“Padayon Ninyo nga Himuon Ini”— Memoryal nga Pagahiwaton sa Abril 5
1. Ngaa importante ang pagsaulog sang Memoryal?
1 “Padayon ninyo nga himuon ini bilang pagdumdom sa akon.” (Luc. 22:19) Ginsugo ini ni Jesus sa iya mga sumulunod para dumdumon ang iya kamatayon. Daku gid ang nahimo sang gawad, amo nga ang pagsaulog sang Memoryal kada tuig amo ang pinakaimportante nga adlaw para sa mga Cristiano. Samtang nagahilapit ang pagsaulog sini sa Abril 5, paano naton mapakita ang aton pagpasalamat kay Jehova?—Col. 3:15.
2. Paano naton mapakita ang aton apresasyon sa Memoryal paagi sa pagtuon kag pagpamalandong?
2 Paghanda: Ginahandaan gid naton ang mga butang nga importante sa aton. Mahanda naton ang aton tagipusuon para sa Memoryal paagi sa pagtuon bilang pamilya kag pagpamalandong sa mga natabo kay Jesus sang nabilin niya nga inadlaw diri sa duta. (Esd. 7:10) Makita sa kalendaryo kag sa Pag-usisa sa Kasulatan Adlaw-adlaw ang bahin sang kasulatan nga pagabasahon. Pero ang kompleto nga lista sang kasulatan lakip ang mga kapitulo sang Pinakabantog nga Tawo nga libro makita sa pahina 23-24 sang Pebrero 1, 2011, nga Ang Lalantawan.
3. Paano naton mapakita ang aton apresasyon sa Memoryal paagi sa pagpakigbahin sing dugang sa ministeryo?
3 Pagbantala: Mapakita man naton ang aton apresasyon paagi sa pagpakigbahin sing bug-os sa ministeryo. (Luc. 6:45) Sugod sa Sabado, Marso 17, may kampanya kita sa bug-os nga kalibutan para agdahon ang iban nga magtambong sa Memoryal. Mahimo mo bala ma-adjust ang imo iskedyul para makapakigbahin sing dugang sa ministeryo, ayhan bilang auxiliary payunir? Mahimo ninyo ini binagbinagon sa inyo masunod nga Pangpamilya nga Pagsimba.
4. Ano ang aton mabenepisyo sa pagsaulog sang Memoryal?
4 Makabenepisyo gid kita sa pagtambong sa Memoryal kada tuig! Nagadugang ang aton kalipay kag gugma sa Dios samtang ginapamalandungan naton ang kaalwan ni Jehova sa paghatag sang iya bugtong nga Anak bilang gawad. (Juan 3:16; 1 Juan 4:9, 10) Nagapahulag ini sa aton nga magkabuhi indi para sa aton kaugalingon. (2 Cor. 5:14, 15) Nagapalig-on man ini sa aton nga dayawon si Jehova sa iban. (Sal. 102:19-21) Gani, nalipay gid ang mga alagad ni Jehova nga ‘ipahayag ang kamatayon sang Ginuo’ sa pagsaulog sang Memoryal sa Abril 5.—1 Cor. 11:26.