Lukas Sau
3 Xyoo 15 uas Thinpeli-as Xixas kav, Phauthi-as Philaj ua tswv xeev kav Yudias, Helauj yog tus kav cheeb tsam Kalilais, nws tus tij laug Filis kav cheeb tsam Ithulias thiab Thakhaunitis, hos Lixanias yog tus kav cheeb tsam Anpilinis. 2 Thaum ntawd Anas yog ib tug pov thawj hlob hos Khayafas yog tus tuam pov thawj hlob. Lub sij hawm ntawd, Vajtswv muab ib txoj xov zoo rau Xekhaliyas tus tub Yauhas tom roob moj sab qhua.
3 Yauhas thiaj ncig thoob plaws cheeb tsam ntawm tus Dej Yaladees. Nws tshaj tawm tias, “Cia li ua kev cai raus dej los qhia tias nej hloov dua siab tshiab, Vajtswv thiaj zam nej lub txim.” 4 Tej no muaj tiav raws li Yaxayas uas yog tus cev Vajtswv lus phau ntawv hais tias, “Yuav muaj ib tug hu tom roob moj sab qhua tuaj tias, ‘Cia li kho kev tos Vajtswv Yehauvas!* Kho nws txoj kev kom tiaj kom tus. 5 Txhub txhua lub kwj ha kom puv thiab khawb txhua lub roob thiab pov roob kom tiaj. Kho txhua txoj kev nkhaus kom ncaj thiab kho tej kev siab qes kom xwm yeem. 6 Ces ib tsoom neeg yuav pom Vajtswv txoj kev cawm dim.’”
7 Thaum muaj neeg coob coob tuaj kom Yauhas muab lawv ua kev cai raus dej, nws hais rau lawv tias, “Cov niag noob nab, leej twg hais rau nej tias nej yuav tsis raug Vajtswv rhuav tshem no? 8 Nej lub neej yuav tsum qhia tias nej hloov dua siab tshiab. Tsis txhob khav tias Anplahas yog nej yawg koob. Kuv qhia rau nej tias Vajtswv muaj peev xwm muab tej pob zeb no tsa tau los ua Anplahas tej xeeb ntxwv. 9 Nim no twb muab rab taus cuab rau ntawm hauv paus ntoo lawm. Txhua tsob ntoo uas tsis txi cov txiv zoo yuav raug muab ntov pov hlawv.”
10 Cov neeg coob coob thiaj nug nws tias, “Yog li, peb yuav ua li cas?” 11 Nws teb lawv tias, “Tus uas muaj ob lub tsho, cia li faib ib lub rau tus uas tsis muaj. Thiab tus uas muaj noj, cia li faib rau tus uas tsis muaj.” 12 Txawm cov neeg sau se los kuj tuaj kom nws muab lawv ua kev cai raus dej thiab. Lawv nug Yauhas tias, “Xib Hwb, peb ne? Peb yuav tsum ua li cas?” 13 Nws teb lawv tias, “Nej tsis txhob sau se tshaj li tau kom tseg.” 14 Cov tub rog kuj nug nws tias, “Ua li peb ne? Peb yuav ua li cas?” Ces nws teb lawv tias, “Nej tsis txhob quab yuam los sis iab hiam ib tug twg kom tau luag tej nyiaj txiag. Tiam sis txaus siab rau nej tej nqi zog.”
15 Cov tib neeg niaj hnub tos ntsoov tus Khetos. Lawv sawv daws thiaj xav* tias tej zaum Yauhas yog tus Khetos. 16 Yauhas thiaj hais rau lawv tias, “Kuv yog tus muab nej ua kev cai raus dej, tiam sis tus muaj hwj chim dua kuv yuav lawv kuv qab los, twb tsis tsim nyog kuv daws nws txoj hlua khau li. Nws yuav muab nej ua kev cai raus lub hwj huam dawb huv thiab raus hluav taws.* 17 Nws tuav rawv rab hlau rawg* yuav muab cov mog* rheeb kom tej npluag ya huv si mus. Nws yuav muab cov mog sau rau hauv nws lub txhab tiam sis cov npluag, nws yuav muab hlawv rau hauv lub cub tawg uas cig mus ib txhis.”
18 Yauhas kuj qhuab qhia cov tib neeg txog ntau yam thiab tshaj tawm txoj xov zoo rau lawv ntxiv. 19 Tiam sis Yauhas ntuas Helauj uas yog tus tswv xeev vim Helauj yuav Helaudias uas yog nws tus niam tij. Thiab Yauhas kuj ntuas Helauj txog txhua yam phem uas nws tau ua. 20 Helauj thiaj ua ib qho phem los ntxiv rau tej ntawd es muab Yauhas kaw kiag rau hauv tsev loj cuj.
21 Thaum sawv daws ua kev cai raus dej, Yexus kuj ua kev cai raus dej thiab. Thaum Yexus tab tom thov Vajtswv, rooj ntug txawm qhib plho. 22 Lub hwj huam dawb huv tshwm zoo li ib tug nquab los rau saum Yexus, thiab muaj ib lub suab hais saum ntuj tuaj tias, “Koj yog kuv tus Tub. Kuv hlub koj heev. Koj ua haum kuv siab.”
23 Thaum Yexus pib ua nws tes hauj lwm, nws muaj li 30 xyoo. Sawv daws yeej hais tias,
nws yog Yauxej tub.
Yauxej yog Helis tub.
24 Helis yog Mathab tub.
Mathab yog Levis tub.
Levis yog Mekhis tub.
Mekhis yog Yana-ais tub.
Yana-ais yog Yauxej tub.
25 Yauxej yog Matathias tub.
Matathias yog Amaus tub.
Amaus yog Nahus tub.
Nahus yog Exalis tub.
Exalis yog Naka-ais tub.
26 Naka-ais yog Ma-as tub.
Ma-as yog Matathias tub.
Matathias yog Xeme-is tub.
Xeme-is yog Yauxem tub.
Yauxem yog Yaudas tub.
27 Yaudas yog Yau-anes tub.
Yau-anes yog Lexas tub.
Lexas yog Xelunpanpees tub.
Xelunpanpees yog Se-athi-ees tub.
Se-athi-ees yog Nelis tub.
28 Nelis yog Mekhis tub.
Mekhis yog Adis tub.
Adis yog Khauxam tub.
Khauxam yog Emadas tub.
Emadas yog Aw tub.
29 Aw yog Yexus tub.
Yexus yog Eli-exes tub.
Eli-exes yog Yaulees tub.
Yaulees yog Mathab tub.
Mathab yog Levis tub.
30 Levis yog Xime-oos tub.
Xime-oos yog Yudas tub.
Yudas yog Yauxej tub.
Yauxej yog Yaunes tub.
Yaunes yog Eli-akhees tub.
31 Eli-akhees yog Melias tub.
Melias yog Menas tub.
Menas yog Matathas tub.
Matathas yog Nathas tub.
Nathas yog Daviv tub.
32 Daviv yog Yexis tub.
Yexis yog Aunpes tub.
Aunpes yog Npau-as tub.
Npau-as yog Xamoos tub.
Xamoos yog Nasoos tub.
33 Nasoos yog Aminadas tub.
Aminadas yog Anais tub.
Anais yog Heloos tub.
Heloos yog Pheles tub.
Pheles yog Yudas tub.
34 Yudas yog Yakhauj tub.
Yakhauj yog Ixaj tub.
Ixaj yog Anplahas tub.
Anplahas yog Thelas tub.
Thelas yog Nahaus tub.
35 Nahaus yog Xelus tub.
Xelus yog Le-us tub.
Le-us yog Pelej tub.
Pelej yog Enpaw tub.
Enpaw yog Selas tub.
36 Selas yog Khainas tub.
Khainas yog Aphasas tub.
Aphasas yog Xees tub.
Xees yog Nau-as tub.
Nau-as yog Lamej tub.
37 Lamej yog Methuxelas tub.
Methuxelas yog Enauj tub.
Enauj yog Yales tub.
Yales yog Mahalalees tub.
Mahalalees yog Khainas tub.
38 Khainas yog Enaus tub.
Enaus yog Xej tub.
Xej yog Adas tub.
Adas yog Vajtswv tub.