Ntseeg Tias Yehauvas Zam Koj Lub Txim

1-2. Cov uas hloov dua siab tshiab muaj kev dim pa ntshua li cas? (Saib daim duab ntawm lub khaum.)

VAJ NTXWV Daviv paub zoo txog thaum yus tau ua ib qho kev txhaum loj es yus lub siab npub nrees vim nws tau ua ntau yam kev txhaum hauv nws lub neej. (Phau Ntawv Nkauj 40:12; 51:3) Txawm li ntawd los nws hloov dua siab tshiab ces Yehauvas kuj zam nws lub txim lawm. (2 Xamuyees 12:13) Tsis tas li ntawd, Daviv kuj paub zoo txog thaum Yehauvas zam nws lub txim es ua rau nws dim pa ntshua.​—Phau Ntawv Nkauj 32:1.

² Zoo ib yam li Daviv, peb kuj yuav dim pa ntshua thaum peb xam pom tias Yehauvas twb zam peb lub txim lawm. Txawm peb ho ua tau ib qho kev txhaum loj lawm los thaum peb paub tias Yehauvas zam peb lub txim vim peb hloov dua siab tshiab, mus nrog cov txwj laus tham, thiab tswj tuag nthi tsis mus ua li qub dua lawm mas ua rau peb kaj siab heev! (Pajlug 28:13; Tes Hauj Lwm 26:20; 1 Yauhas 1:9) Tsis tas li ntawd thaum Yehauvas zam txim, nws yeej zam kom du lug yam nkaus li ib txwm twb tsis muaj dab tsi li!​—Exekees 33:16.

3-4. Muaj ib tug muam xav li cas tom qab nws ua kev cai raus dej, thiab nyob rau hauv zaj kawm no peb yuav tham txog dab tsi?

³ Muaj tej lub sij hawm yeej nyuaj kawg li rau tej tug ntseeg tias Yehauvas zam tau lawv lub txim. Xws li muaj ib tug muam npe hu ua Ntsenifawm (Jennifer) piav txog nws lub neej hluas. Nws hais tias nws niam thiab nws txiv yeej ib txwm ntseeg Yehauvas tiam sis thaum nkawd tu nws loj hlob tuaj, nws txawm mus ua tej yam phem thiab muab zais ntshis tsis pub rau nkawd paub. Tau ntau xyoo tom qab no nws kuj hloov nws lub neej, muab nws tus kheej cob rau Yehauvas thiab ua kev cai raus dej. Nws hais tias: “Yav tag los lawd, kuv ntshaw tej khoom ub khoom no, ua kev nkauj kev nraug, qaug dej qaug cawv, thiab ua neeg siab luv. Kuv paub hais tias thaum kuv thov Yehauvas thiab hloov dua siab tshiab ces nws yeej zam kuv lub txim vim muaj Khetos tus nqi txhiv. Tiam sis nyob puag hauv kuv nruab siab, kuv pheej hais tias Yehauvas tsis zam kuv lub txim li.”

⁴ Muaj tej lub sij hawm puas nyuaj rau koj ntseeg tias Yehauvas twb zam tej yam koj ua yav tag los lawm? Yehauvas xav kom peb ruaj siab tias nws yeej zam peb lub txim ib yam li Daviv. Nyob rau hauv zaj kawm no peb yuav tham txog vim li cas zoo rau peb ntseeg tias Yehauvas zam peb lub txim thiab dab tsi thiaj yuav pab tau kom peb ntseeg li ntawd.

VIM LI CAS ZOO RAU PEB NTSEEG TIAS YEHAUVAS ZAM PEB LUB TXIM?

5. Piav seb Xatas xav kom peb ntseeg li cas.

⁵ Thaum peb ntseeg ruaj nreeg tias Yehauvas zam peb lub txim lawm ces peb yuav zam tau Xatas txoj kev dag ntxias. Nco ntsoov tias Xatas yeej yuav ua ntau yam los haub ntxias peb kom tsis txhob teev tiam Yehauvas. Ib qho uas Xatas dag ntxias tau peb yog ua rau kom peb ntseeg tias peb tej kev txhaum mas yeej zam tsis tau li. Cia peb tham txog tus txiv neej nyob hauv Kauleethaus uas raug muab tshem tawm vim nws ua kev nkauj kev nraug. (1 Kauleethaus 5:1, 5, 13) Tom qab no thaum nws hloov dua siab tshiab, Xatas xav kom cov uas nyob hauv lub koom txoos txhob zam txim thiab tos txais nws rov qab los hlo li. Thiab Xatas xav kom tus txiv neej ntawd lub siab rov qab nkaug nws tias nws lub txim mas yeej zam tsis tau kom nws thiaj “nyuaj siab heev” thiab tsis xav teev tiam Yehauvas. Xatas yeej tsis hloov txoj kev haub ntxias tib neeg kom tso Yehauvas tseg. Tiam sis “peb twb paub zoo txog nws lub tswv yim lawm.”​—2 Kauleethaus 2:5-11.

6. Yuav ua li cas peb lub siab thiaj li tsis rov qab nkaug peb?

⁶ Thaum peb ntseeg ruaj nreeg tias Yehauvas zam peb lub txim lawm ces peb lub siab yuav tsis rov qab nkaug peb ntxiv lawm. Thaum peb ua txhaum, peb lub siab yeej nkaug peb tsis tseg tsis tu. (Phau Ntawv Nkauj 51:17) Ua li ntawd los kuj zoo vim yuav pab tau kom peb hloov siab thiab kho peb tus kheej kom rov ua zoo. (2 Kauleethaus 7:10, 11) Txawm peb twb hloov dua siab tshiab lawm los yog peb lub siab pheej nkaug peb tsis tseg tsis tu ces ntev mus ntev tuaj peb yuav tsis kam teev tiam Yehauvas lawm. Tiam sis yog peb ruaj siab tias Yehauvas twb zam peb lub txim tag lawm ces peb yuav tsis xav ntau ntau. Peb yuav muaj lub siab dawb paug teev tiam Yehauvas thiab muaj kev kaj siab. (Kaulauxais 1:10, 11; 2 Timautes 1:3) Yuav ua li cas peb thiaj ruaj siab tau tias Yehauvas zam peb lub txim lawm tiag tiag?

DAB TSI PAB TAU KOM PEB NTSEEG TIAS YEHAUVAS ZAM TXIM?

7-8. Yehauvas piav li cas txog nws tus kheej rau Mauxes, thiab peb ho tso siab tau li cas? (Khiav Dim 34:6, 7)

⁷ Xav txog tej uas Yehauvas hais txog nws tus kheej. Xws li thaum Mauxes xav paub ntxiv txog Yehauvas saum lub Roob Xinais.a (Nyeem Khiav Dim 34:6, 7.) Thaum Yehauvas piav txog nws tus kheej rau Mauxes, nws hais tias nws yog ib tug Vajtswv uas “muaj lub siab puv nkaus kev hlub thiab tshua.” Vim li no nws thiaj li zam tau cov uas teev tiam nws lub txim. Yehauvas yeej tsis ua lim hiam rau ib tug twg vim tsis muaj ib qho hauv nws lub siab ntxub ntxaug leej twg.

⁸ Peb cia li tso siab plhuav tias thaum Yehauvas hais txog nws tus kheej li cas lawd, nws yeej tsis dag vim nws yog tus Vajtswv tseeb uas tso siab tau. (Phau Ntawv Nkauj 31:5) Cia li ntseeg nws tej lus. Yog koj lub siab pheej nkaug koj txog tej yam kev txhaum koj ua los lawm, ua zoo nug koj tus kheej li no tias: ‘Ua li kuv puas ntseeg tias Yehauvas muaj kev khuv leej, hmov tshua thiab yuav zam tau ib tug neeg txhaum twg uas hloov dua siab tshiab lub txim tiag tiag?’ Yog tias nws zam tau tiag ces yeej tsim nyog koj ntseeg tias nws zam tau koj lub txim.

9. Yehauvas zam peb lub txim yog li cas tiag? (Phau Ntawv Nkauj 32:5)

⁹ Ua zoo xav seb nyob hauv phau Vajlugkub qhia txog Yehauvas txoj kev zam txim li cas. Xws li thaum Daviv piav txog Yehauvas txoj kev zam txim. (Nyeem Phau Ntawv Nkauj 32:5.) Daviv hais tias: “Koj zam tagnrho kuv tej kev txhaum huv tibsi mus.” Lo lus Henplais rau lo lus “zam” kuj txhais hais tias “muab nqa” los sis “muab tsaws.” Thaum Yehauvas zam Daviv lub txim ces yog Yehauvas muab Daviv tej kev txhaum nqa los sis tsaws tawm mus lawm. Yog li ntawd, Daviv thiaj li dim pa ntshua thaum Yehauvas zam nws lub txim. (Phau Ntawv Nkauj 32:2-4) Txawm yog peb los peb yeej yuav dim pa ntshua tib yam nkaus. Thaum peb hloov dua siab tshiab tiag tiag, zoo cuag li Yehauvas twb muab peb tej kev txhaum nqa mus tag lawm ces peb tsis tas yuav nyuaj siab ntxiv.

10-11. Cov lus “tos tsis hnyu zam txim” qhia li cas rau peb txog Yehauvas? (Phau Ntawv Nkauj 86:5)

¹⁰ Nyeem Phau Ntawv Nkauj 86:5.b Daviv hais tias Yehauvas yeej “tos tsis hnyu zam txim.” Muaj ib phau ntawv uas hais txog phau Vajlugkub tham txog nqe no thiab Yehauvas li no tias: “Nws yeej muaj lub siab zam txim.” Vim li cas Yehauvas ho muaj lub siab no? Cov lus txuas ntxiv ntawd hais tias: “Koj muaj kev hlub nplua mias rau cov uas quaj hu thov txog koj.” Raws li zaj peb kawm tag lawm, Yehauvas cog lus yuav hlub thiab nrog nraim cov uas hlub nws. Nws txoj kev hlub no thiaj ua rau nws txaus siab hlo zam cov uas hloov dua siab tshiab. (Yaxayas 55:7) Yog tias haj tseem nyuaj rau koj ntseeg tias Yehauvas zam koj lub txim, ua zoo nug koj tus kheej li no tias: ‘Ua li hauv kuv nruab siab, kuv puas ntseeg tias Yehauvas zam tau neeg lub txim tiag, thiab yuav zam tau ib tug neeg txhaum twg uas hloov dua siab tshiab thiab thov kom nws pab khuv leej?’ Yog tias nws zam tau tiag ces yeej tsim nyog koj ntseeg tias nws yeej muaj kev khuv leej thiab zam tau koj lub txim.

¹¹ Nyob hauv phau Vajlugkub qhia tias Yehauvas yeej nkag siab peb txhua tus tias peb yog noob txaug neeg txhaum. Qhov ntawd mas txhawb tau peb lub zog kawg li. (Phau Ntawv Nkauj 139:1, 2) Cia peb mus kawm dua ib tshooj seb Daviv hais li cas kom thiaj pab tau peb tso siab tias Yehauvas yeej zam tau peb lub txim tiag.

YEHAUVAS NCO NTSOOV DAB TSI TXOG PEB?

12-13. Raws li Phau Ntawv Nkauj 103:14, Yehauvas nco ntsoov li cas txog peb thiab nws coj li cas rau peb? (Phau Ntawv Nkauj 103:14)?

¹² Nyeem Phau Ntawv Nkauj 103:14. Daviv hais tias Yehauvas “nco ntsoov hais tias peb yog hmoov av xwb.” Daviv siv los lus no los qhia peb tias Yehauvas tos tsis hnyu yuav zam cov uas hloov dua siab tshiab vim nws paub hais tias peb yog noob txaug neeg txhaum. Cia peb mus ua tib zoo tshuaj xwv peb thiaj li nkag siab Daviv cov lus no zoo zoo.

¹³ Daviv hais tias Yehauvas “paub hais tias nws muab dabtsi los tsim peb.” Nws “muab av los puab” Adas thiab nws paub tias txawm tib neeg zoo tiav tiav los tib neeg yuav tsum ua qho yam los pab lawv, xws li lawv yuav tsum tau noj, pw, thiab ua pa. (Chivkeeb 2:7) Tiam sis thaum Adas thiab Evas poob kev txhaum ces kuj kis los mus rau nkawd tej xeeb leej xeeb ntxwv. Peb thiaj li saws tau txoj kev txhaum thiab peb lub siab pheej xib mus ua tej yam tsis zoo. Tsis yog Yehauvas paub tias peb yog noob txaug neeg txhaum xwb tiam sis Daviv hais tias Yehauvas “nco ntsoov” tias peb yog neeg txhaum. Lo lus Henplais rau lo lus “nco ntsoov” pab tau kom ib tug hmov tshua lwm tus. Yog li ntawd, Yehauvas paub hais tias muaj qee lub sij hawm peb yeej yuav ua tsis tau zoo ces nws thiaj li khuv khuv leej thiab zam peb lub txim thaum peb hloov dua siab tshiab.​—Phau Ntawv Nkauj 78:38, 39.

14. (1) Daviv piav li cas txog Yehauvas txoj kev zam txim? (Phau Ntawv Nkauj 103:12) (2) Peb khaws tau dab tsi los ntawm qhov uas Yehauvas zam Daviv lub txim? (Saib lub ntsiab “Thaum Yehauvas Zam Txim Ces Nws Tsis Nco Ntxiv Lawm.”)

¹⁴ Yehauvas zam txim rau peb deb npaum li cas? (Nyeem Phau Ntawv Nkauj 103:12.) Daviv hais tias “hnubtuaj deb hnubpoob npaum li cas,” Yehauvas zam peb lub txim deb npaum li ntawd. Hnub tuaj thiab hnub poob yeej tsis muaj ib hnub los sib tshuam tau li. Qhov no qhia tau rau peb li cas txog Yehauvas thaum nws zam peb lub txim? Muaj ib phau ntawv piav li no tias: “Yog tias kev txhaum muab tshem deb npaum li ntawd lawm ces txawm yog tus ntxhiab xwb los yuav taug tsis tau qab soj li thiab txhua yam yuav ploj ntais ntawm lub cim xeeb mus. Tsis tshuav ib qho li lawm.” Muaj tej zaud thaum peb hnov ib qho ntxhiab dab tsi tsw, yuav ua rau peb ras txog tej ntxhiab uas yav thaum ub peb tau hnov dua los lawm. Tiam sis thaum Yehauvas zam txim ces yuav ploj ntais mus tsis hnov tsw ntxiv.​—Exekees 18:21, 22; Tes Hauj Lwm 3:19.

15. Peb yuav ua li cas yog peb lub siab pheej nkaug peb txog tej yam peb tau ua yav thaum ub?

¹⁵ Daviv cov lus uas hais nyob hauv Phau Ntawv Nkauj 103 pab kom peb ntseeg tias Yehauvas yeej zam tau peb lub txim li cas? Yog peb lub siab pheej nkaug peb txog tej kev txhaum peb tau ua yav thaum ub ces ua zoo tshuaj peb tus kheej li no tias: ‘Puas yog kuv tsis nco qab tej uas Yehauvas nco ntsoov, xws li Yehauvas yeej nco ntsoov tias kuv yog noob txaug neeg txhaum thiab nws yeej zam tus neeg txhaum uas hloov dua siab tshiab li kuv? Puas yog kuv pheej nco ntsoov tej uas Yehauvas twb tsis nco qab lawm, xws li nco ntsoov txog tej kev txhaum uas nws twb zam txim lawm thiab nws tsis muab rov qab los hais rau kuv dua?’ Yog tias Yehauvas twb tsis xav txog tej kev txhaum uas peb ua yav tag los ces peb yuav tau tsis txhob xav ntau ntau txog thiab. (Phau Ntawv Nkauj 130:3) Yog peb ntseeg tias Yehauvas yeej zam tau peb lub txim tiag ces peb lub siab yuav tsis rov nkaug peb thiab peb yuav ua taus neej rau yav tom ntej.

16. Piav seb vim li cas tsis zoo rau peb pheej xav mus xav los txog tej kev txhaum uas peb ua yav thaum ub. (Saib daim duab.)

¹⁶ Muab ua piv txwv li no tias yog peb pheej xav txog peb tej kev txhaum yav thaum ub ces zoo yam li peb tsav tsheb es pheej saib ntsoov daim me nyuam iav uas tsom rau nram qab. Yeej zoo rau peb laj muam mus saib me ntswb me ntsis tiam sis yuav phom sij heev yog peb pheej ntsia ntsoov daim iav ntawd kom pom nram qab xwb. Tiam sis yuav kom peb tsav tsheb tsis muaj xwm dab tsi, peb yuav tau ntsia ntsoov kev. Zoo ib yam li ntawd, yog peb xav qho zaug txog tej yam peb ua yuam kev yav tas los kom nco ntsoov tsis txhob rov mus ua dua kuj yog ib qho zoo. Tiam sis yog peb pheej xav ntsoov txog tej peb ua yuam kev xwb ces peb lub siab yuav nkaug peb tsis so ces peb yuav ua tsis taus Yehauvas tes hauj lwm. Yog li ntawd, cia peb ntsia ntsoov txoj kev tom hauv ntej vim peb tab tom taug txoj kev uas coj peb mus tau txoj sia hauv lub qab ntuj tshiab uas Vajtswv cog tseg. Thaum txog lub sij hawm ntawd, peb “yuav tsis nco txog tej uas twb muaj tas los lawm.”​—Yaxayas 65:17; Pajlug 4:25.

TSIS TXHOB CIA LUB SIAB YUAM PEB

17. Vim li cas peb yuav tau ntseeg tias Yehauvas hlub thiab zam tau peb lub txim?

¹⁷ Tsis txhob cia peb lub siab yuam peb tias Yehauvas tsis hlub peb thiab tsis zam peb lub txim vim Xatas yeej tsis tso peb tseg yooj yim thiab nws yuav haub ntxias tias Yehauvas tsis hlub peb thiab tsis zam peb lub txim. (1 Yauhas 3:19) Xatas lub zeem muag yog kom peb tso Yehauvas tseg. Nws yuav yim huab ua heev tshaj rau peb vim nws paub tias nws lub sij hawm tag zuj zus lawm. (Tshwmsim 12:12) Peb yuav tau kam tiag, tsis txhob swb rau nws!

18. Koj yuav ua li cas koj thiaj ntseeg tias Yehauvas hlub thiab zam koj lub txim?

¹⁸ Yuav kom koj tso siab plhuav tias Yehauvas hlub koj ces koj yuav tau ua raws li hais hauv zaj kawm tag los lawm. Hos yog koj xav paub seb Yehauvas puas zam koj lub txim ces koj yuav tau ua raws li zaj kawm no qhia. Xws li xav txog tej uas Yehauvas hais txog nws tus kheej. Ua zoo xav seb nyob hauv phau Vajlugkub qhia txog Yehauvas txoj kev zam txim li cas. Nco ntsoov tias Yehauvas yeej paub tias koj yog noob txaug neeg txhaum. Thiab thaum Yehauvas zam koj lub txim lawm, nws yeej zam tag du lug. Yog koj ua li no ces koj yuav hais tib yam li Daviv tias, “Ua tsaug Yehauvas vim ‘koj zam tagnrho kuv tej kev txhaum huv tibsi mus’!”​—Phau Ntawv Nkauj 32:5.