa kon paano ikaw kag ang imo mga pinalangga mangin kaupod sang malipayon nga mga sumilimba nga makakita sang katumanan sang ginsaad sang Dios.