Lub 11 Hlis

Cov niam txiv yuav tau pab lawv cov me nyuam npaj ua ntej xwv lawv thiaj txawj teb. Cov niam txiv yuav tau saib seb lawv cov me nyuam hlob los yau ces qhia kom lawv txawj teb raws li lawv lub hnub nyoog. Muaj tej zaum yuav muaj tej zaj tham txog tej teeb meem uas cov txij nkawm muaj los sis kev ua txhaum loj tiam sis tej zaum muaj ib los sis ob nqes zoo rau cov me nyuam teb. Ua tib zoo qhia rau koj cov me nyuam kom paub tias muaj tej zaj zoo li hais tas no ces tus coj yuav tsis hu lawv ua luaj twg. Yog qhia li no rau lawv ua ntej ces lawv yuav tsis xav li cas yog lwm tus teb lawm es lawv tsis tau teb. (1 Timautes 6:18) Peb txhua tus yeej npaj tau peb cov lus teb kom qhuas Yehauvas thiab txhawb tau cov kwv tij nkauj muam. (Paj Lug 25:11) Muaj tej zaum peb yuav nyiam piav txog peb lub neej tiam sis nco ntsoov tsis txhob hais ntau ntau txog peb tus kheej. (Paj Lug 27:2; 2 Kauleethaus 10:18) Cia peb nco ntsoov teb txog Yehauvas, nws Txoj Lus, thiab nws cov tib neeg.​—Tshwm Sim 4:11. w23.04 24-25 ¶17-18

Kev hlub yuav pab kom peb tsis tsaug zog thiab ceev faj zov rawv tos. (Mathais 22:37-39) Kev hlub rau Vajtswv yuav pab kom peb ua siab ntev mus tshaj tawm txawm hais tias peb yuav ntsib teeb meem li cas los xij. (2 Timautes 1:7, 8) Peb mus tshaj tawm tsis tseg thiab hu xov tooj los sis sau ntawv mus rau cov uas tsis tau los teev tiam Yehauvas vim peb hlub lawv. Peb vam tias muaj ib hnub lawv yuav thim xav thiab hloov ua li Yehauvas lub siab nyiam. (Exekhees 18:27, 28) Peb kuj hlub peb cov kwv tij nkauj muam Khixatia thiab, thaum peb ib tug txhawb ib tug lub zog thiab ib tug pab ib tug. (1 Thexalaunikas 5:11) Zoo li cov tub rog mus ntaus rog ua ke, peb ib leeg yeej pab ib leeg. Yeej tsis muaj ib zaug uas peb yuav txhob txwm ua kom mob peb cov kwv tij nkauj muam los sis ua phem pauj phem rov rau lawv. (1 Thexalaunikas 5:13, 15) Peb kuj hlub tshua cov kwv tij uas saib xyuas lub koom txoos thaum peb hwm lawv.​—1 Thexalaunikas 5:12. w23.06 10 ¶6; 11 ¶10-11

Muaj ib txoj kev uas yuav tsav tau peb txoj kev ntseeg yog xav ntsoov txog tus nqi txhiv. Yog Vajtswv twb tso nws tus Tub los txhiv lawm ces tej uas nws hais yeej yuav muaj tseeb. Thaum peb ua tib zoo xav txog tias vim li cas nws ho tso nws tus Tub los tuag thiab tej uas nws tus Tub raug, yuav tsav tau peb txoj kev ntseeg rau Vajtswv lo lus cog tseg tias yeej yuav muaj lub qab ntuj tshiab thiab txoj sia ntev dhawv mus ib txhis. Vim li cas peb ho hais tau li ntawd? Muaj li cas xwb ua ntej Vajtswv tus Tub los tuag txhiv? Yehauvas xa nws tus Tub uas nws hlub, tus uas nyob ntawm nws ib sab saum ntuj ceeb tsheej los yug ua ib tug neeg dawb huv. Thaum Yexus tseem nyob hauv ntiaj teb no, nws raug ntau yam kev nyuaj siab. Tom qab ntawd nws tseem tuag txom nyem ntsuav. Qhov no zoo yam nkaus li ib tug nqi uas Yehauvas them kim kawg li. Yog tias Vajtswv xav kom peb nyob ib nyuag ntu xwb ces nws yeej yuav tsis cia nws tus Tub los tuag txom nyem ntsuav ib zaug li. (Yauhas 3:16; 1 Petus 1:18, 19) Vim Yehauvas tau tso nws tus Tub los tuag them peb lub txim txhaum lawm, Yehauvas yeej yuav ua kom tau raws li nws cog tseg txog txoj sia nyob mus ib txhis thiab lub qab ntuj tshiab. w23.04 27 ¶8-9

Ua li Yehauvas puas muaj lub siab xav tsa cov tuag sawv rov qab los? Nws yeej muaj siab tiag. Nws tshoov ntau tus uas sau phau Vajlugkub siab kom sau txog nws lo lus cog tseg tias yav pem suab nws yuav tsa cov tuag sawv rov qab los. (Yaxayas 26:19; Tshwm Sim 20:11-13) Yehauvas tau cog lus li cas lawm, nws yeej yuav ua kom muaj tshwm sim raws li ntawd. (Yausuas 23:14) Yehauvas tos tsis hnyu yuav ntxiv siav ntxiv zog rau cov neeg uas nruam sim lawm. Cia peb ua zoo xav txog Yauj cov lus. Yauj yeej paub tseeb tseeb tias thaum nws tuag, Yehauvas yeej tos tsis hnyu yuav rov pom nws dua. (Yauj 14:14, 15) Yehauvas yeej tos tsis hnyu yuav rov pom tag nrho cov uas teev tiam nws es tau nruam sim lawm thiab. Nws yeej maj maj tsa lawv kom rov muaj sia, noj qab haus huv, thiab muaj kev zoo siab. Hos cov uas tau nruam sim lawm es tsis tau paub txog Yehauvas los nws yeej yuav tsa lawv sawv rov los muaj sia dua. (Tes Hauj Lwm 24:15) Nws yeej xav cog kev phooj ywg nrog cov tib neeg no xwv lawv thiaj tau nyob hauv lub ntiaj teb no mus ib txhis.​—Yauhas 3:16. w23.04 9 ¶5-6

Yuav kom koj tsav tau koj txoj kev vam kev cia siab, muaj qho yam koj ua tau. Xws li yog koj muaj txoj kev vam kev cia siab nyob hauv lub ntiaj teb, mus nyeem tej nqe Vajlugkub txog lub Vaj Kaj Siab thiab muab tej ntawd ua tib zoo xav. (Yaxayas 25:8; 32:16-18) Xav hais tias thaum txog lub caij ntawd, koj yuav pom leeg twg? Yog koj xav ntsoov txog thaum nyob lub qab ntuj tshiab ces yuav zoo yam li koj tej teeb meem uas koj muaj tsis loj ua luaj twg thiab yuav zoo yam li “ib nyuag ntu” xwb. (2 Kauleethaus 4:17) Txoj kev vam kev cia siab uas Yehauvas muab rau koj yuav pab koj thev taus txhua yam kev sim siab uas koj raug. Nws twb npaj tau txhua yam los mus txhawb koj lub zog lawm. Yog li ntawd, thaum koj xav tau kev pab ua koj tes hauj lwm rau Yehauvas, thev ib yam kev sim siab twg los sis yuav kom muaj kev zoo siab mus li, tsis txhob ua siab deb, kav tsij thov Yehauvas pab thiab kawm Vajlugkub koj ib leeg. Thaum muaj cov kwv tij nkauj muam cev tes pab los tsis txhob yig. Lauj sij hawm los xav txog koj lub neej tom ntej hauv lub qab ntuj tshiab. Yog koj ua li no, ‘Vajtswv tus uas muaj hwj chim txhawb [koj] lub zog kom [koj] muaj zog heev ntxiv, txawm yog [koj] tau zoo thiab txom nyem los [koj] thiaj ua taus siab ntev.’​—Kaulauxis 1:11. w23.10 17 ¶19-20

Muaj ntau yam uas peb yuav tau ua Yehauvas tsaug thaum thov nws. Peb ua nws tsaug rau txhua yam zoo uas peb muaj rau qhov txhua yam zoo puav leej los ntawm nws los. (Yakaunpaus 1:17) Xws li peb ua nws tsaug rau lub ntiaj teb thiab txhua yam hauv lub ntiaj teb uas nws tau tsim zoo nkauj heev. Tsis tas li ntawd, peb kuj ris txiaj ntsig uas nws muab txoj sia rau peb, pub peb muaj ib tse neeg, phooj ywg kwv luag, thiab txoj kev vam kev cia siab rau yav tom hauv ntej. Ntxiv ntawd, peb kuj ua tsaug uas nws cia peb los nrog nws sib raug zoo. Peb nyob hauv lub qab ntuj uas neeg tsis ris leej twg txiaj ntsig. Feem ntau tib neeg tsuas xav tias seb lawv yuav tau dab tsi rau dab tsi tiam sis tsis nco ris txiaj ntsig rau tej yam uas lawv muaj. Yog peb muaj lawv tus cwj pwm no ces peb tej lus thov rau Vajtswv tsuas yog nug kom peb tau yam ub yam no xwb. Yuav kom peb tsis txhob muaj tus cwj pwm zoo li no, peb yuav tau xyaum thiab ua tib zoo xav seb muaj tej yam twg uas peb yuav tau ris Yehauvas txiaj ntsig rau.​—Lukas 6:45. w23.05 4 ¶8-9

Yehauvas yog peb Leej Txiv uas hlub peb, nws yeej tsis xav pom peb raug kev txom nyem nyuaj siab. (Yaxayas 63:9) Txawm li ntawd los nws yeej tsis thaiv kom tej kev sim siab uas zoo li dej thiab hluav taws tsis txhob los raug peb. (Yaxayas 43:2) Tiam sis nws cog lus tias nws yuav pab kom peb “hla” dhau tej ntawd. Nws yuav tsis cia tej kev sim siab ntawd ua rau peb teev tiam tsis tau nws. Yehauvas kuj muab nws lub hwj huam dawb huv los pab kom peb thev taus. (Lukas 11:13; Filipis 4:13) Thaum kawg peb yeej cia siab tias Yehauvas yuav pab kom peb thev taus tej kev sim siab thiab kom peb muab siab npuab nws. Yehauvas xav kom peb tso siab rau nws. (Henplais 11:6) Tej thaud peb saib peb tej kev sim siab loj cuag roob ces peb yuav xav tias xyov Yehauvas puas yuav pab peb. Tsis txhob cia tej ntawd ua rau peb ua xyem xyav. Cia li thov Yehauvas es tso siab tias nws yuav teb peb tej lus thov. (Yakaunpaus 1:6, 7) Phau Vajlugkub qhia tias Vajtswv lub hwj chim yuav pab kom peb “caws qia hla tau ntsa loog.”​—Ntawv Nkauj 18:29. w23.11 22 ¶8-9

Ob nqes Vajlugkub no piav tau txoj kev sib hlub zoo kawg nkaus li! Cov lus no txhawb cov txij nkawm li no tias: Neb txoj kev sib hlub yeej nyob tau mus ib txhis. Qhov uas ib khub txij nkawm twg txoj kev sib hlub yuav kav mus li los nyob ntawm nkawd ob leeg. Muab ua piv txwv li no tias zoo yam li ib lub cub tawg cig ntsa thuav yog tias pheej tsij taws tsis so rau. Tiam sis yog thaum twg tsis tsij taws lawm ces yuav txawj tuag zuj zus. Ib khub txij nkawm twg txoj kev sib hlub yuav ruaj khov khwb kho zoo ib yam li ntawd yog tias nkawd pheej kho ntshuj ntshis nkawd txoj kev txij nkawm. Muaj qee lub sij hawm ib khub txij nkawm twg yeej xav tias nkawd txoj kev sib hlub txias zuj zus lawm, yeeb vim yog muaj kev txhawj xeeb txog nyiaj txiag, kev noj qab haus huv los sis tu tub tu kiv. Yuav kom “[Yehauvas tus] nplaim taws” cig tsis tuag, tus txiv thiab tus niam yuav tau tsav nkawd txoj kev sib raug zoo nrog Yehauvas kom ruaj khov khwb kho. w23.05 20-21 ¶1-3

Yuav kom peb muaj lub siab tawv, peb yuav tau ua li cas? Peb niam peb txiv yeej xav kom peb muaj lub siab tawv, tiam sis lawv muab tsis tau rau peb li lawv muab tej qub txeeg qub teg. Ces yuav kom peb ua tau siab tawv peb yuav tsum tau kawm li peb kawm kom peb txawj ua ib yam dab tsi. Ib qho uas yuav pab kom peb ua tau li no ces yog saib peb tus xib hwb. Nws ua li cas ces peb xyaum tas zog kom peb txawj li nws. Zoo ib yam li ntawd, yog peb xyaum cov neeg siab tawv ces peb yuav ua tau siab tawv li lawv thiab. Ib yam li Daniyees peb yuav tsum to taub Vajtswv Txoj Lus kom zoo, nrog Yehauvas tham tsis tu ncua, thiab qhia tej peb xav rau Yehauvas peb thiaj muaj kev sib raug zoo nrog nws. Thiab peb yuav tsum tso siab plhuav tias Yehauvas yeej yuav pab peb. Thaum peb raug kev sim siab peb thiaj yuav ua tau siab tawv. Muaj ntau zaus, cov uas ua tau siab tawv yuav ua rau lwm tus qhuas thiab saib taus lawv. Thiab tej zaum lawv tseem pab tau ib txhia los paub Yehauvas. w23.08 2 ¶2; 4 ¶8-9

Lo lus Kilis uas txhais hais tias “ua tib zoo saib” yog lawv siv thaum lawv muab tshuaj los sim nyiaj sim kub seb puas tseem. Peb yuav tau ua zoo tshuaj xyuas tej uas peb hnov thiab tej uas peb nyeem seb puas muaj tseeb tiag. Tseem ceeb rau peb ua li ntawd vim lub sij hawm muaj kev txom nyem loj kawg nkaus twb los ze ze lawm. Peb tsis txhob ntseeg txhua yam uas peb hnov thiab peb nyeem. Tiam sis ua tib zoo tshuaj xyuas seb phau Vajlugkub thiab Yehauvas lub koom haum hais li cas txog tej ntawd. Yog peb ua li no ces peb thiaj yuav tsis qaug rau dab tej lus dag ntxias. (Paj Lug 14:15; 1 Timautes 4:1) Peb paub tias thaum lub sij hawm muaj kev txom nyem loj kawg nkaus los, Yehauvas cov neeg yeej yuav dim. Tiam sis rau peb tus kheej, peb yeej tsis paub tias xyov tag kis yuav zoo li cas. (Yakaunpaus 4:14) Txawm hais tias peb yuav dim los sis peb yuav tuag ua ntej hnub ntawd los txog los peb paub tseeb tias Yehauvas yeej yuav muab txoj sia nyob mus ib txhis rau cov uas muab siab npuab nws. Thov kom peb txhua leej txhua tus tuav rawv peb txoj kev vam khom kom khov kho thiab ceev faj zov rawv tos Yehauvas hnub. w23.06 13 ¶15-16

Peb tsis paub tias ib cov lus faj lem yuav muaj tiav li cas. (Daniyees 12:8, 9) Txawm li ntawd los, peb tso siab tias thaum txog caij txog nyoog lawm Yehauvas yeej yuav qhia rau peb paub li nws ua yav tas los. Thaum sawv daws hnov tej nom tswv hais tias “peb tau zoo noj thiab tau zoo nyob kawg li lawm” ces thaum ntawd tej nom tswv yuav pib tawm tsam tej kev ntseeg cuav thiab ua kom lawv puas tsuaj tag. (1 Thexalaunikas 5:3; Tshwm Sim 17:16, 17) Tom qab ntawd tej nom tswv yuav pib tawm tsam Vajtswv cov neeg. (Exekhees 38:18, 19) Thaum no yog thaum uas ntsuj rog Amankedoos uas yog ntsuj rog kawg pib. (Tshwm Sim 16:14, 16) Peb tso siab tau tias tej no yeej yuav muaj tshwm sim los sai sai tom ntej no. Ua ntej hnub ntawd los txog, cia peb niaj hnub ua peb Leej Txi Yehauvas tsaug thiab ceev faj zos tos seb cov lus faj lem yuav muaj tshwm sim li cas thiab kub siab lug mus pab lwm tus kom lawv ceev faj zov tos ib yam li peb thiab. w23.08 13 ¶19-20

Thaum tus tub txib Povlauj hais txog kev ntseeg, kev cia siab, thiab kev hlub, nws hais tias ‘kev hlub yog yam uas tseem ceeb dua ntais huv tib si.’ (1 Kauleethaus 13:13) Tos Povlauj hais li no los, yeeb vim yog kev hlub rau Yehauvas thiab tib neeg peb yuav tsum muaj mus li tiam sis kev ntseeg thiab cia siab peb tsis tas nrhiav lawm vim Yehauvas tej lus cog tseg muaj tiav lawm. Tsis tas li ntawd, peb txoj kev hlub qhia tias peb yog Yexus cov tseem thwj tim. Yexus hais tias: “Yog nej sib hlub li no ces sawv daws yuav paub tias nej yog kuv cov thwj tim.” (Yauhas 13:35) Hos Povlauj kuj hais tias: “nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke.” (Kaulauxis 3:14) Thiab tus tub txib Yauhas tau sau li no tias: “Tus uas hlub Vajtswv, tus ntawd yuav tsum hlub nws kwv nws tij.” (1 Yauhas 4:21) Yog li thaum peb hlub peb cov kwv tij nkaum muam twb yog peb hlub Vajtswv ntag. w23.11 8 ¶1, 3

Phau Vajlugkub muab peb lub neej Khixatia piv rau kev sib tw khiav. Cov uas khiav mus txog tus ciam kawg yuav tau txoj sia ntev dhawv mus ib txhis. (2 Timautes 4:7, 8) Peb yuav tsum sib zog khiav tiag tiag vim rau qhov twb yuav txog tus ciam kawg lawm. Tus tub txib Povlauj qhia tias peb yuav khiav li cas peb thiaj tau txoj sia. Nws hais tias peb yuav tsum ‘muab txhua yam uas thaiv peb kev . . . tso pov tseg, thiab peb cia li sib tw khiav ncaj nraim mus kom txog tus ciam tom kawg.’ Puas yog Povlauj hais kom peb tsis txhob nqa ib yam dab tsi li? Tsis yog. Nws tsuas kom peb muab tej uas peb twb tsis cheem tsum thiab yuav ua lub nra hnyav rau peb tso pov tseg xwb, peb thiaj li tsis poob qab los sis khiav tsis taus. Yuav kom peb khiav taus, peb yuav tsum paub tias yam twg yuav ua nra hnyav rau peb thiab muab pov tseg kiag tam sid. Tiam sis muaj tej yam peb yuav tau ris nrog peb, peb thiaj muaj cai sib tw khiav.​—2 Timautes 2:5. w23.08 26 ¶1-2

Txawj yoog yuav pab kom peb saib taus lwm tus txoj kev xav. Xws li ib txhia muam nyiam pleev ntsej muag hos ib txhia tsis nyiam. Ib co ntseeg nyiam me ntsis dej caw tiam sis ib txhia caiv hlo tsis kam haus. Txhua tus ntseeg yeej xav kom noj qab haus huv tiam sis nyias xaiv nyias seb yuav ua li cas thiaj noj qab nyob zoo. Yog tias peb pheej yuam lwm tus hauv lub koom txoos kom xav ib yam li peb xav ces peb yuav ua rau sawv daws sib cais ua pab ua pawg thiab txo tau lwm tus txoj kev ntseeg. (1 Kauleethaus 8:9; 10:23, 24) Yehauvas tsis qhia tsi ntsees seb yuav hnav khaub ncaws li cas rau li cas tiam sis nws muaj tej hauv paus ntsiab lus hauv phau Vajlugkub los pab peb. Peb yuav tau hnav tej tsoos kom phim ua ib tug neeg uas ntseeg Vajtswv. Tej peb xaiv yuav tsum qhia tias peb txawj yoog, hnav tej tsoos kom raug ntsej muag thiab ‘tsim nyog hnav.’ (1 Timautes 2:9, 10) Peb tsis txhob hnav tej tsoos kom ua rau luag tsuas xav txog tej peb hnav xwb. Tej hauv paus ntsiab lus hauv phau Vajlugkub yuav pab kom cov txwj laus txhob tsa cai tias yuav hnav khaub ncaws thiab kho plaub hau li cas. w23.07 23-24 ¶13-14

Yehauvas qhuab qhia kom peb tau lub neej zoo thiab muaj kev zoo siab yav tom hauv ntej. Cov uas mus nrog tus poj niam ruam ua ke tsuas nrhiav ntshis kev plees kev yi thiab kev lom zem uas tsuas nyob ib vuag xwb. Lawv tsis paub tias tej uas lawv ua ntawd yuav coj lawv mus raug kev ploj kev tuag. (Paj Lug 9:13, 17, 18) Tiam sis tsis zoo li ntawd rau cov uas mus nrog tus poj niam uas ‘muaj tswv yim.’ (Paj Lug 9:1) Cia peb xyaum nyiam tej uas Yehauvas nyiam thiab ntxub tej uas nws ntxub. (Ntawv Nkauj 97:10) Thiab peb zoo siab heev mus caw lwm tus los kawm ntawm tus poj niam uas ‘muaj tswv yim’ ib yam li nws cov qhev uas “mus rau saum qhov chaw siab hauv lub nroog hu tuaj tias, ‘Cov neeg ruam, nej cia li los ntawm no!’” Tej uas peb thiab cov uas los nrog peb kawm ntawm tus poj niam muaj tswv yim yuav “muaj sia nyob” mus ib txhis thaum peb sawv daws ‘raws txoj kev txawj ntse qab.’​—Paj Lug 9:3, 4, 6. w23.06 24 ¶17-18

Yog tias ib tug neeg ua hauj lwm los sis ib tug nrog koj kawm ntawv ua ke nug koj txog koj txoj kev ntseeg, koj puas ntshai? Feem ntau peb yeej ntshai. Qhov lawv nug peb ntawd yeej zoo heev vim qhov ntawd yuav pab tau peb paub tias lawv xav li cas rau li cas los sis ntseeg li cas peb thiaj paub qhia txoj xov zoo rau lawv. Muaj qee lub sij hawm, tej txhia hnov lus paj lus cua txog peb txoj kev ntseeg lawv thiaj xav nrog peb sib cav los sis lawv tsis ntseeg tej uas peb qhia ntawd. (Tes Hauj Lwm 28:22) Tsis tas li ntawd, peb nyob rau tiam kawg ces yuav muaj coob leej ntau tus “tsis zam txim rau lwm tus” thiab yuav ‘ua neeg tsiv tsaim.’ (2 Timautes 3:1, 3) Tej zaum koj twb xav dua lawm tias, ‘Yuav ua li cas kuv thiaj tsis hais lus tshawv tshawv rau tus uas tab tom hais lus los twm kuv txoj kev ntseeg?’ Qhov uas yuav pab tau koj yog ua lub siab mos siab muag. Tus uas muaj lub siab mos tsis chim sai tiam sis tswj nws lub siab thaum lwm tus hais lus twm nws los sis tsis paub tias yuav teb li cas rov qab. w23.09 14 ¶1-2

Muaj qee lub sij hawm Yehauvas lub koom haum yeej qhuab ntuas kom peb ceev faj qho yam thiaj pab tau peb. Xws li, lawv ceeb toom kom peb tsis txhob ntshaw nyiaj txiag thiab tsis txhob ua tej yam uas hla Yehauvas tej kev cai. Yog peb cia Yehauvas ua tus coj peb txoj hau kev ces peb yuav tau txais ntau yam zoo. (Yaxayas 48:17, 18; 1 Timautes 6:9, 10) Yehauvas yeej yuav siv tib neeg los coj nws cov tib neeg rau lub sij hawm muaj kev txom nyem loj kawg nkaus thiab thaum 1,000 xyoo. Ua li peb puas yuav mloog lus rau lub sij hawm ntawd? Yuav yooj yim rau peb mloog Yehauvas lus dua yog tias peb twb xyaum tam sim no lawm. Yog li ntawd, cia Yehauvas ua tus coj peb txoj hau kev, tab txawm nws yuav siv cov txiv neej uas nws xaiv los saib xyuas peb. (Yaxayas 32:1, 2; Henplais 13:17) Yog peb mloog Yehauvas lus ces nws yuav coj peb kom tsis txhob muaj ib yam dab tsi los rhuav tau peb txoj kev sib raug zoo nrog nws thiab nws yuav pab kom peb muaj txoj sia ntev dhawv mus ib txhis hauv lub qab ntuj tshiab. w24.02 25 ¶17-18

Tus tub txib Povlauj yeej txaus siab ua Yehauvas tes hauj lwm tiam sis yeej tsis yooj yim. Povlauj mus ncig deb heev thiab lub caij uas nws nyob yeej tsis yooj yim mus rau ub rau no. Thaum Povlauj mus ncig ntawd, muaj qee lub sij hawm muaj “dej nyab” thiab nws raug ‘tub sab ntaus.’ Tsis tas li ntawd, nws kuj raug cov neeg uas tawm tsam muab nws ntaus. (2 Kauleethaus 11:23-27) Txawm Povlauj txaus siab hlo pab cov kwv tij ntseeg los lawv twb tsis ris nws txiaj ntsig li. (2 Kauleethaus 10:10; Filipis 4:15.) Muaj dab tsi pab tau Povlauj rau siab ntso teev tiam Yehauvas? Ib qho uas pab tau nws yog nyeem Vajtswv Txoj Lus thiab xav txog tej uas nws raug, nws thiaj paub txog Yehauvas tus xeeb ceem. Nws thiaj xam pom tias Yehauvas hlub nws heev. (Loos 8:38, 39; Efexaus 2:4, 5) Yog li ntawd, nws thiaj li tig los hlub Yehauvas kawg nkaus li. Povlauj qhia nws txoj kev hlub rau Yehauvas los ntawm qhov uas nws rau siab ntso “pab cov ntseeg.”​—Henplais 6:10. w23.07 9 ¶5-6

Muaj coob leej ntau tus xam pom tias yuav tsum muaj nom tswv tsa cai rau sawv daws coj thiab yuav tau mloog ib txhia cai uas “tej nom tswv” tsa. Txawm li ntawd los cov tib neeg no tsuas mloog tej kev cai lawv xav mloog xwb. Nyob rau hauv phau Vajlugkub hais tias tib neeg tej nom tswv ua rau tib neeg raug kev txom nyem, yog Xatas kav, thiab yuav raug puas tsuaj sai sai tom ntej no. (Ntawv Nkauj 110:5, 6; Laj Lim Tswv Yim 8:9; Lukas 4:5, 6) Tsis tas li ntawd, kuj hais ntxiv tias “yog peb tawm tsam tej nom tswv ces twb yog peb tawm tsam Vajtswv ntag.” Tam sim no Yehauvas haj tseem cia muaj tib neeg tej nom tswv los mus tswj teb kav chaw thiab Yehauvas xav kom peb yuav tsum mloog lawv lus. Yog li ntawd, peb yuav tau “muab rau txhua tus raws li tsim nyog muab,” xws li them se, saib taus, thiab mloog lus. (Loos 13:1-7) Tej zaum peb yuav saib tias ib tsab cai twg tsis ncaj ncees, tsis raws li lub siab xav los sis kim heev tiam sis Yehauvas xav kom peb mloog tsuav tsis txhob hla nws tej kev cai.​—Tes Hauj Lwm 5:29. w23.10 8 ¶9-10

Thaum Xaxoos nyuam qhuav yug los, cov Filitees kav cov Ixayees thiab ua nruj ua tsiv heev rau lawv. (Cov Thawj 13:1) Cov Ixayees thiaj ua neej txom nyem ntsuav. Yehauvas thiaj li txib Xaxoos mus “pab tso cov Yixalayees kom dim ntawm cov Filitees txhais tes.” (Cov Thawj 13:5) Nws yuav tau tso siab rau Yehauvas tiag tiag li. Muaj ib zaug, cov Filitees tuaj ntes Xaxoos ntawm lub nroog Lehis hauv lub xeev Yudas. Cov neeg nyob hauv Yudas ntshai heev, lawv thiaj txiav txim siab muab Xaxoos khi coj mus cob rau cov Filitees. (Cov Thawj 15:9-13) Thaum ntawd, Yehauvas lub hwj huam “ua rau nws muaj zog heev,” nws thiaj li nriaj ua rau tej hlua tu tas. Nws txawm ‘pom ib lub pob txha puab tsaig nees luav uas tseem tshiab khiv’ thiab muab coj los ntaus cov Filitees tuag li 1,000 leej txiv neej!​—Cov Thawj 15:14-16. w23.09 2 ¶3-4

Peb zoo siab uas Yehauvas twb qhia peb txog nws lub ntsiab hauv phau Vajlugkub zuj zus los lawm. Yehauvas muaj ntau txoj kev los ua kom muaj tiav raws li nws lub ntsiab. (Paj Lug 16:4) Thiab thaum kawg tej uas Yehauvas ua yuav nyob mus ib txhis. Ua li Yehauvas lub ntsiab yog dab tsi, thiab nws tau hloov li cas kom muaj tiav raws li nws lub ntsiab? Vajtswv qhia thawj nkawm niam txiv tias nws lub ntsiab yog li cas. Vajtswv hais tias: ‘Neb cia li muaj tub muaj ki kom coob, neb tej xeeb ntxwv yuav huam vam mus nyob thoob plaws txhua qhov chaw kom puv ntiaj teb thiab lawv yuav kav tag nrho lub ntiaj teb . . . thiab txhua tsav yam tsiaj uas nyob hauv ntiaj teb.’ (Chiv Keeb 1:28) Thaum Adas thiab Evas nkawd tsis mloog Vajtswv lus, thiaj ua rau tib neeg muaj kev txhaum. Txawm li ntawd los Yehauvas lub ntsiab tsis hloov. Nws nrhiav dua lwm txoj kev los mus ua kom muaj tiav raws li nws lub ntsiab. Nws tau txiav txim siab tsa ib lub Nceeg Vaj saum ntuj los mus ua kom muaj tiav raws li nws lub ntsiab rau tib neeg thiab lub ntiaj teb ntev los lawm.​—Mathais 25:34. w23.10 20 ¶6-7

Yehauvas yeej yuav pab kom peb peem dhau. Tej zaum yuav tsis yooj yim vim peb muaj lub siab pheej ntshaw plias ua tej yam tsis zoo tau ntev loo lawm. Muaj qee lub sij hawm peb yuav saib qhov uas peb ntshaw plias mus ua tej yam tsis zoo ntawd nyuaj tshaj li tej uas tus tub txib Petus raug. Tiam sis Yehauvas yeej yuav pab kom peb ua tiag kom dhau. (Ntawv Nkauj 94:18, 19) Xws li muaj ib tug kwv tij, thaum nws tsis tau los ntseeg Yehauvas, nws yog ib tug txiv neej deev txiv neej. Nws hloov nws lub neej los coj raws li tej lus hauv phau Vajlugkub. Txawm li ntawd los nws tseem muaj lub siab ntshaw plias rov mus ua tej yam tsis zoo. Muaj dab tsi thiaj li pab kom nws peem dhau tej no? Nws hais tias: “Yehauvas yog tus pab peb. Vim Yehauvas muab nws lub hwj huam dawb huv . . . , kuv thiaj li ua tau lub neej uas haum Yehauvas siab . . . , Yehauvas haj tseem siv kuv ua ntau yam, thiab tab txawm kuv muaj lub siab ntshaw plias ua yuam kev los nws haj tseem txhawb kuv tas zaj tas zog.” w23.09 23 ¶12

Nej cov kwv tij uas tseem hluas, nej yuav tau siv zog nej thiaj ua tau ib tug Khixatias uas paub tab. Nej yuav tau xyaum cov uas coj zoo, muaj kev txawj ntse, ua ib tug uas luag tso siab rau, paub ua neej, thiab npaj rau yav tom ntej. Thaum koj xav txog tej uas koj yuav tau ua yav tom ntej, tej zaum koj yuav xav tias nyuaj heev. Tiam sis koj yeej ua tau xwb. Nco ntsoov tias Yehauvas yeej xav pab koj tiag tiag. (Yaxayas 41:10, 13) Koj cov kwv tij thiab nkauj muam hauv lub koom txoos los yeej xav pab koj thiab. Thaum koj loj hlob ua ib tug txiv neej Khixatias uas paub tab lawd, koj yuav zoo siab thiab txaus siab heev. Peb hlub nej heev kawg li cov kwv tij hluas! Peb thov Yehauvas foom koob hmoov rau qhov uas nej rau siab ntso npaj kom nej ua tau ib tug txiv neej Khixatias uas paub tab. w23.12 29 ¶19-20

Cia peb ua piv txwv li no. Koj tab tom nrog ib co kwv tij nkauj muam sib sau ua ke. Nej nyob sov siab so lom zem heev thiab nej yees duab ua ke. Tsis yog yees ib daim xwb tiam sis yees ob peb daim. Thaum koj ua tib zoo tshuaj cov duab, koj ho pom ib daim duab uas muaj ib tug kwv tij tsis nco qab luag ntxhi lawm. Koj thiaj muab daim duab ntawd pov tseg es khaws ob daim zoo zoo uas sawv daws luag ntxhwb ntxhi. Feem ntau peb yeej nco tau lub sij hawm peb nrog peb cov kwv tij nkauj muam nyob luag ntxhwb ntxhi. Tiam sis muaj tej thaud ib tug kwv tij los sis ib tug muam yuav hais tau los sis ua tau tej yam uas siab peb. Puas tsim nyog peb cim ntsoov qhov ntawd cia? Zoo rau peb muab qhov ntawd pov tseg ib yam li peb muab cov duab pov tseg. (Efexaus 4:32) Peb kuj ua tau li no es nco txog cov sij hawm uas peb muaj nrog nws ua ke luag ntxhwb ntxhi. Cov sij hawm ntawd yog cov uas peb xav muab cim cia mus li. w23.11 12-13 ¶16-17

Povlauj tus nru lus uas hais hauv nqe no, yog kom cov poj niam paub txaj muag es tsis txhob hnav tej tsoos uas tsis tsim nyog hnav uas yuav ua rau lwm tus xav yuam kev. Peb qhuas nej cov muam uas hnav tej tsoos uas tsim nyog hnav xwb! Kev thoob tsib kuj yog ib qho yeeb yam uas cov muam yuav tsum muaj. Tus neeg thoob tsib zoo li cas? Tus neeg thoob tsib yog tus uas paub qhov zoo thiab tsis zoo, tiam sis yeem txiav txim siab ua qhov zoo. Anpinkayis yog ib tug uas zoo li ntawd. Thaum nws tus txiv tau txiav txim siab ua ib yam uas yuav ua rau nws lub cuab lub yig raug kev puas tsuaj, nws txawm nrhiav kiag kev los pab. Vim nws yog ib tug uas thoob tsib, nws thiaj cawm tau nws lub cuab lub yig. (1 Xamuyees 25:14-23, 32-35) Yog peb thoob tsib ces peb yuav paub tias thaum twg zoo rau peb hais lus thiab thaum twg tsis zoo. Thiab kuj yuav pab kom peb paub seb thaum twg zoo rau peb pab lwm tus thiab tsis zoo.​—1 Thexalaunikas 4:11. w23.12 20 ¶8-9

Tus tub txib Povlauj sau cov lus no xa mus rau lub koom txoos nyob rau hauv Loos. Nyob rau hauv, muaj ib co kawm txog Yehauvas thiab Yexus nkawd ces txawm muaj kev ntseeg thiab los ntseeg Yehauvas. Vim lawv muaj kev ntseeg, “Vajtswv thiaj suav tias [lawv] ncaj ncees” thiab muab lub hwj huam dawb huv los xaiv lawv. (Loos 5:1) Lawv tau txais ib txoj kev vam kev cia siab zoo kawg li. Tom qab no Povlauj sau ib tsab ntawv mus rau cov xaiv tseg hauv Efexaus txog txoj kev vam kev cia siab uas Vajtswv tau muab rau lawv. Lawv yuav tau txais “tej qub txeeg qub teg ci ntsa iab uas Vajtswv pub rau cov xov dawb.” (Efexaus 1:18) Thiab Povlauj kuj hais mus rau cov nyob hauv Kaulauxis seb thaum twg lawv mam li tau txais lawv tej nqi zog. Nws hais tias yog ‘txoj kev vam uas khaws cia saum ntuj ceeb tsheej rau nej.’ (Kaulauxis 1:4, 5) Cov xaiv tseg txoj kev vam kev cia siab yog nyob mus ib txhis saum ntuj ceeb tsheej thiab nrog Khetos kav.​—1 Thexalaunikas 4:13-17; Tshwm Sim 20:6. w23.12 9 ¶4-5

Lo lus “tsom kwm” hauv nqe no yog siv rau cov tub rog uas tsom kwm lub nroog kom txhob muaj lwm tus tuaj ntaus tau. Cov tib neeg uas nyob rau hauv lub nroog ntawd nyob tso siab lug vim lawv paub hais tias tej tub rog yuav tiv thaiv lawv. Zoo ib yam li ntawd, yog hais tias Vajtswv txoj kev siab tus tsom kwm peb lub siab thiab peb txoj kev xav ces peb lub siab yuav tus yees thiab tsis txhawj ntshai ib yam dab tsi. (Ntawv Nkauj 4:8) Txawm tias tej teeb meem uas peb raug tsis hloov nthawv nthav tam sid los nco ntsoov tias Hanas yeej muaj lub siab tus yees txawm nws tej teeb meem tseem nyob li qub. (1 Xamuyees 1:16-18) Thaum peb muaj lub siab tus ces peb yuav txiav txim siab tau zoo dua. Peb yuav tau ua li cas? Yav thaum ub, thaum ib lub nroog twg muaj teeb meem, cov pej xeem yeej mus qhia rau cov tub rog xwv cov tub rog thiaj paub tiv thaiv tau lawv. Zoo tib yam li ntawd, peb kuj yuav tau thov kom Yehauvas pab peb. Zoo rau peb thov tag thov thiab, mus txog thaum peb muaj lub siab tus yees. (Lukas 11:9; 1 Thexalaunikas 5:17) Yog tias koj tab tom raug ib yam teeb meem twg los kav tsij thov Vajtswv kam tiag, Vajtswv yeej yuav muab lub siab tus yees rau koj.​—Loos 12:12. w24.01 21 ¶5-6

Yexus thev dhau kev tsim txom, kev thuam, thiab kev iab liam los daws nws Leej Txiv lub npe kom dawb huv. Nws paub tias nws twb ua txhua yam li nws Txiv tau hais lawm ces nws yeej tsis ntshai tsam nws ho ua rau nws Txiv poob ntsej muag li. (Henplais 12:2) Nws kuj paub tias Xatas yog tus uas tsim tej kev lim hiam ntawd rau nws. (Lukas 22:2-4; 23:33, 34) Xatas vam tias tej ntawd yuav ua rau Yexus tso Yehauvas tseg tiam sis tsis muaj raws li Xatas lub siab xav! Yexus ua tau pov thawj tias Xatas yog tus niag dag uas lim hiam heev, thiab Yehauvas yeej muaj cov uas muab siab npuab nws uas raug kev sim loj npaum li cas los tsis tso nws tseg! Koj puas xav ua rau koj tus Vaj Ntxwv Yexus zoo siab? Rau siab ntso qhuas Yehauvas lub npe, thiab mus pab lwm tus kom paub tias Yehauvas zoo npaum li cas. Yog koj ua li ntawd ces twb yog koj xyaum Yexus. (1 Petus 2:21) Thiab koj kuj ua rau Yehauvas zoo siab thiab ua tau pov thawj tias Xatas yog ib tug niag dag uas ntsej muag tuab heev! w24.02 11-12 ¶11-13

Tsib xyoos dhau los no, muaj tshaj li ib plhom leej los ua kev cai raus dej ua Yehauvas ib tug Tim Khawv. Thaum koj cob koj tus kheej rau Yehauvas twb yog koj xaiv los ua Yexus ib tug thwj tim. Qhov uas koj ua raws li Vajtswv lub siab nyiam yuav yog yam uas tseem ceeb tshaj hauv koj lub neej. Tus Khixatias yuav tsum ua dab tsi? Yexus hais tias: “Yog leej twg xav nrog kuv mus, tus ntawd yuav tsum tsis txhob ua raws li nws lub siab nyiam.” (Mathais 16:24) Thaum koj muab koj tus kheej cob rau Yehauvas lawd, txhua yam uas tsis haum Yehauvas siab koj yuav tsis ua lawm. (2 Kauleethaus 5:14, 15) Yog li ntawd tsis txhob mus ua “tej uas neeg lub siab nyiam ua,” xws li kev nkauj kev nraug. (Kalatias 5:19-21; 1 Kauleethaus 6:18) Tej uas Vajtswv txwv no puas yog ua kom nyuaj koj xwb? Tsis yog. Yog tias koj hlub Yehauvas thiab ntseeg tias nws txoj kev cai zoo rau koj ces yeej tsis nyuaj rau koj li.​—Ntawv Nkauj 119:97; Yaxayas 48:17, 18. w24.03 2 ¶1; 3 ¶4

Yehauvas muab nws lub hwj huam dawb huv rau cov uas nws txaus siab rau. (Mathais 12:18) Xav txog lo lus nug no, ‘Kuv puas coj tau tej yeeb yam ntawm Vajtswv lub hwj huam hauv kuv lub neej?’ Koj puas pom tias tom qab koj los paub Yehauvas, koj rub tau koj lub siab ntev dua tuaj? Thaum koj yim huab coj tau tej yeeb yam ntawm lub hwj huam ces koj yim huab pom tias Yehauvas txaus siab rau koj! Tus nqi txhiv tsuas theej tau cov uas Yehauvas txaus siab rau xwb. (1 Timautes 2:5, 6) Tiam sis yog peb tseem xav tias Yehauvas tsis txaus siab rau peb tab txawm peb twb ntseeg tias Yexus los tuag theej peb lub txhoj thiab peb twb ua kev cai raus dej tas lawm, peb yuav tau ua li cas? Nco ntsoov tias peb ntseeg tsis tau peb lub siab tiam sis peb ntseeg tau Yehauvas. Nws suav tias cov uas muaj kev ntseeg rau tus nqi txhiv yog cov uas ncaj ncees thiab yuav foom koob hmoov rau lawv.​—Ntawv Nkauj 5:12; Loos 3:26. w24.03 30 ¶15; 31 ¶17