TULUN-AN NGA ARTIKULO 23
AMBAHANON 2 Jehova ang Imo Ngalan
Daw Ano ka Importante sa Imo ang Ngalan ni Jehova?
“‘Kamo ang akon mga saksi,’ siling ni Jehova.”—ISA. 43:10.
ANG MATUN-AN NATON
Tun-an naton kon ano ang mahimo naton para mapakabalaan kag mabindikar naton ang ngalan ni Jehova.
1-2. Ngaa masiling naton nga importante kay Jesus ang ngalan ni Jehova?
ANG ngalan ni Jehova amo gid ang pinakaimportante para kay Jesus. Sia ang may pinakamadamo nga nahimo para ipakilala ang ngalan ni Jehova. Natun-an naton sa nagligad nga artikulo nga handa si Jesus nga mapatay para mapakabalaan ang ngalan ni Jehova. (Mar. 14:36; Heb. 10:7-9) Sa tapos sang iya Isa ka Libo ka Tuig nga Paggahom, handa si Jesus nga ibalik kay Jehova ang tanan niya nga awtoridad para mapakabalaan ang ngalan ni Jehova. (1 Cor. 15:26-28) Ginapakita sang tanan nga ginhimo ni Jesus nga palangga gid niya ang iya Amay.
2 Nagkadto si Jesus sa duta sa ngalan sang iya Amay. (Juan 5:43; 12:13) Ginpakilala niya ang ngalan sang iya Amay sa iya mga disipulo. (Juan 17:6, 26) Nagpanudlo sia kag naghimo sang mga milagro sa ngalan ni Jehova. (Juan 10:25) Ang matuod, ginpangabay niya si Jehova nga bantayan ang iya mga disipulo “tungod sa [Iya] ngalan.” (Juan 17:11) Ginapakita sini nga ang ngalan ni Jehova amo gid ang pinakaimportante para kay Jesus. Gani kon wala kabalo ang isa ka tawo sang ngalan ni Jehova ukon wala niya ini ginagamit, masiling bala niya nga matuod sia nga Cristiano?
3. Ano ang binagbinagon naton sa sini nga artikulo?
3 Bilang mga Cristiano, ginailog naton si Jesus. Gani importante man sa aton ang ngalan sang iya Amay. (1 Ped. 2:21) Binagbinagon sa sini nga artikulo kon ngaa ginhatag ni Jehova ang iya ngalan sa mga nagabantala sang “maayong balita sang Ginharian.” (Mat. 24:14) Binagbinagon man naton kon daw ano dapat ka importante sa aton ang ngalan ni Jehova.
“KATAWHAN NGA TAWGON SA IYA NGALAN”
4. (a) Ano ang ginsiling ni Jesus sa iya mga disipulo antes sia nagpalangit? (b) Base sa ginsiling ni Jesus, ano nga pamangkot ang binagbinagon naton?
4 Antes nagpalangit si Jesus, ginsilingan niya ang iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Gani, indi lang sa Israel ibantala sang mga disipulo ang maayong balita. Sa ulihi, may kahigayunan ang mga tawo sa tanan nga pungsod nga mangin sumulunod ni Jesus. (Mat. 28:19, 20) Pero nagsiling si Jesus: “Mangin saksi ko kamo.” Dapat bala kilalahon sining bag-o nga mga disipulo ang ngalan ni Jehova kag mangin saksi nila sia, ukon mangin saksi lang sila ni Jesus? Buligan kita sang mga hitabo nga ginsambit sa Binuhatan kapitulo 15 nga masabat ini.
5. Paano ginpakita sang mga apostoles kag mga gulang sa Jerusalem nga dapat kilalahon sang tanan nga tawo ang ngalan ni Jehova? (Tan-awa man ang piktyur.)
5 Sang 49 C.E., nagtipon ang mga apostoles kag mga gulang sa Jerusalem para binagbinagon kon bala dapat magpatuli ang mga indi Judiyo para mangin Cristiano sila. Sa katapusan sang ila pagbinagbinag, ang utod ni Jesus sa iloy nga si Santiago nagsiling: “Ginsaysay sing tul-id ni [Pedro] nga ang Dios nagbaton na karon sa mga indi Judiyo, agod makapili sia halin sa ila sang katawhan nga tawgon sa iya ngalan.” Kay sin-o ngalan ang ginapatuhuyan ni Santiago? Ginkutlo ni Santiago ang ginsiling ni manalagna Amos, kag nagsiling sia: “Agod ang nabilin nga mga tawo hanuot nga magpangita kay Jehova, pati na ang mga tawo sang tanan nga pungsod nga ginatawag sa akon ngalan, siling ni Jehova.” (Binu. 15:14-18) Magluwas nga matun-an sining bag-o nga mga disipulo ang parte kay Jehova, ‘tawgon man sila sa iya ngalan.’ Buot silingon, ipakilala nila ang ngalan sang Dios kag makilala sila sa sini nga ngalan.
Sang nagtipon ang nagadumala nga hubon sang unang siglo, nahangpan sining matutom nga mga lalaki nga ang mga Cristiano dapat tawgon sa ngalan sang Dios (Tan-awa ang parapo 5)
6-7. (a) Ngaa nagkadto si Jesus sa duta? (b) Ano pa gid ang mas importante nga rason kon ngaa nagkadto si Jesus sa duta?
6 Ang ngalan ni Jesus nagakahulugan sing “Si Jehova ang Kaluwasan.” Kag gingamit ni Jehova si Jesus para luwason ang mga tawo nga nagatuo sa Iya kag kay Jesus. Nagkadto si Jesus sa duta para ihatag ang iya kabuhi para sa mga tawo. (Mat. 20:28) Bangod gingawad kita ni Jesus, may paglaum kita nga maluwas kag mabuhi sing wala sing katapusan.—Juan 3:16.
7 Pero ngaa kinahanglan luwason ang mga tawo? Bangod sang natabo sa hardin sang Eden. Suno sa nagligad nga artikulo, nagrebelde kay Jehova ang aton una nga mga ginikanan nga si Adan kag si Eva. Bangod sini, nadula nila ang kahigayunan nga mabuhi sing wala sing katapusan. (Gen. 3:6, 24) Gani nagkadto si Jesus sa duta para luwason ang mga tawo. Pero may mas importante pa nga rason sangsa sini. Dumduma nga ginpasipalahan ni Satanas ang ngalan ni Jehova sa hardin sang Eden. (Gen. 3:4, 5) Gani, mas importante ang pagpakabalaan sa ngalan ni Jehova. Kabalo si Jesus nga kon mapakabalaan ang ngalan sang iya Amay, maluwas sing bug-os ang mga tawo. Kag kon parte sa pagpakabalaan sa ngalan ni Jehova, si Jesus ang pinakamaayo nga persona nga makahimo sini. Kay man, nagkadto sia sa duta sa ngalan ni Jehova kag gintuman niya ang tanan nga ginpahimo sa iya.
Kon wala kabalo ang isa ka tawo sang ngalan ni Jehova ukon wala niya ini ginagamit, masiling bala niya nga matuod sia nga Cristiano?
8. Ano ang dapat maintiendihan sang tanan nga gusto magsunod kay Jesus?
8 Dapat maintiendihan sang mga Judiyo kag indi Judiyo nga gusto magsunod kay Jesus nga ang iya Amay nga si Jehova nga Dios amo ang nagpaposible sang ila kaluwasan. (Juan 17:3) Dugang pa, pareho kay Jesus, tawgon sila sa ngalan ni Jehova. Dapat man nila maintiendihan nga importante gid nga pakabalaanon ina nga ngalan. Nagadepende sa sini ang ila kaluwasan. (Binu. 2:21, 22) Gani dapat tun-an sang tanan nga matutom nga mga sumulunod ni Jesus ang parte kay Jehova kag parte sa iya. Indi katingalahan nga sa katapusan sang iya pangamuyo nga mabasa sa Juan 17, amo ini ang iya ginsiling: “Ginpakilala ko ang imo ngalan sa ila kag padayon ko nga ipakilala ini, agod higugmaon nila ang iban kaangay sang paghigugma mo sa akon kag agod mahiusa ako sa ila.”—Juan 17:26.
“KAMO ANG AKON MGA SAKSI”
9. Paano naton mapakita nga importante sa aton ang ngalan ni Jehova?
9 Gani bilang mga sumulunod ni Jesus, maathag nga dapat naton pakabalaanon ang ngalan ni Jehova. (Mat. 6:9, 10) Ini nga ngalan amo dapat ang pinakaimportante sa aton. Kag dapat makita ini sa aton mga ginahimo. Pero paano naton mapakabalaan ang ngalan ni Jehova kag mapamatud-an nga indi matuod ang ginsiling ni Satanas parte kay Jehova?
10. Ano ang mabasa naton sa Isaias 42-44 nga pareho sa isa ka kaso sa korte? (Isaias 43:9; 44:7-9) (Tan-awa man ang piktyur.)
10 Matun-an naton sa Isaias 42-44 kon ano ang mahimo naton para mapakabalaan ang ngalan ni Jehova. Mabasa sa sini nga mga kapitulo nga ginhambalan ni Jehova ang mga tawo nga wala nagasimba sa iya nga pamatud-an nila nga matuod ang ila mga dios. Pareho sa isa ka kaso sa korte, nagsiling si Jehova nga magdala sila sang mga saksi nga makapamatuod sa masarangan kuno himuon sang ila mga dios. Pero wala gid sila sing saksi.—Basaha ang Isaias 43:9; 44:7-9.
Paagi sa aton mga ginasiling kag ginahimo, ginapamatud-an naton nga si Jehova lang gid ang Dios (Tan-awa ang parapo 10-11)
11. Ano ang ginsiling ni Jehova sa iya katawhan nga mabasa sa Isaias 43:10-12?
11 Basaha ang Isaias 43:10-12. Nagsiling si Jehova sa iya katawhan: “Kamo ang akon mga saksi, . . . kag ako ang matuod nga Dios.” Ginpamangkot sila ni Jehova: “May iban pa bala nga Dios magluwas sa akon?” (Isa. 44:8) Pribilehiyo gid naton nga sabton ina nga pamangkot. Paagi sa aton mga ginasiling kag ginahimo, ginapamatud-an naton nga si Jehova lang ang matuod nga Dios. Ang iya ngalan labaw gid sa tanan nga ngalan. Sa aton paagi sa pagkabuhi, mapamatud-an naton nga palangga gid naton si Jehova kag mainunungon kita sa iya bisan pa ginatinguhaan ni Satanas nga pauntaton kita. Paagi sa sini, mapakabalaan naton ang Iya ngalan.
12. Paano natuman ang tagna sa Isaias 40:3, 5?
12 Kon ginapakabalaan naton ang ngalan ni Jehova, ukon ang iya reputasyon, ginailog naton si Jesucristo. Nagtagna man si Isaias nga may isa nga ‘magahawan [ukon, ‘magahanda,’ footnote] sang dalan ni Jehova.’ (Isa. 40:3) Paano ina natuman? Ginhanda ni Juan nga Manugbawtismo ang dalan para kay Jesus. Pero ang matuod, ‘dalan ini ni Jehova.’ Kay man, nagkadto si Jesus sa duta sa ngalan ni Jehova kag naghambal sia sa ngalan ni Jehova. (Mat. 3:3; Mar. 1:2-4; Luc. 3:3-6) Nagsiling pa ini nga tagna: “Ang himaya ni Jehova ipahayag.” (Isa. 40:5) Paano ina natuman? Sang nagkadto si Jesus sa duta, perpekto niya nga ginrepresentar si Jehova nga daw pareho lang nga si Jehova mismo ang nagkadto sa duta.—Juan 12:45.
13. Paano naton mailog si Jesus?
13 Pareho kay Jesus, mga saksi kita ni Jehova. Ginatawag kita sa ngalan ni Jehova kag ginasugid naton sa iban ang iya dalayawon nga mga ginahimo. Pero para mahimo naton ini sing maayo, dapat man naton isugid sa mga tawo ang tanan nga ginhimo ni Jesus para mapakabalaan ang ngalan ni Jehova. (Binu. 1:8) Si Jesus ang panguna nga Saksi ni Jehova kag ginailog naton ang iya halimbawa. (Bug. 1:5) Pero paano naton mapakita nga importante sa aton ang ngalan ni Jehova?
KON PAANO NATON MAPAKITA NGA IMPORTANTE SA ATON ANG NGALAN NI JEHOVA
14. Suno sa Salmo 105:3, ano ang ginabatyag naton parte sa ngalan ni Jehova?
14 Ginapabugal gid naton ang ngalan ni Jehova. (Basaha ang Salmo 105:3.) Nalipay gid si Jehova kon ginapabugal naton ang iya ngalan. (Jer. 9:23, 24; 1 Cor. 1:31; 2 Cor. 10:17) Ang ekspresyon nga “magpabugal tuhoy kay Jehova” nagakahulugan nga ginapabugal naton si Jehova bilang aton Dios. Ginakabig naton nga pribilehiyo nga isugid sa iban nga balaan si Jehova kag husto ang tanan niya nga ginahimo. Indi gid kita dapat mahuya nga isugid sa aton mga upod sa obra, klasmeyt, kaingod, kag sa iban nga mga tawo nga mga Saksi kita ni Jehova. Gusto sang Yawa nga mag-untat kita sa pagsugid sa iban sang ngalan ni Jehova. (Jer. 11:21; Bug. 12:17) Ang matuod, gusto ni Satanas kag sang mga nagapalapta sang iya kabutigan nga malimtan sang mga tawo ang ngalan ni Jehova. (Jer. 23:26, 27) Pero bangod importante sa aton ang ngalan ni Jehova, gusto naton nga dayawon sia “sa bug-os nga adlaw.”—Sal. 5:11; 89:16.
15. Ano ang buot silingon sang pagtawag sa ngalan ni Jehova?
15 Padayon kita nga nagatawag sa ngalan ni Jehova. (Joel 2:32; Roma 10:13, 14) Ang pagtawag sa ngalan ni Jehova nagakahulugan nga nabal-an naton ang iya personal nga ngalan kag ginagamit naton ini. Pero indi lang amo sina. Nagakahulugan man ini nga nabal-an naton nga may balatyagon sia kag mga kinaiya, nga puede kita mangin suod sa iya, nagasalig kita sa iya, kag nagapangayo kita sa iya sing bulig kag giya. (Sal. 20:7; 99:6; 116:4; 145:18) Ginasugid man naton sa iban ang iya ngalan kag mga kinaiya. Ginabuligan naton sila nga maghinulsol kag maghimo sang mga pagbag-o para malipay sa ila si Jehova.—Isa. 12:4; Binu. 2:21, 38.
16. Paano naton mapamatud-an nga butigon si Satanas?
16 Handa kita nga mag-antos para sa ngalan ni Jehova. (Sant. 5:10, 11) Kon padayon kita nga mangin mainunungon kay Jehova bisan pa nagaantos kita, ginapamatud-an naton nga butigon si Satanas. Sang panahon ni Job, amo ini ang ginsiling ni Satanas parte sa mga nagaalagad kay Jehova: “Ihatag sang tawo ang tanan nga yara sa iya tungod sa iya kabuhi.” (Job 2:4) Ginapagua ni Satanas nga magaalagad lang ang mga tawo kay Jehova kon maayo ang ila kahimtangan, kag talikdan nila si Jehova kon ara sila sa kabudlayan. Pero ginpamatud-an ni Job nga sala si Satanas. May pribilehiyo man kita nga pamatud-an nga bisan ano pa ang himuon ni Satanas, indi gid naton pagtalikdan si Jehova. Makasalig gid kita nga bantayan kita ni Jehova tungod sa iya ngalan.—Juan 17:11.
17. Suno sa 1 Pedro 2:12, paano pa gid naton mahimaya ang ngalan ni Jehova?
17 Ginatinguhaan gid naton nga madayaw ang ngalan ni Jehova. (Hulu. 30:9; Jer. 7:8-11) Bangod kilala kita nga mga Saksi ni Jehova, ang aton mga ginahimo posible maghatag sing kadayawan ukon kahuy-anan sa iya ngalan. (Basaha ang 1 Pedro 2:12.) Gani, ginahimo gid naton ang aton bug-os nga masarangan nga madayaw si Jehova paagi sa aton mga ginasiling kag ginahimo. Paagi sa sini, mahimaya naton ang iya ngalan bisan pa indi kita perpekto.
18. Ano pa ang isa ka paagi nga mapakita naton nga importante sa aton ang ngalan ni Jehova? (Tan-awa man ang footnote.)
18 Mas importante sa aton ang ngalan ni Jehova sangsa aton reputasyon. (Sal. 138:2) Ngaa importante gid ini? Kay posible nga indi maayo ang ihambal sang iban parte sa aton bangod ginahimo naton ang makapalipay kay Jehova.a Sang ginpatay si Jesus, gintamod sia sang mga tawo nga kriminal kag ginpakahuy-an. Pero handa si Jesus nga atubangon ini para mahimaya ang ngalan ni Jehova. ‘Ginbalewala niya ang kahuluy-an,’ ukon wala sia nabalaka sing sobra sa kon ano ang pagtamod sang iban sa iya. (Heb. 12:2-4) Nakapokus sia sa paghimo sang kabubut-on sang Dios.—Mat. 26:39.
19. Ngaa ginapabugal mo gid ang ngalan ni Jehova?
19 Ginapabugal gid naton ang ngalan ni Jehova kag kadungganan gid naton nga tawgon bilang mga Saksi ni Jehova. Bangod sini, padayon kita nga magadayaw sa iya bisan pa pakalainon kita sang iban. Mas importante sa aton ang ngalan ni Jehova sangsa aton reputasyon. Gani padayon naton nga dayawon ang ngalan ni Jehova bisan pa ginatinguhaan ni Satanas nga pauntaton kita. Paagi sa sini, ginapakita naton nga pareho kay Jesucristo, ang ngalan ni Jehova amo ang pinakaimportante sa aton.
AMBAHANON 10 Dayawon si Jehova nga Aton Dios!
a Bisan ang matutom nga si Job nabalaka sa iya reputasyon sang gin-akusahan sia sang iya tatlo ka abyan. Sang primero, sang napatay ang iya kabataan kag nadula ang tanan niya nga ginapanag-iyahan, “wala makasala si Job ukon magbasol sa Dios.” (Job 1:22; 2:10) Pero sang gin-akusahan sia nga basi nakahimo sia sang sala, ‘naghambal sia nga wala nagahunahuna sing maayo.’ Nangin mas importante sa iya ang iya reputasyon sangsa pagpakabalaan sa ngalan sang Dios.—Job 6:3; 13:4, 5; 32:2; 34:5.