Lub 12 Hlis

Yehauvas yog tus Vajtswv uas ‘muaj hwj chim loj kawg nkaus.’ (Tshwm Sim 1:8) Nws yeej muaj hwj chim tsa tau cov tuag kom sawv rov qab los thiab muaj hwj chim kov yeej tus yeeb ncuab uas yog txoj kev tuag. (1 Kauleethaus 15:26) Muaj ib yam ntxiv uas pab tau peb paub tias Vajtswv muaj hwj chim tsa tau cov tuag yog Vajtswv cim tau ib puas tsav yam. Nws tis npe rau txhua lub hnub qub. (Yaxayas 40:26) Nws yeej nco ntsoov txhua tus uas tau nruam sim lawm. (Yauj 14:13; Lukas 20:38) Tsis tas li ntawd, nws yeej cim tau txhua txhua yam txog cov uas nws yuav tsa rov qab los, tsis hais tus tib neeg tus xeeb ceem, tej yam nws ua hauv lub neej, thiab tus neeg ntawd tej cim xeeb huv tib si. Peb ntseeg tias yav tom ntej Yehauvas yuav tsa cov tuag sawv rov qab los, yeeb vim yog nws muaj lub siab thiab nws muaj hwj chim tsa tau lawv rov muaj sia dua. Tsis tas li ntawd, yav puag thaum ub Yehauvas twb tau tsa neeg sawv rov muaj sia dua lawm. Nws twb pub hwj chim rau ob peb tug txiv neej thiab Yexus lawv tsa tau cov tuag. w23.04 9-10 ¶7-9

Yog peb mam xav mam hais thiab hais lus mos mos ces tib neeg yuav kheev mloog peb dua thiab nrog peb sib txuas lus. Tiam sis yog muaj ib tug twg xav sib cam kom yeej kom swb los sis thuam peb txoj kev ntseeg ces peb tsis tas yuav nrog nws tham ntxiv lawm los tau. (Paj Lug 26:4) Feem ntau tib neeg yeej tsis coj li ntawd, ib txhia kuj txaus siab hlo mloog thiab. Yog peb muaj lub siab mos siab muag, yuav pab tau peb lawm hov ntau. Thov Yehauvas kom ntxiv dag ntxiv zog rau peb kom muaj lub siab mos muag teb cov uas muaj lus nug los sis cov uas thuam peb txoj kev ntseeg. Nco ntsoov tias peb tus cwj pwm uas hais lus mos lus muag yuav ua rau kom tsis txhob muaj lus sib cav sib ceg. Qhov uas peb hais lus mos mos thiab saib taus lwm tus yuav rub tau cov uas mloog peb hloov lawv tej kev xav txog peb thiab tej uas hais nyob hauv phau Vajlugkub. Peb ‘yuav tsum npaj tos txhua lub sij hawm’ thaum lwm tus nug txog peb txoj kev ntseeg thiab peb yuav tau ua lub siab mos siab muag thiab saib taus lawv thaum peb teb lawv. (1 Petus 3:15) Cia kom luag pom tias peb yog ib tug neeg uas muaj siab mos siab muag! w23.09 19 ¶18-19

Peb yuav tham txog plaub qho uas qhia tias tus neeg siab ntev zoo li cas. Qhov ib, tus neeg siab ntev tsis chim sai. Thaum muaj neeg txhob txwm ua kom nws npau taws los nws ua tau siab tus tus thiab thaum nws muaj kev ntxhov siab los nws tsis ua kub ua heev rau lwm tus. (Khiav Dim 34:6) Qhov ob, tus neeg siab ntev ua tau siab tus. Thaum nws tos ib yam dab tsi ntev dhau lawm los nws tsis ntxhov siab thiab tsis ua rau nws nyob tsis tswm. (Mathais 18:26, 27) Qhov peb, tus neeg siab ntev tsis maj. Thaum muaj ib teg hauj lwm tseem ceeb, tus neeg siab ntev yuav tsis maj thiab tsis lam tau lam ua tsuag tsuag kom tas xwb. Tiam sis nws yuav siv sij hawm los ua zoo npaj tias nws yuav ua li cas. Thiab nws npaj sij hawm kom txaus los ua tes hauj lwm ntawd kom tiav log. Qhov plaub, tus neeg siab ntev yuav ua tiag nyiaj nws tej teeb meem thiab tsis yws daws dom. Tus neeg siab ntev yuav xav txog tej uas zoo hauv nws lub neej xwb thiab rau rau siab teev tiam Yehauvas li nws ua tau. (Kaulauxis 1:11) Txhua tus Khixatia yuav tau ua li plaub qho uas hais tag no. w23.08 20-21 ¶3-6

Ib qho uas tiv thaiv tau peb lub siab yog peb paub tias Yehauvas paub txhua yam uas peb xav hauv peb lub siab. Qhov no qhia tias Yehauvas tsis yog pom peb sab nraud li neeg pom xwb tiam sis nws paub peb lub siab tias peb zoo li cas tiag. Yog peb nco ntsoov Yehauvas tej lus ntuas uas yuav pab tau peb nyob mus ib txhis, ces tej kev phem kev qias thiab tej lus dag ntawm Xatas thiab nws lub qab ntuj yuav ntxias tsis tau peb mus ua phem ua qias. (Yauhas 4:14; 1 Yauhas 5:18, 19) Thaum peb paub Yehauvas zoo zuj zus ces peb yuav hlub thiab hwm nws. Peb yuav tsis xav ua kom mob nws siab. Tus muam Matam (Marta) hauv teb chaws Khau-esa (Croatia) hais tias: “Kuv paub tias thaum yus lub siab xav mus ua txhaum mas yeej nyuaj heev rau yus tswj yus lub siab. Tiam sis qhov uas kuv ntshai tsam Yehauvas tu siab tiv thaiv tau kuv.” Matam hais tias qhov uas pab tau nws tsis mus ua plees ua yi yog nws ua tib zoo xav tias yog nws mus tej ntawd nws yuav ntsib teeb meem li cas. Peb yeej ua tau li nws thiab. w23.06 20-21 ¶3-4

Yexus paub tias Yehauvas lub ntsiab yog los mus daws Yehauvas lub npe kom dawb huv. Vim li no Yexus thiaj qhia nws cov thwj tim thov Vajtswv tias: “Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe.” (Mathais 6:9) Yexus to taub tias qhov ntawd yog qhov teeb meem loj tshaj plaws uas raug txhua leej txhua tus. Tsis muaj ib tug twg, tsis hais cov saum ntuj los sis cov hauv ntiaj teb, yuav ua tau ntau npaum li Yexus ua los daws Yehauvas lub npe kom dawb huv. Txawm li ntawd los thaum Yexus raug ntes, nws cov yeeb ncuab tseem iab liam tias nws ua saib tsis taus nws Leej Txiv thiab. Yexus paub tias qhov uas ua saib tsis taus nws Leej Txiv lub npe uas dawb huv yog ib lub txim loj heev. Nws txhawj tias lawv yuav muab lub txim ntawd rau nws ris. Tej zaum twb yog vim li no Yexus thiaj “nyuaj siab kawg nkaus li” ua ntej nws raug ntes.​—Lukas 22:41-44. w24.02 11 ¶11

Thaum peb sib tw khiav kom tau txoj sia, peb yuav tsum hlub Yehauvas thiab Yexus nkawd tshaj peb hlub peb tsev neeg. (Mathais 10:37) Tiam sis kuj tsis yog hais tias peb yuav tau tso peb lub luag hauj lwm rau peb tsev neeg tseg peb thiaj li ua tau haum Yehauvas thiab Yexus nkawd siab. Rau qhov yuav kom peb ua tau haum nkawd siab, peb yuav tsum ua peb tes hauj lwm rau peb tsev neeg. (1 Timautes 5:4, 8) Thaum peb ua li no, peb yeej zoo siab dua vim Yehauvas yog tus tsim peb ces nws yeej paub tias peb tsev neeg yuav zoo siab dua, yog ob niam txiv paub sib hlub sib hwm, cov niam cov txiv hlub thiab cob qhia lawv cov me nyuam, thiab cov me nyuam mloog lawv niam lawv txiv lus. (Efexaus 5:33; 6:1, 4) Txawm koj yog tus txiv, tus poj niam, los sis tus me nyuam los yeej pab tau koj dua yog koj ua li cov tswv yim hauv phau Vajlugkub qhia es tsis txhob ua li koj lub siab xav tias yog xwb, los sis ua li cov neeg hauv koj lub zej lub zos ua xwb, los sis ua li cov neeg txawj ntse hais kom ua xwb. Kav tsij siv peb tej ntaub ntawv Vajlugkub thiab tej yeeb yaj kiab los pab kom koj paub siv tej hauv paus ntsiab lus hauv phau Vajlugkub. w23.08 28 ¶6-7

Zoo rau ib tug muam Khixatias xyaum kam tiag kom paub ua neej. Tej yam uas nws kawm txij thaum me me los yeej yuav tsis tag dawb tag do thiab haj tseem yuav pab nws lub neej mus li. Xwv li, xyaum txawj nyeem thiab sau ntawv. Muaj tej haiv neeg suav tias tsis tseem ceeb ua luaj twg rau cov poj niam txawj nyeem thiab sau ntawv. Txawm li ntawd los txhua tus Khixatias yuav tau txawj nyeem thiab sau ntawv. (1 Timautes 4:13) Txhob cia ib yam dab tsi los tav tau koj txoj hau kev kom paub nyeem thiab paub sau ntawv. Txawj nyeem thiab sau ntawv yeej yuav pab tau koj lub neej xwb xwb li. Xws li yuav pab kom koj nrhiav tau hauj lwm los yug koj. Tsis tas li ntawd xwb, yuav yooj yim dua rau koj tshawb nrhiav Vajtswv Txoj Lus thiab txawj qhia lwm tus. Tiam sis qhov uas tseem ceeb tshaj yog yuav pab koj txav ze rau Yehauvas tshaj li yav tag los vim koj txawj nyeem Nws txoj lus lawm, thiab ua tib zoo xav txog tej uas koj nyeem.​—1 Timautes 4:15. w23.12 20 ¶10-11

Thov Yehauvas pab thaum muaj kev sim siab. Peb yog noob txaug neeg txhaum ces peb yuav tau tswj lub siab uas pheej liab qas khiav mus ua tej yam tsis zoo. Tsis tas li ntawd, Xatas tseem tsub ntxiv kom huab yam nyuaj. Ib yam uas Xatas tsub ntxiv ntawd yog tej peb saib los sis mloog. Nws xav kom tej yam vuab tsuab uas peb pom los sis hnov ntawd txheem mus rau peb lub siab lub ntsws xwv peb thiaj mus ua kev txhaum loj. (Malakaus 7:21-23; Yakaunpaus 1:14, 15) Yuav kom peb tseg taus kev sim siab peb yuav tau cia Yehauvas pab peb. Yexus tau hais cov lus no thaum nws qhia seb yuav thov Vajtswv li cas: “Thov tsis txhob cia peb qaug rau tej kev sim siab tiam sis thov cawm peb dim ntawm Xatas txhais tes.” (Mathais 6:13) Yehauvas yeej tos tsis hnyu yuav pab peb tiam sis peb yuav tau taij thov nws. Tom qab peb thov Vajtswv tag lawm, peb yuav tau ua raws nkaus li tej lus uas peb thov ntawd. w23.05 6-7 ¶15-17

Thaum ib khub niam txiv saib nkawd txoj kev sib raug zoo nrog Yehauvas muaj nuj nqis ces nkawd yuav txaus siab hlo ua raws li tej lus nws qhia xwv nkawd thiaj kho tau tej teeb meem hauv nkawd lub neej. Cov uas muaj kev ntseeg yuav ua npaum li lawv ua tau kom xyaum tau Yehauvas thiab nws tej yeeb yam xws li ua siab dawb siab zoo, ua siab ntev, thiab ib tug zam txim rau ib tug. (Efexaus 4:32–5:1) Yog nkawd ob leej coj yam li no yuav ua rau nkawd txoj kev sib hlub loj zuj zus. Muaj ib tug muam npe hu ua Linam (Lena) sib yuav tshaj li 25 lub xyoos tau hais li no tias, “Yeej yooj yim rau yus hlub thiab hwm ib tug neeg uas muaj kev ntseeg.” Cia peb mus tham txog ib khub niam txiv uas nyob hauv phau Vajlugkub. Thaum Yehauvas yuav tau xaiv ib khub niam txiv los mus ua tus Mexiyas niam thiab txiv, tag nrho Daviv cov xeeb ntxwv, nws xaiv Yauxej thiab Maivliag nkawd. Vim li cas nws ho xaiv nkawd? Vim nkawd muaj kev sib raug zoo nrog Yehauvas thiab nws paub hais tias nkawd yuav ua nkawd lub neej kom haum nws siab. w23.05 21 ¶3-4

Txawm Yexus yog peb tus Thawj Coj thiab nws tsis muaj kev txhaum los cov kwv tij uas nws xaiv los mus coj haj tseem yog noob txaug neeg txhaum. Tej zaum peb yuav tsis tshua xav mloog lawv hais thaum lawv kom peb ua ib yam twg. Tus tub txib Petus yeej tsis tshua xav mloog thaum ib tug tub txib saum ntuj kom nws noj tej tsiaj uas Mauxes Txoj Kev Cai suav tias tsis huv. Petus pheej yig tsis kam noj peb zaug! (Tes Hauj Lwm 10:9-16) Vim li cas nws ho yig? Rau qhov Petus tsis nkag siab tej uas hais kom nws ua ntawd. Tiam sis tus tub txib Povlauj ho mloog cov laus neeg nyob hauv lub nroog Yeluxalees thaum lawv txib kom nws coj plaub tug txiv neej mus rau lub tuam tsev es ua kev cai ntxuav kom qhia tias nws coj Mauxes Txoj Kev Cai. Povlauj paub hais tias cov ntseeg yeej tsis coj Mauxes Txoj Kev Cai lawm thiab nws paub tias nws tsis tau ua dab tsi txhaum. Txawm li ntawd los “Hnub tom qab Povlauj thiaj coj cov txiv neej ntawd nrog nws mus ua kev cai ntxuav.” (Tes Hauj Lwm 21:23, 24, 26) Qhov uas Povlauj mloog lawv hais no pab tau kom sawv daws nyob sib haum xeeb.​—Loos 14:19, 21. w23.10 10 ¶15-16

Yuav kom peb ua phooj ywg zoo nrog ib tug twg peb yuav tsum txawj sib hwm. Yog li ntawd, cov uas xav ua phooj ywg zoo nrog Yehauvas yuav tsum “hwm” nws. (Ntawv Nkauj 25:14) Txawm yog peb nyuam qhuav los teev tiam Vajtswv Yehauvas los sis peb twb teev tiam nws ntev lawm los peb txhua leej txhua tus yuav tsum paub hwm nws. Peb yuav hwm Yehauvas li cas? Tus uas hwm Yehauvas yuav tsis ua ib yam dab tsi los rhuav nws txoj kev sib raug zoo nrog Yehauvas. Yexus hwm Yehauvas li ntawd. (Henplais 5:7) Nws tsis ntshai tias Yehauvas yuav ua phem rau nws. (Yaxayas 11:2, 3) Tiam sis nws hlub Yehauvas heev thiab xav mloog Yehauvas lus xwb. (Yauhas 14:21, 31) Peb los yeej hwm thiab hlub Yehauvas ib yam li Yexus thiab vim Yehauvas hlub peb, nws txawj ntse, nws coj ncaj ncees, thiab nws muaj hwj chim tshaj plaws. Peb paub tias Yehauvas hlub peb nws thiaj xav kom peb mloog nws lus. Thaum nws cob qhia peb es peb mloog nws lus ces peb ua rau nws zoo siab tiam sis yog peb tsis mloog nws lus ces peb yuav ua rau nws tu siab.​—Ntawv Nkauj 78:41; Paj Lug 27:11. w23.06 14 ¶1-2; 15 ¶5

Thaum Vaj Ntxwv Uxiyas muaj hwj chim lawm, nws tsis nco qab tias Yehauvas yog tus uas pub tej ntawd rau nws. Peb khaws tau dab tsi los ntawm qhov no? Peb yuav tau nco ntsoov tias Yehauvas yog tus muab txhua yam zoo rau peb ua neej thiab pub peb ua nws tes hauj lwm. Yog li ntawd, peb yuav tau ris Yehauvas txiaj ntsig es tsis txhob khav txog tej yam peb ua tau. (1 Kauleethaus 4:7) Peb yuav tau txo hwj chim thiab xam pom tias peb yog noob txaug neeg txhaum thiab yuav tau muaj lwm tus qhuab ntuas peb. Muaj ib tug kwv tij hnub nyoog nchav kwv lam li 60 lub xyoos sau li no tias: “Kuv yuav tau tsis txhob chim los sis qaug zog thaum lwm tus pom tej yam kuv ua tau tsis yog. Thaum lwm tus qhuab ntuas kuv vim kuv ua tau tej yam tsis zoo, kuv yeej xyaum tiag kom rov ua tau zoo dua thiab ua npaum li kuv ua tau rau Yehauvas.” Thaum peb mloog Yehauvas lus thiab txo hwj chim ces peb lub neej yuav tshav ntuj nrig.​—Paj Lug 22:4. w23.09 10 ¶10-11

Cov ntseeg uas nyob rau Povlauj tiam yuav tau muaj lub siab ntev thev. Lawv kuj muaj teeb meem ib yam li lwm leej lwm tus thiab, tiam sis qhov uas lawv yog ib tug ntseeg kuj tsub teeb meem ntxiv rau lawv. Muaj ib txhia raug tsim txom los ntawm cov Yudais tej thawj coj, cov Loos tej nom tswv, thiab lawv tsev neeg. (Mathais 10:21) Tsis tas li ntawd, nyob rau hauv lub koom txoos los lawv yuav tau ua zoo tshuaj kom cov neeg fav xeeb txhob ntxias tau lawv. (Tes Hauj Lwm 20:29, 30) Cov ntseeg ntawd thev dhau txhua yam huv si. (Tshwm Sim 2:3) Ua li cas lawv ho thev dhau? Lawv xav txog tej tug hauv Vajtswv Txoj Lus zoo li Yauj. (Yakaunpaus 5:10, 11) Lawv thov kom Vajtswv ntxiv dag ntxiv zog. (Tes Hauj Lwm 4:29-31) Thiab lawv tsuas xav ntsoov txog lub caij zoo tom qab lawv thev dhau lawm. (Tes Hauj Lwm 5:41) Peb txhua leej txhua tus yeej yuav thev dhau tib yam nkaus yog tias peb kawm tej yam ntxwv hauv Vajtswv Txoj Lus, kawm tej ntaub ntawv uas Yehauvas lub koom haum luam tawm, thiab xav txog tej peb kawm ntawd. w23.07 3 ¶5-6

Yehauvas thiab Yexus nkawd yeej tsis tso peb tseg. Tom qab tus tub txib Petus tsis lees paub Yexus tas, nws yuav tau txiav txim siab seb nws yuav tso tseg los nws yuav peem kam tiag ua Yexus Khetos ib tug thwj tim. Yexus twb thov Yehauvas kom pab Petus tuav rawv nws txoj kev ntseeg. Yexus qhia rau Petus paub tias Yexus twb thov Vajtswv pab Petus lawm thiab Yexus tso siab tias Petus yuav mus txhawb nws cov kwv tij lub zog. (Lukas 22:31, 32) Ntshe thaum Petus xav txog Yexus cov lus no yuav txhawb nws lub zog heev! Zoo ib yam li ntawd, thaum peb yuav txiav txim siab ua ib yam twg, tej zaum Yehauvas yuav siv cov txwj laus los mus pab kom peb tuav rawv peb txoj kev ntseeg. (Efexaus 4:8, 11) Tib yam li Yehauvas pub rau Petus thiab lwm cov tub txib kom muaj txawm peem, nws yeej yuav saib xyuas kom peb muaj txaus noj txaus haus yog peb muab nws tes hauj lwm tso ua ntej hauv peb lub neej. w23.09 24-25 ¶14-15

Yehauvas yeej paub txhua yam zoo uas peb tau ua, tsis hais loj thiab me. Nws yeej saib tej peb ua rau nqi heev thiab nws yuav them rov rau peb. Yog tias koj tau ua ib tug tub leg num los sis ib tug txwj laus yav tas los. Yehauvas yeej nco ntsoov koj tes hauj lwm uas koj tau ua yav tas los lawm thiab qhov uas koj ua vim koj muaj kev hlub. (1 Kauleethaus 15:58) Nws yeej pom tias koj haj tseem hlub sawv daws. Yehauvas xav kom peb txoj kev hlub rau nws thiab rau lwm tus tob zuj zus. Peb yuav tsav ntxiv tau peb txoj kev hlub rau Yehauvas yog tias peb nyeem nws Txoj Lus, muab coj los ua tib zoo xav, thiab thov nws tsis so. Peb txoj kev hlub rau cov kwv tij nkauj muam yuav tob zuj zus yog peb nrhiav txhua txoj hau kev los mus pab lawv. Thaum peb txoj kev hlub tob zuj zus ces peb yuav txav ze zuj zus rau Yehauvas thiab cov kwv tij nkauj muam. Peb txoj kev sib raug zoo no yuav nyob taus mus ib txhis! w23.07 10 ¶11; 11 ¶13; 13 ¶18

Cov ntseeg nyias yuav tau txiav txim siab rau nyias txoj kev noj qab haus huv. Thaum cov ntseeg xaiv ib txoj kev kho mob twg, lawv yuav tau mloog tej kev cai nyob hauv phau Vajlugkub kom tsis txhob siv ntshav los sis ua neeb ua yaig. (Tes Hauj Lwm 15:20; Kalatias 5:19, 20) Dua li ntawd lawv xav txiav txim siab rau yam kev kho mob twg los tau. Txawm peb xam pom tias ib yam kev kho mob twg zoo dua los peb yuav tau saib taus cov kwv tij nkauj muam es cia lawv txiav txim siab seb hom kev kho mob twg lawv nyiam. Cia peb nco ntsoov plaub yam no rau nruab siab: (1) Tsuas yog Vajtswv lub Nceeg Vaj xwb thiaj yuav kho tau txhua yam kab mob kev nkeeg. (Yaxayas 33:24) (2) Txhua tus ntseeg “nyias yuav tsum ntseeg tias qhov uas nyias xav yog lawm.” (Loos 14:5) (3) Peb tsis txhob txiav txim rau lwm tus tias lawv ua tsis yog los sis ua ib yam dab tsi los txo lwm tus txoj kev ntseeg. (Loos 14:13) (4) Cov ntseeg yuav tsum muaj kev hlub thiab xam pom tias sawv daws sib koom siab hauv lub koom txoos zoo dua li tej uas ib tug twg lub siab xav.​—Loos 14:15, 19, 20. w23.07 24 ¶15

Koj puas saib koj txoj kev sib raug zoo nrog Yehauvas rau nqi? Koj yeej saib rau nqi. Yav puag thaum ub, muaj coob leej ntau tus kuj hlub Yehauvas ib yam nkaus li koj. (Ntawv Nkauj 104:33, 34) Muaj ntau tus yeej ua txhua yam kom tau teev tiam Yehauvas, xws li cov Naxis. Cov Naxis yog cov Ixayees uas kub siab lug muab lawv lub neej coj los ua ib teg hauj lwm tseem ceeb rau Yehauvas. Nyob rau hauv Mauxes Txoj Kev Cai, yeej cia ib tug txiv neej los sis ib tug poj niam muab nws lub neej cob ua ib teg hauj lwm rau Yehauvas ib ncuas sij hawm. (Teev Npe 6:1, 2) Thaum ib tug Ixayees cog lus ua ib tug Naxis, nws yuav tau coj raws li tej kev cai uas lwm cov Ixayees tsis tas coj. Vim li cas ib tug Ixayees ho xav ua ib tug Naxis? Nws xav ua vim nws txoj kev hlub rau Yehauvas thiab nws ris txiaj ntsig rau ntau yam zoo uas nws tau.​—Kev Cai 6:5; 16:17. w24.02 14 ¶1-2

Lo lus “muab siab npuab” yog txhais los ntawm lo lus Henplais uas phau Vajlugkub siv los qhia txog Vajtswv txoj kev hlub rau nws cov phooj ywg. Phau Vajlugkub kuj siv lo lus no los piav txog txoj kev sib hlub uas Vajtswv cov neeg ib leeg muaj rau ib leeg thiab. (2 Xamuyees 9:6, 7) Yog hais tias peb rau siab xyaum tiag ces ntev mus peb yeej yuav muab siab npuab Yehauvas ntau zuj zus ntxiv. Cia peb kawm mus ntxiv seb ho muaj tseeb li no rau Daniyees li cas. Daniyees txoj kev npuab siab rau Yehauvas yeej raug sim tas nws sim neej. Ib zaug yog thaum nws muaj li 90 tawm xyoo. Muaj ib co nom tswv ntxub Daniyees thiab saib tsis taus Daniyees tus Vajtswv ces lawv thiaj sib tuav tswv yim los tua nws. Lawv rhawv ib txoj cai los sim Daniyees seb Daniyees yuav npuab siab rau Yehauvas los npuab siab rau vaj ntxwv. Txoj cai ntawd tsuas txwv tsis pub Daniyees thov Vajtswv li 30 hnub xwb. Tiam sis Daniyees yeej npuab siab rawv rau Yehauvas thiab tsis ua li lawv txoj cai hais.​—Daniyees 6:12-15, 20-22. w23.08 5 ¶10-12

Yehauvas xav kom peb rau siab ntso hlub peb cov kwv tij nkauj muam. Thaum ib tug kwv tij nkauj muam twg ua tau siab tau qes rau peb, cia peb nco ntsoov tias lawv yeej tsis txhob txwm ua rau kom peb mob siab tiam sis twb yog lawv tsis xav tom ntej tom qab xwb. (Paj Lug 12:18) Vajtswv yeej hlub nws cov tib neeg heev tab txawm lawv yog noob txaug neeg txhaum. Nws yeej tsis muab peb txiav tu npawv thaum peb ua yuam kev los sis nws tsis cib nyeej. (Ntawv Nkauj 103:9) Peb ris txiaj ntsig kawg li uas Yehauvas zam txim pub rau peb thiab peb yuav tau xyaum nws tus cwj pwm uas zam lwm tus! (Efexaus 4:32–5:1) Nco ntsoov tias peb yuav tau ncawg peb cov kwv tij nkauj muam rau lub sij hawm kawg no. Yav tom ntej no yuav muaj kev tsim txom heev zuj zus ntxiv. Tej zaum peb yuav raug kaw vim peb txoj kev ntseeg los muaj. Yog muaj li no tshwm sim, peb yuav vam khom peb cov kwv tij nkauj muam ntseeg los pab peb.​—Paj Lug 17:17. w24.03 15-16 ¶6-7

Nyob rau hauv phau Vajlugkub, yeej muaj cov hluas uas muaj ib txoj kev sib raug zoo nrog Yehauvas, ua haum Yehauvas siab, thiab ua lub neej tshav ntuj nrig. Ib tug hluas ntawd kuj yog Daviv. Thaum nws tseem hluas, nws txiav txim siab teev tiam Yehauvas thiab tom qab no nws los ua ib tug vaj ntxwv. (1 Vaj Ntxwv 3:6; 9:4, 5; 14:8) Yog koj kawm txog Daviv lub neej, yuav pab kom koj teev tiam Yehauvas mus li. Ntxiv ntawd, koj kuj kawm tau txog Malakaus los sis Timautes. Nkawd yeej teev tiam Yehauvas thaum tseem hluas thiab rau siab ntso teev tiam nws. Qhov uas koj lub neej yuav zoo thiab tsis zoo yog nyob ntawm koj txoj kev txiav txim siab tam sim no. Yog koj tso siab rau Yehauvas es tsis txhob tso siab rau koj lub tswv yim ces Yehauvas yuav pab koj txiav txim tau qhov zoo qhov yog. Koj yuav ua tau lub neej tshav ntuj nrig. Nco ntsoov tias Yehauvas yeej saib tej uas koj ua rau nws muaj nuj nqis heev. Tsis muaj ib yam dab tsi yuav pauv tau lub neej uas teev tiam peb Leej Txiv Yehauvas. w23.09 13 ¶18-19

Tus tub txib Povlauj yeej paub tias nws cov kwv tij nkauj muam ntseeg yeej yog noob txaug neeg txhaum. Xws li thaum nws nyuam qhuav pib los ntseeg, muaj ib txhia hauv lub koom txoos hauv Yeluxalees kuj tsis ntseeg tias nws yog ib tug thwj tim. (Tes Hauj Lwm 9:26) Muaj ib txhia kuj hais phem txog Povlauj kom ua rau lwm cov tsis txhob ntseeg nws. (2 Kauleethaus 10:10) Povlauj xam pom tias qhov uas ib tug txwj laus ua tau yuam kev yuav txo tau lwm tus lub zog. (Kalatias 2:11, 12) Malakaus uas yog ib tug uas Povlauj paub zoo ua rau Povlauj tu siab heev. (Tes Hauj Lwm 15:37, 38) Yog Povlauj tsis xav nrog cov ua yuam kev rau nws ua ke los tau tiam sis nws saib qhov zoo uas cov kwv tij nkauj muam ua, thiab nws kub siab lug teev tiam Yehauvas. Muaj dab tsi ho pab tau Povlauj ua siab ntev thev? Povlauj hlub cov kwv tij nkauj muam ntseeg kawg nkaus li. Txoj kev hlub uas Povlauj muaj rau lwm tus pab tau kom nws tsis txhob cim ntsoov lwm tus tej kev txhaum tiam sis xam pom qhov zoo ntawm lwm tus xwb. Kev hlub pab tau kom Povlauj zam txim rau lwm tus, nws thiaj hais cov lus nyob rau hauv nqe Vajlugkub rau hnub no. w24.03 15 ¶4-5

Muaj ntau zaj nyob rau hauv phau Vajlugkub qhia tias qhov ua siab mos siab muag ntawd tseem ceeb heev. Xws li zaj uas hais txog Ixaj. Thaum nws mus nyob rau ntawm cov Filitees ciam dej ciam av hauv Nkelales, cov neeg zej zog tuaj muab nws txiv tej qhov tshij txhub tas lawm. Ixaj tsis nrog lawv sib txeeb tiam sis nws thiab nws tsev neeg tsiv mus nyob lwm qhov chaw thiab khawb dua lwm lub qhov tshij. (Chiv Keeb 26:12-18) Tiam sis cov Filitees tseem tuaj txeeb cov dej hauv tej qhov tshij tib yam nkaus. Txawm lawv txeeb npaum li no los Ixaj tsuas xav kom sawv daws nyob sib haum xeeb xwb. (Chiv Keeb 26:19-25) Muaj dab tsi pab tau Ixaj ua lub siab mos siab muag tab txawm lwm tus txhob txwm ua los twm nws? Nws yoog tau nws niam thiab nws txiv nkawd ob tug yam ntxwv. Nws pom nws txiv Anplahas nyiam nrog luag sib haum xeeb thiab nws niam muaj “lub siab mos siab muag thiab muaj lub siab tus yees.”​—1 Petus 3:4-6; Chiv Keeb 21:22-34. w23.09 15 ¶4

Thaum txog caij txog nyoog, Yehauvas thiaj tau xa nws tib leeg Tub los rau hauv lub ntiaj teb los qhia tib neeg txog lub Nceeg Vaj thiab muab nws txoj sia los txhiv tib neeg. Tom qab ntawd Yehauvas thiaj tsa Yexus ciaj sawv rov los mus saum ntuj mus kav Vajtswv lub Nceeg Vaj. Lub ntsiab loj hauv phau Vajlugkub yog Yehauvas yuav siv lub Nceeg Vaj uas Khetos kav los ua kom muaj tiav raws li nws lub ntsiab rau lub ntiaj teb es daws nws lub npe ntawm tej kev iab hiam. Yehauvas lub ntsiab yeej tsis hloov. Nws cog lus tias txhua yam uas nws tau hais lawd yeej yuav muaj xwb xwb li. (Yaxayas 46:10; Henplais 6:17, 18) Lub ntiaj teb yuav hloov ua ib lub vaj kaj siab rau Adas thiab Evas nkawd cov xeeb leej xeeb ntxwv uas zoo tiav tiav lawd tau nyob “kaj siab lug mus ib txhis.” (Ntawv Nkauj 22:26) Tsis tas li ntawd xwb, nws lub ntsiab thaum kawg yog kom txhua tus uas nyob saum ntuj thiab hauv ntiaj teb nyob sib koom siab. Thaum ntawd txhua tus yuav muab siab npuab Yehauvas uas yog tus kav lawv. (Efexaus 1:8-11) Qhov uas Yehauvas yuav ua kom muaj tiav raws li nws lub ntsiab yog ib qho uas zoo tshaj plaws li puas yog? w23.10 20 ¶7-8

Thaum cov neeg Yudais uas nyob hauv lub nroog Npanpiloos mus txog Yeluxalees, lawv ntsib ntau yam kev nyuaj siab, lub teb chaws los nyob tsis tiaj tsis tus. Tsis tas li ntawd xwb, cov teb chaws uas nyob ib ncig lawv los tseem tuaj tawm tsam lawv thiab. Vim li no thiaj nyuaj heev rau lawv tau hau ntsoov kho Yehauvas lub tuam tsev. Yog li ntawd, Yehauvas thiaj txib ob tug cev nws lus uas yog Hakais thiab Xekhaliyas mus txhawb kom cov tib neeg rov kub siab ua Yehauvas tes hauj lwm. Nkawd yeej txhawb tau cov tib neeg kawg li tiag. (Hakais 1:1; Xekhaliyas 1:1) Kwv lam li 50 xyoo tom qab ntawd, cov Yudais uas rov tim Npanpiloos los rov qaug zog heev. Exalas thiaj tau mus ntawm Npanpiloos mus rau hauv Yeluxalees mus txhawb Vajtswv cov tib neeg kom muab Yehauvas txoj kev pe hawm tso ua ntej hauv lawv lub neej. (Exalas 7:1, 6) Hakais thiab Xekhaliyas nkawd cov lus faj lem yeej pab tau Vajtswv cov tib neeg txheej thaud tso siab rau Yehauvas thaum lawv raug kev tawm tsam. Yog li ntawd, cov lus ntawd yeej pab tau peb tso siab tias Yehauvas yuav pab peb thaum peb raug kev nyuaj siab hauv peb lub neej.​—Paj Lug 22:19. w23.11 14-15 ¶2-3

Peb yuav hlub peb cov kwv tij nkauj muam li cas? Qhov uas peb hlub peb cov kwv tij nkauj muam ces yog peb nplig lawv. (1 Thexalaunikas 4:18) Yuav ua li cas txoj kev hlub peb muaj rau peb cov kwv tij nkauj muam thiaj ruaj khov khwb kho? Tsis txhob cim ntsoov tej uas lwm tus ua meem txom peb thiab tsis raws li peb lub siab nyiam tiag tiag. Niaj hnub nim no vim li cas ho tseem ceeb rau peb ib leeg hlub ib leeg? Petus hais tias: ‘Twb yuav txog lub sij hawm uas ib puas tsav yam hauv ntiaj teb no puas tsuaj. Qhov uas tseem ceeb tshaj plaws, . . . nej ib leeg yuav tsum hlub ib leeg tiag tiag.’ (1 Petus 4:7, 8) Vim lub qab ntuj phem no twb yuav dua mus, peb yuav raug dab tsi? Yexus qhia tias: “Txhua haiv neeg yuav ntxub nej vim nej yog kuv cov thwj tim.” (Mathais 24:9) Yuav kom peb thev taus tej kev ntxub ntxaug ntawd, peb yuav tau sib koom siab. Yog peb hlub peb cov kwv tij nkauj muam ces Xatas yuav ua tsis tau kom peb tawg ua sab ua sua rau qhov kev hlub yuav pab kom peb nyob sib koom siab ua ke.​—Filipis 2:1, 2. w23.11 13 ¶18-19

Qhov tseeb hauv Vajtswv Txoj Lus muaj hwj chim heev. Thaum peb qhia Yehauvas rau tib neeg thiab qhia tias nws zoo li cas tiag ces peb yuav pom tej yam zoo heev. Peb yuav pom tias lawv tsis qaug rau Xatas txoj kev dag ntxiv lawm thiab lawv yuav pom tias peb Leej Txiv Yehauvas yog ib leej txiv uas zoo heev. Lawv yuav qhuas txog Yehauvas lub hwj chim uas loj kawg nkaus. (Yaxayas 40:26) Lawv yuav tso siab rau nws rau qhov nws yog ib tug Vajtswv uas ncaj ncees heev. (Kev Cai 32:4) Lawv yuav pom tias Vajtswv muaj laj lim tswv yim heev, kawm tsis paub tag. (Yaxayas 55:9; Loos 11:33) Thiab lawv yuav pom tias Vajtswv yog txoj kev hlub ces qhov no yuav nplig tau lawv siab heev. (1 Yauhas 4:8) Thaum lawv yim txav ze rau Yehauvas ces lawv yim cia siab tias lawv yuav tau txoj sia ntev dhawv mus ib txhis. Peb muaj ib txoj koob hmoov zoo heev los pab kom tib neeg txav ze rau lawv Leej Txiv! Yog peb ua li ntawd ces Yehauvas suav tias ‘peb koom nrog [nws] ua hauj lwm.’​—1 Kauleethaus 3:5. w24.02 12 ¶15

Yog tias koj tab tom kawm Vajlugkub los sis koj niam koj txiv tu koj loj hlob los pe hawm Yehauvas, koj yeej xav ua kev cai raus dej thiab puas yog? Qhov no yog ib lub hom phiaj zoo heev li! Tiam sis ua ntej koj yuav ua kev cai raus dej koj yuav tau muab koj tus kheej cob rau Yehauvas tso. Koj muab koj tus kheej cob rau Yehauvas li cas? Koj thov nws thiab cog lus rau nws tias koj yuav pe hawm nws tib leeg xwb thiab yuav ua raws li nws lub siab nyiam ua ntej txhua tsav txhua yam tib si. Koj cog lus tias koj yuav hlub Yehauvas “kawg siab kawg ntsws, kawg koj txoj sia, kawg laj lim tswv yim” mus li. (Malakaus 12:30) Thaum koj muab koj tus kheej cob rau Yehauvas tsuas yog koj thiab Yehauvas thiaj paub xwb. Tiam sis thaum koj ua kev cai raus dej ces qhia tab meeg sawv daws tias koj muab koj tus kheej cob rau Yehauvas lawm. Qhov koj cog lus tseg rau Yehauvas es muab koj lub neej cob rau nws tseem ceeb heev. Koj yeej xav ua raws li koj tej lus cog tseg. Yehauvas yeej xav kom koj ua raws li ntawd thiab.​—Laj Lim Tswv Yim 5:4. w24.03 2 ¶2; 3 ¶5

Txhua tus txij nkawm yeej muaj kev nyuaj siab. Nyob hauv phau Vajlugkub yeej hais tias cov uas muaj txij nkawm yeej “niaj hnub nyuaj siab.” (1 Kauleethaus 7:28) Twb yog vim ob tug txij nkawm nyias los nyias ib qho los, nyias muaj nyias tus cwj pwm, thiab nyias nyiam nyias lawm ib yam. Tsis tas li ntawd, nyias los ntawm nyias ib haiv tib neeg los sis nyias muaj nyias ib txoj kev coj noj coj ua. Ua ntej ib tug txij nkawm tsis tau sib yuav, nkawd tsis pom qhov tsis zoo txog thaum sib yuav tau lawm. Tej no thiaj li ua rau nkawd muaj teeb meem heev. Nkawd tsis yeem kho tiam sis ib leeg liam hais tias yog tim ib leeg. Nkawd tsuas xam pom tias sib cais los sis sib nrauj ntshe yuav zoo dua. Tiam sis yog nkawd sib cais los sis sib nrauj, puas yuav kho tau nkawd tej teeb meem? Yuav kho tsis tau. Yehauvas kom tus txiv tsev thiab tus niam tsev nyob ua ke tab txawm nyuaj rau nkawd ob leeg. w24.03 16 ¶8; 17 ¶11

Tom qab koj ua kev cai raus dej, koj rau siab ntso kawm txog Yehauvas thiab koj yim huab paub thiab hlub nws zuj zus ntxiv. Tej no ua rau koj txoj kev vam kev cia siab ruaj khov zuj zus tuaj. (Henplais 5:13–6:1) Tej zaum koj twb pom tias cov lus hais hauv Loos 5:2-4 muaj tiag. Koj raug ntau yam kev txom nyem tiam sis koj yeej ua siab ntev thev thiab pom tias Vajtswv txaus siab rau koj. Thaum koj paub li ntawd, ua rau koj tos ntsoov tej uas Vajtswv cog tseg. Tam sim no koj txoj kev vam kev cia siab ruaj khov tshaj li thaum koj nyuam qhuav los ntseeg. Koj lub neej hloov hlo thiab koj kuj coj zoo rau koj tsev neeg, txawj txiav txim siab ua ub ua no, thiab kuj siv koj lub sij hawm kom muaj nuj nqis. Tom qab koj paub tias Vajtswv txaus siab rau koj thiab koj txoj kev vam kev cia siab ruaj khov zuj zus tuaj, tus tub txib Povlauj hais tias koj yuav paub tias koj txoj kev vam kev cia siab yeej yuav muaj tiag.​—Loos 15:13. w23.12 12-13 ¶16-19

Thaum peb raug kev sim siab, peb yuav tsis xav thiab coj li qub vim peb ntxhov siab dhau. Ua li thaum peb ntxhov siab dhau, Yehauvas ho pab peb li cas? Yehauvas cog lus rau peb tias nws yuav hwj kom peb nyob ruaj khov. Thaum muaj cua daj cua dub ntsawj ces yuav ua rau lub nkoj yoj mus yoj los. Yuav kom hwj tau lub nkoj nyob ruaj khov, luag ua ob sab tis rau ntawm ob sab nkoj ces ua rau lub nkoj mus tus yees lawm. Yehauvas yuav hwj peb tib yam li ntawd yog peb rau siab ntso teev tiam nws tsis tseg txawm peb yuav raug kev sim siab dab tsi. w24.01 22 ¶7-8

Thaum koj muaj kev txhawj ntshai, ua zoo tshuaj koj tus kheej li no tias, ‘Yehauvas tau ua dab tsi lawm?’ Xav txog tej yam Yehauvas tau tsim. Xws li “tsa muag ntsia” seb Yehauvas saib xyuas tej noog thiab tej paj hmab paj ntoos uas nws tau tsim li cas, tab txawm tej no tsis muaj nws tej yeeb yam thiab teev tiam tsis tau nws. Yog Yehauvas saib xyuas tej ntawd ces cia li cia siab tias Yehauvas yuav yim huab saib xyuas peb. (Mathais 6:25-32) Tsis tas li ntawd, ua zoo tshuaj tej yam Yehauvas twb tau ua rau cov uas teev tiam nws yav tag los lawm. Tej zaum koj kuj nyeem txog tej tug uas tuav rawv kev ntseeg hauv phau Vajlugkub los sis koj kuj nyeem txog tej tug uas teev tiam Yehauvas niaj hnub nim no. Txuas ntxiv ntawd, ua zoo xav seb Yehauvas tau tsom kwm koj li cas rau li cas. Nws tau pab koj li cas xwv koj thiaj los paub tau nws? (Yauhas 6:44) Nws tau teb koj tej lus thov li cas? (1 Yauhas 5:14) Thiab qhov uas nws tus Tub los tuag theej txhoj pab tau koj li cas?​—Efexaus 1:7; Henplais 4:14-16. w24.01 4 ¶6; 7 ¶17