Kon Paano Mo Madumduman ang mga Teksto

May mga bes bala nga indi mo madumduman ang isa ka teksto sa Biblia? Mahimo amo ini ang teksto nga makapaumpaw sa imo, makabulig sa imo nga mabatuan ang sala nga panghunahuna, ukon ang teksto nga gusto mo isugid sa iban. (Sal. 119:​11, 111) Binagbinaga ang pila ka panugda nga makabulig sa imo nga madumduman ang mga teksto.

• Gamita ang tag sa JW Library^® nga app. Kon may nabasa ka nga teksto nga nanamian mo, puede ka maghimo sang tag kag sulati ini sang “Paborito Ko nga Teksto.” Puede mo diri i-save ang nanamian mo nga mga teksto para madali mo ini makita sa ulihi.

• Ibutang ang teksto sa lugar nga pirme mo makita. Isulat sa papel ang teksto nga gusto mo dumdumon, kag itapik ini sa lugar nga pirme mo makita. Ginapatapik ini sang iban sa ila espiho ukon sa ila ref. Ginahimo naman sang iban ang ila paborito nga teksto nga wallpaper sa ila kompyuter ukon sa ila gadyet.

• Maghimo sang mga flash card. Isulat ang libro, kapitulo, kag bersikulo sa atubang sang flash card, dayon isulat naman sa likod ang ginasiling sang teksto. Testingi nga tan-awa ang teksto, dayon tinguhai nga masaulo mo ang ginasiling sini. Ukon testingi nga tan-awa ang ginasiling sang teksto, dayon tinguhai nga masaulo mo kon ano ini nga teksto.