Nahibaluan Mo Bala?
Ano nga klase sang kangga ang ginsakyan sang Etiopianhon nga opisyal sang ginlagas sia ni Felipe?
ANG orihinal nga tinaga nga gin-translate nga “kangga” sa Bag-ong Kalibutan nga Badbad puede magpatuhoy sa madamo nga klase sang kangga. (Binu. 8:28, 29, 38) Pero posible gid nga daku nga kangga ang ginsakyan sang Etiopianhon nga opisyal, kag mas daku ini sangsa kangga nga ginagamit sa inaway ukon sa palumba. Binagbinaga ang pila ka rason kon ngaa masiling naton ini.
Naghalin pa sa malayo nga lugar ang Etiopianhon kag isa sia ka mataas nga opisyal. Ang Biblia nagasiling nga “isa [sia] ka mataas nga opisyal sa idalom sang rayna sang Etiopia, kag sia ang nagadumala sa tanan nga bahandi sang rayna.” (Binu. 8:27) Sang una, bahin sang Etiopia ang Sudan kag ang pinakabagatnan sang Egipto. Posible indi lang isa ka kangga ang ginsakyan sang Etiopianhon nga opisyal sa iya pagbiyahe. Kag posible madamo sia sang gindala nga gamit sa iya pagbiyahe sa malayo nga lugar. Sang unang siglo, ang isa ka salakyan nga ginagamit sa pagbiyahe amo ang kangga nga may atop kag may apat ka ruweda. Ang libro nga Acts—An Exegetical Commentary nagsiling: “May espasyo ini nga klase sang kangga, gani makadala ka sang madamo nga gamit, komportable ang pagbiyahe, kag mas malayo nga lugar ang imo makadtuan.”
Nagabasa ang Etiopianhon nga opisyal sang nalab-ot sia ni Felipe. Ang Biblia nagasiling: “Nagdalagan si Felipe sa tupad sini kag nabatian ni Felipe nga ginabasa [sang Etiopianhon nga opisyal] sing mabaskog ang libro ni Isaias nga manalagna.” (Binu. 8:30) Mahinay lang ang pagdalagan sang mga kangga nga ginagamit para sa pagbiyahe. Bangod sini, puede makabasa ang Etiopianhon nga opisyal samtang nagabiyahe kag nasarangan ni Felipe nga malagas ang kangga.
“Gin-agda [sang Etiopianhon] si Felipe nga magsakay sa iya kangga kag magpungko sa iya tupad.” (Binu. 8:31) Kon kangga para sa palumba ang ginsakyan sang Etiopianhon, posible gid nga magatindog lang sila ni Felipe. Pero, may espasyo ang kangga nga ginagamit para sa pagbiyahe, gani puede makapungko ang Etiopianhon kag si Felipe.
Base sa Binuhatan kapitulo 8 kag sa iban pa nga mga ebidensia, makita sa mga piktyur sa aton bag-o nga mga publikasyon nga nagasakay sa isa ka daku nga kangga ang Etiopianhon nga opisyal imbes nga sa gamay nga kangga nga ginagamit sa inaway ukon sa palumba.