ZAJ KAWM 15
Yexus Yog Leej Twg?
Yexus yog ib tug neeg uas muaj koob nto npe tshaj plaws hauv keeb kwm. Txawm li los, coob tus tsuas paub Yexus lub npe xwb. Lawv tsis paub ntau yam txog nws thiab lawv nyias hais nyias ib yam tias Yexus yog leej twg tiag. Phau Vajlugkub hais li cas txog nws?
1. Yexus yog leej twg?
Yexus yog ib tug plig muaj hwj chim heev uas nyob saum ntuj ceeb tsheej. Nws yog thawj tug uas Vajtswv Yehauvas tsim. Vim li ntawd, thiaj muab nws hu ua “Vajtswv tus Tub hlob.” (Kaulauxais 1:15) Phau Vajlugkub hais tias Yexus yog Vajtswv “tib Leeg Tub” rau qhov Yexus tib leeg xwb thiaj yog Yehauvas ua tus tsim kiag. (Yauhas 3:16) Yexus ua hauj lwm fab taws ntso nrog nws Leej Txiv Yehauvas, thiab pab Nws tsim ib puas tsav yam huv tib si. (Nyeem Pajlug 8:30.) Yexus muaj kev sib raug zoo nrog Vajtswv Yehauvas heev. Kuj tau muab nws hu ua “Txojlus” vim nws yog tus cev lus rau Vajtswv. Nws cev Vajtswv tej lus rau tib neeg thiab cov tub txib saum ntuj.—Yauhas 1:14.
2. Vim li cas Yexus los rau hauv ntiaj teb?
Tshaj 2,000 xyoo dhau los lawm, Yehauvas tau ua ib qho txuj ci. Nws siv nws lub hwj huam dawb huv muab Yexus txoj sia saum ntuj ceeb tsheej los tso rau hauv ib tug ntxhais nkauj xwb hu ua Maivliag lub tsev me nyuam. Ua li no, Yexus thiaj yug los ua tib neeg ib yam li sawv daws. (Nyeem Lukas 1:34, 35.) Yehauvas txib Yexus los rau hauv ntiaj teb los ua tus Mexiyas, los sis tus Khetos uas tau cog lus tseg, thiab los cawm noob neej.a Txhua yam uas Yehauvas tau hais hauv phau Vajlugkub txog tus Mexiyas yeej muaj tiav rau Yexus. Qhov no pab tau tib neeg paub tias Yexus yeej “yog tus Khetos uas yog Vajtswv Leej Tub.”—Mathais 16:16.
3. Tam sim no Yexus nyob qhov twg lawd?
Tom qab Yexus lub neej uas ua ib tug neeg xaus lawd, Vajtswv tsa nws sawv rov los mus ua ib tug plig thiab rov mus saum ntuj ceeb tsheej lawm. Nyob saum ntuj ceeb tsheej, “Vajtswv thiaj pub nws tau lub meej mom siab tshaj thiab tau lub npe zoo tshaj txhua lub npe tib si.” (Filipis 2:9) Nim no, Yexus yog ib tug tub txib saum ntuj uas muaj hwj chim heev. Tsuas yog Vajtswv Yehauvas thiaj muaj hwj chim loj dua Yexus xwb.
KAWM NTXIV
Kawm seb Yexus yog leej twg tiag thiab seb vim li cas tseem ceeb ua luaj rau koj kawm txog nws.
4. Yexus tsis yog tus Vajtswv uas muaj hwj chim loj dua ntais
Phau Vajlugkub qhia tias txawm Yexus yog ib tug plig saum ntuj ceeb tsheej uas muaj hwj chim heev los, nws yeej mloog nws tus Vajtswv thiab nws Leej Txiv Yehauvas lus. Vim li cas peb thiaj hais tau li no? Saib zaj YEEB YAJ KIAB Ces saib seb phau Vajlugkub qhia li cas txog qhov uas Yexus zoo tsis thooj li Vajtswv.
Cov nqe Vajlugkub nram no yuav pab kom peb nkag siab txog Yehauvas thiab Yexus nkawd. Nyeem cov nqes Vajlugkub, thiab tham txog cov lus ntawd.
Nyeem Lukas 1:30-32.
Tus tub txib saum ntuj hais li cas txog Yexus thiab Vajtswv Yehauvas, “tus uas muaj hwjchim loj kawg nkaus”?
Nyeem Mathais 3:16, 17.
Thaum Yexus ua kev cai raus dej tas, muaj ib lub suab hais li cas saum ntuj tuaj?
Koj xav tias lub suab ntawd yog leej twg lub?
Nyeem Yauhas 14:28.
Leej twg yog tus nyob ntev tshaj thiab muaj hwj chim loj dua? Leej Txiv los yog Leej Tub?
Thaum Yexus muab Yehauvas hu ua nws Leej Txiv, qhov ntawd qhia li cas rau peb?
Nyeem Yauhas 12:49.
Yexus puas xav tias nws thiab nws Leej Txiv nkawd yog tib tug? Koj ho xav li cas?
5. Yexus yeej yog tus Mexiyas
Phau Vajlugkub muaj ntau zaj lus faj lem uas qhia txog tus Mexiyas los sis tus uas Vajtswv tau xaiv los cawm noob neej. Cov lus faj lem no pab kom tib neeg paub tias tus Mexiyas ho yog leej twg tiag. Saib zaj YEEB YAJ KIAB kom paub qho ntsis txog ib co lus faj lem uas Yexus tau ua tiav thaum nws los hauv ntiaj teb no.
Nyeem cov lus faj lem no hauv phau Vajlugkub thiab tham txog cov lus nram qab no:
Nyeem Mikhas 5:2 kom paub tias tus Mexiyas yuav tsum yug rau qhov twg.b
Yexus puas yug hauv lub teb chaws Yudas raws li zaj lus faj lem tau hais?—Mathais 2:1.
Nyeem Phau Ntawv Nkauj 34:20 thiab Xakhaliyas 12:10 kom pom txhua yam uas phau Vajlugkub tau hais ua ntej txog tus Mexiyas txoj kev tuag.
Puas muaj tiav raws nkaus li cov lus faj lem no?—Yauhas 19:33-37.
Koj puas xav tias yog Yexus txhob txwm ua kom tej no muaj tiav raws li cov lus faj lem xwb?
Qhov no qhia li cas rau koj txog Yexus?
6. Tej uas peb kawm txog Yexus pab tau peb
Phau Vajlugkub hais tias tseem ceeb heev rau peb kawm txog Yexus thiab tes hauj lwm uas Vajtswv muab rau nws ua. Nyeem Yauhas 14:6 thiab 17:3, thiab tham txog lo lus no:
Vim li cas tseem ceeb rau peb kawm txog Yexus?
Yexus qhib kev kom peb tau los ua Vajtswv tus phooj ywg. Nws qhia qhov tseeb txog Yehauvas, thiab vim muaj Yexus, peb thiaj yuav tau txoj sia ib txhis tsis kawg
IB TXHIA HAIS TIAS: “Yehauvas Cov Tim Khawv tsis ntseeg Yexus.”
Koj yuav teb li cas rau lawv?
KOJ KAWM TAU DAB TSI
Yexus yog ib tug plig uas muaj hwj chim heev. Nws yog Vajtswv tus Tub thiab yog tus Mexiyas.
Rov Tham Dua
Vim li cas ho muab Yexus hu ua “Vajtswv tus Tub hlob”?
Ua ntej Yexus los hauv ntiaj teb, nws ua dab tsi xwb?
Ua cas peb thiaj paub tias Yexus yog tus Mexiyas?
TSHAWB NTXIV
Kawm ntxiv seb ua cas peb thiaj paub tias Yexus yog tus Mexiyas.
Kawm seb phau Vajlugkub puas qhia tias Vajtswv thiab Yexus nkawd yog ob txiv tub ib yam li neeg tej txiv tub.
“Vim Li Cas Thiaj Muab Yexus Hu Ua Vajtswv Tus Tub?” (Nyeem hauv jw.org/hmn)
Kawm seb vim li cas phau Vajlugkub tsis qhia tias Vajtswv yog peb leeg.
“Yexus Puas Yog Vajtswv?” (Phau Tsom Faj lub 4 Hlis tim 1 xyoo 2009)
Nyeem seb ib tug poj niam lub neej tau hloov li cas tom qab nws tshawb nrhiav tau tej uas phau Vajlugkub hais txog Yexus.
a Zaj kawm 26 thiab 27 yuav tham tias vim li cas noob neej thiaj cheem tsum txoj kev cawm dim thiab seb Yexus ho cawm peb li cas.
b Saib Cov Lus Qhia 2 txog ib zaj lus faj lem uas qhia tias thaum twg Yexus mam tshwm los rau hauv ntiaj teb no tiag.