Tej Kev Txiav Txim Siab Uas Yehauvas Pom Zoo

1. Tej yam twg nyuaj rau peb ua?

TXHUA txhua hnub peb yuav tau txiav txim siab ua ub ua no. Tej txhia kuj yooj yim xws li yuav noj dab tsi ua tshais los sis thaum twg mam li mus pw. Hos tej txhia nyuaj heev los txiav txim siab vim yuav raug rau peb txoj kev noj qab haus huv, txoj kev zoo siab hauv lub neej, peb tsev neeg, thiab peb txoj kev teev tiam Yehauvas. Peb xav kom tej yam peb txiav txim siab ntawd zoo rau peb thiab peb tsev neeg. Tiam sis qhov tseem ceeb tshaj yog kom peb txiav txim tau raws li Yehauvas pom zoo.​—Loos 12:1, 2.

2. Dab tsi yuav pab kom koj txawj txiav txim siab tau rau qhov zoo?

² Koj yuav txiav txim siab zoo dua yog tias (1) paub txhua yam, (2) xav seb Yehauvas xav li cas, thiab (3) luj seb qhov twg zoo dua. Nyob rau hauv zaj kawm no peb yuav kawm txog peb yam no thiab seb yuav ua li cas peb thiaj ua tau neeg thoob tsib.​—Pajlug 2:11.

PAUB TXHUA YAM

3. Piav seb koj yuav tau ua li cas ua ntej koj txiav txim ua ib yam twg.

³ Yuav kom koj txiav txim siab tau zoo, koj yuav tsum paub tseeb tseeb tias yog li cas ua ntej tso. Vim li cas ho tseem ceeb rau koj paub? Muab ua piv txwv li no tias muaj ib tug neeg mob mus nrog nws tus kws tshuaj tham. Tus kws tshuaj puas lam hais tias nws yuav kho tus neeg mob ntawd li no rau li no ua ntej nws tshuaj tus neeg mob ntawd? Tus kws tshuaj yeej tsis ua li ntawd ib zaug li. Zoo tib yam li ntawd, yog koj ua zoo tshuaj thiab paub txhua yam ua ntej tso ces koj yuav txiav txim tau zoo dua. Yuav ua li cas koj thiaj ua tau li ntawd?

4. Raws li Pajlug 18:13, koj yuav tau ua li cas koj thiaj li paub txhua yam? (Saib daim duab.)

⁴ Yuav kom koj paub txhua yam, koj yuav tau nug. Xws li muaj ib tug caw koj mus koom ib roog kev noj haus. Koj puas yuav mus koom? Yog koj tsis paub tus tswv cuab zoo los sis koj tsis paub nws yuav pam noj pam haus li cas, koj yuav tau nug nws tias: “Rooj noj ntawd yuav nyob rau qhov twg thiab yog thaum twg? Pes tsawg leej yuav tuaj koom? Leej twg yuav yog tus saib xyuas? Leej twg tuaj koom? Koj npaj kev ua si li cas rau cov tuaj koom? Koj puas muab dej caw rau cov neeg tuaj koom ntawd haus?” Yog koj nug raws li hais tag no lawm ces koj yuav paub txiav txim siab zoo dua.​—Nyeem Pajlug 18:13.

5. Tom qab koj paub txhua yam lawm, koj yuav tau ua li cas?

⁵ Tom qab koj paub txhua yam lawm ces koj yuav tau ua tib zoo xav. Xws li koj paub tias muaj ib co uas tuaj rau ntawd tsis nyiam coj raws li phau Vajlugkub tej hauv paus ntsiab lus los sis sawv daws yuav haus dej caw nchuav nthwv tsis muaj ib tug los saib xyuas, ua li koj puas xam pom tias rooj noj haus yuav ua rau sawv daws qw ua lom vab vab? (1 Petus 4:3) Ua li rooj noj haus no puas yuav cuam tshuam kom koj tsis txhob mus tau kev sib txoos los sis mus tshaj tawm txoj xov zoo? Thaum koj muab tej no los ua zoo xav tag lawm ces yuav yooj yim rau koj txiav txim siab. Tiam sis muaj ib qho ntxiv uas koj yuav tau xav txog. Koj yeej paub tias koj xav li cas txog rooj noj haus ntawd tiam sis ua li Yehauvas ho xav li cas?​—Pajlug 2:6.

XAV SEB YEHAUVAS XAV LI CAS

6. Raws li Yakaunpaus 1:5, vim li cas peb ho thov kom Yehauvas pab peb?

⁶ Thov kom Yehauvas pab koj nkag siab nws txoj kev xav. Yehauvas cog lus tias nws yuav muab tswv yim kom koj txawj xav tias yam twg zoo thiab yam twg nws tsis pom zoo. Yehauvas “yog tus muaj siab dawb siab zoo pub ib puas tsav yam rau sawvdaws, nws tsis khuvxim li.” (Nyeem Yakaunpaus 1:5) Yog li nws yeej yuav tsav tswv yim rau koj.

7. Piav seb ua li cas koj thiaj paub Yehauvas txoj kev xav.

⁷ Yog koj thov Yehauvas kom tsav tswv yim rau koj, ua tib zoo xav seb nws yuav teb koj li cas rau li cas. Muab ua piv txwv li no tias: Yog koj mus rau ib qho chaw es poob zoo thiab tsis paub kev, tej zaud koj yuav nug ib tug neeg zej zog nyob rau ntawd kom pab koj. Ua li yog nws tsis tau teb koj, koj puas cia li mus lawm? Koj yeej tsis ua li ntawd ib zaug li. Koj yuav ua tib zoo mloog nws qhia kev rau koj. Zoo tib yam li ntawd, tom qab koj thov Yehauvas tsav tswv yim rau koj, koj yuav tau mus tshawb nrhiav seb phau Vajlugkub tej kev cai thiab hauv paus ntsiab lus ho pab tau koj li cas. Xws li ua ntej koj yuav txiav txim siab mus koom ib rooj noj haus li hais tas los lawm, koj yuav tau xav seb nyob hauv phau Vajlugkub hais li cas txog tej kev lom zem qw vab vab, poo tej neeg phem, thiab qhov uas txhawb Vajtswv txoj kev xav dua li tej koj ntshaw.​—Mathais 6:33; Loos 13:13; 1 Kauleethaus 15:33.

8. Koj yuav ua li cas yog koj xav tau kev pab kom koj thiaj mus nrhiav tau tej uas koj xav paub? (Saib daim duab.)

⁸ Muaj tej zaud koj yuav xav tau kev pab kom koj thiaj mus nrhiav tau tej uas koj xav paub. Tej zaud koj kuj thov kom ib tug kwv tij los sis muam paub paub pab koj. Tsis tas li ntawd, zoo rau koj tshawb nrhiav kom tau koj tus kheej. Koj mus siv tau tej twj xws li Yehauvas Cov Tim Khawv Phau Ntawv Tshawb Nrhiav Vajlugkub. Nco ntsoov tias koj lub hom phiaj yog txiav txim siab kom raws li Yehauvas pom zoo.

9. Ua li cas peb ho paub tias peb txiav txim siab raws li Yehauvas pom zoo? (Efexus 5:17)

⁹ Qhov uas peb paub hais tias peb txiav txim siab raws li Yehauvas pom zoo yog peb yuav tsum tau paub tias nws nyiam li cas rau li cas. Nyob hauv phau Vajlugkub hais tias: “Yog koj paub Vajtswv tus uas Dawbhuv, koj thiaj yog tus totaub tiag.” (Pajlug 9:10) Yog li ntawd, yuav kom peb to taub tiag tiag, peb yuav tsum paub Yehauvas cov yeeb yam, nws lub ntsiab, thiab tej yam nws nyiam thiab ntxub. Ua zoo tshuaj koj tus kheej li no tias, ‘Raws li qhov kuv paub txog Yehauvas, kuv yuav txiav txim siab li cas kuv thiaj ua tau raws li nws pom zoo?’​—Nyeem Efexus 5:17.

10. Vim li cas phau Vajlugkub tej hauv paus ntsiab lus tseem ceeb dua tib neeg tej kev coj noj coj ua?

¹⁰ Muaj tej lub sij hawm yuav kom peb ua tau haum Yehauvas siab, peb yuav ua rau cov uas peb twb paub lawm tu siab. Xws li muaj ib txhia niam txiv xav kom lawv tus ntxhais mus yuav ib tug txiv uas tsis txom nyem los sis ib tug txiv uas them taus nqe tshoob rau nkawd tab txawm nws kev ntseeg tsis tshua loj pes tsawg. Nkawd xav kom nkawd tus ntxhais tsis txhob txom nyem tiam sis tus uas nkawd tus ntxhais yuav puas pab tsav nkawd tus ntxhais txoj kev ntseeg? Yehauvas yuav xav li cas txog qhov no? Nyob hauv Mathais 6:33 txhawb kom cov Khixatias “kav tsij txhawb Vajtswv txoj kev kav.” Txawm peb hwm peb niam peb txiv thiab saib taus tej tib neeg zej zog los qhov tseem ceeb tshaj yog ua rau kom Yehauvas zoo siab.

LUJ SEB QHOV TWG ZOO DUA

11. Qhov yeeb yam uas hais hauv Filipis 1:9, 10 twg yuav pab koj txawj luj seb qhov twg zoo dua?

¹¹ Tam sim no koj paub phau Vajlugkub tej hauv paus ntsiab lus lawm, koj yuav tau xav zoo zoo txog koj tej kev txiav txim siab. (Nyeem Filipis 1:9, 10) Yog koj thoob tsib to nrog ces koj yuav txawj muab txhua yam xav seb qhov twg yog qhov zoo. Tej zaud muaj tej qho tsis tshua nyuaj txiav txim siab tiam sis tsis yog txhua txoj kev txiav txim siab yuav yooj yooj yim. Kev thoob tsib yuav pab kom koj muaj tswv yim txiav txim siab tab txawm yuav nyuaj npaum li cas.

12-13. Txoj kev thoob tsib pab tau koj txiav txim siab li cas thaum nrhiav hauj lwm?

¹² Muab ua piv txwv li no tias koj tab tom nrhiav ib txog hauj lwm kom koob tau koj lub cuab lub yig. Txawm muaj ob txog hauj lwm xav txais koj mus ua. Koj yeej ua tib zoo xav seb txoj hauj lwm ntawd yuav ua li cas rau li cas, ua lub sij hawm twg, mus ho deb li thiaj txog, thiab ntau tshaj ntawd. Ob txog hauj lwm no yeej zoo rau ib tug Khixatias mus ua. Tej zaud koj yuav nyiam ib txoj heev zog ib txoj vim koj nyiam ua hom hauj lwm ntawd los sis them nqi siab zog. Txawm li ntawd los tshuav qho yam koj yuav tau ua tib zoo xav txog.

¹³ Xws li, txoj hauj lwm twg yuav cuam tshuam koj tej kev sib txoos? Ua li txoj hauj lwm twg yuav cuam tshuam kom koj pab tsis tau koj tsev neeg muaj kev kaj siab thiab ntseeg Yehauvas? Qhov uas koj xav li no yuav pab tau kom koj txawj muab “yam uas tseem ceeb dua ntais” uas yog koj txoj kev pe hawm Yehauvas thiab koj tsev neeg tso ua ntej qhov uas mus khwv kom muaj nyiaj muaj txiaj. Thaum koj ua li no tas ces koj yuav txiav txim siab tau rau tej yam uas Yehauvas yuav foom koob hmoov rau koj.

14. Txoj kev thoob tsib thiab kev hlub yuav pab kom peb tsis txhob txo lwm tus txoj kev ntseeg li cas?

¹⁴ Kev thoob tsib yuav pab kom peb txawj xav tias tej uas peb txiav txim siab ua yuav raug rau lwm tus li cas xwv peb thiaj “tsis txo lwm tus txoj kev ntseeg.” (Filipis 1:10) Qhov no tseem ceeb heev thaum hais txog tej tsoos tsho uas peb hnav thiab peb tu peb tus kheej li cas. Xws li tej zaum peb nyiam hnav qho yam tsoos tsho los sis tu peb lub cev raws li peb lub siab nyiam. Tiam sis koj yuav ua li cas yog lwm tus uas nyob hauv lub koom txoos thiab cov uas tsis ntseeg Yehauvas tsis pom zoo rau tej uas koj ua ntawd? Kev thoob tsib yuav pab kom koj txawj xav txog lawv. Kev hlub yuav rub tau koj lub siab “los ua kom haum lwm tus” thiab hnav tej tsoos thiab tu koj tus kheej kom raug ntsej muag. (1 Kauleethaus 10:23, 24, 32; 1 Timautes 2:9, 10) Yog peb txawj xav li no ces peb yuav txiav txim tau qhov zoo kom qhia tias peb hlub thiab saib taus lwm tus.

15. Thaum koj txiav txim siab ua ib yam dab tsi tseem ceeb, koj yuav tau xav txog dab tsi?

¹⁵ Yog tias koj yuav txiav txim siab ua ib yam dab tsi tseem ceeb, koj yuav tau ua tib zoo xav seb yuav zoo li cas rau li cas. Yexus qhia kom peb “zaum tsaws xam zoo zoo ua ntej seb puas muaj nyiaj txaus ua kom tiav.” (Lukas 14:28) Koj yuav tau xav txog tias yuav siv sij hawm thiab dag zog ntau npaum li cas. Muaj tej zaud koj yuav tau nrog koj tsev neeg sab laj seb lawv ho ua tau li cas rau li cas los mus pab qhov uas koj yuav txiav txim siab ntawd. Vim li cas ho zoo rau koj npaj li no ua ntej? Yog koj npaj li no ces koj yuav xam pom tias tej zaud muaj qho yam koj yuav tau hloov me ntsis. Tsis tas li ntawd, yog koj nug koj tsev neeg thiab mloog tej lus uas lawv qhia rau koj ces lawv yuav txaus siab hlo pab koj.​—Pajlug 15:22.

TXIAV TXIM SIAB TAU QHOV ZOO

16. Yuav ua li cas koj thiaj txiav txim siab tau qhov zoo? (Saib lub ntsiab “Txawj Txiav Txim Siab.”)

¹⁶ Yog koj ua raws li hais tas saum toj no ces koj yeej paub txiav txim siab tau qhov zoo. Koj yeej tshawb kom paub txhua yam thiab muab piv rau phau Vajlugkub tej hauv paus ntsiab lus. Tom qab ntawd koj mam li thov Yehauvas pab kom mus raws li koj tej kev txiav txim siab.

17. Yam uas pab tau koj txiav txim siab kom zoo zoo yog dab tsi?

¹⁷ Txawm koj txiav txim siab tau zoo yav tag los lawm los nco ntsoov tias txoj kev txiav txim siab zoo tshaj yog muaj Yehauvas lub tswv yim tsis yog qhov uas koj txawj txawj txiav txim siab. Yehauvas tib leeg xwb thiaj pab tau koj paub, to taub, thiab ua neeg thoob tsib. (Pajlug 2:1-5) Yehauvas yuav pab tau kom koj txawj txiav txim siab raws li nws pom zoo.​—Phau Ntawv Nkauj 23:2, 3.