1924​—Tau 100 Xyoo Lawm

SIV XOV TOOJ CUA

Cov kwv tij hauv Npe-ee siv tshaj li ib xyoos thiaj li txua tau lub xov tooj cua uas hu ua WBBR nyob rau hauv Xateem Ailees (Staten Island) ntawm Nus Yauj Xiti (New York City). Thaum thawj lawv mus muab tej ntoo txiav ces lawv mam li ua ib lub tsev rau cov tuaj ua hauj lwm thiab lawv tsa dua ib lub tsev los tso tej twj. Thaum lawv ua li no tiav lawm, cov kwv tij mam li muab tej twj coj los sib dhos kom ua tau ib lub xov tooj cua. Tiam sis tseem tshuav ntau yam lawv yuav tau ua kom tiav ua ntej.

Nyuaj rau cov kwv tij txhos tus ncej txais xov tooj cua heev vim tus ncej siab li 91 meters (300 feet) hos ob tug ncej txheem siab li 61 meters (200 feet). Thawj zaug lawv tsa tsis tau. Tiam sis lawv tso siab tias Yehauvas yeej yuav pab lawv ua kom tau ces lawv thiaj tsa tau tus ncej lawm. Khavees Ploxaws (Calvin Prosser) kuj yog ib tug uas pab tsa tus ncej. Nws hais tias: “Yog thawj zaug peb tsa tau tus ncej lawm mas peb yuav rov qhuas peb tus kheej.” Tiam sis cov kwv tij qhuas Yehauvas vim Yehauvas pab lawv. Txawm li ntawd los lawv tseem muaj dua ib qho teeb meem ntxiv.

Nyob rau lub caij ntawd xov tooj cua haj tseem tshiab tshiab tseem tsis tau nto moo ces thiaj li tsis muaj leej twg muaj twj coj los muag. Tiam sis cov kwv tij nrhiav tau ib tug tib neeg uas txawj ua tej twj ntawd uas nyob tsis deb ntawm lawv. Lawv yuav tsis tau lub paj taub ces lawv thiaj siv ib lub xov tooj los ua xwb. Thaum lub 2 Hlis, muaj ib hmos lawv txawm sim cov twj seb puas ua hauj lwm. Lawv yuav tau siv ib yam los mus sim ces yog li ntawd cov kwv tij thiaj li hu nkauj. Awnes Laus (Ernest Lowe) nco ntsoov tias hnub ntawd zoo li cas rau li cas. Nws hais tias thaum lawv tseem tab tom hu nkauj, tus txiav txim Luthafaw (Rutherford)b hnov lawv hu hu nkauj hauv xov tooj cua ces nws txawm hu tuaj. Luthafaw nyob hauv Npluavlees (Brooklyn) uas deb li 25 kilumev (15 mais).

Kwv Tij Luthafaw hu tuaj thiab hais tias: “Nej tsum kiag. Nej hu nkauj mas ua rau kuv pob ntseg lag tag lawm os!” Nws hais no ua rau cov kwv tij txaj muag heev lawv thiaj li tsum kiag. Tiam sis zaum no lawv paub hais tias lub xov tooj cua ua hauj lwm lawm.

Thaum lub 2 Hlis tim 24 xyoo 1924, Kwv Tij Luthafaw hais tias lub xov tooj cua yuav muab siv “ua Khetos uas yog Vaj Ntxwv tes hauj lwm.” Tsis tas li ntawd, nws hais ntxiv tias lub xov tooj cua “yuav pab tib neeg nkag siab phau Vajlugkub thiab pab kom tib neeg pom tias lawv nyob rau lub sij hawm kawg lawm.”

Thawj zaug lawv tshaj tawm hauv xov tooj cua mus tau zoo kawg li. Lawv thiaj li siv tau 33 xyoos los mus tshaj tawm tej yam uas Yehauvas cov tib neeg ua.

LAWV TAB MEEG CEM TEJ KEV NTSEEG CUAV

Lub 7 Hli xyoo 1924, Cov Tub Kawm Vajlugkub muaj ib lub rooj sib txoos nyob rau lub nroog Khaulanpas (Columbus) hauv lub xeev Auhaiyaum (Ohio). Cov Tub Kawm Vajlugkub tuaj qhov txhia chaw tuaj thiab muaj lus qhuab qhia ua lus Alas, Askiv, Fab Kis, Ntsaws Mes Nis (German), Kilis, Hankalias (Hungarian), Ithalis (Italian), Lithu-enias (Lithuanian), Phaulis (Polish), Lav Xias (Russian), cov lus ua Xikadinivias (Scandinavian), thiab Yus Khees (Ukrainian). Tib neeg kuj mloog tau ib txhia lus qhuab qhia hauv xov tooj cua. Tsis tas li ntawd, cov kwv tij kuj nug kom cov tib neeg sau xov xwm sau txog lub rooj sib txoos txhua txhua hnub.

Nyob rau Hnub 4 (Thursday) lub 7 Hli tim 24, muaj tshaj li 5,000 tawm tus kwv tij nkauj muam mus tshaj tawm txoj xov zoo rau hauv lub nroog uas muaj lub rooj sib txoos. Lawv tseb yuav luag 30,000 phau ntawv thiab kawm Vajlugkub nrog tib neeg txhiab txhiab leej. Nyob rau hauv Phau Tsom Faj hais tias “tag nrho lub rooj sib txoos, hnub ntawd yog hnub uas muaj kev zoo siab tshaj plaws.”

Nyob rau Hnub 5 (Friday) lub 7 Hli tim 25, thaum Kwv Tij Luthafaw cev ib zaj lus qhuab qhia, nws nyeem ib tsab ntawv cem cov xib hwb cuav. Nws hais tias tej nom tswv, kev ntseeg, thiab tej lag luam txwv “tsis pub tib neeg kawm qhov tseeb txog Vajtswv lub Nceeg Vaj uas Vajtswv yuav siv los foom koob hmoov rau noob neej.” Nws hais ntxiv tias cov txiv neej no hais tsis yog lawm vim lawv txhawb nqa lub Lis Au Neseem (League of Nations) thiab hais tias qhov no yog Vajtswv txoj kev kav hauv ntiaj teb. Cov Tub Kawm Vajlugkub yuav tau ua siab tawv qhawv tshaj tawm txoj xov no rau tib neeg.

Phau Tsom Faj xaus lus li no txog lub rooj sib txoos: “Lub rooj sib txoos hauv Khaulanpas no txhawb tau cov kwv tij nkauj muam txoj kev ntseeg heev thiab pab tau kom lawv muaj lub siab tawv mus tshaj tawm tab txawm lawv yuav raug tawm tsam li cas los xij peem.” Li-aus Kholauj (Leo Claus) uas tuaj rau lub rooj sib txoos hais tias: “Tom qab peb mus vaj mus tsev mas cuab tau peb lub zog kawg li mus tshaj tawm txoj xov no rau hauv peb thaj tsam.”

Thaum lub 10 Hli, Cov Tub Kawm Vajlugkub mus tseb qas plhom daim ntawv uas muaj cov lus Kwv Tij Luthafaw nyeem tawm tsam cov xib hwb cuav. Nyob hauv lub me nyuam zos Khalivees (Cleveland) ntawm lub xeev Aukahaumas (Oklahoma), Faleej Ntoxees (Frank Johnson) tseb tag nws cov ntawv thiab yuav tau tos 20 feeb cov kwv tij muam mam li tuaj tos tau nws. Tsis zoo rau nws nyob ntawd tos vim cov tib neeg hauv zos nrhiav nrhw nws vim lawv chim heev. Kwv tij Ntsoxees thiaj li mus khiav nkaum hauv ib lub tsev teev ntuj. Thaum lub sij hawm ntawd tsis muaj neeg nyob rau hauv. Nws thiaj li muab nws cov ntawv uas nws nqa tuaj tso rau txhua lub rooj thiab muab ib daim cuam rau hauv tus xib hwb phau Vajlugkub. Tom qab ntawd nws tseem tshuav sij hawm, nws thiaj li coj mus tso rau ob lub tsev teev ntuj ntxiv.

Faleej thiaj li dhia ceev ceev rov qab los rau ntawm qhov chaw uas cov kwv tij yuav tuaj tos nws. Nws thiaj li mus khiav nkaum ntawm lub chaw muag roj kom cov txiv neej thiaj tuaj nrhiav tsis tau nws. Cov txiv neej twb tsav tsheb los mus dhau tiam sis lawv tsis pom nws. Tom qab lawv mus dhau lawm, cov kwv tij nkauj muam mam li tuaj tos tau nws.

Muaj ib tug kwv tij hais tias: “Thaum peb hla lub zos ntawd mus, peb mus dhau peb lub tsev teev ntuj. Ib lub tsev teev ntuj twg muaj kwv lam li 50 leej sawv sab nraud. Ib txhia tab tom nyeem daim ntawv tseb hos ib txhia muab coj mus qhia rau lawv tus xib hwb. Peb mus raug caij kawg li uas tsis muaj xwm dab tsi! Peb ua Vajtswv Yehauvas tsaug vim nws tiv thaiv peb thiab pab kom peb txawj mus tseb daim ntawv es thiaj tsis raug xwm dab tsi.”

MUAJ SIAB TAWV QHAWV TSHAJ TAWM

Cov Tub Kawm Vajlugkub uas nyob lwm lub teb chaws kuj muaj siab tawv qhawv tshaj tawm txoj xov zoo. Nyob rau Fab Kis qaum teb, Ntsauxes Khij (Józef Krett) qhia rau cov neeg khawb qhov av uas tuaj teb chaws Phaulees (Poland) tuaj. Cov kwv tij teem kom Ntsauxes mus tham ib zaj lus qhuab qhia hu ua “Tsis Ntev Tom Ntej No Cov Tuag Yuav Sawv Rov Los.” Thaum cov kwv tij nkauj muam mus caw cov tib neeg hauv zos, muaj ib tug txiv plig ceeb toom cov tib neeg kom tsis txhob mus koom. Txawm nws ceeb toom lawv li ntawd los muaj tshaj li 5,000 leej mus koom. Tsis tas li ntawd, tus txiv plig los tseem tuaj koom lawm thiab. Kwv Tij Ntsauxes caw kom tus txiv plig qhia vim li cas tus txiv plig ho ntseeg txawv tiam sis tus txiv plig tsis kam. Tom qab Kwv Tij Ntsauxes tham nws zaj lus qhuab qhia tag, nws muab tag nrho nws cov ntaub ntawv tseb rau tib neeg vim lawv xav paub Vajtswv Txoj Lus heev.​—Amaus 8:11.

Nyob rau Afika (Africa), muaj ib tug kwv tij hu ua Khalauj Nplaus (Claude Brown) mus tshaj tawm txoj xov zoo rau lub teb chaws Nkana (Ghana). Muaj coob leej ntau tus paub qhov tseeb vim nws mus tham lus qhuab qhia thiab mus tseb ntaub ntawv rau tib neeg. Ntsos Nplexees (John Blankson) yog ib tug uas kawm muab tshuaj kuj tuaj koom thaum Kwv Tij Khalauj cev nws zaj lus qhuab qhia. Tom qab ntawd, Ntsos xam pom tias nws nrhiav tau qhov tseeb. Nws hais tias: “Qhov tseeb ua rau kuv zoo siab heev thiab kuv muab qhia rau coob leej ntau tus uas kuv mus kawm ntawv nrog.”

Ntsos kawm tau hauv phau Vajlugkub tias tsis muaj Vaj Peb Leeg. Muaj ib hnub nws thiaj li mus xyuas ib lub tsev teev ntuj thiab mus nug tus txiv plig. Tiam sis tus txiv plig muab nws ntiab tawm thiab nthe nws tias: “Koj tsis yog ib tug Khixatias. Koj yog Ntxwg Nyoog ntiag tug. Cia li khiav tawm mus!”

Thaum Ntsos rov qab los txog tsev, nws sau ib tsab ntawv mus rau tus txiv plig thiab nug seb tus txiv plig puas kam nrog nws tham txog vim li cas lawv ntseeg Vaj Peb Leeg. Tus txiv plig mus cuag Ntsos tus thawj xib hwb hauv Ntsos lub tsev kawm ntawv ces tom qab ntawd tus txiv plig mam hais kom Ntsos mus cuag tus thawj xib hwb. Yog li ntawd, tus thawj xib hwb thiaj li nug seb puas yog Ntsos sau ib tsab ntawv mus rau tus txiv plig.

Ntsos thiaj li teb tias, “Kuv yeej tau sau lawm.”

Ntsos tus thawj xib hwb thiaj li yuam kom Ntsos sau ib daim ntawv mus thov tus txiv plig zam txim. Yog li ntawd Ntsos thiaj sau hais tias:

“Kuv tus thawj xib hwb hais kom kuv sau ib tsab ntawv tuaj thov koj zam txim tiam sis ua ntej kuv yuav thov txim, koj yuav tsum lees tias koj qhia tej yam tsis tseeb txog phau Vajlugkub.”

Tus thawj xib hwb thiaj li ceeb tas thiab hais tias, “Ntsos, koj yuav sau li no tiag tiag lov?”

Ntsos thiaj li teb tias, “Yog. Kuv cov lus tsuas muaj li no xwb.”

Tus thawj xib hwb teb tias, “Peb yuav muab koj rho tawm ntawm lub tsev kawm ntawv no mus. Koj yuav tuaj kawm tsis tau lub tsev kawm ntawv no yog koj pheej hais lus los mus nkaug tus txiv plig uas tej nom tswv txhawb nqa.”

Ntsos teb tias, “Tiam sis . . . thaum koj qhia ib zaj twg es peb tsis nkag siab ib lub ntsiab twg, peb yeej nug tau koj ne puas yog?”

Tus thawj xib hwb teb tias, “Koj yeej nug tau.”

Ntsos teb tias, “Kuv twb yeej ua li ntawd. Tus txiv plig qhia peb txog phau Vajlugkub es kuv thiaj li nug nws ib lo lus nug. Yog tias nws teb tsis tau kuv qhov lus nug, vim li cas kuv ho yuav tau sau ntawv mus thov txim?”

Ntsos kuj tsis raug rho tawm hauv nws lub tsev kawm ntawv thiab nws kuj tsis tau xa ib daim ntawv mus thov txim.

TXAUS SIAB HLO UA HAUJ LWM NTAU NTXIV

Phau Tsom Faj hais txog tes hauj lwm rau xyoo ntawd tias: “Peb hais tib lo lus uas Daviv hais tias: ‘Koj ua rau kuv muaj zog sib tua hauv tshavrog.’ (Phau Ntawv Nkauj 18:39) Xyoo ntawd mas txhawb zog tiag tiag li vim peb pom Yehauvas pab peb ua nws tes hauj lwm. Nws cov tib neeg puav leej txaus siab hlo qhia txoj xov zoo.”

Nyob rau tib xyoos ntawd, cov kwv tij xav muaj dua ib lub xov tooj cua ntxiv. Lub xov tooj cua tshiab no yuav ua nyob ze rau Sikhankaus (Chicago). Lub xov tooj cua no muab tis npe hu ua VAWJ (WORD) uas txhais hais tias Vajtswv Txoj Lus. Zaum no lub xov tooj cua tej twj tsim tau muaj ceem zog ces cov tib neeg uas nyob ntawd mus txog ntua Kanada (Canada) qaum teb puav leej hnov txoj xov txog lub Nceeg Vaj.

Nyob rau xyoo 1925, Yehauvas pab cov kwv tij kom lawv nkag siab Tshwmsim tshooj 12. Tom qab lawv nkag siab tshooj ntawd ces ib txhia txawm tsis kam teev tiam Yehauvas lawm. Txawm li ntawd los ib txhia yeej zoo siab tias lawv to taub txog tej yam muaj tshwm sim saum ntuj thiab ho los raug Vajtswv cov tib neeg li cas hauv ntiaj teb no.