Yexus Qhia Tias Lub Ntiajteb Yuav Kawg Rau Thaum Twg

XAV SEB YEXUS HAIS LI CAS TXOG HNUB KAWG:

“Nej yuav tsum ceevfaj, rau qhov nej tsis paub hnub twg thiab lub sijhawm twg yuav muaj li ntawd.”​—MATHAIS 25:13.

“Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd.”​—MALAKAUS 13:33.

Yeej tsis muaj ib tug hauv ntiajteb no yuav paub tias thaum twg lub qab ntuj phem mam kawg. Txawm li los Vajtswv twb teem “hnub ntawd thiab lub sijhawm ntawd” tseg lawm. (Mathais 24:36) Yexus tau qhia rau nws cov thwjtim tias yuav muaj tej xwm txheej twg tshwm sim ua ntej hnub kawg.

PEB YUAV POM MUAJ LI CAS

Yexus hais tias ‘ib lub tebchaws yuav sawv tawm tsam ib lub tebchaws; thiab ib haiv neeg yuav sawv tawm tsam ib haiv neeg. Yuav muaj kev tshaib kev nqhis thiab av yuav qeeg txhua qhov.’ (Mathais 24:7) Yexus kuj hais ntxiv tias yuav muaj “mob kis rau ntau qhov.” (Lukas 21:11, TT ) Tej xwm txheej no qhia tias ‘twb txog lub sijhawm uas lub ntiajteb yuav kawg.’ (Mathais 24:3) Koj puas pom tias tej uas Yexus hais no tabtom muaj tshwm lawm tiag?

Niaj hnub niam no peb yeej pom muaj kev tsov kev rog, kev tshaib kev nqhis, av qeeg, thiab muaj kab mob kev nkeeg ib qho tshwm tag ib qho tshwm tuaj. Xws li nyob rau xyoo 2004, thaum av qeeg hauv nruab tiv txwv Is Dias (Indian Ocean) dej ntas loj heev tuaj kuav tibneeg ua rau 225,000 leej tau tag sim neej. Hos peb xyoos xwb, tus kab mob COVID-19 kis mus thoob qab ntuj ua rau 6.9 plhom leej tau tag sim neej. Yexus twb qhia lawm tias thaum muaj tej xwm txheej no ces hnub kawg twb los ze lawm.

“LUB SIJHAWM KAWG”

Phau Vajlugkub qhia tias yuav muaj li cas rau “lub sijhawm kawg.” (2 Petus 3:3, 4) Ob Timautes 3:1-5 qhia tias tibneeg yuav coj phem zuj zus. (Saib lub ntsiab me “Ua Ntej Lub Ntiajteb Yuav Kawg.”) Niaj hnub no koj puas pom tibneeg ua nruj ua tsiv, muab hlob, xam pom lawv tus kheej thiab tsis hlub lwm tus? Tej no qhia meej tias peb nyob rau lub sijhawm kawg lawm.

Phau Vajlugkub qhia tias “tshuav tsis ntev lawm” xwb, lub sijhawm kawg twb yuav xaus. Vajtswv yuav muab ‘cov uas ua rau lub ntiajteb no puas tsuaj’ rhuav tshem mus.​—Tshwmsim 11:15-18; 12:12, TT.

LUB QAB NTUJ TSHIAB TWB LOS YUAV TXOG!

Vajtswv twb teem tseg lawm tias hnub twg thiab teev twg nws mam rhuav tshem lub qab ntuj phem no. (Mathais 24:36) Txawm li los ‘nws tsis xav cia ib tug twg puas tsuaj mus.’ (2 Petus 3:9) Tamsim no nws tseem ncua sijhawm rau peb los zwm rau nws, vim nws xav kom peb dim thaum nws rhuav tshem lub qab ntuj phem no thiab muab lub ntiajteb kho ua ib lub Vaj Kaj Siab.

Vajtswv twb npaj ib txoj kev los cob qhia tibneeg thoob ntiajteb kom lawv los zwm rau nws txoj kev kav lawm. Yexus tau qhia tias txoj xov zoo txog Vajtswv lub Nceeg Vaj yuav raug muab tshaj tawm “mus thoob qab ntuj” ua ntej lub sijhawm kawg xaus. (Mathais 24:14) Yehauvas Cov Timkhawv thoob ntiajteb tau siv ntau li 2,000 plhom txoos teev mus tshaj tawm txog txoj xov zoo.

Lub sijhawm uas noob neej kav twb yuav xaus. Txawm li ntawd los koj yeej muaj peevxwm dim tau mus nyob hauv lub Vaj Kaj Siab thaum Vajtswv rhuav tshem lub qab ntuj phem no. Zaj tom ntej yuav qhia seb koj yuav ua li cas thiaj tau mus nyob hauv lub qab ntuj tshiab.